1. Cosa puede hace si Jehova para cumpli de suyu proposito?

SI Jehova puede queda maskin cosa que necesita para cumpli de suyu proposito. Por ejemplo, ele ya queda un Maestro, un Tata quien ta dale comforta y ya queda un Evangelizador. Cuanto lang este na manada cosas que puede le queda. (Isa. 48:17; 2 Cor. 7:6; Gal. 3:8) Pero mas mucho, ta usa le maga gente para cumpli de suyu maga proposito. (Mat. 24:14; 28:19, 20; 2 Cor. 1:3, 4) Puede tambien si Jehova dale kanaton sabeduria y fuerza que necesita kita para cumpli el de suyu voluntad. Este ta dale mira si cosa quierre decir del nombre de Jehova, como cosa ya habla el cuanto maga scholar.

2. (a) Porque tiene vez tan duda kita si ta usa ba kanaton si Jehova? (b) Cosa kita considera na este articulo?

² Todo kita quierre que usa kanaton si Jehova, pero el cuanto tan duda si ta usa ba kanila si Jehova. Porque? Cay ta sinti sila que limitao ya sila por causa na diila edad, circumstancia o abilidad. Pero el otro, conforme ya na cosa sila ta puede hace poreso gendeh sila ta puede mira que necesita sila hace mas para progresa. Na este articulo, hay discuti kita si paquemodo si Jehova puede dale el cosa kita necesita para cumpli de suyu proposito. Despues, examina kita maga ejemplo na Biblia si paquemodo si Jehova ta dale con el de suyu maga siervo​—hombre man o mujer—​el deseo y fuerza para actua. Y na uliji, considera kita si cosa kita hace para usa kanaton si Jehova.

3. Como cosa ya menciona na Filipo 2:13, paquemodo kanaton dale si Jehova el deseo para actua?

³ Le con el Filipo 2:13. * Si Jehova puede dale kanaton el deseo para actua. Paquemodo le se hace? Por ejemplo, posible ya sabe kita que tiene necesidad na congregacion. O ya le un carta el maga anciano estaba na branch office que ta necesita ayuda na otro teritorio. Puede kita pregunta na diaton mismo cuerpo, ‘Cosa yo puede hace para ayuda?’ O baka ya ricibi kita un dificil assignment pero no sabe kita si puede ba kita hace con este enbuenamente. O despues le cuanto versiculo na Biblia, baka pensa kita, ‘Paquemodo yo aplica con este para ayuda con otro?’ Si Jehova gendeh ta forza kanaton hace maskin cosa. Pero si ta puede le mira que ta pensa kita si cosa kita puede hace, dale le kanaton el deseo para hace con ese.

4. Paquemodo kanaton puede dale si Jehova el fuerza para actua?

⁴ Si Jehova puede tambien dale kanaton fuerza para actua. (Isa. 40:29) Puede le dale de suyu sagrao espiritu para progresa pa el diaton maga abilidad. (Ex. 35:30-35) Puede usa si Jehova con el de suyu organizacion para enseña kanaton si paquemodo hace con el diaton assignment. Si gendeh tu asigurao si paquemodo hace con el un assignment, pidi ayuda. Y puede tambien kita pidi maskin cuando con “el grande poder ta sale con el Dios.” (2 Cor. 4:7; Luc. 11:13) El Biblia ta contene manada ejemplo si paquemodo ta dale si Jehova con el maga hombre y mujer el deseo y el fuerza para actua. Mientras ta discuti kita cuanto maga ejemplo, pensa si paquemodo si Jehova puede tambien usa contigo.

5. Cosa kita puede aprende na manera si paquemodo y cuando si Jehova ya usa con Moises para salva De Suyu maga siervo?

⁵ Ya usa si Jehova con Moises para salva con el maga Israelita. Pero, cuando ya usa si Jehova con ele? Aquel ba tiempo cuando ya sinti le cualificao despues con ele enseña “todo el saber del Egipto”? (Act. 7:22-25) Gendeh, sino ya usa con Moises despues pa con ele ayuda si Jehova queda humilde y calmao persona. (Act. 7:30, 34-36) Ya dale si Jehova con Moises el coraje para converza con el bien poderoso lider na Egipto. (Ex. 9:13-19) Cosa kita puede aprende na manera si paquemodo y cuando si Jehova ya usa con Moises? Ta usa si Jehova con aquellos quien ta pricura imita de suyu maga calidad y quien ta confia con ele para tiene fuerza.​—Fil. 4:13.

6. Cosa kita ya aprende na manera si paquemodo si Jehova ya usa con Barzilai para ayuda con Rey David?

⁶ Cuanto siglo ya pasa, si Jehova ya usa con Barzilai para ayuda con Rey David. Si David y el de suyu maga uban “con hambre, cansao y con sequia” cuando ta escapa con Absalom, el anak de David. Na este tiempo, viejo ya si Barzilai pero ele y el de suyu maga uban ya pone na peligro con el diila vida para dale el necesidad de David y del de suyu maga uban. Nuay pensa si Barzilai que gendeh mas con ele puede usa si Jehova cay de edad ya le. Sino, ya dale le el cosa le tiene para ayuda con el maga siervo del Dios. (2 Sam. 17:27-29) Cosa leccion kita puede saca aqui? Maskin cosa pa el diaton edad, si Jehova puede usa kanaton para dale el necesidad del diaton maga hermano y hermana  quien ta queda cerca kanaton o na otro lugar. (Prov. 3:27, 28; 19:17) Maskin gendeh kita puede ayuda kanila directamente, puede kita dale contribucion para ayuda kanila maskin onde y maskin cuando este necesita.​—2 Cor. 8:14, 15; 9:11.

7. Paquemodo ya usa si Jehova con Simeon y paquemodo este puede anima kanaton?

⁷ Ya promete si Jehova con Simeon, un leal y de edad hombre na Jerusalem, que puede le mira con el Mesias antes le muri. Este promesa asigurao ya puede gayot anima con Simeon, ciendo largo tiempo ya le ta espera con el Mesias. Ya premia si Jehova con Simeon por causa na de suyu fe y cay ya continua le aguanta. Un dia, bajo na guia del sagrao espiritu, ya anda le na templo. Ya puede le mira alla con el bata, si Jesus. Y si Jehova ya usa con Simeon para dale profecia acerca con este bata quien queda el Cristo. (Luc. 2:25-35) Maskin pa posible ya muri si Simeon antes principia si Jesus con el de suyu ministerio, alegre si Simeon cay ya usa con ele si Jehova na ansina manera. Y tiene le maga buen cosas que puede esperanza! Na nuevo mundo, si Simeon puede mira si paquemodo el rulanza de Jesus lleva bendicion na todo familia na tierra. (Gen. 22:18) Kita tambien ta rindi gracias con Jehova na maskin cosa privilegio que ta dale le kanaton.

8. Paquemodo kanaton puede usa si Jehova igual na cosa le ya hace con Bernabe?

⁸ Del primer siglo C.E., el un bondadoso gente que si Jose ya conforma que usa con ele si Jehova. (Act. 4:36, 37) Posible, bien efectivo dale animo si Jose poreso el maga apostoles ya llama con ele Bernabe que quierre decir “quien ta dale animo.” Por ejemplo, despues queda Cristiano si Saul, manada del maga hermano y hermana el tiene miedo atraca con ele cay ya persigui le de antes con el maga congregacion. Pero, si Bernabe ya anima y ya ayuda con Saul y asigurao ya aprecia gayot este si Saul. (Act. 9:21, 26-28) Na uliji, el maga anciano na Jerusalem quierre anima con el maga hermano y hermana quien ta queda na lejos lugar igual como na Antioquia de Siria. Con quien sila ya imbia? Con Bernabe! Justo gayot el diila decision. Asegun na Biblia, “ya conseja [si Bernabe] con el maga gente que necesita gayot sila man fiel con Dios con todo corazon.” (Act. 11:22-24, El Nuevo Testamento) Na igual manera, si Jehova puede tambien ayuda kanaton para anima con el diaton maga hermano y hermana ahora. Por ejemplo, puede le usa kanaton para anima y dale comforta con aquellos quien tiene familia que ya muri. O puede le manda move kanaton para visita o llama con el un enfermo o quien yan depress para habla kanila maga buen palabra. Igual con Bernabe, permiti ba tu que usa contigo si Jehova?​—1 Tes. 5:14.

9. Cosa kita puede aprende na manera si paquemodo ya ayuda si Jehova con el un hermano queda un buen anciano?

⁹ Ya ayuda si Jehova con el un hermano que si Vasily para queda un cualificao espiritual pastor. Cuando ya queda anciano si Vasily na edad de 26, ya tiene le miedo que gendeh le cualificao ayuda con el congregacion, especialmente con aquellos quien ta experiencia dificultad. Pero, ya puede le ricibi training estaba na maga experienciao anciano y na Kingdom Ministry School. Ya hace le el todo lo que puede para progresa. Por ejemplo, ya lista le maga diutay goal que puede le hace. Cuando ya puede le hace cada uno de este, hinay-hinay ya perde de suyu miedo. Ele ya habla: “El cosa que ta tiene yo miedo de antes,  ta dale conmigo alegria ahora. Si ta puede yo incuntra justo texto para dale comforta na un hermano o hermana na congregacion na ayuda de Jehova, ta dale este conmigo grande alegria.” Maga hermano, si imita ustedes con Vasily y conforma manda usa con Jehova, puede le dale con ustedes el abilidad para hace pa mas na congregacion.

10. Cosa ya hace si Abigail y cosa tu ya puede aprende na de suyu ejemplo?

¹⁰ Necesita ayuda si David y de suyu maga soldao cay ta hace kanila apas si Rey Saul. El maga soldao de David ya pidi poco comida con el rico Israelita que si Nabal. Ya sinti sila que puede sila pidi comida ciendo ta protege sila con el maga carnero de Nabal na desierto. Pero nuay kanila cosa ya dale si Nabal. Ya rabia si David y quierre le mata con Nabal y con el todo hombre na de suyu familia. (1 Sam. 25:3-13, 22) Pero el mujer de Nabal, si Abigail, gendeh lang bonita sino tiene tambien hondo entendimiento. Ya dale le mira grande coraje cuando ya hinca le enfrente de David y ya habla con ele que no man balus para gendeh le tiene culpa de sangre. Con respeto le ya habla con David que confia na ayuda de Jehova. Tiene efecto na corazon de David el humilde palabra y buen conducta de Abigail. Poreso, ya puede le realiza que ya imbia si Jehova con Abigail. (1 Sam. 25:23-28, 32-34) Ya cultiva si Abigail maga buen calidad poreso ya puede con ele usa si Jehova. Na igual manera, puede usa si Jehova con el maga hermana quien ta converza con respeto y tiene hondo entendimiento para hace fuerte con el diila familia y con otro na congregacion.​—Prov. 24:3; Tito 2:3-5.

11. Cosa ya hace el maga anak mujer de Salum y quien ta imita kanila ahora?

¹¹ Manada siglo el ya pasa, ya usa si Jehova con el maga anak mujer de Salum para ayuda compone con el maga pader del Jerusalem. (Neh. 2:20; 3:12) Maskin pa si Salum un principe, conforme el de suyu maga anak mujer hace este dificil y peligroso trabajo. (Neh. 4:15-18) Gendeh sila igual con el maga prominente Tekoita hombre quien “gendeh humilde y nuay ayuda na trabajo.” (Neh. 3:5) Imagina el alegria del maga anak mujer de Salum cuando ya completa el pader del Jerusalem adentro lang na 52 dia! (Neh. 6:15) Ahora, alegre el maga hermana participa na un especial servicio con Dios igual como construi y mentena maga facilidad que dedicao con Jehova. Necesita kita con este maga activo, ma-abilidad y leal hermana para cumpli con este trabajo.

12. Paquemodo si Jehova usa kanaton igual con Tabita?

¹² Ya manda move si Jehova con Tabita para hace “maga cosa-cosa bueno y . . . ayuda con el maga pobre” especialmente con el maga viuda. (Act. 9:36) Cay bueno le y bondadoso, manada el quien ya llura cuando ya muri le. Pero ya queda sila bien alegre cuando ya resucita con ele si apostol Pedro. (Act. 9:39-41) Cosa kita puede aprende con Tabita? Joven man kita o de edad ya, hombre o mujer, todo kita puede dale practical ayuda na diaton maga hermano y hermana.​—Heb. 13:16.

13. Paquemodo ya usa si Jehova con el un huyain hermana y cosa le ya habla?

¹³ Un huyain hermana si Ruth que quierre queda misionario. Cuando bata pa le, ta anda le casa en casa para dale tract na maga gente. “Alegre yo hace con este trabajo,” ele ya habla. Pero, bien dificil para con ele converza na maga gente acerca na Reino del Dios. Maskin  huyain si Ruth, ya queda le un regular pioneer na edad de 18. Del 1946, ya atende le na Watchtower Bible School of Gilead y na uliji, ya sirvi le na Hawaii y na Japan. Ya usa con ele si Jehova para predica con el buen noticia na ese maga nacion. Despues del cerca 80 año na ministerio, si Ruth ya habla: “Si Jehova pirmi ta dale fuerza conmigo. Ya ayuda le conmigo quita con el de mio pagka-huyain. Convincido yo que si Jehova puede usa maskin con quien que ta confia con ele.”

14. Asegun na Colosa 1:29, cosa kita debe hace para usa kanaton si Jehova?

¹⁴ Desde antes, ta usa si Jehova con el de suyu maga siervo na manada manera. Na cosa manera le usa contigo? Ta depende se na esfuerzo que ta hace tu. (Le con el Colosa 1:29.) Si conforma tu usa contigo si Jehova, puede le hace contigo un activo evangelizador, efectivo maestro, un persona que bueno dale comforta, buen trabajador, amable amigo o maskin cosa le quierre para cumpli de suyu voluntad.

15. Asegun na 1 Timoteo 4:12, 15, cosa debe pidi el maga joven hermano con Jehova?

¹⁵ Quetal ustedes maga joven hermano quien cerca ya queda adulto? Necesita con el maga hombre que mafuerza pa para ayuda na congregacion como maga siervo ministerial. Na manada congregacion, mas mucho anciano contra na siervo ministerial. Maga joven hermano, puede ba ustedes cultiva el deseo que hace pa mas na congregacion? Tiene vez el cuanto hermano ta habla, “Alegre ya yo sirvi como un publisher.” Si ansina tu ta sinti, pidi con Jehova que ayuda contigo cultiva el deseo para sirvi como un siervo ministerial y dale contigo el abilidad para hace maskin cosa tu puede para sirvi con ele. (Ecl. 12:1) Necesita kame de tuyu ayuda!​—Le con el 1 Timoteo 4:12, 15.

16. Cosa kita debe pidi con Jehova y porque?

¹⁶ Si Jehova puede hace contigo maskin cosa que necesita para cumpli de suyu voluntad. Poreso, pidi con ele el deseo para hace el de suyu trabajo y despues, pidi con ele el fuerza que necesita tu. Joven man tu o de edad, usa de tuyu tiempo, fuerza y otro pa cosas para honra con Jehova ahora. (Ecl. 9:10) Si ya dale contigo precioso oportunidad para hace pa mas na servicio con Jehova, no dayun pensa que gendeh tu puede hace con ese. Un grande privilegio que hace el maskin cosa para puede dale honor con el diaton amable Tata!