1-2. Cosa el diferencia de Ajab y Manases, y cosa maga pregunta kita hay considera?

HAY discuti kita con el dos rey quien ya vivi na tiempo del Biblia. El uno ya rula na reino del diez tribo de Israel y el otro na reino del dos tribo de Juda. Maskin pa ya vivi sila na diferente tiempo, manada cosa comon kanila. Yan rebelde sila con Jehova y ya causa con el maga gente para comete culpa. Ya adora sila na falso dios y ya mata gente. Pero, tiene cosa diferente con este dos gente. El uno kanila ya continua hace mal cosas hasta ya muri le. Pero, el otro ya arripinti y ya perdona con el de suyu maga mal trabajo. Quien este sila?

² El diila nombre amo si Ajab, el rey de Israel, y si Manases, el rey de Juda. El diferencia de este dos gente puede enseña kanaton acerca na un bien importante cosa—el arripintimiento. (Act. 17:30; Roma 3:23) Cosa el arripintimiento y paquemodo kita con este dale mira? Necesita kita con este sabe cay quierre kita que perdona kanaton si Jehova si ta puede kita comete culpa. Para sabe el contestacion na este maga pregunta, hay examina kita con el vida de este dos rey y mira si cosa kita puede aprende na diila ejemplo. Despues, hay considera kita si cosa ya enseña si Jesus acerca na arripintimiento.

3. Cosa clase de rey si Ajab?

³ Si Ajab amo el ika-siete rey na reino del diez tribo de Israel. Ya casa le con Jesabel, el anak del rey de Sidon, un rico nacion na norte. Cay ya casa si Ajab con Jesabel, manada oportunidad el Israel para hace sen. Pero por causa con este, mas ya queda malo el relacion del nacion con Jehova. Ta adora con Baal si Jesabel y ya causa le con Ajab para hace calayat con este umalin religion que ta inclui el prostitucion na templo y maskin el maga sacrificio de maga anak. Cuando reyna si  Jesabel, na peligro el vida del todo maga profeta de Jehova. Ya mata le con el manada kanila. (1 Rey 18:13) Si Ajab “mas malo na vista de Jehova contra na todo quien yan una con ele.” (1 Rey 16:30) Ya puede mira si Jehova con el cosa ya hace si Ajab y Jesabel. Pero por causa na lastima de Jehova, ya imbia le con profeta Elias para dale aviso con el De Suyu maga siervo que cambia con el diila manera de vida mientras gendeh pa atrasao. Pero, nuay oi si Ajab y Jesabel.

4. Cosa el juzgamiento con Ajab y cosa el de suyu reaccion?

⁴ Nuay dura, ya llega ya el tiempo de Jehova para actua. Ya imbia le con Elias para habla el De Suyu juzgamiento con Ajab y Jesabel. Hay mata con el diila entero familia. Ya hace gayot triste con Ajab el cosa ya habla si Elias. Despues, este arogante gente “ya queda humilde.”—1 Rey 21:19-29.

5-6. Porque kita puede habla que nuay deverasan arripinti si Ajab?

⁵ Maskin pa ya queda humilde si Ajab na aquel ocasion, el de suyu conducta ta dale mira que nuay le deverasan arripinti. Nuay le pricura quita con el falso adoranza na de suyu reino. Y nuay le anima con otro para adora con Jehova. Puera con ese, tiene tambien otro cosa ya hace si Ajab que ta dale mira que gendeh le deverasan ta arripinti.

⁶ Nuay dura, cuando ya invita si Ajab con el buen rey de Juda que si Josafat que man junto con ele na guerra contra con el maga Siriano, ya pidi si Josafat que consulta anay na un profeta de Jehova. Del primero, nuay conforma si Ajab y ya habla: “Tiene pa un gente con quien kita puede atraca para pregunta con Jehova; pero ta odia yo con ele cay gendeh bueno el cosa le ta predicta acerca conmigo sino pirmi malo.” Maskin pa ansina, ya pregunta siempre sila con profeta Micaias. Justo si Ajab. Mal noticia el cosa ya predicta el profeta del Dios! En vez de arripinti y pidi el perdon de Jehova, ya pone na preso si Ajab con ese profeta. (1 Rey 22:7-9, 23, 27) Maskin pa ya puede pone na preso el rey con el profeta de Jehova, gendeh le puede sangga que cumpli el profecia. Na siguiente guerra, ya muri si Ajab.—1 Rey 22:34-38.

7. Cosa el mirada de Jehova con Ajab despues este muri?

⁷ Despues muri si Ajab, ya revela si Jehova si cosa el de suyu mirada con ese gente. Cuando ya puede bolbe el buen rey que si Josafat, ya imbia si Jehova con profeta Jehu para regaña con ele cay yan alianza le con Ajab. El profeta de Jehova ya habla: “Justo ba que ayuda tu con el maga malo y ama con aquellos quien ta odia con Jehova?” (2 Cron. 19:1, 2) Considera este: Si deverasan ya arripinti si Ajab, asigurao gendeh llama el profeta con ele como un mal gente quien ta odia con Jehova. Claro que maskin pa yan triste si Ajab na cosa le ya hace, nuay le completamente arripinti.

8. Cosa kita puede aprende acerca na arripintimiento na ejemplo de Ajab?

⁸ Cosa kita puede aprende na ejemplo de Ajab? Cuando ya oi le con el mensaje de Elias que hay castiga con el de suyu familia, ya queda humilde si Ajab del primero. Bueno el cosa le ya hace. Pero, el de suyu maga trabajo na uliji ta dale mira que gendeh le con todo corazon ya arripinti. Entonces, el arripintimiento gendeh lang quierre decir que basta sinti triste por cuanto tiempo. Considera kita con el otro ejemplo para ayuda kanaton entende si cosa quierre decir que deverasan arripinti.

9. Cosa clase de rey si Manases?

⁹ Maga dos siglo despues, ya queda rey si Manases del Juda. Gane, posible que mas grabe el  de suyu culpa que con Ajab! Puede kita le: “Bien manada le mal cosas ya hace na vista de Jehova para manda con ele rabia.” (2 Cron. 33:1-9) Ya hace si Manases maga altar para na maga pagano dios y ya hace pa gane le un imagen de sagrao arigui na sagrao templo de Jehova. Este sagrao arigui posible ta representa con el adoranza na sexo. Ya practica le magica, adivinacion y salamanca. Ya mata le manada gente. Gane, “ya hace le pasa con el de suyu mismo maga anak na fuego” como un sacrificio na maga falso dios.—2 Rey 21:6, 7, 10, 11, 16.

10. Paquemodo ya disciplina si Jehova con Manases y cosa el reaccion del rey?

¹⁰ Igual con Ajab, ya ignora si Manases con el maga aviso que ya dale si Jehova con ele por medio del De Suyu maga profeta. Na uliji, “ya lleva si Jehova contra [con el Juda] el maga jefe del maga soldao del rey de Asiria y ya cuji sila con Manases con maga gancho y ya amarra con ele con dos cadena de bronce y ya lleva na Babilonia.” Alla, mientras preso na Babilonia, posible ya pensa enbuenamente si Manases con el cosa le ya hace. Y “ya continua le queda humilde adelante del Dios del de suyu maga tatarabuelo.” Pero, mas pa el cosa le ya hace. “Ya suplica le con el de suyu Dios si Jehova.” Gane, si Manases ‘ya continua reza con Ele.’ Ese mal gente ta cambia ya. Ya principia le mira con Jehova como “de suyu Dios” y ya continua suplica con ele.—2 Cron. 33:10-13.

11. Asegun na 2 Cronicas 33:15, 16, paquemodo ya dale mira si Manases que deverasan le ya arripinti?

¹¹ Ya llega el tiempo, ya contesta si Jehova con el maga rezo de Manases. Ya puede le mira que deverasan ya cambia si Manases, como cosa puede mira na de suyu maga rezo. Poreso, ya oi si Jehova con el rezo de Manases y ya hace bira con ele na trono. Ya hace si Manases el todo para dale mira que deverasan le ya arripinti. Ya hace le el cosa nuay hace si Ajab. Ya cambia le con el de suyu conducta. Ya pricura le quita con el falso adoranza y hace bira con el puro adoranza. (Le con el 2 Cronicas 33:15, 16.) Asigurao necesita quel fe y coraje cay un mal influencia si Manases para na de suyu familia, de suyu maga uban na palacio y con el maga gente por manada año. Pero ahora, na de suyu ultimo maga año, ya pricura si Manases compone con el maga problema que ya causa le. Posible, un buen influencia le con el de suyu apu, si Josias, quien na uliji ya queda un buen rey.—2 Rey 22:1, 2.

12. Cosa kita puede aprende na ejemplo de Manases acerca na arripintimiento?

¹² Cosa kita puede aprende na ejemplo de Manases? Puera que ya queda le humilde, tiene pa le cosa ya hace. Ya reza le que dale con ele mira lastima. Y ya cambia le con el de suyu manera de vida. Ya hace le esfuerzo para compone con el kamali que ya causa le y ya hace le el todo para adora con Jehova y ya ayuda con otro para hace tambien ansina. El ejemplo de  Manases puede ayuda con aquellos quien ya hace serioso culpa. El de suyu experiencia ta dale prueba que “bueno y preparao para perdona” si Dios Jehova. (Sal. 86:5) Puede perdona con el un persona—si deverasan le ta arripinti.

13. Ilustra un importante leccion acerca na arripintimiento.

¹³ Gendeh lang basta ya sinti triste si Manases na maga culpa que ya hace le. Ta enseña este kanaton un importante leccion acerca na arripintimiento. Considera con el un ilustracion: Ya anda tu na bakery y ya cumpra un cake. Pero en vez de dale contigo cake, ya dale sila contigo huevos. Hay conforma ba tu? Siempre gendeh! Pero, quetal si ya explica sila que el huevos amo un importante ingrediente del cake? Hay conforma ya ba tu? Gendeh siempre! Na igual manera, ta pidi si Jehova que deverasan arripinti el un persona quien ya comete culpa. Si ese persona ta sinti triste na culpa que ya hace le, bueno se. Ese sentido amo un importante parte del arripintimiento pero gendeh se bastante. Cosa pa otro el debe le hace? Manada kita cosa puede aprende na istoria que ya relata si Jesus.

14. Na ilustracion de Jesus, paquemodo el perdido anak ya dale mira con el maga primer señal que ya arripinti le?

¹⁴ Ya cunta si Jesus un istoria acerca na un perdido anak que puede le na Lucas 15:11-32. El joven hombre yan rebelde contra con el de suyu tata, ya sale na casa y ya anda “para na un nacion lejos.” Alla, ya vivi le un imoral vida. Pero cuando yan dificil el de suyu vida, ya principia le pensa acerca na cosa le ya hace. Ya realiza le que mas enbuenamente el de suyu vida cuando junto le con el de suyu tata. Si Jesus ya habla que el hombre ‘ya puede pensa na su corazon.’ Ya decidi le que bolbe kanila y pidi perdon con el de suyu tata. Importante para con el anak que realiza que ya hace le manada mal decision. Pero, bastante ya ba se? Gendeh. Necesita le hace accion!

15. Paquemodo ya dale mira el perdido anak que deverasan le ya arripinti?

¹⁵ Ya dale mira sincero arripintimiento el perdido anak na cosa le ya hace. Ya viaja le largo distancia para bolbe kanila. Despues, cuando ya atraca le con el de suyu tata, ya habla le: “Ya peca yo contra con el cielo y contra con uste. Gendeh mas conviene llama conmigo el de uste anak.” (Luc. 15:21) El cosa ya habla el joven hombre ta revela que quierre le compone con el de suyu relacion con Jehova. Sabe tambien le que el de suyu maga accion ya hace sinti duele con el de suyu tata. Y preparao le hace el todo para ganá otravez con el favor del de suyu tata. Gane para puede se hace, preparao le queda igual na uno del maga trabajador del de suyu tata. (Luc. 15:19) Este ilustracion gendeh lang un istoria que ta puede anima kanaton. Este istoria puede gayot ayuda con el maga anciano.  Puede este ayuda kanila si ta pricura sila determina si deverasan ba ya arripinti el un persona quien ya comete un serioso culpa.

16. Porque posible dificil para na maga anciano sabe si deverasan ba ta arripinti el un persona?

¹⁶ Gendeh facil para na maga anciano que determina si deverasan ba ya arripinti el un persona quien ya comete un serioso culpa. Porque? Gendeh ta puede le corazon el maga anciano poreso ta pricura sila busca evidencia que el diila hermano deverasan ta odia con el cosa le ya hace. Na cuanto maga caso, posible bien grabe el culpa que ya hace el un persona poreso el maga anciano quien ya agarra con ese posible gendeh convincido que deverasan le ta arripinti.

17. (a) Cosa ejemplo ta dale mira que gendeh bastante el tristeza para demonstra deverasan arripintimiento? (b) Como cosa ya menciona na 2 Corinto 7:11, cosa debe dale mira el un persona quien deverasan ta arripinti?

¹⁷ Considera un ejemplo. El un hermano manada beses ya comete adulterio por cuanto año. En vez de pidi ayuda, ya esconde le con el de suyu imoral conducta na de suyu mujer, maga amigo y na maga anciano. Na uliji, ya gole con ele. Cuando ya dale con ele mira el maga evidencia, ya admiti le con el cosa le ya hace y gane dol ta sinti gayot le triste. Bastante ya ba se? Asigurao, mas pa con ese el cosa necesita mira el maga anciano. Gendeh este un kamali que una vez lang ya sucede sino un serioso culpa que ya hace por cuanto año. Gendeh ele mismo el ya confesa sino ya gole con ele. Poreso, necesita mira evidencia el maga anciano que deverasan le ya hace cambio na de suyu pensamiento, sentido y conducta. (Le con el 2 Corinto 7:11.) Posible, necesita largo tiempo para na ese hombre que hace con el maga necesita cambio. Grande el posibilidad que hay quita con ele na Cristiano congregacion por cuanto tiempo.—1 Cor. 5:11-13; 6:9, 10.

18. Paquemodo puede dale mira el persona con quien yan disfellow que deverasan le ta arripinti y cosa el resulta?

¹⁸ Para dale mira deverasan arripintimiento, el un persona con quien yan disfellow necesita regular atende na maga miting y sigui con el maga consejo del maga anciano que regular reza y estudia con el Biblia. Hay pricura tambien le evita con el maga situacion que puede causa con ele que culpa oleh. Si hace le esfuerzo para hace bira el de suyu relacion con Jehova, puede le asigura que hay perdona gayot con ele si Jehova y hay hace con ele bira na congregacion el maga anciano. Siempre, si ta decidi acerca con el quien ya comete culpa, el maga anciano ta evalua con el cada caso depende na circumstancia y ta evita sila que juzga sobra.

19. Cosa el envuelto si deverasan ta arripinti el un persona? (Ezequiel 33:14-16)

¹⁹ Como cosa kita ya aprende, gendeh lang  bastante para na un persona quien ya comete culpa que habla que tan triste le na cosa le ya hace. Sino, debe tambien le cambia con el manera si paquemodo le ta pensa y ta sinti, y hace con el maga cosas que ta dale mira que deverasan le ta arripinti. Debe le descanza con el de suyu mal conducta y obedece otravez con el maga principio de Jehova. (Le con el Ezequiel 33:14-16.) El de con todo importante cosa que debe hace el un persona quien ya comete culpa amo que hace bira con el de suyu relacion con Jehova.

20-21. Paquemodo kita puede ayuda con el un persona quien ya comete serioso culpa?

²⁰ Ya explica si Jesus un importante parte del de suyu ministerio cuando ya habla le: “Noay Yo vene para llama con el maga gente noay culpa para arripinti, sino con el maga pecador.” (Luc. 5:32) Amo tambien se debe el diaton deseo. Pone kita que ya puede kita sabe que el diaton cerca amigo ya comete un serioso culpa. Cosa kita debe hace?

²¹ Hay pone lang kita na peligro con el diaton amigo si pricura kita esconde con el de suyu culpa. Gane, gendeh kita con ese puede hace cay ta mira si Jehova. (Prov. 5:21, 22; 28:13) Puede tu ayuda con el de tuyu amigo si habla tu con ele que quierre ayuda el maga anciano. Si no quierre confesa el de tuyu amigo na maga anciano, debe tu informa con el maga anciano acerca con ese. Si hace tu se, ta dale tu mira que deverasan tu quierre ayuda con ele. Na peligro el de suyu relacion con Jehova!

22. Cosa kita hay discuti na siguiente articulo?

²² Pero, paquemodo si el un persona ya comete un bien serioso culpa y por largo tiempo poreso el maga anciano ya decidi que debe con ele man disfellow? Quierre decir ba de ese que nuay con ele trata con lastima? Na siguiente articulo, hay discuti kita si paquemodo si Jehova ta disciplina na lastimoso manera con aquellos quien ya culpa y si paquemodo kita puede imita con ese.