1. Cosa el diaton “espiritual necesidad” y na cosa manera conectao este na alegria?

 EL DEVERASAN alegria gendeh lang basta un sentido que ta llega pero ta perde lang. Puede se experiencia el un persona na de suyu entero vida. Na cosa manera? Si Jesus ya explica na de suyu Sermon na Monte: “Alegre aquellos quien ta pensa el diila espiritual necesidad.” (Mat. 5:3, NWT) Sabe si Jesus que ya crea con el maga gente que tiene el grande deseo para conoce y adora con el diila Creador, si Dios Jehova. Amo se el diaton “espiritual necesidad.” Y ciendo si Jehova un “alegre Dios,” aquellos quien ta adora con ele puede tambien queda alegre.​—1 Tim. 1:11, NWT.

2-3. (a) Asegun con Jesus, quien pa el puede queda alegre? (b) Cosa kita discuti na este articulo y porque este necesita?

² Hay queda lang ba kita alegre si nuay kita problema? Gendeh. Tiene cosa ya habla si Jesus que posible espanta kita. “Aquellos quien ta llora”​—posible por causa cay tan conciencia sila na diila maga culpa o cay ta experiencia sila grabe problema na diila vida—​puede siempre queda alegre. Ansina tambien el cosa ya habla si Jesus acerca con aquellos “maga persiguido por causa cay ta hace sila el cosa el Dios quiere” o aquellos con quien “ta insulta” cay ta sigui sila con el Cristo. (Mat. 5:4, 10, 11) Pero, paquemodo queda deverasan alegre el un persona na ese maga situacion?

³ Ta enseña kanaton si Jesus que hay queda kita alegre, gendeh cay nuay kita problema na vida, sino cay ta satisfecha kita  con el diaton espiritual necesidad y ta pricura queda cerca con Dios. (Sant. 4:8) Paquemodo kita puede hace con ese? Na este articulo, hay discuti kita tres cosas que puede ayuda kanaton para queda deverasan alegre.

4. Cosa el primer cosa que debe kita hace para queda deverasan alegre? (Salmo 1:1-3)

⁴ UNA: Para queda deverasan alegre, debe kita obtene espiritual comida. El maga gente y el maga animal necesita fisical comida para vivi. Pero, el maga gente lang el puede obtene espiritual comida. Y necesita kita con ese. Amo se el razon si porque ya habla si Jesus: “El gente gendeh ta vivi na pan lang, sino na todo maga palabra que ta sale na boca del Dios.” (Mat. 4:4) Poreso, gendeh kita debe permiti que pasa el dia que nuay kita le con el Palabra del Dios, el Biblia. El salmista ya habla: ‘Alegre el gente que el alegria talli na ley de Jehova y ta le con ese dia y denoche.’​—Le con el Salmo 1:1-3.

5-6. (a) Cosa kita puede aprende na Biblia? (b) Na cosa maga manera puede ayuda kanaton si le kita con el Biblia?

⁵ Cay ta ama kanaton si Jehova, ya dale le kanaton maga importante informacion na Biblia si paquemodo tene un alegre vida. Ya aprende kita si cosa el de suyu proposito para kanaton. Ya sabe kita si paquemodo kita queda cerca con ele y obtene el de suyu perdon. Y ya aprende tambien kita acerca na bonito esperanza que ya promete le kanaton na futuro. (Jer. 29:11) Ya queda gayot kita alegre cay ya sabe kita este maga verdad cuando ya estudia kita con el Biblia!

⁶ Sabe kita que el Biblia lleno tambien de  maga practical consejo para na diaton vida. Si sigui kita con ese maga consejo, hay queda kita alegre. Si tan luya tu por causa na de tuyu maga problema, dale mas tiempo para le con el Palabra de Jehova y medita con ese. Si Jesus ya habla: “Mas alegre pa aquellos quien ta oi y ta obedece con el Palabra de Dios!”​—Luc. 11:28.

7. Cosa tu puede hace para mas beneficia na de tuyu lehida del Palabra del Dios?

⁷ Si ta le tu con el Palabra del Dios, dale tiempo para man enjoy con ese. Para ilustra, ya puede ya ba tu experiencia con este? Tiene quien ya cuci con el de tuyu favorito comida. Pero cay ta apura tu o tiene cosa ta pensa, paspas tu ya come y nuay gayot saborea con este. Na uliji, ya puede tu realiza que era hinay-hinay lang tu ya come para ya puede tu saborea con el cada subuh. Puede tambien se sucede si ta le tu con el Biblia. Posible, bien paspas gayot tu ta le que gendeh tu ta puede man absorb si cosa el mensaje de este. Poreso, dale tiempo para man enjoy le con el Palabra del Dios. Imagina con el maga ecsena y con el maga voz, y pensa acerca na cosa tu ya le. Si hace tu con este, hay queda tu mas alegre.

8. Na cosa manera “el fiel y sabio esclavo” ta hace el diila papel? (Mira tambien con el footnote.)

⁸ Ya iscuji si Jesus con “el fiel y sabio esclavo” para dale kanaton espiritual comida na justo tiempo y abundancia gayot kita na espiritual comida. * (Mat. 24:45, NWT) Estaba na Biblia el todo cosa ta produci el fiel esclavo. (1 Tes. 2:13) Poreso, ese espiritual comida puede ayuda kanaton para sabe el pensamiento de Jehova como cosa ele ya revela na Escritura. Ese el razon si porque ta le kita con el magasin Watchtower y Awake! y el maga articulo na jw.org. Ta prepara kita para na midweek y weekend miting na congregacion. Y ta mira kita cada mes con el programa na JW Broadcasting.^® Si ta le y ta estudia kita con el Biblia, puede se ayuda kanaton para puede hace con el ika-dos cosa que puede ayuda kanaton para queda deverasan alegre.

9. Cosa el ika-dos cosa que puede ayuda kanaton para queda deverasan alegre?

⁹ IKA-DOS: Para queda deverasan alegre, necesita kita sigui con el maga principio de Jehova. El salmista ya escribi: “Alegre el todo quien ta tiene miedo con Jehova, quien ta camina na De Suyu camino.” (Sal. 128:1) Si ta tiene kita miedo con Jehova, quierre decir de este que bien grande el diaton respeto con ele poreso ta evita kita hace maskin cosa que gendeh ta hace alegre con ele. (Prov. 16:6) Poreso, ta continua kita sigui con el maga principio del Dios acerca si cosa el justo y gendeh justo asegun na Biblia. (2 Cor. 7:1) Hay queda kita alegre si ta hace kita con el maga cosas que quierre si Jehova y ta desaleja na maga cosas que ta odia le.​—Sal. 37:27; 97:10; Roma 12:9.

10. Asegun na Roma 12:2, cosa el diaton responsibilidad?

¹⁰ Le con el Roma 12:2. El un persona posible sabe que tiene autoridad si Jehova para decidi si cosa el justo y gendeh justo pero debe tambien le sigui con el maga principio del Dios. Por ejemplo, el un persona posible sabe que el gobierno tiene el derecho para pone maga speed limit na camino. Pero, baka gendeh le conforma sigui con ese maga ley. Poreso, bien corre le ta maneja. Por medio na diaton conducta, ta dale kita mira si deverasan ba gayot kita ta creé que el maga principio de Jehova amo el de con todo bueno para kanaton. (Prov. 12:28) Ese el cosa ya sinti si David poreso ya habla le acerca con Jehova: “Ya manda  tu conmigo sabe el camino del vida. Na de tuyu presencia, tiene grande alegria; na de tuyu derecha mano, tiene alegria hasta para cuando.”​—Sal. 16:11.

11-12. (a) Si tan lingasa kita o tan luya, na cosa kita debe queda con cuidao? (b) Paquemodo el maga palabra na Filipo 4:8 puede ayuda kanaton si ta iscuji entretenimiento?

¹¹ Si tan lingasa kita o tan luya, posible tiene kita cosa ta hace para ulvida con el diaton maga problema. Razonable se pero debe kita queda con cuidao que gendeh hace el maga cosas que ta odia si Jehova.​—Ef. 5:10-12, 15-17.

¹² Na de suyu carta para na maga de Filipo, si apostol Pablo ya anima con el maga Cristiano que continua considera con el maga cosas que “bueno y limpio, el maga cosa-cosa que kita ta ama y . . . todo clase de virtud.” (Le con el Filipo 4:8.) Maskin pa el cosa ya escribi si Pablo gendeh acerca na entretenimiento, debe este afecta con el recreacion que ta iscuji kita. Pruba hace este: Cada vez ta sale el maga palabra “maga cosa-cosa” na texto, cambia con ese na maga palabra “cancion,” “salida,” “novela” o “video game.” Ayuda este contigo para determina si cosa posible el aceptable na mirada del Dios y el maga cosas que posible gendeh aceptable con ele. Quierre kita sigui con el maga alto principio de Jehova. (Sal. 119:1-3) Y si tiene kita limpio conciencia, puede kita hace con el sunod cosa que puede ayuda kanaton para queda deverasan alegre.​—Act. 23:1.

13. Cosa el ika-tres cosa que puede ayuda kanaton para queda deverasan alegre? (Juan 4:23, 24)

¹³ IKA-TRES: Asigura que una na de tuyu vida el adoranza con Jehova. Ya crea kanaton si Jehova poreso debe kita adora con ele. (Rev. 4:11; 14:6, 7) Necesita kita hace prioridad que adora con ele na manera que quierre le​—“na Espiritu y na verdad.” (Le con el Juan 4:23, 24.) Quierre kita que el sagrao espiritu del Dios hay guia con el diaton adoranza para uyun este na maga verdad que puede incuntra na de suyu Palabra. Debe una na diaton vida el diaton adoranza maskin pa ta queda kita na lugar donde tiene restriccion o ta prohibi con el diaton trabajo. Mas de 100 del diaton maga hermano y hermana el na preso ahora por causa lang cay maga Testigo de Jehova sila. * Maskin pa ansina, ta hace sila el todo para puede reza, estudia y habla con otro acerca na diaton Dios y de suyu Reino. Si ta insulta o ta persigui kanaton, puede siempre kita queda alegre cay sabe kita que junto kanaton si Jehova y hay premia le kanaton.​—Sant. 1:12; 1 Ped. 4:14.

14. Cosa ya sucede con el un joven hermano na Tajikistan y porque?

¹⁴ El maga experiencia del diaton maga hermano y hermana ta dale prueba que el tres cosas que nuevo lang kita ya considera ta ayuda gayot para queda kita deverasan alegre, maskin cosa pa el diaton circumstancia. Considera si cosa ya sucede con el 19 año hermano que si Jovidon Bobojonov, de Tajikistan, cay nuay le conforma queda soldao. Del Octubre 4, 2019, ya saca con ele na diila casa, ya pone na preso y ya trata como un criminal. Ya sabe el otro maga nacion acerca con este injusticia. Asegun na report, tiene con ele quien ya gulpia para forza con ele que hace juramiento y visti uniforme de soldao. Despues de ese, ya sentencia con ele y ya pone na labor camp hasta ya llega el tiempo que el presidente del nacion ya manda que larga con ele. Na todo cosa ya experiencia si Jovidon, ya mentena le con el de suyu integridad y alegria. Ya  puede le se hace cay ya pensa le con el de suyu espiritual necesidad.

15. Paquemodo ya puede obtene espiritual comida si Jovidon cuando na preso le?

¹⁵ Cuando na preso le, ya puede obtene espiritual comida si Jovidon maskin pa nuay ele Biblia o uno del diaton maga publicacion. Paquemodo? El maga hermano y hermana alla ya lleva con ele comida y ya escribi con el texto del dia na maga grocery bag. Poreso, ya puede ele le con el Biblia y medita con este cada dia. Despues le sale na preso, ya dale le este consejo para con aquellos nuay pa experiencia grabe probanza: “Bien importante que usa tu enbuenamente con el de tuyu libertad ahora para mas hace hondo el de tuyu saber acerca con Jehova. Puede tu este hace si le tu con el de suyu Palabra y con el diaton maga publicacion.”

16. Na cosa yan focus si Jovidon?

¹⁶ El diaton hermano ya sigui con el maga principio de Jehova. En vez de pensa acerca na maga gendeh justo deseo y hace maga mal cosas, yan focus le con Jehova y si cosa el importante con Ele. Ya observa si Jovidon con el maga bonito creacion del Dios. Cada aga, ta puede le oi que ta canta el maga pajaro. Y si denoche, ta mira le con el luna y con el  maga estrellas. Ele ya habla: “Ese maga regalo que estaba con Jehova ya puede conmigo anima y hace alegre.” Si ta aprecia kita con el maga espiritual y fisical provision de Jehova, ta queda kita alegre y ese alegria puede ayuda kanaton para aguanta.

17. Paquemodo el maga palabra na 1 Pedro 1:6, 7 puede ayuda con el un persona quien posible ta enfrenta situacion igual de Jovidon?

¹⁷ Si Jovidon ya hace tambien una con el adoranza con Jehova. Sabe le que importante que mentena el de suyu integridad con el verdadero Dios. Si Jesus ya habla: “Adora con el Señor, el dituyo Dios, con ele lang gayot sirvi.” (Luc. 4:8) Quierre el maga oficial y el maga soldao que descanza ya si Jovidon queda uno del maga Testigo de Jehova. Nuay le se hace sino sincero le ya reza con Jehova cada aga y cada denoche para ayuda con ele que aguanta y gendeh man compromiso. Maskin pa na grabe maltratamiento que ya experiencia si Jovidon, nuay gayot le man compromiso. Como resulta, bien alegre le ahora cay tiene le un cosa que nuay le antes con ele arresta, gulpia y hace preso​—un mas fuerte fe cay ya experiencia probanza.​—Le con el 1 Pedro 1:6, 7.

18. Paquemodo kita puede mentena con el diaton alegria?

¹⁸ Sabe si Jehova si cosa kita necesita para queda deverasan alegre. Si hace tu con el tres cosas que puede ayuda contigo para queda deverasan alegre, puede tu mentena con el de tuyu alegria maskin pa na maga dificultad. Como resulta, puede tambien tu habla: “Alegre el maga gente que el Dios amo si Jehova!”​—Sal. 144:15.