CADA año, manada maga precioso carnero el ta bira na Cristiano congregacion y ta queda otravez maga Testigo de Jehova. Imagina el “alegria na cielo” si ta bira el cada uno! (Luc. 15:7, 10) Si uno tu de este maga persona, puede tu asigura que si Jesus, el maga angel y si Jehova mismo bien alegre mira contigo que queda parte otravez del congregacion. Pero mientras ta compone tu con el de tuyu amistad con Jehova, posible tu enfrenta maga dificultad. Cosa el cuanto de este y cosa el puede ayuda contigo?

Manada el tiene negativo sentido despues bira na congregacion. Posible, ta entende tu si cosa ya sinti si Rey David. Maskin despues perdona con el de suyu maga pecado, ele ya habla: “Ya tapa ya conmigo el de mio maga kamali.” (Sal. 40:12; 65:3) Despues puede bira con Jehova el un persona, posible sinti siempre le culpable o huya por manada año. Si Isabelle yan disfellow por mas de 20 año. * Ele ya habla, “Bien dificil para conmigo creé que puede conmigo perdona si Jehova.” Si tan luya tu, puede tu otravez queda mahina na espiritual. (Prov. 24:10) Pricura hace manera para gendeh se sucede contigo.

El otro tan lingasa cay baka gendeh sila puede hace el todo cosa necesita para puede hace bira con el diila relacion con Jehova. Despues le puede bira, si Antoine ya habla, “Ya sinti yo que ya ulvida yo con el todo cosa yo ta hace de antes como un Cristiano.” Por causa na ese maga sentido, el cuanto posible tan alang-alang que hace el todo para participa na maga espiritual actividad.

Para ilustra, si ya queda bien bungcao el casa del un persona por causa na un tifun, posible man luya le si ta pensa le si paquemodo de grande tiempo y esfuerzo el necesita para compone  con ese. Na igual manera, si ya queda malo el de tuyu amistad con Jehova por causa na un serioso pecado, posible tu sinti que bien grande esfuerzo el necesita tu hace para compone con ese. Pero, tiene cosa puede ayuda contigo.

Si Jehova ya invita kanaton: “Vene ustedes ahora y arregla kita el maga cosas entre kanaton.” (Isa. 1:18) Ya hace ya tu grande esfuerzo para ‘arregla con el maga cosas.’ Ta ama contigo si Jehova cay ta hace tu con ese. Pensa este: Cay ya bira tu con Jehova, puede le usa contigo como un ejemplo para dale prueba que imbustero si Satanas!—Prov. 27:11.

Cuando ya hace tu con este, ya queda ya tu mas cerca con Jehova y ta promete le que atraca tambien le contigo. (Sant. 4:8) Pero, gendeh bastante que sabe lang el otro que parte ya tu otravez del congregacion. Necesita tu continua hace fuerte con el de tuyu amor para con el de tuyu Tata y Amigo, si Jehova. Paquemodo tu puede hace con ese?

Pruba hace maga goal que puede tu alcanza. Acorda que posible fuerte siempre el de tuyu espiritual fundacion—el de tuyu saber acerca con Jehova y de suyu maga promesa acerca na futuro. Pero ahora, necesita tu otravez tiene un buen rutina. Incluido aqui que predica con el buen noticia y regular man junto con el de tuyu maga hermano y hermana. Considera con el siguiente goal.

Pirmi man cuento con Jehova. Ta entende el de tuyu Tata que si ta continua tu sinti culpable, man dificil tu man cuento con ele. (Roma 8:26) Maskin pa ansina, “reza firmi” y habla con Jehova si paquemodo tu de quierre que queda de suyu amigo. (Roma 12:12) Si Andrej ya acorda: “Ya sinti yo sobra de culpable y huya. Pero despues del cada rezo, ya menora aquel sentido. Mas ya tiene yo paz na pensamiento.” Si no sabe tu si acerca na cosa reza, considera con el maga rezo de Rey David que escribido na Salmo 51 y 65.

Regular estudia con el Biblia. Ayuda este contigo para tiene fuerte fe y hace hondo con el de tuyu amor para con Jehova. (Sal. 19:7-11) “Cay nuay yo espiritual rutina, ya queda yo maluya y ya puede hace sinti duele con Jehova,” ya habla si Felipe. “No quierre yo repiti con ese kamali poreso ya decidi yo que hace con el personal estudiada como de mio proteccion.” Puede tambien tu hace con ese. Si ta necesita tu guia si paquemodo busca buen topico para na de tuyu personal estudiada, puede tu pidi ayuda con el de tuyu mature amigo.

Hace esfuerzo para queda cerca na de tuyu maga hermano y hermana. El cuanto quien ya bira na congregacion tan lingasa que baka tiene kanila negativo mirada el otro. Si Larissa ya admiti: “Ya tiene gayot yo huya. Ya sinti yo que ya traiciona yo con el congregacion. Ese el cosa yo ya sinti por largo tiempo.” Puede tu asigura que el maga anciano y el otro maga mature hermano y hermana bien quierre ayuda contigo mientras ta compone tu con el de tuyu espiritualidad. (Mira con el cajon “ Cosa Puede Hace el Maga Anciano?”) Alegre sila que ya bira tu y quierre sila que queda tu alegre!—Prov. 17:17.

Cosa tu hace para queda mas cerca na congregacion? Participa na maga actividad que ta hace el maga hermano y hermana—atende na maga miting y regular predica na ministerio. Paquemodo este ayuda? Si Felix ya habla: “Ya espera gayot el congregacion que bira yo. Ya sinti yo que ta ama sila conmigo. Todo sila ya ayuda conmigo para queda parte otravez del familia, para sinti que ya perdona conmigo y para continua sirvi con Jehova.”—Mira con el cajon “ Cosa Tu Puede Hace?”

Si Satanas hay continua contigo dale maga problema para pricura hace luya contigo mientras ta compone tu con el de tuyu amistad con Jehova. (Luc. 4:13) Queda preparao por medio que hace fuerte con el de tuyu relacion con Jehova ahora.

Acerca na de suyu maga carnero, si Jehova ya promete: “Hay busca yo con el perdido, hay lleva yo otravez con el ya queda lejos, hay pone yo venda con el irido, y con el maluya hay hace yo fuerte.” (Eze. 34:16) Si Jehova ya ayuda con el manada para compone con el diila relacion con ele. Puede tu asigura que quierre le ayuda contigo para continua hace mas fuerte el de tuyu amistad con ele.