1-2. Cosa el de con todo buen manera para le y estudia con el Biblia? Ilustra.

 IMAGINA que quierre tu cumpra un casa. Cosa tu quierre mira antes tu cumpra con ese? El letrato lang ba del frentero del casa? Asigurao, quierre tu mira con el casa na personal para puede tu observa el alrededor de este, entra para chequia con el todo cuarto y mira enbuenamente con el todo parte del casa. Baka quierre pa gane tu sabe si paquemodo ya construi con este. Asigurao, quierre tu mira con el todo detalle del casa que ta plaña tu cumpra.

² Ansina tambien kita puede hace si ta le y ta estudia con el Biblia. El un scholar na Biblia ya habla que el Biblia amo igual na “un grande building que bien alto y tiene hondo fundacion.” Si ansina, paquemodo kita queda bien familiar na cosa ta habla el Biblia? Si paspas tu con este le, posible puede lang tu aprende el maga simple verdad—“el primero maga leccion . . . del Palabra del Dios.” (Heb. 5:12) En vez de hace se, igual con aquel casa, entra “adentro” para examina con el todo detalle. El un buen manera para estudia con el Biblia amo que mira si paquemodo conectao con uno y otro el diferente parte del mensaje de este. Pricura entende gendeh lang si cosa tu ta creé sino si porque tambien tu ta creé con ese.

3. Cosa ya anima si apostol Pablo con el de suyu maga hermano y hermana que hace y porque? (Efeso 3:14-19)

³ Para puede gayot kita entende con el todo detalle del Palabra del Dios, debe kita aprende maga hondo verdad na Biblia.  Ya anima si apostol Pablo con el de suyu maga hermano y hermana que estudia enbuenamente con el Palabra del Dios para puede gayot sila “entende . . . si cosa ba el anchor y el largor, el altor y el hondura” del verdad. Si hace sila se, hay queda mas fuerte el fundacion del diila fe. (Le con el Efeso 3:14-19.) Ansina tambien el cosa kita necesita hace. Mira kita si paquemodo kita puede estudia enbuenamente con el Palabra del Dios para puede gayot kita entende si cosa quierre decir de este.

4. Cosa kita puede hace para queda mas cerca con Jehova? Dale maga ejemplo.

⁴ Como maga Cristiano, gendeh kita contento que aprende lang maga simple cosas na Biblia. Na ayuda del sagrao espiritu del Dios, quierre kita aprende “maskin el maga secreto [o hondo cosas] del Dios.” (1 Cor. 2:9, 10) Quierre ba tu principia un personal study project que puede hace contigo mas cerca con Jehova? Por ejemplo, puede tu man research si paquemodo le ya demonstra el de suyu amor na de suyu maga siervo de antes y si paquemodo se ta dale prueba que ta ama tambien le contigo. Baka quierre tu examina con el arreglamiento de adoranza na Israel de antes y compara con este na arreglamiento de adoranza que ta hace el maga Cristiano ahora. O baka quierre tu estudia con el todo detalle del maga profecia que ya cumpli si Jesus durante el de suyu vida y ministerio aqui na tierra.

5. Tiene ba tu un topico que quierre tu hace como de tuyu personal study project?

⁵ Ya pregunta con el cuanto quien quierre-quierre man research acerca na maga topico na Biblia si cosa sila quierre estudia na Palabra del Dios. Puede tu mira con el cuanto del diila contestacion na cajon “ Maga Topico Para na Personal Estudiada.” Puede tu man enjoy estudia con ese maga topico si usa tu con el Watch Tower Publications Index o con el Research Guide for Jehovah’s Witnesses. Si tiene tu hondo estudiada del Biblia, puede se hace fuerte con el de tuyu fe y ayuda se contigo que “incuntra . . . el saber del Dios.” (Prov. 2:4, 5) Considera kita ahora con el cuanto hondo verdad na Biblia que puede kita estudia.

6. (a) Cosa el diferencia entre na plano y na proposito? (b) Porque kita puede habla que hasta para cuando el proposito de Jehova para na maga gente y na tierra?

⁶ Considera por ejemplo si cosa ta habla el Biblia acerca na proposito del Dios. Diferente el cosa quierre decir del plano y del proposito. El plano amo igual na un especifico y pijo ruta que puede contigo guia na de tuyu destinacion. Pero, puede falla el plano si tiene un sanggadura na camino. El proposito tan focus mismo na de tuyu destinacion. Sabe kita si onde kita quierre anda pero gendeh pijo el diaton ruta. Si cerrao el un camino, puede kita man adjust y pasa na otro camino. Ansina el cosa ya hace si Jehova. Hinay-hinay le ya revela el de suyu proposito na Biblia. (Ef. 3:11) Puede iscuji si Jehova diferente manera para cumpli con el de suyu proposito y “ta hace [le] el todo cosas para cumpli” con ese. (Prov. 16:4) Y el maga resulta del cosa ta hace si Jehova hay esta hasta para cuando. Cosa el proposito de Jehova y cosa maga cambio le ya hace para puede cumpli con ese?

7. Despues man rebelde kanda Adan y Eva, paquemodo si Jehova ya cambia con el manera si paquemodo le cumpli con el de suyu proposito? (Mateo 25:34)

⁷ Ya habla el Dios con el maga primer gente si cosa el de suyu proposito para kanila. Necesita sila “tene . . . maga anak y queda manada, llena con el tierra y domina con este y tene autoridad . . . na cada animal na tierra.” (Gen. 1:28) Cuando yan rebelde kanda Adan y Eva que ya causa para culpa el maga gente, nuay se sangga con Jehova para cumpli con el de suyu proposito. Ya cambia le el manera si paquemodo cumpli con ese. Ya decidi dayun le que establicia un Reino na cielo que hay cumpli con el de suyu original proposito para na cielo y na tierra. (Le con el Mateo 25:34.) Na de suyu iscujido tiempo, ya imbia si Jehova con el de suyu unico Anak na tierra para enseña con el maga gente acerca na Reino y dale con el de suyu vida para rescata kanaton na pecado y muerte. Despues, ya resucita con Jesus para na cielo para rula como Rey na Reino del Dios. Pero, tiene pa kita cosa mas puede aprende acerca na proposito del Dios.

8. (a) Cosa el tema del Biblia? (b) Como cosa ya menciona na Efeso 1:8-11, cosa el ultimo proposito de Jehova? (Mira con el letrato na cover.)

⁸ El tema del Biblia amo que hay vindica con el nombre de Jehova mientras ta cumpli le con el de suyu proposito para na tierra por medio na de suyu Reino bajo na rulanza del Cristo. Gendeh puede cambia con el proposito de Jehova. Ya promete le que hay sucede el todo cosa le ya habla. (Isa. 46:10, 11, ftn.; Heb. 6:17, 18) Llega el tiempo, el tierra hay queda un paraiso donde el maga perfecto y recto descendiente de Adan y Eva hay “vivi . . . hasta para cuando.” (Sal. 22:26) Pero, gendeh lang ese el cosa quierre cumpli si Jehova. El ultimo proposito de suyu amo que hace unido con el de suyu maga siervo na cielo y na tierra. Despues, el todo hay queda leal y obedece con Jehova como el diila Soberano. (Le con el Efeso 1:8-11.) Asigurao, tan bilib gayot tu si paquemodo ta cumpli si Jehova con el de suyu proposito.

9. Si le kita con el Biblia, paquemodo de adelantao el cosa kita puede sabe acerca na futuro?

⁹ Considera con el profecia que ya menciona si Jehova na jardin de Eden, como cosa puede le na Genesis 3:15. b Ta refiri este na maga suceso que hay cumpli con el de suyu proposito. Pero, hay sucede este despues pa  del miles de año. Por ejemplo, ya habla el Dios con Abraham que despues del manada generacion, el uno del de suyu maga descendiente hay queda el Cristo. (Gen. 22:15-18) Y despues, del 33 C.E., ya hace iri con Jesus na talon, como cosa ya predicta. (Act. 3:13-15) El ultimo suceso del profecia—donde machaca con el cabeza de Satanas—hay sucede mas de 1,000 año pa na futuro. (Rev. 20:7-10) Y el Biblia ta revela si cosa hay sucede na fin del pelea entre na sistema de Satanas y na organizacion de Jehova.

10. (a) Cosa maga suceso el cerca ya sucede? (b) Paquemodo kita puede prepara con el diaton pensamiento y corazon? (Mira con el footnote.)

¹⁰ Pensa acerca con este maga extraordinario suceso que ya predicta el Biblia. Una, el maga nacion hay proclama que “tiene paz y seguridad.” (1 Tes. 5:2, 3, El Nuevo Testamento) Derepente lang, hay principia el grande tribulacion cuando el maga nacion hay ataca con el todo falso religion. (Rev. 17:16) Despues de ese, posible na milagroso manera, puede kita mira “con el Anak del Gente [que] ta vene incima del maga celaje del cielo con grande poder y gloria.” (Mat. 24:30) Hay juzga si Jesus con el maga gente y hace separta con el maga carnero na maga cabrito. (Mat. 25:31-33, 46) Pero, tiene tambien cosa hace si Satanas. Por causa na de suyu rabia, hay manda le move con el un alianza del maga nacion que ya llama el Biblia como Gog na tierra de Magog para ataca con el maga siervo de Jehova. (Eze. 38:2, 10, 11) Na ese tiempo, el maga iscujido quien ya queda aqui na tierra hay man junto con el Cristo y con el de suyu maga soldao na cielo para man guerra na Armagedon—el ultimo suceso na grande tribulacion. c (Mat. 24:31; Rev. 16:14, 16) Despues, hay principia ya el Un Mil Año Rulanza del Cristo na entero tierra.—Rev. 20:6.

11. Cosa oportunidad tu tiene si vivi ya tu hasta para cuando? (Mira tambien con el letrato.)

¹¹ Ahora, mira pa kita si cosa sucede despues. El Biblia ya habla que el diaton Creador “ya pone . . . na [diaton] corazon el eternidad.” (Ecl. 3:11) Pensa si cosa este quierre  decir para contigo y na de tuyu relacion con Jehova. Acerca con este, bonito el cosa ya habla el libro Draw Close to Jehovah, pagina 319: “Si ya vivi ya kita por cien, miles, millones o billones pa gane de maga año, mas manada ya kita cosa sabe acerca con Jehova contra na cosa kita sabe ahora. Pero, hay sinti siempre kita que bien manada cosas pa kita necesita aprende acerca con ele. . . . Gendeh kita puede imagina si paquemodo de bonito el vida na Paraiso pero el de con todo bonito acerca con ese amo que queda pa kita mas cerca con Jehova.” Pero ahora, mientras ta continua pa kita estudia con el Palabra del Dios, cosa pa kita puede examina?

12. Paquemodo kita puede mira para na cielo? Dale un ejemplo.

¹² El Palabra del Dios ta dale kanaton idea acerca na presencia de Jehova “na mas alto lugar.” (Isa. 33:5) El Biblia ta menciona maga bonito cosas acerca con Jehova y na de suyu organizacion na cielo. (Isa. 6:1-4; Dan. 7:9, 10; Rev. 4:1-6) Por ejemplo, puede kita le acerca na maga maka-bilib suceso que ya mira si Ezekiel cuando “ya abri el cielo y ya principia [le] mira maga vision del Dios.”—Eze. 1:1.

13. Cosa tu ya aprecia na papel de Jesus na cielo, como cosa ya menciona na Maga Hebreo 4:14-16?

¹³ Pensa tambien acerca na papel de Jesus na cielo como el diaton Rey y Alto Sacerdote. Por medio con ele, puede kita atraca na “trono” del Dios na rezo, pidi que dale kanaton mira lastima y ricibi el ayuda “cuando necesita kita” con ese. (Le con el Maga Hebreo 4:14-16.) Ojala gendeh kita permiti que pasa el dia que gendeh kita medita con el cosa ya hace y ta hace si Jehova y si Jesus na cielo para kanaton. El diila amor debe afecta y motiva kanaton que queda activo na diaton servicio y adoranza.—2 Cor. 5:14, 15.

14. Cosa el uno na de con todo buen cosas que puede kita hace para dale mira el diaton apresacion con Jehova y con Jesus? (Mira tambien con el maga letrato.)

 ¹⁴ El uno na de con todo buen manera para dale mira el diaton apresacion con Dios y con el de suyu Anak amo si pricura kita ayuda con otro para queda Testigo de Jehova y dicipulo de Jesus. (Mat. 28:19, 20) Amo se el cosa ya hace si apostol Pablo por causa na de suyu apresacion con Dios y con el Cristo. Sabe le que quierre si Jehova que “todo el maga gente ay salva y ay alcanza el completo conocimiento del verdad.” (1 Tim. 2:3, 4) Ya hace gayot le esfuerzo na ministerio para ayuda con el manada gente. Por medio con ese, puede le ayuda “salva con algunos, maskin cosa el [de suyu] sacrificio.”—1 Cor. 9:22, 23.

15. Asegun na Salmo 1:2, cosa kita hace para queda alegre?

¹⁵ El salmista ya habla que alegre el un persona si “el de suyu alegria talli na ley de Jehova” y si “ta medita le con el De Suyu ley dia y denoche.” (Sal. 1:1-3; ftn.) El un translator del Biblia que si Joseph Rotherham tiene cosa ya habla acerca con este texto na de suyu libro Studies in the Psalms. Ya habla le que el un persona “debe tene el fuerte deseo que ricibi el guia del Dios poreso hay busca le con este, estudia y dale largo tiempo para pensa acerca con este.” Ya habla tambien le que “si pasa el dia y el un persona nuay le con el Biblia, sayang aquel dia.” Puede tu man enjoy estudia con el Biblia si considera tu con el todo maga importante detalle y mira si paquemodo ese todo conectao con uno y otro. Maka-alegre gayot que estudia con el Palabra del Dios!

16. Cosa kita hay discuti na sunod articulo?

¹⁶ Gendeh bien dificil entende con el maga bonito verdad que ya enseña kanaton si Jehova na de suyu Palabra. Na sunod articulo, hay considera kita con el uno na maga hondo verdad—el grande espiritual templo de Jehova que ya menciona si Pablo na de suyu carta para na maga Hebreo Cristiano. Ojala este topico puede dale contigo alegria.