1. Cosa posible llega na diaton pensamiento si pensa kita acerca na un lastimoso persona?

SI PENSA kita acerca na un lastimoso persona, posible hay pensa kita con el un persona quien bueno, tiene empatia, compasion y bondadoso. Posible, hay pensa tambien kita con el istoria de Jesus acerca na un buen Samaritano. Aquel hombre de otro nacion “ya tene lastima” con el un Judio con quien ya gulpia y ya ruba el maga ladron. Ya tene lastima el Samaritano con el irido Judio y amable ya cuida con ele. (Luc. 10:29-37) Este ilustracion ta dale mira con el bonito calidad del diaton Dios—el lastima. Este calidad amo un aspeto del amor del Dios y ta dale le mira este kanaton na manada manera cada dia.

2. Cosa el otro aspeto del lastima?

² Tiene pa otro aspeto del lastima que puede kita pensa. El un lastimoso persona posible decidi que gendeh castiga con aquellos con quien debe era castiga, si tiene valido razon. Si Jehova ya dale gayot mira que lastimoso le kanaton. “Gendeh le kanaton ta castiga asegun na diaton maga pecado,” como cosa ya habla el salmista. (Sal. 103:10) Pero na otro maga tiempo, posible serioso disciplina si Jehova con aquellos quien ya culpa.

3. Cosa maga pregunta kita hay examina?

³ Na este articulo, hay discuti kita tres pregunta: Porque si Jehova ta dale mira lastima? Cosa el coneccion del serioso disciplina y lastima? Y cosa puede ayuda kanaton para dale mira lastima? Mira kita si paquemodo el Palabra del Dios ta contesta con este maga pregunta.

4. Porque si Jehova ta dale mira lastima?

⁴ Bien quierre si Jehova queda lastimoso. Ya escribi si apostol  Pablo que el Dios “bien grande gayot el lastima.” Ya explica si Pablo que el Dios lastimoso cay ta dale le esperanza que vivi na cielo con el de suyu maga imperfecto iscujido siervo. (Ef. 2:4-7) Pero, gendeh lang si Jehova ta dale mira lastima con el de suyu maga iscujido siervo. Si salmista David ya escribi: “Bueno si Jehova con todo y puede mira con el de suyu lastima na todo de suyu trabajo.” (Sal. 145:9) Por causa cay ta ama si Jehova con el maga gente, pirmi le ta dale mira lastima si tiene valido razon para hace se.

5. Paquemodo si Jesus ya aprende acerca na lastima de Jehova?

⁵ Compara con maskin quien, sabe si Jesus si paquemodo de bien quierre dale mira lastima si Jehova. Este Tata y Anak junto na cielo por miles de año antes si Jesus vene aqui na tierra. (Prov. 8:30, 31) Na manada ocasion, ya mira si Jesus si paquemodo el de suyu Tata ya dale mira lastima na maga imperfecto gente. (Sal. 78:37-42) Na de suyu enseñanza, pirmi si Jesus ta menciona acerca con este bonito calidad del de suyu Tata.

6. Cosa ilustracion el ya usa si Jesus para ayuda kanaton entende el lastima del de suyu Tata?

⁶ Como cosa ya menciona del ya pasa articulo, ya usa si Jesus un ilustracion acerca con el un perdido anak para ayuda kanaton entende que bien quierre dale mira lastima si Jehova. Ya sale el anak na casa y “ya hace le usik el cen na maga vicio.” (Luc. 15:13) Na uliji, ya arripinti le na de suyu imoral trabajo, ya queda humilde y ya bira na diila casa. Cosa ya hace el de suyu tata? Ya puede dayun mira el anak si cosa el reaccion del de suyu tata. Si Jesus ya habla: “Cuando lejos pa [el anak], su tata ya puede mira con ele y su corazon ya llena de lastima. Ya corre le y ya abraza con su anak y ya besa con ele.” Nuay hace huya el tata con el de suyu anak. Sino, ya dale le mira lastima y ya perdona con el de suyu anak y ya acepta con ele otravez na familia. Bien grande el pecado del perdido anak pero cay ya arripinti le, ya perdona con ele el de suyu tata. El lastimoso tata na ilustracion ta representa con Jehova. Ya dale mira kanaton si Jesus que el de suyu Tata quierre perdona con el maga pecador quien sincero ta arripinti.—Luc. 15:17-24.

7. Paquemodo el sabeduria de Jehova conectao na lastima que ta dale le mira?

⁷ Ta dale mira lastima si Jehova por causa na de suyu incomparable sabeduria. Pirmi le ta hace maga decision para na bien del de suyu maga creacion. El Biblia ta habla que “el saber que ta sale na cielo” amo ‘lleno de lastima  y maga trabajo bueno.’ (Sant. 3:17) Igual como un amable mayores, sabe si Jehova que el de suyu lastima bueno para na de suyu maga anak. (Sal. 103:13; Isa. 49:15) Ta dale esperanza el lastima de Jehova maskin pa imperfecto el maga gente. El sabeduria de Jehova amo el ta manda move con ele para dale mira lastima si ta mira le que tiene valido razon para hace se. Pero, balance el lastima de Jehova. Cay sabio le, gendeh le ta consinti con el mal practica.

8. Cosa tiene vez el necesita hace y porque?

⁸ Pone kita que el un siervo del Dios ya decidi que vivi un imoral vida. Cosa kita debe hace? Ya habla si Jehova con Pablo que habla con el congregacion que ‘no man junto’ con ele. (1 Cor. 5:11) El maga persona quien ta culpa que gendeh ta arripinti ta man disfellow na congregacion. Necesita con este hace para protege con el diaton maga fiel hermano y hermana, y para suporta con el maga principio de Jehova. Pero, el cuanto posible man dificil mira que este arreglamiento amo un expresion del lastima de Jehova. Deverasan ba se? Mira kita.

9-10. Uyun na Maga Hebreo 12:5, 6, porque kita puede habla que un lastimoso provision si tan disfellow con el un persona? Ilustra.

⁹ Si ya oi kita un anuncio na miting que el un persona con quien kita conoce y ta ama “gendeh mas uno del maga Testigo de Jehova,” yan triste gayot kita. Posible ya pensa kita si necesita ba gayot man disfellow con ele. Un expresion ba de lastima si tan disfellow con el un persona? Si. Gendeh sabio, lastimoso o amable si gendeh ta disciplina con el un persona quien ta necesita con ese. (Prov. 13:24) Puede ba ayuda con el un persona que cambia y arripinti si man disfellow con ele? Puede. Manada maga hermano y hermana quien ya comete serioso culpa el ya habla que cuando yan disfellow kanila, ya ayuda quel kanila para realiza si paquemodo de serioso el diila culpa, para arripinti, cambia con el diila conducta y bira otravez con Jehova.—Le con el Maga Hebreo 12:5, 6.

¹⁰ Considera un ilustracion. El un pastor ya nota que enfermo el uno del de suyu maga carnero. Sabe le que para puede cura con este enfermedad, necesita le separta con el enfermo carnero na grupo. Pero, quierre-quierre el maga carnero que man junto na grupo y posible hay rabia sila si separta kanila. Quierre decir ba de este que malo el pastor cay ya hace le separta con el carnero? Siempre gendeh. Sabe le que si permiti le con el enfermo carnero que man junto na grupo, man calayat el enfermedad. Si separta le con el enfermo, hay protege le con el entero grupo.—Compara na Levitico 13:3, 4.

11. (a) Na cosa maga manera puede compara con el un persona con quien yan disfellow na un enfermo carnero? (b) Cosa maga provision y ayuda el puede obtene el maga yan disfellow?

¹¹ Si yan disfellow con el un Cristiano, puede kita compara con ele con aquel enfermo carnero. Enfermo le na espiritual manera. (Sant. 5:14) Igual na cuanto literal enfermedad, el espiritual enfermedad puede hace tapon con otro. Poreso na cuanto situacion, necesita hace separta na congregacion con el un persona que enfermo na espiritual. Ese disciplina amo un expresion del amor de Jehova para na de suyu maga fiel siervo y puede este ayuda con el quien ya culpa para realiza si paquemodo de serioso el de suyu culpa y para arripinti. Maskin disfellow, puede le atende na maga miting donde puede le ricibi instruccion estaba na Biblia y hace otravez fuerte con el de suyu fe. Puede tambien le saca publicacion para na de suyu personal usada y mira JW Broadcasting^®. Y si ta mira el maga anciano que ta hace le maga progreso, posible hay  dale sila con ele consejo y direccion para puede ayuda con ele hace bira con el de suyu relacion con Jehova para puede le queda otravez un Testigo de Jehova. *

12. Cosa el amable y lastimoso cosa que puede hace el maga anciano con el quien ya culpa que nuay arripinti?

¹² Importante que acorda kita que aquellos lang quien ya comete serioso culpa que nuay arripinti el ta man disfellow. Sabe el maga anciano que debe sila pensa enbuenamente antes sila decidi que man disfellow con el un persona. Sabe sila que si Jehova ta disciplina “na justo manera.” (Jer. 30:11) Ta ama sila con el diila maga hermano y no quierre sila hace maskin cosa que causa peligro na diila espiritualidad. Pero tiene vez, el amable y lastimoso cosa para hace amo quita con el quien ya culpa na congregacion por cuanto tiempo.

13. Porque el un Cristiano na Corinto necesita man disfellow?

¹³ Considera si paquemodo si apostol Pablo ya trata con el quien ya culpa que nuay arripinti del primer siglo. El un Cristiano na Corinto ya comete imoralidad y ta queda junto con el mujer del de suyu tata. Un bien terrible cosa este! Sabe si Pablo que si Jehova ya habla con el maga Israelita de antes: “El un hombre quien yan sexo con el mujer del de suyu tata ya pone na verguenza con el de suyu tata. Debe mata kanila dos.” (Lev. 20:11) Siempre, gendeh puede manda si Pablo que mata con ese gente. Pero, ya habla le con el maga de Corinto que man disfellow con este. El imoral conducta de aquel gente ya afecta con otro na congregacion. Gane, el cuanto kanila gendeh ta pensa que un serioso culpa quel.—1 Cor. 5:1, 2, 13.

14. Paquemodo si Pablo ya dale mira lastima con el gente na Corinto que yan disfellow y porque? (2 Corinto 2:5-8, 11)

¹⁴ Despues del cuanto tiempo, ya sabe si Pablo que ya hace maga grande cambio aquel persona. Deverasan gayot le ya arripinti! Maskin pa ya lleva verguenza aquel gente na congregacion, si Pablo ya habla con el maga anciano que no quierre le “queda bien estricto.” Ya habla le kanila: “Ahora ustedes debe perdona y dale animo con ele.” Nota si cosa el razon de Pablo: “Para hende ay gana con ele el tristeza por causa del di suyo pecado y castigo.” Ya tiene lastima si Pablo con el gente quien ya arripinti. No quierre mira el apostol con el gente que queda bien triste acerca na cosa le ya hace  que hay descanza ya le pidi perdon.—Le con el 2 Corinto 2:5-8, 11, El Nuevo Testamento.

15. Paquemodo el maga anciano queda balance si ta dale serioso disciplina y si ta dale mira lastima?

¹⁵ Igual con Jehova, el maga anciano bien quierre dale mira lastima. Hay dale sila serioso disciplina si necesita pero hay dale sila mira lastima si posible, si tiene valido razon para hace con ese. Cay si gendeh sila ta disciplina, gendeh sila ta dale mira lastima sino ta consinti. Pero, el maga anciano lang ba el necesita dale mira lastima?

16. Asegun na Proverbio 21:13, cosa hay hace si Jehova con aquellos quien no quierre dale mira lastima?

¹⁶ El todo maga Cristiano ta pricura imita con el lastima de Jehova. Porque? El un razon amo cay si Jehova gendeh ta oi con aquellos quien no quierre dale mira lastima con otro. (Le con el Proverbio 21:13.) Nuay ni uno kanaton el quierre que gendeh oi si Jehova con el diaton maga rezo poreso ta evita kita tene duro corazon. En vez ignora con el dolor que ta sinti el diaton hermano, debe kita pirmi preparao oi “si ta pidi ayuda el maka-lastima gente.” Na igual manera, ta acorda kita con este consejo: “El gente noay tene lastima, ay juzga con ele sin lastima.” (Sant. 2:13) Si acorda kita si paquemodo kita de necesita lastima, mas grande el posibilidad que puede kita dale mira lastima. Quierre kita dale mira lastima especialmente con el persona quien ya comete culpa que ya arripinti y ya bira na congregacion.

17. Paquemodo si Rey David ya dale mira deverasan lastima?

¹⁷ El maga ejemplo na Biblia puede ayuda kanaton dale mira lastima y evita queda bien istricto. Por ejemplo, considera con Rey David. Manada beses le ya dale mira deverasan lastima. Maskin pa quierre si Saul mata con ele, ya dale mira lastima si David con el iscujido rey del Dios. Nuay le pricura con este vengga o man balus.—1 Sam. 24:9-12, 18, 19.

18-19. Cosa el dos situacion donde nuay dale mira lastima si David?

¹⁸ Pero, gendeh pirmi lastimoso si David. Cuando si Nabal, un gendeh bueno gente, ya insulta y nuay conforma dale comida con David y con el de suyu maga gente, ya queda bien rabiao si David y ya decidi mata con Nabal y con el todo hombre na de suyu casa. Pero por causa na cosa ya hace si Abigail, el mujer de Nabal que bueno y pacienciosa, ya puede evita queda culpable de sangre si David.—1 Sam. 25:9-22, 32-35.

¹⁹ Na otro ocasion, si profeta Natan ya habla con David acerca na un rico gente quien ya ruba un carnero del pobre vecinos. Rabiao ya habla si David: “Igual si paquemodo vivo si Jehova, debe muri el gente quien ya hace con ese!” (2 Sam. 12:1-6) Sabe si David con el Ley de Moises. El un ladron quien ya ruba un carnero, necesita debolbe cuatro carnero con el gente con quien ele ya ruba. (Ex. 22:1) Bien sobra el castigo si mata con aquel ladron. Actualmente, ya cunta si Natan con ese istoria para ayuda con David entende que mas grabe el  maga crimen que ya comete le. Mas lastimoso el tratamiento de Jehova con David contra el tratamiento de David con aquel ladron na ilustracion de Natan.—2 Sam. 12:7-13.

20. Cosa kita puede aprende na ejemplo de David?

²⁰ Nota que cuando bien rabiao si David, ya juzga le que conviene mata con Nabal y con el de suyu maga gente. Despues, ya juzga tambien le que conviene mata con el gente na ilustracion de Natan. Na este segundo ilustracion, posible pensa kita si porque el un buen gente puede dale un bien pesao juzgamiento. Considera con el cosa nuevo lang ya sucede con David. Na aquel tiempo, ta sinti gayot le culpable. Si el un persona bien istricto y pronto lang juzga, un señal se que gendeh bueno el de suyu espiritualidad. Ya dale aviso si Jesus con el de suyu maga siguidores: “No ustedes juzga con otros y (el Dios) gendeh ay juzga con ustedes. Cay con ustedes ay juzga igual como ustedes ta jusga con otros.” (Mat. 7:1, 2) Poreso, evita kita queda bien istricto y pricura tene ‘grande lastima’ igual con el diaton Dios.

21-22. Cosa el cuanto manera que puede kita dale mira lastima?

²¹ El lastima gendeh lang basta un sentido. El maga lastimoso gente ta hace maga cosas para ayuda con otro. Todo kita puede mira si cosa el necesidad del diaton familia, na diaton congregacion y na diaton comunidad. Asigurao, tiene manada oportunidad para dale mira lastima! Tiene ba kita conoce quien ta necesita comforta? Puede ba kita dale practical ayuda igual como dale comida o hace buen cosas para con otro? Posible gaha que el un persona quien ya queda un Testigo de Jehova otravez ta necesita un buen amigo quien hay anima con ele? Puede ba kita man cuento acerca con el buen noticia que ta dale comforta con otro? Amo este el uno na maga de con todo buen manera para dale mira lastima con otro maga gente.—Job 29:12, 13; Roma 10:14, 15; Sant. 1:27.

²² Si sabe kita con ese maga necesidad, puede kita mira que manada oportunidad para dale mira lastima. Si ta dale kita mira lastima, queda gayot alegre el diaton Tata na cielo, el Dios quien “bien grande gayot el lastima”!