“SI TIENE uno kaninyo quien gendeh man guerra contra na France o England, todo kamo hay muri!” ya grita el un oficial de Nazi na un grupo de maga Testigo de Jehova durante el Guerra Mundial II. Maskin pa cerca lang el maga soldao de Nazi, nuay ni uno na este maga hermano el yan compromiso. Ya dale gayot sila mira que animoso sila! Un ejemplo este que ta dale mira si cosa el mirada del maga Testigo de Jehova na guerra: Gendeh kita ta participa na guerra de este mundo. Maskin pa pone na peligro el diaton vida, ta esta kita neutral na maga conflicto del mundo.

1. EL MAGA SIERVO DEL DIOS PARTE DEL UN NACION

De antes, si Jehova ya iscuji un nacion para queda de suyu maga siervo​—el nacion de Israel. Ya llama le con el maga Israelita como de suyu “especial propiedad estaba na todo maga gente.” (Ex. 19:5) Ya dale tambien el Dios kanila un especifico teritorio. Poreso si ta manda el Dios con el maga Israelita que man guerra contra na otro maga nacion, gendeh sila tan guerra o ta mata con otro quien ta sirvi tambien con Jehova. *

Ahora, el maga siervo de Jehova amo estaba na “todo maga nacion, raza, tribo y lenguage.” (Rev. 7:9) Si el maga siervo del Dios participa na guerra, puede sila man contra​—y mata pa gane—​con el otro maga siervo del Dios.

 2. SI JEHOVA EL YA MANDA CON EL MAGA ISRAELITA PARA ANDA MAN GUERRA

De antes, si Jehova el quien ya decidi si cuando y porque el maga Israelita necesita anda man guerra. Por ejemplo, el Dios ya manda con el maga Israelita que man guerra para hace con el de suyu juzgamiento con el maga Canaanita. Ese maga persona conocido por causa cay ta adora sila con el maga demonio, ta comete maka-asco sexual imoralidad y ta ofrece con el diila maga anak. Ya manda si Jehova con el maga Israelita que quita con este mal influencia na lugar onde le ya promete kanila. (Lev. 18:24, 25) Cuando ta esta ya el maga Israelita na Tierra Prometido, tiene vez ta permiti kanila el Dios que defende con el Israel na de este maga enemigo. (2 Sam. 5:17-25) Pero, nuay permiti si Jehova que el maga Israelita mismo el decidi que anda man guerra. Cuando ya hace sila se, mas mucho gendeh bueno el resulta.​—Num. 14:41-45; 2 Cron. 35:20-24.

Ahora, nuay permiti si Jehova con el maga gente que anda man guerra. El maga nacion tan guerra para hace el cosa quierre el maga gente y gendeh si cosa quierre el Dios. Posible sila principia man guerra cay quierre sila queda grande el diila teritorio, tene manada sen o por causa na politica. Pero, quetal aquellos quien ta habla que tan guerra sila na nombre del Dios para defende con el diila religion o para mata con el maga enemigo del Dios? Hay protege si Jehova con el de suyu maga deverasan siervo y hay destroza con el de suyu maga enemigo na un guerra na futuro​—el guerra de Armagedon. (Rev. 16:14, 16) Na este guerra, el maga soldao del Dios amo el maga espiritu creatura y gendeh el de suyu maga siervo na tierra.​—Rev. 19:11-15.

3. EL MAGA ISRAELITA NUAY MATA CON AQUELLOS QUIEN TIENE FE CON JEHOVA

De antes, el maga soldao de Israel ta dale mira lastima con aquellos quien ta demonstra fe con Dios y ta mata con aquellos lang con quien ya juzga si Jehova que debe muri. Nota con este dos ejemplo. Maskin pa ya manda si Jehova que destroza con el Jerico, el maga Israelita nuay  mata con Rahab y con el de suyu familia por causa na de suyu fe. (Jos. 2:9-16; 6:16, 17) Na uliji, nuay destroza con el maga Gibeonita cay ya dale sila mira respeto con Dios.​—Jos. 9:3-9, 17-19.

Ahora, si tan guerra el maga nacion, el maga soldao gendeh tan alang-alang que mata con el maga gente que tiene fe o maskin con aquellos maga inocente civilian.

4. EL MAGA ISRAELITA DEBE SIGUI CON EL MAGA LEY DEL DIOS ACERCA NA GUERRA

De antes, si Jehova ya manda con el maga soldao de Israel que anda man guerra asegun na de suyu maga instruccion. Por ejemplo, tiene vez el Dios ta habla kanila que extende “arreglo de paz” na un ciudad que hay ataca sila. (Deut. 20:10) Ta expecta tambien si Jehova que el maga soldao de Israel hay mentena con el diila mismo cuerpo y el diila campo que limpio na fisical y na moral. (Deut. 23:9-14) El maga soldao de otro maga nacion tan rape con el maga mujer despues sila saca con el diila teritorio pero ya prohibi se si Jehova que hace el maga Israelita. Gane, puede lang sila casa con el maga cautivo mujer un mes desde ya saca sila con el ciudad.​—Deut. 21:10-13.

Ahora, mayoria del maga nacion ta firma un contrata donde tan uyun sila que man guerra asegun na cuanto maga ley. Maskin pa el proposito de este amo para protege con el maga civilian, mas mucho del maga nacion gendeh ta sigui con este maga ley.

5. YAN GUERRA EL DIOS PARA NA DE SUYU NACION

De antes, yan guerra si Jehova para na maga Israelita y mas mucho ya hace le maga milagro para puede sila ganá na guerra. Por ejemplo, paquemodo ya ayuda si Jehova con el maga Israelita para ganá contra na ciudad de Jerico? Na direccion de Jehova, cuando el maga Israelita “ya grita suena igual si na guerra, el pader ya tumba” y mas pronto para kanila que saca con el ciudad. (Jos. 6:20) Y paquemodo sila ya ganá na guerra contra na maga Amorita? “Ya hace cae si Jehova maga grande ulan de hielo estaba na cielo . . . Gane, mas manada el ya muri na ulan de hielo contra na espada del maga Israelita.”​—Jos. 10:6-11.

EL MAGA DEVERASAN CRISTIANO TA MENTENA PAZ

Como cosa kita ya aprende, el diaton situacion ahora bien diferente na Israel de antes. Pero, este maga diferencia gendeh lang amo el razon si porque kita gendeh ta anda na guerra. Tiene pa otro. Por ejemplo, el Dios ya predicta que na ultimo maga dia, aquellos quien tiene saber acerca con ele gendeh mas “aprende . . . man guerra,” poreso quierre decir gendeh tambien sila participa na guerra. (Isa. 2:2-4) Omento pa, el Cristo ya habla que el de suyu maga dicipulo “gendeh del mundo”; hay esta sila neutral na maga conflicto del mundo.​—Juan 15:19.

El Cristo ya anima tambien con el de suyu maga siguidores que hace pa mas. Ya habla le kanila que evita con el maga cosas que ta resulta na agrabio, rabia y guerra. (Mat. 5:21, 22) Omento pa, ya habla le con el de suyu maga siguidores que “trabaja por causa del paz” y ama con el diila maga enemigo.​—Mat. 5:9, 44.

Paquemodo kita este puede hace como individual? Posible, nuay kita deseo para participa na guerra pero ta sinti ba kita que enemigo diaton el un persona na congregacion? Ojala continua kita hace esfuerzo para quita con ese clase de sentido.​—Sant. 4:1, 11.

Gendeh kita ta participa na guerra del maga nacion sino ta hace kita esfuerzo para mentena paz y ama con uno y otro. (Juan 13:34, 35) Ojala queda kita determinao que esta neutral mientras ta espera kita con el dia cuando hay termina si Jehova con el todo guerra hasta para cuando.​—Sal. 46:9.