1. Porque manada gente el tan libug?

MILES de religion ahora el ta clama que maga Cristiano y ta habla que ta adora sila con Dios na aceptable manera. Amo se el razon si porque manada gente el tan libug. Ta pregunta sila, “Uno lang ba el deverasan religion o el todo religion ta hace alegre con Dios?” Convincido ba gayot kita que el cosa kita ta enseña amo el verdad y el manera de adoranza que ta hace el maga Testigo de Jehova ahora amo el manera que aceptable con Jehova? Posible ba gayot que queda kita asigurao con ese? Considera kita con el maga evidencia.

2. Porque convincido si apostol Pablo con el verdad? (1 Tesalonica 1:5)

² Bien convincido si apostol Pablo na verdad. (Le con el 1 Tesalonica 1:5.) Ese conviccion gendeh base na emocion. Sino, ya estudia enbuenamente si Pablo con el Palabra del Dios. Ya creé le que “todo el maga Escritura inspirao de Dios.” (2 Tim. 3:16) Cosa le ya aprende na de suyu estudiada? Na Escritura, ya incuntra prueba si Pablo que si Jesus el Mesias—evidencia que ya iscuji ignora el maga religioso lider. Este maga gente ta clama que ta representa sila con Dios pero ta hace sila maga cosas que ta odia le. (Tito 1:16) Gendeh igual kanila, nuay lang basta iscuji si Pablo si cosa parte del Palabra del Dios le creé. Preparao le enseña y aplica con “el todo consejo del Dios.”—Act. 20:27, NWT.

3. Para queda bien convincido, debe ba kita sabe el maga contestacion na todo del diaton maga pregunta? (Mira tambien con el cajon “ El Maga Trabajo y Pensamiento de Jehova—‘Bien Manada Este.’”)

³ El cuanto ta sinti que el verdadero religion debe puede contesta con el todo pregunta, maskin el maga pregunta que nuay especifico contesta na Biblia. Razonable ba se? Considera  con el ejemplo de Pablo. Ya anima le con el maga Cristiano que “antes de hacer un cosa, pensa anay” pero ya admiti tambien le que manada cosas el nuay le entende. (1 Tes. 5:21) “El diaton saber gendeh perfecto,” ya escribi le y despues ya omenta, “kita ta mira lang igual na un espejo, gendeh claro.” (1 Cor. 13:9, 12) Nuay entende si Pablo con el todo cosas y kita tambien. Pero, ya entende si Pablo con el maga importante verdad acerca con Jehova. Bastante el cosa le sabe para queda convincido que ese el verdad!

4. Paquemodo kita hace fuerte con el diaton conviccion que ya incuntra kita el verdad y cosa kita considera acerca con el maga verdadero Cristiano?

⁴ El un manera para puede kita hace fuerte con el diaton conviccion que ya incuntra kita el verdad amo si compara kita con el manera de adoranza que ya dale mira si Jesus na cosa ta hace el maga Testigo de Jehova ahora. Na este articulo, hay mira kita que el maga verdadero Cristiano (1) ta odia con el idolatria, (2) ta respeta con el nombre de Jehova, (3) ta ama con el verdad y (4) ta ama gayot con uno y otro.

5. Cosa kita ya aprende con Jesus acerca na justo manera para adora con Dios y paquemodo kita puede aplica con el cosa le ya enseña?

⁵ Por causa na de suyu hondo amor con Dios, con Jehova lang si Jesus ya adora—cuando talla le na cielo y cuando taqui le na tierra. (Luc. 4:8) Ya enseña tambien le con el de suyu maga dicipulo que hace se. Nuay gayot usa si Jesus ni el de suyu maga dicipulo maga imagen na diila adoranza. Ciendo Espiritu el Dios, nuay maskin cosa puede hace el maga gente que ta semeja na gloria de Jehova! (Isa. 46:5) Pero, quetal el hacida de maga imagen que ta llama maga santo y reza con este? Na segundo ley del Diez Mandamiento,  si Jehova ya habla: “Gendeh tu debe hace imagen o forma igual maskin cosa que talla na cielo o aqui na tierra . . . Gendeh tu debe hinca kanila.” (Ex. 20:4, 5) Bien claro ese maga palabra con aquellos quien quierre hace alegre con Dios.

6. Cosa manera de adoranza el ta sigui el maga Testigo de Jehova ahora?

⁶ El maga gente quien ta estudia history ya habla que el maga Cristiano del primer siglo ta dale el diila exclusivo devocion con Dios. Por ejemplo, el libro History of the Christian Church ya habla que aquellos maga Cristiano “hay odia” con el idea que usa maga imagen na maga lugar de adoranza. Ahora, el maga Testigo de Jehova ta sigui con el ejemplo que ya dale mira ese maga Cristiano. Gendeh kita ta reza na maga imagen de maga “santo” o na maga angel. Gendeh gane kita ta reza maskin con Jesus. Y gendeh kita ta hace maga acto de adoranza na maga simbolo del diaton nacion. Maskin cosa pa sucede, determinao kita obedece con el maga palabra de Jesus: “Adora con el Señor [Jehova], el dituyo Dios.”—Mat. 4:10.

7. Na cosa maga manera bien diferente el maga Testigo de Jehova na otro maga religion?

⁷ Ahora, manada el quien ta sigui con el maga prominente lider de iglesia. Bien bilib sila con ese maga persona que dol ta adora ya sila con esos. Manada maga gente el ta anda na diila iglesia, ta cumpra con el diila maga libro y ta dale grande donacion kanila o na maga organizacion que ta suporta sila. El cuanto maga gente ta creé gayot con el todo cosa sila ta habla. Bien alegre mira el maga gente con este maga lider que dol con Jesus ya sila ta mira. Pero, el maga verdadero siervo de Jehova nuay maga clero. Maskin ta respeta kita con aquellos quien ta guia kanaton, ta acepta kita con el claro enseñanza de Jesus: “Todo ustedes man hermano.” (Mat. 23:8-10) Gendeh kita tan idolo con el maga gente, maga lider man sila de religion o de politica. Y gendeh kita ta suporta con el diila maga propaganda. Sino, ta esta kita neutral y separtao na mundo. Na este maga manera, ta dale kita mira que diferente kita na manada religion que ta clama Cristiano.—Juan 18:36.

8. Porque kita sabe que quierre si Jehova que dale kita gloria con el de suyu nombre y manda este sabe na todo?

⁸ Na un ocasion, si Jesus ya reza: “Tata, dale gloria con el de Uste Nombre.” Suena ya contesta si Jehova con aquel rezo estaba na cielo y ya promete le que hay santifica le con el de suyu nombre. (Juan 12:28) Na de suyu ministerio, ya dale gloria si Jesus con el nombre del de suyu Tata. (Juan 17:26) Poreso, ta sinti el maga verdadero Cristiano que un privilegio usa con el nombre del Dios y manda este sabe con otro.

9. Paquemodo ya dale mira el maga Cristiano del primer siglo que ta respeta sila con el nombre del Dios?

⁹ Del primer siglo C.E., despues lang establicia con el Cristiano congregacion, si Jehova “ya pone atencion por el primera vez con el maga hende-Judio, pati tiene di ila ya puede queda el di suyo maga siguidores.” (Act. 15:14, El Nuevo Testamento.) El maga Cristiano del primer siglo con gana ya manda sabe con otro y ya usa gayot con el nombre del Dios. El maga apostoles y maga dicipulo ya usa con el nombre del Dios cuando ya predica sila y cuando ya escribi sila con el maga libro na Biblia. * Na ese manera, ya manda sila mira que sila lang el maga gente quien ya  manda sabe con el nombre del Dios.—Act. 2:14, 21.

10. Cosa el evidencia que el maga Testigo de Jehova amo el solamente quien ta manda sabe el nombre de Jehova?

¹⁰ El maga Testigo de Jehova ba amo el solamente quien ta manda sabe con el nombre de Jehova? Considera con el evidencia. Ahora, manada maga lider de religion el ta hace el todo para esconde el verdad que el Dios tiene personal nombre. Ya quita sila con este na diila maga translation de Biblia y na cuanto situacion, ya prohibi sila usa con el nombre del Dios na diila maga iglesia. * Tiene ba quien puede nega que el maga Testigo de Jehova amo el solamente quien ta respeta y ta honra con el nombre de Jehova? Mas ta manda kita sabe con el personal nombre del Dios contra na otro religion! Ta hace kita el todo para vivi asegun na cosa ta habla na diaton nombre—kita maga Testigo de Jehova. (Isa. 43:10-12) Ya produci kita mas de 240 millon copia del New World Translation of the Holy Scriptures que ta usa con el nombre de Jehova donde ya quita el otro maga translator del Biblia. Y ta produci kita maga publicacion que base na Biblia que ta usa con el nombre de Jehova na mas de 1,000 lengguaje!

11. Paquemodo el maga Cristiano del primer siglo ya dale mira que ta ama sila con el verdad?

¹¹ Ta ama si Jesus con el verdad—el verdad acerca con Dios y na De Suyu maga proposito.  Si Jesus ya vivi harmonia con ese verdad y ya manda le sabe con ese verdad na otro. (Juan 18:37) El maga deverasan siguidores de Jesus ya ama tambien gayot con el verdad. (Juan 4:23, 24) Gane, si apostol Pedro ya refiri con el Cristianidad como “el camino del Verdad.” (2 Ped. 2:2) Por causa na diila amor na verdad, nuay acepta el maga Cristiano del primer siglo con el maga religioso idea, tradicion y maga personal opinion que gendeh harmonia na verdad. (Col. 2:8) Na igual manera, el maga verdadero Cristiano ahora ta pricura ‘vivi conforme gayot con el verdad’ y tan base con el diila creencia y diila manera de vida na Palabra de Jehova.—3 Juan 3, 4.

12. Cosa ta hace aquellos quien ta guia si ta realiza sila que necesita hace cambio na diaton entendimiento y porque sila ta hace con ese?

¹² Gendeh ta clama el maga siervo del Dios ahora que tiene sila el perfecto o completo entendimiento del verdad. Tiene vez, ta puede sila hace maga kamali na manera si paquemodo ta explica con el un enseñanza na Biblia o si paquemodo sila ta organiza con el congregacion. Gendeh mas kita debe espanta. El Biblia ta hace claro que el maga siervo de Jehova mas puede entende con el verdad mientras ta pasa el tiempo. (Col. 1:9, 10) Hinay-hinay ta manda sabe si Jehova con el verdad y debe kita con paciencia espera hasta puede kita mas entende con el verdad. (Prov. 4:18) Si el Cuerpo Gobernante ya puede realiza que necesita kita cambia con el diaton entendimiento na un especifico verdad, gendeh sila tan alang-alang hace con ese maga cambio. Manada del maga iglesia ahora el ta cambia con el diila enseñanza para lang ganá con el favor del diila maga miembro o queda cerca con el mundo. Pero, el maga Testigo de Jehova ta hace maga cambio cay quierre kita queda cerca con Dios y adora con ele igual na manera de Jesus. (Sant. 4:4) Si ta hace kita maga cambio, gendeh este por causa cay ya cambia el opinion del maga gente na mundo sino cay mas ya entende kita con el Biblia. Ta ama kita con el verdad!—1 Tes. 2:3, 4.

13. Cosa el de con todo importante calidad que ya dale mira el maga verdadero Cristiano y paquemodo se ta demonstra el maga Testigo de Jehova ahora?

¹³ Conocido con el maga Cristiano del primer siglo por causa na diila maga buen calidad pero especialmente el amor. Si Jesus ya habla: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:34, 35) El maga Testigo de Jehova ahora na entero mundo ta experiencia con el deverasan amor y unidad. Gendeh kita igual na otro organizacion cay igual kita na un familia maskin pa estaba kita na diferente nacion y cultura. Ta puede kita mira el evidencia del deverasan amor na diaton maga miting, asemblea y convencion. Ese evidencia ta hace kanaton mas convincido que ta adora kita con Jehova na manera que aceptable con ele.

14. Asegun na Colosa 3:12-14, cosa el un importante manera que puede kita dale mira que ta ama gayot kita con uno y otro?

¹⁴ Ta anima kanaton el Biblia que “ama gayot con uno y otro.” (1 Ped. 4:8) El un manera para dale mira ese amor amo si perdona kita con uno y otro, y considera con el imperfeccion del otro. Ta busca tambien kita maga oportunidad para queda bondadoso y hospitable con el todo na congregacion, maskin pa con aquellos quien ya hace sinti duele kanaton. (Le con el Colosa 3:12-14.) Si ta demonstra kita con ese amor, ta dale kita mira que deverasan kita maga Cristiano.

15. Na cosa otro maga manera ta sigui kita el manera de adoranza que ya dale mira el maga Cristiano del primer siglo?

¹⁵ Ta sigui kita el manera de adoranza que ya dale mira el Cristiano congregacion del primer siglo na otro manera tambien. Por ejemplo, organizao kita igual si paquemodo ya organiza con el maga Cristiano del primer siglo. Tiene kita maga traveling overseer, anciano y siervo ministerial. (Fil. 1:1; Tito 1:5) El diaton mirada na sexo y matrimonio, el pagka-sagrao del sangre y el diaton deseo para protege con el congregacion desde na maga quien ya comete culpa que gendeh ta arripinti amo todo base na cosa ya dale mira el maga Cristiano del primer siglo.—Act. 15:28, 29; 1 Cor. 5:11-13; 6:9, 10; Heb. 13:4.

16. Cosa kita puede aprende na Efeso 4:4-6?

¹⁶ Si Jesus ya habla que manada hay clama como de suyu maga dicipulo pero gendeh todo kanila el deverasan. (Mat. 7:21-23) Ta habla tambien kanaton el Biblia que na ultimo maga dia, manada ‘hay pretende como religioso.’ (2 Tim. 3:1, 5) Pero, claro ta habla el Biblia kanaton que “uno lang el fe” que ta aproba el Dios.—Le con el Efeso 4:4-6.

17. Quien el ta sigui ahora con Jesus y ta demonstra el solamente deverasan fe?

¹⁷ Quien ta demonstra el solamente deverasan fe ahora? Ya examina ya kita con el evidencia. Ya puede kita mira el manera de adoranza que ya enseña si Jesus y ya sigui el maga Cristiano de primer siglo. Uno lang el contestacion—el maga Testigo de Jehova. Un grande privilegio que queda uno del maga siervo de Jehova y sabe el verdad acerca con Jehova y con el de suyu maga proposito! Ojala, continua kita queda convincido que tiene kita el verdad.