Durante aquel año, el organizacion ya hace cuanto cambio para el maga Estudiante del Biblia hay queda unido na diila adoranza. El The Watch Tower ya principia man publish maga comento que ta explica con el texto que ta considera sila na diila Miting de Rezo, Alabanza y Testimonia cada semana. Omento pa, el maga Estudiante del Biblia ya hace tambien un calendario que ta dale mira si cosa texto hay discuti cada semana na miting y si cosa cancion canta durante el diila personal estudiada y de familia adoranza.

Na diila maga miting, el maga Estudiante del Biblia ta dale “maga testimonia” acerca na diila experiencia na ministerio, si cosa sila ta rindi gracias con Jehova, ta canta o ta reza. Si Eva Barney, quien ya bautiza del 1923 na edad de 15, ya acorda: “Si quierre tu dale testimonia, necesita tu para y principia habla un cosa igual como, ‘Quierre yo rindi gracias con el Señor na todo buen cosas que ya hace le para conmigo.’” El cuanto maga hermano quierre-quierre dale testimonia. Ya continua si Hermana Barney: “Si Hermano Godwin tiene manada cosas que quierre rindi gracias con el Señor. Pero cuando ya mira el de suyu mujer que dol malingasa ya el hermano quien ta conduci, ya hala le con el ropa del de suyu marido poreso ya descanza este man cuento y ya sinta.”

Una vez na un mes, el cada congregacion tiene ta hace un especial Miting de Rezo, Alabanza y Testimonia. El The Watch Tower de Abril 1, 1923, ya menciona acerca con este miting: “El media porcion del miting debe dedica na maga testimonia acerca na ministerio y para anima con el maga predicador. . . . Ta creé kame que na este manera, hay queda mas unido el maga hermano y hermana.”

Si Charles Martin, un 19 año predicador, estaba na Vancouver, Canada, ya beneficia gayot na este maga miting. Ele ya acorda: “Aqui yo ya aprende si cosa habla si ta predica na casa en casa. Pirmi tiene quien ta relata con el diila experiencia na predicacion. Ya dale se conmigo idea si cosa habla y si paquemodo contesta si tiene oposicion.”

Ya queda tambien mas unido el maga hermano y hermana cay tiene sila maga dia donde ta anima con todo que sale predica. El Abril 1, 1923, issue del The Watch Tower ya habla: “Para queda kita todo unido na igual trabajo . . . , ta anima kanaton que na Martes, Mayo 1, 1923, todo kita sale predica. Despues de ese, ansina el cosa kita hace  na primer Martes del cada mes . . . El maga miembro del cada congregacion debe participa na este trabajo.”

Maskin el maga joven Estudiante del Biblia ya participa na este trabajo. Si Hazel Burford que 16 año lang aquel tiempo ya acorda: “El Bulletin tiene maga sampol discusion que puede kame man memorize. a Junto con Lolo, con ganá yo ya participa na este todo maga actividad.” Pero, nuay expecta si Hermana Burford na reaccion del un hermano na de suyu predicacion. Ele ya relata: “El un de edad hermano nuay gayot gusta cay tan cuento yo con el maga gente. Aquel tiempo, el cuanto nuay entende que el todo maga Estudiante del Biblia, incluido el ‘maga soltero y dalaga,’ debe alaba con el diaton Creador.” (Sal. 148:​12, 13) Pero, ya continua predica si Hermana Burford. Ya puede le atende na segundo clase de Gilead School y ya sirvi como un misionario na Panama. Despues del cuanto tiempo, aquel maga hermano yan adjust con el diila mirada acerca na participacion del maga jovenes na ministerio.

El maga convencion ya ayuda tambien con el maga hermano para queda mas unido. Manada na este maga convencion, tiene maga dia donde ta sale el todo para predica. Por ejemplo, na convencion na Winnipeg, Canada, invitao el todo quien ya atende na convencion para predica na Marzo 31. Manada maga gente con quien ya puede predica na este maga especial dia y bonito el maga resulta. Del Agosto 5, maga 7,000 gente el quien ya atende na otro convencion na Winnipeg. Na aquel tiempo, este el de con todo alto numero del quien ya atende na un convencion na Canada.

El de con todo importante convencion del maga siervo de Jehova del 1923 ya hace del Agosto 18-26, na Los Angeles, California. Cuanto semana antes el convencion, el maga diario tiene maga advertisement acerca na este ocasion y el maga Estudiante del Biblia ya puede dale mas de 500,000 handbill. Ya pone sila maga banner na maga publico transportacion y na maga coche para anuncia con el convencion.

 Del Sabado, Agosto 25, ya dale si Hermano Rutherford con el talk “Maga Carnero y Cabrito,” donde ya hace le claro que el “maga carnero” amo el maga gente quien tiene justo condicion de corazon y hay vivi na un paraiso tierra. Ya introduci tambien le un resolucion que ya llama “Un Aviso.” Na este resolucion, ya condena le con el Cristianismo y ya anima con el maga sincero persona que separta na “Grande Babilonia.” (Rev. 18:​2, 4) Na uliji, el maga activo Estudiante del Biblia na entero mundo ya distribui millones de copia de este resolucion.

Na ultimo dia del convencion, mas de 30,000 el quien ya puede oi con el talk de Hermano Rutherford que tiene titulo “El Todo Nacion Ta Marcha Para na Armagedon Pero Millones que Vivo Ahora el Nunca Muri.” Cay sabe sila que manada el quien atende, el maga Estudiante del Biblia yan renta con el Los Angeles Coliseum que nuevo lang ya construi. Y para asigura que puede oi el todo, el maga hermano ya usa con el loudspeaker system del stadium que nuevo tecnologia aquel tiempo. Manada tambien el quien ya puede oi con este programa por medio na radio.

Del año 1923, mas ya queda grande el trabajo predicacion na Africa, Europe, India y South America. Na India, mientras ta cuida con el de suyu mujer y seis anak, si A. J. Joseph ta ayuda produci maga literatura na lengguaje Hindi, Tamil, Telugu y Urdu.

Na Sierra Leone, el maga Estudiante del Biblia que si Alfred Joseph y Leonard Blackman ya escribi na world headquarters na Brooklyn, New York, para pidi ayuda. Del Abril 14, 1923, ya ricibi sila con el contestacion. “Un Sabado noche,” ya habla si Alfred, “tiene conmigo quien ya llama que nuay yo expecta.” El quien ya llama con ele bien suena ya pregunta, “Etu ba quel quien ya escribi na Watch Tower Society quien ta pidi omento predicador?” “Si,” ya contesta si Alfred. “Bueno, conmigo sila ya imbia.” El quien yan cuento con ele amo si William R. Brown. Ya llega le aquel dia estaba na Caribbean junto con el de suyu mujer que si Antonia y el diila maga anak que kanda Louise y Lucy. Nuay mas espera por largo tiempo el maga hermano para mira con Hermano Brown y con el de suyu familia.

Ya continua relata si Alfred: “Alamañana, ta discuti kame de Leonard acerca con el Biblia como cosa kame ta hace cada semana. Dayun lang, ya mira kame con el un alto hombre na puerta. Si Hermano Brown quel. Cay bien activo gayot  le, quierre dayun le dale discurso publico alamañana.” Nuay pa un mes, ya puede distribui si Hermano Brown con el todo publicacion que ya lleva le. Nuay dura, ya ricibi le omento 5,000 libro y despues lang del cuanto tiempo, ya acaba ese todo y ta necesita omento libro. Pero nuay conoce con Hermano Brown como un hombre quien ta vende libro. Na entero vida de suyu como un activo siervo de Jehova, pirmi le ta usa con el Biblia na de suyu maga talk poreso ya llama con ele Bible Brown.

Na Germany, el maga hermano ya decidi que cambia con el branch office na Barmen para na otro lugar cay bien diutay gayot este ciudad. Ya oi tambien sila que gendeh dura, el maga soldao de France hay ataca con ese ciudad. Ya incuntra el maga Estudiante del Biblia un grande building na Magdeburg que justo para onde man print maga literatura. Del Junio 19, ya acaba ya cambia el maga hermano con el maga printing equipment y otro pa maga gamit para na nuevo Bethel na Magdeburg. Na dia despues habla na world headquarters que ya puede ya sila cambia, ya anuncia na diario que el France ya ataca con el ciudad de Barmen. Ya rindi gayot gracias el maga hermano cay ya protege y ya ayuda kanila si Jehova.

Na Brazil, si George Young, quien ya viaja largo distancia para predica con el buen noticia, ya establicia un nuevo branch y ya principia man publish con el The Watch Tower na lengguaje de Portuguese. Adentro lang na cuanto meses, ya puede le distribui mas de 7,000 literatura. Alegre gayot si Sarah Ferguson cuando ya visita si Hermano Young con el diila familia. Ta le ya ele con el The Watch Tower desde 1899 pero nuay pa le puede dale mira el de suyu dedicacion por medio na bautismo. Despues del cuanto meses, si Hermana Ferguson y el de suyu cuatro anak ya puede ya bautiza.

Na fin del año, el The Watch Tower de Deciembre 15, 1923 ya menciona si paquemodo el maga cambio na adoranza ya puede afecta na maga Estudiante del Biblia. Este ta habla: “Claro puede mira que el maga congregacion . . . tiene fuerte espiritualidad . . . Ojala queda kita preparao para na mas trabajo y activo y con alegria continua sirvi con Dios durante el año 1924.”

Un bien bonito año tambien para na maga Estudiante del Biblia el 1924. El maga hermano na Bethel cuanto meses ya ta trabaja na un lugar na Staten Island que cerca lang na diila headquarters na Brooklyn. El maga facilidad que ya construi alla ya completa na maga primer meses del 1924. Ya ayuda este para hace mas unido con el maga hermano y hermana, y para predica con el buen noticia na manera que nuay pa puede hace de antes.