Para cumpli con el diila assignment, el maga Estudiante del Biblia necesita queda animoso. Necesita sila proclama con el “buen noticia” na maga sumiso pati “el dia del vengganza” na maga malo.

Si Hermano J. H. Hoskin, quien ta queda na Canada, animoso ya predica del 1921 maskin pa na maga oposicion. Ya puede le conoce con el un Methodist ministro. Ya principia si Hermano Hoskin con el diila istoria por medio na maga palabra: “Debe man cuento lang kita enbuenamente acerca na Biblia y maskin pa gendeh kita man uyun na cuanto cosa, puede kita termina enbuenamente con el diaton istoria y esta siempre man amigo.” Pero, nuay se sucede. Ya cunta si Hermano Hoskin: “Cuanto minuto lang kame ya puede man cuento cuando [el ministro] ya hace bagsak con el puerta y pensaba yo hay cae el grande espejo na piso.”

“Con el maga gendeh Cristiano ya lang tu anda man cuento,” ya grita el ministro. Nuay contesta si Hermano Hoskin pero mientras ta sale le, ya pensa le, ‘Dol yan cuento ya yo na uno nuevo lang!’

Cuando ya dale sermon el ministro pagka-alamañana, ya habla le maga falso istoria acerca con Hermano Hoskin. “Ya habla le con el maga gente que iyo el de con todo imbustero gente quien ya anda na aquel lugar y debe conmigo tira,” ya acorda si Hermano Hoskin. Maskin pa con ese, con animo le ya predica y ya tiene le buen exito. Ele ya habla: “Bien alegre gayot iyo na de mio predicacion alla. Gane, el cuanto maga gente ya habla, ‘Sabe yo que imbiao tu del Dios!’ y ya ofrece sila que dale el maga cosas que necesita yo.”

Para ayuda progresa con el maga interesao, el maga Estudiante del Biblia ya produci maga programa para na estudiada del Biblia na The Golden Age. * Tiene este maga pregunta que base na Biblia para na maga jovenes que puede discuti el maga mayores na diila maga anak. El maga mayores hay “pregunta este na diila maga anak y ayuda kanila para busca el contestacion na Biblia.” El cuanto maga pregunta, igual como “Cuanto libro tiene el Biblia?,” ta enseña maga  simple verdad. El otro, igual como, “Debe ba expecta el cada verdadero Cristiano que hay persigui kanila?,” ta ayuda con el maga jovenes para queda animoso predicador.

Tiene tambien maga pregunta que base na Biblia para con aquellos quien manada ya sabe na Biblia. El contestacion puede incuntra na primer libro del Studies in the Scriptures. Miles el quien ya puede beneficia con ese maga programa pero el The Golden Age del Deciembre 21, 1921, ya habla que este maga programa gendeh mas continua. Porque gendeh ya?

Ya puede realiza aquellos quien ta guia que el maga nuevo estudiante del Biblia necesita aprende con el maga simple verdad na sistematico manera. Por causa de ese, yan release con el libro The Harp of God del Noviembre 1921. El maga interesao persona quien ya acepta con el libro ya participa tambien na un estudiada del Biblia que puede sila hace solo-solo. Este estudiada ya ayuda kanila para aprende acerca na “proposito del Dios que dale vida hasta para cuando con el maga gente.” Paquemodo este ta hace?

Si el un persona ya acepta un copia del libro, hay ricibi le un diutay card que ta habla con ele si cosa pagina para le na libro. Pagka-sunod semana, hay ricibi le un card que tiene maga pregunta base na cosa le ya le. Na ultimo parte de ese card, puede le mira si cosa ele le para na sunod semana.

Cada semana por 12 semana, hay ricibi el estudiante un nuevo card que ya imbia el un local congregacion. Mas manada, el maga de edad o aquellos quien tiene limitao circumstancia na congregacion amo el quien ta imbia con ese maga card. Por ejemplo, si Anna K. Gardner, de Millvale, Pennsylvania, U.S.A., ya acorda: “Cuando yan release con el The Harp of God, ya queda ocupao si Thayle, el de mio hermana quien tan dificil camina, cay ele el quien ta imbia con el maga card de pregunta cada semana.” Si ya acaba ya el estudiante contesta con el todo pregunta, personal hay visita con ele para puede pa le aprende mas acerca na Biblia.

Na fin del año, si Hermano J. F. Rutherford ya imbia un carta para na todo congregacion. Ya nota le que “el predicacion del Reino na este año mas ya puede alcanza y mas ya puede ayuda con el mas manada gente compara del maga ya pasa año.” Despues, ya omenta le: “Bien manada trabajo pa el necesita cumpli. Anima con otro que man junto na este bonito trabajo.” Claro gayot que el maga Estudiante del Biblia ya sigui con ese consejo. Del año 1922, mas con coraje sila ya predica acerca con el Reino compara de antes.