1. Porque kita alegre queda uno del maga Testigo de Jehova?

BIEN alegre kita queda uno del maga Testigo de Jehova! Ta lleva kita con el nombre del Dios y ta vivi asegun na ese nombre por medio na predicacion y hacida de dicipulo. Alegre kita si ta puede kita ayuda con el un persona quien “tiene justo condicion de corazon para obtene vida eterna” que queda uno del maga siervo de Jehova. (Act. 13:48, NWT) Ta sinti kita igual con el cosa ya sinti si Jesus quien ‘ya llena de alegria’ cuando el de suyu maga dicipulo ya bira y ya habla con ele el buen resulta del diila predicacion.—Luc. 10:1, 17, 21.

2. Paquemodo kita dale mira que importante kanaton el predicacion?

² Bien importante kanaton el trabajo predicacion. Si apostol Pablo ya anima con Timoteo: “Bicia embuenamente si cosa tu ta hace y ta insiña.” Si Pablo ya omenta: “Hace firmi ansina y ay salva tu mismo y aquellos quien ta oi contigo.” (1 Tim. 4:16) Entonces, el diaton predicacion puede salva vida. Pirmi kita ta vicia si cosa kita ta hace cay bajo kita na Reino del Dios. Quierre kita pirmi actua na manera que ta dale gloria con Jehova y harmonia na buen noticia que ta predica kita. (Fil. 1:27) Ta dale kita mira que ta ‘vicia kita enbuenamente si cosa kita ta enseña’ si ta prepara kita enbuenamente na diaton ministerio y ta pidi con Jehova que bendici con el diaton esfuerzo antes kita predica con otro.

3. Hay queda ba interesao el todo na mensaje del Reino? Dale un ejemplo.

³ Maskin pa ta hace kita el diaton de con todo bueno para predica con otro, posible siempre kita incuntra maga gente quien nuay interes na buen noticia del Reino. Considera con el experiencia de Hermano Georg Lindal, quien ya predica solo-solo na Iceland principia del 1929 hasta 1947. Ya dale ele miles de publicacion pero nuay ni un persona el quien ya acepta con el verdad. Ele ya escribi: “El cuanto dol contra gayot na verdad pero el mayoria nuay lang gayot interes.” Maskin pa manada misionario quien ya gradua na Gilead el ya llega para  ayuda na trabajo, ya pasa pa nueve año antes el maga interesao de Iceland ya dedica con el diila vida con Jehova y ya bautiza. *

4. Cosa kita posible sinti si gendeh ta acepta el maga gente con el buen noticia?

⁴ Tan triste kita si gendeh ta acepta el maga gente con el buen noticia. Posible kita sinti igual con Pablo quien ya experiencia “tristeza bien grande gayot y el [de suyu] dolor gendeh ta acaba” cay el mayoria del maga Judio gendeh ta acepta con Jesus como el Mesias. (Roma 9:1-3) Paquemodo si ya hace ya tu el todo esfuerzo y ya reza acerca con ese pero el Bible study nuay siempre progresa y necesita ustedes descanza? O paquemodo si nuay pa tu tiene Bible study quien ya progresa para na bautismo? Debe ba tu man conciencia y pensa que gendeh ta bendici si Jehova con el de tuyu ministerio? Na este articulo, hay contesta kita con este dos pregunta: (1) Paquemodo determina que tiene buen exito el diaton ministerio? (2) Cosa kita debe expecta si ta predica con otro?

5. Porque posible el cosa kita ta hace para con Jehova gendeh pirmi ta sucede asegun na cosa kita quierre?

⁵ El Biblia ta habla acerca con el persona quien ta hace el voluntad del Dios: “Todo cosa le hace hay tiene buen exito.” (Sal. 1:3) Pero, gendeh este quierre decir que el todo cosa kita ta hace para con Jehova hay sucede asegun na cosa kita quierre. El diaton vida “lleno de problema” por causa na diaton mismo imperfeccion y del otro. (Job 14:1) Omento pa, aquellos quien tan contra kanaton posible sangga kanaton para predica na publico. (1 Cor. 16:9; 1 Tes. 2:18) Entonces, paquemodo si Jehova ta determina si tiene ba buen exito el diaton predicacion? Considera con el cuanto principio na Biblia que puede ayuda kanaton contesta con ese pregunta.

6. Paquemodo si Jehova ta determina que tiene buen exito el diaton trabajo para con ele?

⁶ Ta nota si Jehova con el diaton esfuerzo y ta mira que gendeh kita ta descanza. Na ojos de Jehova, tiene buen exito el diaton trabajo si con gana kita ta hace con ese y con amor, maskin cosa pa el reaccion del maga gente. Si Pablo ya escribi: “El Dios gane justo: Gendeh gayot Ele ay olvida el de ustedes maga trabajo y el amor que ya dale ustedes mira con Ele por medio del servicio que ya hace, y ta hace pa ustedes ahora, con el maga santo [“sagrao,” NWT].” (Heb. 6:10) Ta acorda si Jehova con el diaton maga esfuerzo y amor, maskin pa nuay positivo resulta el diaton esfuerzo. Entonces, aplicable kanaton el cosa ya habla si Pablo na maga de Corinto: “El de ustedes trabajo por causa del Señor gendeh ay queda sin maga fruta,” maskin pa el diaton trabajo nuay resulta asegun na cosa kita ta expecta.—1 Cor. 15:58.

7. Cosa kita puede aprende na cosa ya habla si apostol Pablo acerca na de suyu ministerio?

 ⁷ Un buen misionario si apostol Pablo y ya puede le forma maga nuevo congregacion na manada ciudad. Pero, cuando necesita le defende con el de suyu cualificacion como un ministro del Cristo, nuay le man cuento acerca si paquemodo de manada gente le ya puede ayuda para queda maga Cristiano. Sino, si Pablo ya escribi: “Mas mucho el dimio maga trabajo.” (2 Cor. 11:23) Igual con Pablo, debe kita acorda que el de con todo importante para con Jehova amo que si hace kita esfuerzo na trabajo y gendeh ta descanza.

8. Cosa kita debe acorda acerca na diaton ministerio?

⁸ Alegre si Jehova na diaton ministerio. Ya imbia si Jesus con el de suyu 70 dicipulo para predica con el mensaje del Reino y despues sila predica, “ya bira [sila] bien alegre.” Porque sila bien alegre? Sila ya habla: “Maskin el maga demonio ta somete canamon cuando ta usa came el de Uste Nombre!” Pero, ya corecta si Jesus con el cosa sila ta pensa cuando ya habla le kanila: “No ustedes alegra [o queda alegre] cay el maga espiritu ta somete con ustedes, sino alegra cay el de ustedes nombre escribido na cielo.” (Luc. 10:17-20) Sabe si Jesus que gendeh sila pirmi tiene igual ansina experiencia na diila ministerio. Gane, no sabe kita si paquemodo de manada de aquellos quien ya oi con el maga dicipulo el ya queda siervo del Dios. El maga dicipulo necesita entende que el diila alegria gendeh lang ta depende na cosa sila ya puede cumpli sino el mas importante amo cay sabe sila que ta puede sila hace alegre con Jehova por causa na diila maga esfuerzo.

9. Asegun na Galacia 6:7-9, cosa el resulta si aguanta kita na diaton ministerio?

⁹ Si aguanta kita na diaton ministerio, hay obtene kita vida hasta para cuando. Si con todo corazon kita ta siembra y ta cultiva con el similla de verdad, kita tambien “ta siembra na Espiritu” si ta permiti kita con el espiritu del Dios que guia con el diaton vida. Si gendeh kita “descansa” o “perde el animo,” ya asigura si Jehova que hay tene kita vida hasta para cuando, maskin pa nuay kita puede ayuda un nuevo dicipulo que dedica con el de suyu vida con Dios.—Le con el Galacia 6:7-9.

10. Onde ta depende el reaccion del maga gente na diaton ministerio?

¹⁰ El reaccion del maga gente ta depende na condicion del diila corazon. Si Jesus ya explica con este verdad na de suyu ilustracion acerca con el un siembrador quien ya siembra similla na diferente clase de tierra pero uno lang el ya crici y ya fruta. (Luc. 8:5-8) Si Jesus ya habla que el diferente clase de tierra ta representa con el condicion del corazon del maga gente quien ya ricibi con el “Palabra de Dios” na diferente manera. (Luc. 8:11-15) Igual con el siembrador, gendeh kita puede controla con el resulta del diaton trabajo ciendo ta depende se na condicion del corazon del quien ta oi kanaton. El diaton responsibilidad amo continua siembra con el maga similla del mensaje del Reino. Como cosa ya habla si apostol Pablo, el “cada uno diila ay recivi el disuyo pago asegun con el disuyo trabajo,” gendeh na resulta del de suyu trabajo.—1 Cor. 3:8.

11. Porque si Jehova alegre con Noe maskin nuay quien ya oi con ele? (Mira con el letrato na cover.)

¹¹ Desde antes, manada del maga siervo de Jehova el quien ya predica con el maga gente quien no quierre oi. Por ejemplo, si Noe “ya conversa por causa del justicia,” posible por cuanto decada. (2 Ped. 2:5) Asigurao, ya  esperanza le que tiene quien oi con el cosa le ta predica pero nuay habla si Jehova que sucede se. Sino cuando ya manda le con Noe que construi arca, el Dios ya habla: “Debe tu entra na arca junto con el de tuyu maga anak, de tuyu mujer y el maga mujer del de tuyu maga anak.” (Gen. 6:18) Y cuando ya habla si Jehova con el grandor y capacidad del arca, posible ya realiza si Noe que poco lang el quien oi con el cosa le predica. (Gen. 6:15) Como cosa kita sabe, nuay maskin un persona estaba na aquel violente mundo el quien ya oi con Noe. (Gen. 7:7) Ya pensa ba si Jehova que gendeh bastante el cosa ya hace si Noe? Nuay gayot! Alegre si Jehova con Noe cay fiel le ya hace con el cosa con ele ya pidi.—Gen. 6:22.

12. Paquemodo si profeta Jeremias ya tene alegria na de suyu ministerio maskin pa tiene tan contra con ele y gendeh ta oi?

¹² Si profeta Jeremias posible ya predica por cuanto decada maskin pa el maga gente tan contra con ele y gendeh ta oi. Ya queda le bien maluya cay “ya insulta y ya gangguia” con ele el maga contrario y ya pensa que descanza na de suyu assignment. (Jer. 20:8, 9) Pero, nuay descanza si Jeremias! Cosa ya puede ayuda con ele para ganá contra con el de suyu negativo pensamiento y tene alegria na de suyu ministerio? Yan focus le na dos importante verdad. Una, el mensaje del Dios que ta habla si Jeremias con el maga gente hay dale kanila “futuro y esperanza.” (Jer. 29:11) Ika-dos, ya iscuji con ele si Jehova para habla con el maga gente el De Suyu mensaje. (Jer. 15:16) Kita tambien ta lleva un mensaje de esperanza na maga gente y ta lleva kita el nombre de Jehova como el de suyu maga Testigo. Si man focus kita con este dos importante verdad, puede kita queda alegre maskin cosa pa el reaccion del maga gente.

13. Cosa kita ya aprende na ilustracion de Jesus que ya menciona na Marcos 4:26-29?

¹³ Hinay-hinay ta sucede el espiritual progreso. Ya enseña si Jesus con este verdad na de suyu ilustracion acerca con el un siembrador quien ya durmi. (Le con el Marcos 4:26-29.) Hinay-hinay puede mira con el resulta del esfuerzo del siembrador y nuay le cosa puede hace para pronto se crici. Posible necesita tambien tu espera cuanto tiempo para mira con el progreso del de tuyu Bible study. Igual con el un siembrador quien gendeh puede hace crici dayun con el de suyu siembra asegun na cosa le quierre, gendeh tambien kita puede forza con el diaton maga Bible study que hace dayun maga espiritual progreso asegun na cosa kita quierre. Poreso, no man luya o descanza si el diila progreso gendeh dayun ta sucede asegun na cosa tu ta expecta. Igual na siembrada, el hacida de dicipulo ta necesita paciencia.—Sant. 5:7, 8.

14. Cosa ejemplo ta dale mira que hinay-hinay puede mira el progreso alli na diaton ministerio?

¹⁴ Na cuanto maga lugar, necesita largo tiempo antes tiene quien hay bautiza. Considera con el dos man hermana que si Gladys y Ruby Allen con quien yan assign del 1959 como maga regular pioneer na un lugar na Canada, na provincia de Quebec. * Por causa na pressure na comunidad y na influencia del iglesia Catolico, el maga gente no quierre oi con el mensaje del Reino. Si Gladys ya acorda: “Ta anda kame na casa en casa por ocho hora na un dia adentro de dos año pero nuay kanamon quien ta oi. Ta iscucha el maga gente na puerta pero si mira sila kanamon, ta esconde sila. Pero, nuay kame descanza.” Ya llega el tiempo, ya cambia el custumbre del maga  gente y el cuanto ya principia oi con el mensaje. Ahora, tiene ya tres congregacion na ese lugar.—Isa. 60:22.

15. Cosa ta enseña el 1 Corinto 3:6, 7 acerca na trabajo de hacida de dicipulo?

¹⁵ Necesita el ayuda del manada para hace un dicipulo. Necesita un congregacion para puede ayuda con el un persona progresa para na bautismo. (Le con el 1 Corinto 3:6, 7.) El un publisher ya deja tract o magasin na un interesao persona. Pero, gendeh le puede bira na tiempo que conveniente para con ese persona poreso ya pidi le na otro hermano para hace con el return visit. Ese publisher ya puede principia un Bible study. Y despues, ya invita le cuanto maga hermano y hermana para sigui con ele man Bible study y el cada uno ta anima con ese Bible study na diferente manera. El cada hermano y hermana con quien le ya conoce hay puede ayuda para rega con el similla de verdad. Na ese manera, el todo quien ya ayuda con ese persona puede queda alegre si bautiza ya le.—Juan 4:35-38.

16. Porque tu puede queda alegre na de tuyu ministerio maskin nuay tu buen salud o limitao ya el de tuyu fuerza?

¹⁶ Paquemodo si limitao ya el cosa tu ta puede hace na predicacion y enseñada del buen noticia por causa cay nuay tu buen salud y fuerza? Puede siempre tu queda alegre cay tiene tu cosa puede contribui na trabajo para na entero mundo. Considera con el experiencia de Rey David cuando ele y el de suyu maga gente ya salva con el diila familia y maga cosas estaba na maga Amalequita. Dos cientos del de suyu maga gente el cansao ya para anda na guerra poreso ya esta sila para vicia con el diila maga bagaje. Despues sila ganá na guerra, ya manda si David que el todo cosa sila ya saca hay dividi igual-igual para na todo. (1 Sam. 30:21-25) Semejante se na diaton trabajo de hacida de dicipulo. El cada uno quien ta hace el diila de con todo bueno puede siempre queda alegre cada vez tiene quien conoce con Jehova y ta bautiza.

17. Na cosa kita debe rindi gracias con Jehova?

¹⁷ Ta rindi kita gracias con Jehova na de suyu amable manera si paquemodo le ta mira con el diaton servicio con ele. Sabe le que gendeh kita puede controla con el resulta del diaton esfuerzo. Pero, ta nota le con el diaton esfuerzo y motivo y hay premia le kanaton. Ta enseña tambien le kanaton si paquemodo queda alegre acerca na maskin cosa que ta puede kita hace na trabajo predicacion. (Juan 14:12) Puede kita asigura que tiene kita el favor del Dios si gendeh kita descanza!