1-2. (a) Cosa ya hace el cuanto gobierno contra na maga siervo de Jehova pero cosa el reaccion del maga siervo del Dios? (b) Paquemodo el persecucion puede resulta na alegria? (Dale tambien comento acerca na letrato na cover.)

 AHORA, tiene restriccion o ta prohibi con el diaton trabajo na mas de 30 maga lugar na entero mundo. Na cuanto de ese maga lugar, ya hace preso el maga autoridad con el diaton maga hermano y hermana. Cosa malo sila ya hace? Na ojos de Jehova, nuay sila cosa ya hace malo. El cosa lang sila ya hace amo ya le y ya estudia con el Biblia, ya predica con otro y ya atende na maga miting junto con el diila maga hermano y hermana. Ya iscuji tambien sila esta neutral na politica. Maskin pa na grabe oposicion, este maga fiel siervo del Dios ya mentena con el diila integridad *​—ya dale sila mira completo devocion con Jehova. Y ta hace gayot se kanila alegre!

² Posible, ya puede tu mira con el maga letrato del cuanto de ese maga animoso Testigo y ya nota que tan smile sila. Alegre sila cay sabe sila que si Jehova alegre kanila cay ya mentena sila con el diila integridad con ele. (1 Cron. 29:17a) Si Jesus ya habla: “Alegre el maga persiguido por causa cay ta hace sila el cosa el Dios quiere . . . Alegra gayot ustedes, cay el de ustedes premio na cielo bien grande.”​—Mat. 5:10-12.

3. Asegun na Maga Actividad 4:19, 20, cosa el reaccion del maga apostoles na persecucion del primer siglo y porque?

³ El diaton maga hermano y hermana ta experiencia el cosa ya sucede con el maga apostoles del primer siglo cuando ya persigui  kanila cay ya predica sila acerca con Jesus. El maga juez na alto corte del maga Judio manada beses “ya manda canila que no mas ya gayot comversa na Nombre de Jesus.” (Act. 4:18; 5:27, 28, 40) Cosa el reaccion del maga apostoles? (Le con el Maga Actividad 4:19, 20.) Sabe sila que tiene mas alto autoridad el quien ‘ya manda kanila anuncia con el de suyu maga gente’ acerca con el Cristo. (Act. 10:42) Poreso, el maga representante del maga apostoles que si Pedro y Juan con animo ya habla que debe sila obedece con Dios contra na maga juez y ya declara que gendeh sila descanza converza acerca con Jesus. Vene cae, dol ta pregunta sila con el maga juez, ‘Ta habla ba ustedes que mas alto el de ustedes maga mandamiento contra con el del Dios?’

4. Asegun na Maga Actividad 5:27-29, cosa buen ejemplo el ya dale mira el maga apostoles para na todo verdadero Cristiano y paquemodo kita puede imita kanila?

⁴ Ya dale buen ejemplo el maga apostoles para imita el todo verdadero Cristiano. Determinao sila que “obedece con el Dios, y gendeh con el maga gente.” (Le con el Maga Actividad 5:27-29.) Despues kanila gulpia por causa na diila integridad, el maga apostoles ya sale na corte que “bien alegre cay ya pasa sila como un honor el verguenza que ya sufri sila por causa del Nombre de Jesus” y ya continua sila predica!​—Act. 5:40-42.

5. Cosa maga pregunta kita necesita contesta?

⁵ Tiene kita cuanto pregunta na cosa ya hace el maga apostoles. Por ejemplo, na cosa manera el diila decision que obedece con Dios en vez con el maga gente harmonia na mandamiento del Biblia que “obedece con el autoridad del gobierno”? (Roma 13:1) Paquemodo kita puede “somete con el . . . maga autoridad del gobierno,” como cosa ya habla si apostol Pablo, y mentena siempre el diaton integridad con Dios como el quien tiene el de con todo alto autoridad?​—Tito 3:1.

6. (a) Con quien ta refiri “el autoridad del gobierno” que ya menciona na Roma 13:1 y paquemodo kita debe trata kanila? (b) Cosa el verdad acerca na autoridad del todo maga gobierno?

⁶ Le con el Roma 13:1. Na este versiculo,  el termino “autoridad del gobierno” ta refiri con el maga gente quien ta rula y tiene poder con otro. Debe obedece el maga Cristiano con este maga gobierno. Este maga autoridad ta pricura mentena paz, ta asigura que ta obedece el maga gente con el ley y tiene vez, ta protege pa gane con el maga siervo de Jehova. (Rev. 12:16) Poreso, debe kita dale kanila el impuesto, tributo, miedo y honor que ta pidi sila. (Roma 13:7) Pero, tiene lang autoridad el maga gobierno por causa cay ya permiti se si Jehova. Ya hace se claro si Jesus cuando ya cuestiona con ele el Romano gobernador que si Poncio Pilato. Cuando si Pilato ya habla que puede le salva con el vida de Jesus o puede manda mata con ele, si Jesus ya habla: “Noay uste poder sobre conmigo si noay se dale con uste desde arriva.” (Juan 19:11) Igual con Pilato, limitao lang el autoridad del maga gobierno y politico ahora.

7. Cuando kita debe gendeh obedece con el maga gobierno y cosa sila debe acorda?

⁷ El maga Cristiano debe obedece con el maga ley del gobierno basta gendeh este tan contra con el maga ley del Dios. Pero, gendeh kita ta obedece con el maga gobierno si el cosa sila ta manda hace ta prohibi el Dios o si ta prohibi sila con el cosa el Dios ya manda kanaton que hace. Por ejemplo, posible sila manda con el maga joven hombre que carga maga armas y participa na guerra. * O posible hay prohibi sila con el diaton Biblia, maga publicacion, hace con el diaton trabajo predicacion y adora junto. Si el maga gobierno ta usa con el diila autoridad na gendeh justo manera, igual como persigui con el maga dicipulo del Cristo, responsable sila con Dios. Ta mira si Jehova!​—Ecl. 5:8.

8. Na cosa manera diferente si Jehova na “autoridad del gobierno”?

⁸ El “autoridad del gobierno” puede tene autoridad, hace maga buen cosas y tene poder con otro. Pero, gendeh este quierre decir que perfecto ya sila y de con todo alto. Tiene un Persona quien perfecto y mas alto contra kanila todo y ese amo si Jehova. Cuatro beses ya menciona na Biblia que ya llama con Dios Jehova el “Dios Supremo.”​—Dan. 7:18, 22, 25, 27.

9. Cosa ya puede mira si profeta Daniel na maga vision?

⁹ Si profeta Daniel ya mira maga vision que claro ta dale mira que tiene mas alto autoridad si Jehova contra con otro. Ya mira si Daniel una con el cuatro grande animal que ta representa con el maga de con todo poderoso gobierno de antes​—el Babilonia, Medo-Persia, Grecia y Roma, y el de con todo poderoso gobierno ahora, el Anglo-America. (Dan. 7:1-3, 17) Despues, ya mira si Daniel con Dios Jehova que sintao na un trono na cielo. (Dan. 7:9, 10) El cosa sunod ya puede mira aquel fiel profeta debe sirvi como un aviso para na maga gobierno ahora.

10. Asegun na Daniel 7:13, 14, 27, con quien ya dale si Jehova el autoridad para rula con el tierra y cosa este ta dale mira acerca con Ele?

¹⁰ Le con el Daniel 7:13, 14, 27. El Dios ya saca con el todo poder y autoridad del maga gobierno del gente y ya dale este con otro quien mas poderoso y mas conviene con este ricibi. Con quien? Con Jesucristo, el quien “igual como anak del gente,” y con “el maga sagrao del Dios Supremo,” el 144,000 quien hay rula “hasta para cuando.” (Dan. 7:18) Claro, si Jehova el “Dios Supremo” cay ele lang el tiene autoridad para hace con ese.

11. Cosa pa ya escribi si Daniel que ta dale mira que tiene mas alto autoridad si Jehova na maga nacion?

¹¹ El suceso na vision que ya mira si Daniel  harmonia na cosa le ya escribi del una. “El Dios del cielo,” ya habla si Daniel, “ta quita . . . y ta establicia maga rey.” Ya escribi tambien le que “el Bien Alto Dios amo el quien rula na reino del maga gente y dale le el rulanza con maskin quien le quierre.” (Dan. 2:19-21; 4:17) Tiene ya ba ya quita o ya establicia rey si Jehova de antes? Si!

12. Dale ejemplo si paquemodo si Jehova ya quita con el maga rey na diila posicion de antes. (Mira con el letrato.)

¹² Claro ya dale mira si Jehova que tiene le alto autoridad contra na “autoridad del gobierno.” Considera este tres ejemplo. El Faraon de Egipto ya hace esclavo con el maga siervo de Jehova y manada beses le nuay conforma que libra kanila. Pero, ya libra kanila el Dios y ya hace lumus con el Faraon na Colorao Mar. (Ex. 14:26-28; Sal. 136:15) Si Rey Belsazar de Babilonia ya hace un fiesta y “yan rebelde . . . contra con el Señor del cielo” y “ya alaba . . . con el maga dios de plata y oro” en vez con Jehova. (Dan. 5:22, 23) Pero, ya castiga el Dios con aquel arogante gente. “Na aquel mismo noche,” ya mata con Belsazar y el de suyu reino ya dale con el maga de Medo y de Persia. (Dan. 5:28, 30, 31) Si Rey Herodes Agripa I de Palestina ya manda mata con apostol Santiago y despues, ya manda hace preso con apostol Pedro donde intencion de suyu que mata tambien con este. Pero, nuay permiti si Jehova con el cosa ta plaña si Herodes. “El angel del Señor ya gulpia [o ya castiga] con ele” y ya muri le.​—Act. 12:1-5, 21-23.

13. Dale ejemplo si paquemodo ya ganá si Jehova contra na grupo de maga rey.

¹³ Ya dale tambien mira si Jehova que mas alto el de suyu autoridad contra na grupo de maga rey. Yan guerra le para na Israel y ya ayuda kanila para destroza con el alianza del 31 maga rey de Canaan y para saca con el grande parte del Tierra Prometido. (Jos. 11:4-6, 20; 12:1, 7, 24) Ya ayuda tambien si Jehova con el maga Israelita para completamente ganá contra con Rey Ben-hadad y 32 otro rey de Siria quien yan guerra contra na Israel.​—1 Rey 20:1, 26-29.

14-15. (a) Cosa ya habla si Rey Nabucodonosor y Rey Dario acerca na rulanza de Jehova? (b) Cosa ya habla el salmista acerca con Jehova y na De Suyu nacion?

¹⁴ Desde antes, ya dale prueba si Jehova que ele el Dios Supremo! Cuando si Rey Nabucodonosor de Babilonia yan hambug  acerca na ‘de suyu mismo fuerza y poder, y gloria del de suyu autoridad’ en vez de habla que si Jehova el conviene ricibi el alabanza, el Dios ya castiga con ele y ya queda le loco. Cuando ya queda le entacto otravez, si Nabucodonosor “ya alaba . . . con el Bien Alto Dios” y ya habla que ‘el rulanza de Jehova hasta para cuando.’ Ele ya omenta: “Nuay quien puede sangga con ele.” (Dan. 4:30, 33-35) Despues pone na probanza con el integridad de Daniel con Dios y ya salva con ele si Jehova na cueva del maga leon, si Rey Dario ya habla: “El maga gente debe tembla na miedo na Dios de Daniel. Cay ele el vivo Dios y ta esta le hasta para cuando. Nunca destroza de suyu reino y nuay fin el de suyu rulanza.”​—Dan. 6:7-10, 19-22, 26, 27.

¹⁵ El salmista ya habla: “Si Jehova ya hace falla con el maga estrategia del maga nacion; ya sangga le con el maga plano del maga gente.” Ele ya omenta: “Alegre el nacion que el Dios amo si Jehova, el maga gente que ya iscuji le como de suyu mismo propiedad.” (Sal. 33:10, 12) Un buen razon gayot se para mentena kita con el diaton integridad con Jehova!

16. Cosa kita puede asigura que sucede na grande tribulacion y porque? (Mira con el letrato.)

¹⁶ Ya puede kita sabe si cosa ya hace si Jehova de antes. Cosa kita puede expecta que hay sucede na futuro? Puede kita asigura que hay salva si Jehova con el de suyu maga leal siervo durante el “grande calamidad” o tribulacion. (Mat. 24:21; Dan. 12:1) Hay hace le con este cuando el alianza del maga nacion que conocido como el Gog de Magog hay hace un violente ataque na entero mundo contra con aquellos quien fiel con Jehova. Maskin pa incluido na ese alianza el todo 193 miembro del United Nations, nuay lang se si compara con el Dios Supremo y na de suyu maga soldao na cielo! Si Jehova ya promete: “Hay dale yo gloria y santifica con el de mio mismo cuerpo y manda conoce con  el de mio mismo cuerpo na manada nacion; y hay sabe gayot sila que iyo si Jehova.”​—Eze. 38:14-16, 23; Sal. 46:10.

17. Cosa ta predicta el Biblia acerca na maga rey del mundo y con aquellos quien ta mentena integridad con Jehova?

¹⁷ Por causa na ataque del Gog, hay principia el guerra de Armagedon donde si Jehova hay destroza “con todo el maga rey na mundo.” (Rev. 16:14, 16; 19:19-21) Gendeh igual kanila, “el maga recto lang el queda na tierra, y el quien ta mentena integridad hay esta aqui.”​—Prov. 2:21, ftn.

18. Cosa conforme hace el manada verdadero Cristiano y porque? (Daniel 3:28)

¹⁸ Del ya pasa maga siglo, manada verdadero Cristiano el ya pone na peligro con el diila mismo vida y diila libertad cay ta ama sila con Jehova como diila Soberano Señor. Ya mentena sila con el diila integridad. Igual sila con el tres Hebreo quien ya salva na bien caliente horno cay ya esta sila fiel con el Dios Supremo.​—Le con el Daniel 3:28.

19. Cosa el basejan de Jehova si ta juzga con el de suyu maga siervo y cosa kita debe hace ahora?

¹⁹ Si salmista David ya escribi acerca na importancia que mentena integridad con Dios: “Hay sentencia si Jehova con el maga gente. Juzga conmigo, O Jehova, asegun na de mio pagka-recto y asegun na de mio integridad.” (Sal. 7:8) Otravez, si David ya escribi: “Ojala el de mio integridad y pagka-recto hay guarda conmigo.” (Sal. 25:21) Hay tene kita el de con todo buen vida si esta kita fiel con Jehova y mentena el diaton lealtad con ele maskin cosa man hay sucede! Si hace kita se, hay sinti kita igual na salmista quien ya escribi: “Alegre aquellos quien ta mentena integridad . . . , quien ta camina uyun na ley de Jehova.”​—Sal. 119:1, ftn.