1. Cosa esperanza si Jehova ta dale kanaton?

 SI Jehova ya dale kanaton el bonito esperanza que vivi hasta para cuando. El cuanto tiene esperanza que vivi hasta para cuando na cielo como imortal espiritu creatura. (1 Cor. 15:50, 53) Pero, el mayoria tiene el esperanza que vivi hasta para cuando na tierra con perfecto salud y con alegria. (Rev. 21:3, 4) Na cielo man o na tierra el diaton esperanza, precioso se para kanaton.

2. Onde base el diaton esperanza y porque se kita puede habla?

² El palabra “esperanza” como ya usa na Biblia quierre decir “ta expecta que tiene maga buen cosas que hay sucede.” Puede gayot kita asigura con el diaton esperanza na futuro cay estaba se con Jehova. (Roma 15:13) Sabe kita si cosa ele ya promete y que pirmi ele ta cumpli con el de suyu maga palabra. (Num. 23:19) Convincido kita que si Jehova tiene el deseo y poder para cumpli con el todo cosa le ya habla. Poreso, el diaton esperanza gendeh base na imaginacion o cosa que quierre kita sucede sino base ese na evidencia y realidad.

3. Cosa kita discuti na este articulo? (Salmo 27:14)

³ El diaton Tata na cielo ta ama gayot kanaton y quierre le que confia kita con ele. (Le con el Salmo 27:14.) Si fuerte el diaton esperanza con Jehova, hay puede kita aguanta na maga probanza y tene coraje y alegria maskin cosa pa el sucede kanaton na futuro. Considera kita si paquemodo el esperanza puede protege kanaton. Una, hay considera kita si porque el esperanza igual na un ancla y un helmet. Despues, hay discuti kita si paquemodo kita puede hace fuerte con el diaton esperanza.

4. Na cosa manera el esperanza igual na un ancla? (Maga Hebreo 6:19)

⁴ Na de suyu carta para na maga Hebreo, si apostol Pablo ya compara con el diaton esperanza na un ancla. (Le con el  Maga Hebreo 6:19.) Pirmi le ta viaja por medio de barco poreso sabe si Pablo que ta usa con el maga ancla para gendeh man anud el barco. Na un ocasion, pasajero le na un barco cuando ya tiene un fuerte tifun. Durante aquel tifun, ya puede le mira maga tripulante que ya buta con el maga ancla na agua para gendeh man bangga el barco na maga grande piedra. (Act. 27:29, 39-41) Igual na un ancla que ta agarra con el barco, el esperanza puede ayuda kanaton para gendeh kita man anud o man lejos con Jehova si ta enfrenta kita maga dificultad. El diaton esperanza puede ayuda kanaton que esta calmao si ta experiencia maga problema cay ta creé kita que hay queda siempre enbuenamente el situacion. Acorda que ya habla ya daan si Jesus que hay persigui kanaton. (Juan 15:20) Poreso si ta medita kita con el diaton esperanza na futuro, puede este ayuda kanaton que continua sirvi con Jehova.

5. Paquemodo el esperanza ya puede ayuda con Jesus cuando ya enfrenta le muerte?

⁵ Considera si paquemodo el esperanza ya puede ayuda con Jesus para esta fiel maskin pa sabe le que hay enfrenta le muerte. Del Pentecostes 33 C.E., si apostol Pedro ya coteja un profecia estaba na libro de Salmo que ta dale mira si paquemodo de calmao si Jesus: “Masquin ay muri el di mio cuerpo tiene pa yo grande esperanza, cay hende uste ay deja con el di mio alma [“conmigo,” NWT] na lugar del maga muerto, ni hende uste ay deja man buluk el cuerpo del di uste servidor bien devoto. . . . Ay queda yo bien alegre cay pirmi uste junto conmigo.” (Act. 2:25-28, El Nuevo Testamento; Sal. 16:8-11) Maskin pa sabe si Jesus que hay muri le, asigurao le na de suyu esperanza que hay resucita con ele el Dios y hay puede le man junto otravez con el de suyu Tata na cielo.​—Heb. 12:2, 3.

6. Cosa el un hermano ya habla acerca na esperanza?

⁶ El diaton esperanza ya puede ayuda con el manada del diaton maga hermano y hermana para aguanta. Considera con el ejemplo de Leonard Chinn, un fiel hermano quien ya queda na England. Durante el Primer Guerra Mundial, yan preso le cay nuay le conforma queda soldao. Por dos mes, solo-solo ele na preso. Despues de ese, ya forza con ele que hace maga bien pesao trabajo. “El de mio maga experiencia,” ya escribi le, “ya ayuda conmigo para realiza si paquemodo de importante el esperanza para puede aguanta. Talli el maga ejemplo de Jesus, del maga apostoles y del maga profeta, y sabe kita acerca con el maga bonito promesa na Biblia. Todo ese ta dale kanaton esperanza y ta ayuda kanaton para aguanta.” El esperanza ya queda igual como un ancla para con Leonard y puede tambien se queda igual como un ancla para kanaton.

7. Paquemodo el maga probanza ta puede hace fuerte con el diaton esperanza? (Roma 5:3-5; Santiago 1:12)

⁷ Mas ta queda fuerte el diaton esperanza despues kita experiencia maga probanza y sinti el ayuda y favor de Jehova. (Le con el Roma 5:3-5; Santiago 1:12.) Poreso, mas fuerte ya el diaton esperanza ahora contra cuando primer vez kita ya acepta con el buen noticia. Quierre si Satanas que man luya kita por causa na maga probanza pero na ayuda de Jehova, puede kita aguanta con ese.

8. Na cosa manera el esperanza igual na un helmet? (1 Tesalonica 5:8)

⁸ El Biblia ya compara tambien con el diaton esperanza na un helmet. (Le con el 1 Tesalonica 5:8.) El un soldao ta usa helmet para protege con el de suyu cabeza na maga golpe del de suyu maga enemigo. Na diaton espiritual guerra, necesita kita protege con el diaton  pensamiento na maga ataque de Satanas. Ta usa le manada tentacion y maga idea para influencia con el diaton pensamiento. Igual si paquemodo el un helmet ta protege con el cabeza del un soldao, el diaton esperanza ta protege con el diaton pensamiento para puede kita esta fiel con Jehova.

9. Cosa el resulta si el maga gente nuay esperanza?

⁹ El diaton esperanza que vivi hasta para cuando puede ayuda kanaton para hace maga justo decision. Pero si gendeh fuerte el diaton esperanza y ta principia kita pensa acerca na diaton mismo deseo lang, puede kita ulvida con el diaton esperanza. Considera con el cosa ya sucede con el cuanto maga Cristiano na Corinto de antes. Yan luya el diila fe na un importante promesa del Dios​—el esperanza de resureccion. (1 Cor. 15:12) Si Pablo ya habla que el maga gente quien nuay esperanza na futuro ta vivi lang para satisfecha con el diila mismo deseo. (1 Cor. 15:32) Manada maga gente quien gendeh ta creé con el maga promesa del Dios ta vivi lang ahora para na diila mismo alegria. Pero, diferente kita cay ta confia kita con el maga promesa del Dios na futuro. El diaton esperanza amo igual na un helmet que ta protege con el diaton pensamiento y ta ayuda kanaton para gendeh pensa con el diaton mismo cuerpo lang ciendo puede se destroza con el diaton relacion con Jehova.​—1 Cor. 15:33, 34.

10. Paquemodo el esperanza puede protege kanaton na maga imbusterias?

¹⁰ El diaton esperanza puede tambien ayuda kanaton para gendeh pensa que nunca kita puede hace alegre con Jehova. Por ejemplo, el cuanto posible habla: ‘Imposible gayot que queda yo uno de aquellos quien vivi hasta para cuando. Maskin cosa pa yo hace, gendeh gayot yo puede cumpli con el cosa el Dios ta manda.’ Acorda que el falso amigo de Job, si Elifaz, ya usa maga semejante palabra. Si Elifaz ya habla: “Puede ba queda limpio el un mortal gente?” Mas pa, ya habla le acerca con Dios: “Nuay gane le confianza na de suyu maga sagrao, y maskin el cielo gendeh limpio na de suyu ojos.” (Job 15:14, 15) Maga imbusterias gayot este! Acorda si quien quierre que pensa tu ansina​—si Satanas. Sabe le que si continua tu pensa ansina, hay principia perde el de tuyu esperanza. Poreso, no creé con ese maga imbusterias y man focus na maga promesa de Jehova. Pirmi acorda que quierre le que vivi tu hasta para cuando y hay ayuda le contigo alcanza con ese goal.​—1 Tim. 2:3, 4.

11. Porque importante el paciencia mientras ta espera kita que cumpli el Dios con el de suyu maga promesa?

¹¹ Gendeh pirmi facil que mentena fuerte esperanza. Posible, perde el diaton paciencia mientras ta espera que cumpli el Dios con el de suyu maga promesa. Ciendo si Jehova ta existi ya desde antes pa, el cosa que dol largo tiempo ya para kanaton corto lang para con ele. (2 Ped. 3:8, 9) Hay cumpli le con el de suyu maga promesa na de con todo buen manera. Pero posible, gendeh le hace con ese na tiempo que ta expecta kita. Cosa puede ayuda kanaton para continua hace fuerte con el diaton esperanza mientras ta espera que cumpli el Dios con el de suyu maga promesa?​—Sant. 5:7, 8.

12. Asegun na Maga Hebreo 11:1, 6, na cosa manera el esperanza conectao na fe?

¹² Hay esta fuerte el diaton esperanza si esta kita cerca con Jehova​—el quien puede hace posible con el diaton esperanza. Gane, el Biblia ya menciona que el esperanza conectao na fe que si Jehova ta existi y que ele el “ta premia con aquellos quien ta busca con Ele.” (Le con el Maga Hebreo 11:1, 6.) Si mas real si Jehova para kanaton, hay queda mas fuerte el diaton confianza que hay cumpli le con el todo de suyu maga promesa. Hay considera kita maga  practical manera para mas hace fuerte el diaton relacion con Jehova y mentena fuerte esperanza.

13. Paquemodo kita queda cerca con Dios?

¹³ Reza con Jehova y le con el de suyu Palabra. Maskin pa gendeh kita ta puede mira con Jehova, puede kita queda cerca con ele. Puede kita con ele converza na rezo y asigurao hay oi le kanaton. (Jer. 29:11, 12) Puede kita oi con Dios si le kita con el de suyu Palabra y medita con ese. Mientras ta le kita acerca si paquemodo si Jehova ya cuida con aquellos quien leal con ele de antes, el diaton esperanza hay queda mas fuerte. El todo que escribido na Palabra del Dios amo “para insiñanza diaton: para ay puede kita tene esperanza por medio del maga ejemplo de paciencia y consuelo que el maga Escritura ta dale.”​—Roma 15:4.

14. Porque importante que medita si cosa si Jehova ya puede hace para con otro?

¹⁴ Medita si paquemodo si Jehova ya cumpli con el de suyu maga promesa. Considera si cosa ele ya hace para con Abraham y Sara. Gendeh mas sila puede tene anak cay bien de edad ya sila. Pero, ya promete el Dios que hay tene sila anak. (Gen. 18:10) Cosa el reaccion de Abraham? El Biblia ya habla: “Noay le siempre perde el esperanza y ya cree le.” (Roma 4:18) Maskin pa na mirada del maga gente dol nuay esperanza el diila situacion, si Abraham ya confia que hay cumpli si Jehova con el De Suyu promesa. Y ya sucede gayot se. (Roma 4:19-21) Ese suceso ta enseña kanaton que puede gayot kita pirmi confia que hay cumpli si Jehova con el de suyu maga promesa maskin paquemodo pa de imposible el situacion para kanaton.

15. Porque kita debe medita si cosa ya el Dios ya puede hace para kanaton?

¹⁵ Considera si cosa si Jehova ya puede hace para contigo. Pensa si paquemodo ya tu personal ya beneficia na cumplimiento del maga  promesa que escribido na Palabra del Dios. Por ejemplo, ya promete si Jesus que hay dale el de suyu Tata con el de tuyu maga necesidad na vida. (Mat. 6:32, 33) Ya asigura tambien si Jesus contigo que hay dale si Jehova contigo el sagrao espiritu si pidi tu con ese. (Luc. 11:13) Ya cumpli si Jehova con ese maga promesa. Posible, ta puede tu pensa con el otro maga promesa de suyu contigo que ya cumpli le. Por ejemplo, ya promete le que hay perdona le contigo y hay dale le contigo comforta y espiritual comida. (Mat. 6:14; 24:45; 2 Cor. 1:3) Si medita tu si cosa ya el Dios ya puede hace para contigo, hay puede tu hace fuerte con el de tuyu esperanza na cosa ele hay hace para contigo na futuro.

16. Porque el esperanza un precioso regalo?

¹⁶ Un precioso regalo estaba con Dios el diaton esperanza que vivi hasta para cuando. Ta espera kita con ese y asigurao kita que hay sucede se. Igual ese na un ancla que ta ayuda kanaton para aguanta na maga probanza y persecucion, y para esta fuerte maskin enfrenta muerte. Igual ese na un helmet que ta protege con el diaton pensamiento para puede kita resisti si cosa el malo y hace si cosa el justo. El diaton esperanza que base na Biblia ta hace kanaton mas cerca con Dios y ta dale mira si paquemodo de grande el de suyu amor para kanaton. Ta beneficia gayot kita si ta mentena kita con el diaton fuerte esperanza.

17. Porque el diaton esperanza ta resulta na alegria?

¹⁷ “Alegra na de ustedes esperanza,” como cosa ya anima si apostol Pablo na de suyu carta para na maga de Roma. (Roma 12:12) Puede queda alegre si Pablo cay asigurao le que si esta le fiel, hay puede le obtene vida hasta para cuando na cielo. Puede tambien kita queda alegre na diaton esperanza cay sabe kita que si Jehova hay cumpli con el de suyu maga promesa. Como cosa ya escribi el salmista, “alegre el quien . . . ta confia con Jehova el de suyu Dios, . . . el Dios que pirmi fiel.”​—Sal. 146:5, 6.