1. Porque dificil para kanaton que obedece?

 TAN dificil ba tu obedece tiene vez? Ya sucede se con Rey David poreso ya reza le con Dios: “Dale conmigo el deseo que obedece contigo.” (Sal. 51:12) Ta ama si David con Jehova. Maskin pa ansina, tiene maga tiempo que yan dificil obedece si David y ansina tambien kita. Porque? Una, ya hereda kita con el tendencia que queda desobediente. Ika-dos, pirmi ta hace manera si Satanas para man rebelde kita, como cosa le ya hace. (2 Cor. 11:3) Ika-tres, ta vivi kita na un mundo donde comon el rebellon—“el espiritu que ta trabaja adentro na corazon del maga rebelde.” (Ef. 2:2) Debe kita hace grande esfuerzo gendeh lang para resisti con el diaton tendencia que comete culpa sino para resisti tambien con el influencia del Diablo y de este mundo. Mas pa, debe tambien kita hace el todo para obedece con Jehova y con aquellos con quien le ya dale autoridad.

2. Cosa quierre decir que queda “preparao obedece”? (Santiago 3:17)

² Le con el Santiago 3:17, NWT. b El escritor del Biblia que si Santiago ya habla que el maga sabio gente “preparao obedece.” Pensa si cosa se quierre decir. Debe kita queda preparao y bien quierre obedece con aquellos con quien si Jehova ya dale cuanto autoridad. Siempre, gendeh ta expecta si Jehova que obedece kita con el un persona quien ta pidi kanaton que desobedece con el De Suyu maga mandamiento.—Act. 4:18-20.

3. Porque importante con Jehova que obedece kita con aquellos quien tiene autoridad kanaton?

³ Posible, mas facil para kanaton que obedece con Jehova contra na maga gente. Razonable se ciendo pirmi justo el maga direccion que ta dale si Jehova. (Sal. 19:7) Pero, gendeh ansina  el maga gente quien tiene autoridad. Maskin pa ansina, el diaton Tata na cielo ya dale cuanto autoridad con el diaton maga mayores, maga oficial de gobierno y con el maga anciano. (Prov. 6:20; 1 Tes. 5:12; 1 Ped. 2:13, 14) Si ta obedece kita kanila, ta obedece kita con Jehova. Considera kita si paquemodo kita puede obedece con el maga gente con quien ya dale autoridad si Jehova, maskin pa posible tan dificil kita tiene vez acepta y sigui con el diila maga direccion.

4. Porque manada anak el ta desobedece con el diila mayores?

⁴ Manada jovenes el ta puede man junto con aquellos quien “desobediente con el maga mayores.” (2 Tim. 3:1, 2) Porque manada kanila el ta desobedece? El cuanto mayores gendeh ta hace el cosa sila ta habla con el diila maga anak y ta sinti el maga anak que gendeh se justo. El otro ta sinti que el consejo del diila mayores gendeh mas practical, sobra de istricto y de antes pa. Si un joven tu, ya puede ba tambien tu sinti igual ansina? Manada el tan dificil aplica con el mandamiento de Jehova: “Obedece con el de ustedes maga mayores por causa del Señor. Amo ese el de ustedes obligacion.” (Ef. 6:1) Cosa puede ayuda contigo para obedece con ese?

5. Porque si Jesus el de con todo buen ejemplo de un joven quien ya obedece con el de suyu mayores? (Lucas 2:46-52)

⁵ Puede tu aprende na de con todo buen ejemplo de obediencia—si Jesus. (1 Ped. 2:21-24) Un perfecto gente le pero imperfecto el de suyu mayores. Maskin pa tiene vez ya puede sila hace maga kamali y ya mal entende con ele, ya honra siempre kanila si Jesus. (Ex. 20:12) Considera si cosa ya sucede cuando 12 año si Jesus. (Le con el Lucas 2:46-52.) Nuay puede nota el de suyu mayores que ya queda le na Jerusalem. Responsibilidad de Jose y Maria que asigura que junto kanila el todo diila maga anak na viaje despues del fiesta. Cuando ya puede ya sila mira con Jesus, ya disculpa si Maria con ele na problema que ya causa le kanila. Puede era habla si Jesus kanila que gendeh debe disculpa con ele. Pero nuay le se hace sino ya dale le mira respeto y ya dale simple contestacion. Pero, si Jose y Maria “noay . . . entende el cosa Le ya habla canila.” Maskin pa ansina, ya continua somete si Jesus y “ya queda . . . bajo del diila autoridad.”

6-7. Cosa puede ayuda con el maga jovenes para obedece con el diila mayores?

⁶ Maga jovenes, tan dificil ba ustedes obedece con el de ustedes mayores si ta puede sila hace maga kamali o si nuay sila puede entende con ustedes? Cosa puede ayuda con ustedes? Una, pensa si cosa sinti si Jehova. El Biblia ta habla que si ta obedece ustedes con el de ustedes mayores, “ta hace [se] alegre con el Señor.” (Col. 3:20) Sabe si Jehova que tiene vez, gendeh con ustedes completamente ta entende el de ustedes mayores o ta puede sila hace maga ley que dificil para obedece. Pero si ta obedece siempre ustedes kanila, ta hace ustedes alegre con Jehova.

⁷ Ika-dos, pensa si cosa sinti el de ustedes mayores. Si ta obedece ustedes con el de ustedes mayores, ta hace ustedes kanila alegre y mas confia sila con ustedes. (Prov. 23:22-25) Posible tambien que queda ustedes mas cerca kanila. “Cuando ya principia yo obedece con el cosa quierre el de mio mayores,” ya habla el un hermano de Belgium que si Alexandre, “ya queda kame mas close y mas alegre.” c Ika-tres, pensa si paquemodo ustedes beneficia na futuro si obediente ustedes ahora. Si Paulo, quien ta  queda na Brazil, ya habla, “Cay ya aprende yo obedece con el de mio mayores, ya ayuda se conmigo para obedece con Jehova y con otro quien tiene autoridad.” El Palabra del Dios ta dale con ustedes un buen razon para obedece con el de ustedes mayores. Este ta habla: “El [de ustedes] maga cosa-cosa ay anda embuenamente y [ustedes] ay tene largo vida na mundo.”—Ef. 6:2, 3.

8. Porque el cuanto jovenes ya iscuji obedece con el diila mayores?

⁸ Manada jovenes el ya puede beneficia cay ya obedece sila con el diila mayores. Si Luiza que de Brazil tambien yan dificil de antes entende si porque gendeh pa con ele ta permiti que tene cellphone. Gendeh le ta entende si porque, ciendo mayoria de aquellos igual de suyu edad tiene ya cellphone. Pero, ya puede le realiza que ya hace quel el de suyu mayores cay ta protege sila con ele. Ahora ya habla le, “Si ta obedece yo con el de mio mayores, gendeh yo ta sinti que dol ya pone conmigo restriccion sino un proteccion quel para conmigo.” Si Elizabeth que un joven hermana de United States tan dificil siempre obedece tiene vez con el de suyu mayores. Ele ya habla, “Si gendeh yo completamente ta entende si porque conmigo ya dale un nuevo ley el de mio mayores, ta pensa yo con el maga tiempo que ya protege conmigo el diila maga ley de antes.” Si Monica, quien ta queda na Armenia, ya habla que pirmi bueno el resulta si ta obedece le con el de suyu mayores contra si ta desobedece le kanila.

9. Cosa ta sinti el manada gente acerca na ley del maga gobierno?

⁹ Manada gente el ta admiti que necesita kita con el “autoridad del gobierno” y que debe kita obedece con cuanto del diila maga ley. (Roma 13:1) Pero, si gendeh sila ta gusta con el un ley o ta sinti que bien sobra el cosa este ta pidi, posible gendeh sila ta obedece con ese. Considera, por ejemplo, con el pagada de maga impuesto. Na un nacion na Europe, 25 por ciento de aquellos con quien yan survey el ta creé que “gendeh bueno que paga maga impuesto si ta pensa tu que gendeh este razonable.” Poreso, gendeh maka-estraña que maga 65 por ciento lang del maga impuesto el ta paga na gobierno na ese nacion.

10. Porque kita ta obedece con el maga ley maskin pa gendeh kita tan uyun con ese?

¹⁰ El Biblia ta revela que el maga gobierno del gente ta causa sufrimiento, bajo este na control de Satanas y cerca ya con este destroza. (Sal. 110:5, 6; Ecl. 8:9; Luc. 4:5, 6) Ta habla tambien este que si “quien ta man contra con el autoridad, ta man contra con el plano del Dios.” Na presente, ta permiti si Jehova que rula este maga gobierno para mentena orden y ta expecta le que obedece kita kanila. Entonces, necesita kita dale si cosa el debe para kanila—incluido el impuesto, respeto y obediencia. (Roma  13:1-7) Posible que para kanaton, el un ley gendeh conveniente, gendeh razonable o necesita sen para obedece con ese. Pero, ta obedece kita con Jehova y ta habla le que debe kita obedece con este maga gobierno—basta el diila maga ley gendeh tan contra na de suyu maga mandamiento.—Act. 5:29.

11-12. Asegun na Lucas 2:1-6, cosa ya hace si Jose y Maria para puede obedece con el un ley y cosa el resulta? (Mira tambien con el maga letrato.)

¹¹ Puede kita aprende na ejemplo de Jose y Maria, quien preparao obedece con el autoridad del gobierno maskin pa gendeh este conveniente para kanila. (Le con el Lucas 2:1-6.) Cuando maga nueve meses ya de priñada si Maria, ya enfrenta sila de Jose un bien dificil situacion. Si Augusto, quien ta rula na Imperio de Roma, ya manda registra con el maga gente. Poreso, necesita viaja si Jose y Maria para na Betlehem que maga 150 kilometro estaba na diila lugar y pasa sila na manada gulud. Gendeh gayot facil aquel viaje, especialmente para con Maria. Posible que malingasa este man maridable acerca na safety de Maria y del diila baby. Paquemodo ya lang si pari le mientras ta viaja sila na camino? Priñada le con el baby quien hay queda el Mesias na futuro. Puede ba que gendeh ya lang sila obedece con el ley del gobierno?

¹² Maskin tiene maga razon si Jose y Maria para man lingasa, ya obedece siempre sila con el ley. Y ya bendici kanila si Jehova cay obediente sila. Safe ya llega si Maria na Betlehem, enbuenamente el baby cuando ya nace y ya puede pa sila ayuda cumpli con el un profecia na Biblia!—Miq. 5:2.

13. Paquemodo el diaton obediencia puede afecta con el diaton maga hermano?

¹³ Si ta obedece kita con el gobierno, ta beneficia kita y el otro. Paquemodo? Una, gendeh kita experiencia con el maga mal consequencia del desobediencia. (Roma 13:4) Si ta obedece kita con el gobierno, puede se afecta con el mirada del maga autoridad na maga Testigo de Jehova. Por ejemplo, cuanto decada ya el ya pasa na Nigeria, el maga soldao ya entra na un  Kingdom Hall durante el un miting na congregacion y ta busca con aquellos quien yan protesta cay no quierre paga impuesto. Pero el oficial ya manda sale con el maga soldao y ya habla: “El maga Testigo de Jehova pirmi ta paga impuesto.” Cada vez ta obedece tu con el ley, ta puede tu ayuda mentena con el buen reputacion del maga siervo de Jehova. Y un dia, ese reputacion puede protege con el de tuyu maga hermano y hermana.—Mat. 5:16.

14. Cosa ya ayuda con el un hermana para queda “preparao obedece” con el maga autoridad?

¹⁴ Pero maskin pa ansina, posible que gendeh siempre facil para kanaton que obedece con el autoridad del gobierno. “Bien dificil para conmigo que obedece kanila,” ya admiti si Joanna, un hermana na United States, “cay el cuanto del de mio familia ya experiencia injusticia na mano del maga autoridad.” Pero, ya hace grande esfuerzo si Joanna para cambia con el de suyu mirada. Una, nuay mas ele le maga post na social media que tan contra con el maga autoridad. (Prov. 20:3) Ika-dos, ya reza le que ayuda con ele si Jehova que confia con Ele y gendeh espera cambio na gobierno del maga gente. (Sal. 9:9, 10) Ika-tres, ya le ele maga articulo na diaton maga publicacion acerca na neutralidad. (Juan 17:16) Ahora, ya habla si Joanna que por causa ta respeta y ta obedece le con el maga autoridad, ya sinti ya le “bien calmao y contento.”

15. Porque posible dificil para kanaton que obedece con el direccion estaba na organizacion de Jehova?

¹⁵ Ta pidi kanaton si Jehova que “obedece y somete” con aquellos quien ta guia na congregacion. (Heb. 13:17) Deverasan, perfecto el diaton Lider que si Jesus. Pero, gendeh perfecto aquellos con quien le ta usa para guia kanaton aqui na tierra. Poreso, posible que man dificil kita obedece kanila, especialmente si pidi sila kanaton que hace con el un cosa que no quierre kita hace. Si apostol Pedro yan dificil tambien obedece de antes. Cuando ya habla con ele el un angel que come con el carne del maga animal que mabuling bajo na Ley de Moises, nuay conforma si Pedro—y gendeh lang una vez sino tres beses! (Act. 10:9-16) Porque? Gendeh le ta entende con ese nuevo direccion. Bien diferente este na cosa le ta hace de antes. Si yan dificil si Pedro obedece con el direccion estaba na un perfecto angel, asigurao que mas dificil para kanaton que obedece con el direccion estaba na maga imperfecto gente.

16. Maskin pa ya sinti si apostol Pablo que gendeh razonable el direccion que ya ricibi le, cosa le ya hace? (Maga Actividad 21:23, 24, 26)

¹⁶ “Preparao obedece” si apostol Pablo maskin pa ya ricibi le un direccion que posible gendeh razonable para con ele. El maga Judio Cristiano ya puede oi maga istoria-istoria que si Pablo ta predica “que no mas . . . sigui na ley de Moises” y gendeh le ta respeta con ese Ley. (Act. 21:21) El maga anciano na Jerusalem ya manda con Pablo que lleva cuatro hombre na templo y hace el ceremonia de labada para dale mira que ta sigui le con el Ley. Pero, sabe si Pablo que el maga Cristiano gendeh mas bajo na Ley y nuay tambien le cosa ya hace malo. Maskin pa ansina, ya obedece dayun si Pablo. “Ya lleva [le] con el maga hombre y ya hace junto canila el ceremonia del lavada del cuerpo.” (Le con el Maga Actividad 21:23, 24, 26.) Cay ya obedece si Pablo, ya ayuda le que esta unido el maga hermano.—Roma 14:19, 21.

17. Cosa tu ya aprende na experiencia de Stephanie?

¹⁷ El un hermana que si Stephanie yan dificil acepta con el un decision que ya hace el branch office. Ele y el de suyu marido alegre ta sirvi na un foreign-language group. Despues, ya decidi el branch office que man dissolve con el diila grupo y yan assign con el man maridable na un  congregacion na diila mismo lengguaje. “Gendeh gayot yo alegre na aquel decision,” ya admiti si Stephanie. “Gendeh yo ta creé que tiene mas grande necesidad na diamon mismo lengguaje.” Maskin pa ansina, ya decidi le que suporta con el nuevo direccion. “Despues del cuanto tiempo, ya puede yo mira si porque justo gayot ese decision,” ya habla le. “Ya queda kame dol espiritual mayores na manada maga hermano y hermana na diamon congregacion que el familia nuay na verdad. Tan Bible study yo ahora con el un hermana que nuevo lang ya queda activo otravez. Y mas tiene ya yo tiempo para hace con el de mio personal estudiada.” Ele ya omenta, “Limpio el de mio conciencia cay sabe yo que ya hace yo el todo cosa yo puede hace para queda obediente.”

18. Cosa el beneficio si obediente kita?

¹⁸ Puede kita aprende queda obediente. Si Jesus “ya aprende . . . obedece por medio del sufrimiento” y gendeh por causa cay enbuenamente el de suyu situacion. (Heb. 5:8) Igual con Jesus, mas mucho, ta aprende kita queda obediente si ta experiencia kita maga dificil circumstancia. Por ejemplo, cuando ta principia pa lang el COVID-19 pandemic y ya pidi kanaton que gendeh anay man miting na diaton maga Kingdom Hall y gendeh anda predica casa en casa, yan dificil ba tu obedece? Pero cay obediente tu, ya protege este contigo, ya puede este ayuda para queda unido el congregacion y ya hace este alegre con Jehova. Mas preparao ya kita ahora para obedece con el maskin cosa instruccion que hay ricibi kita durante el grande tribulacion. Alli depende el diaton vida!—Job 36:11.

19. Porque tu quierre queda obediente?

¹⁹ Ya puede kita aprende que si obediente kita, hay ricibi kita manada bendicion. Pero, el primer razon si porque quierre kita obedece con Jehova amo cay ta ama kita con ele y quierre kita hace alegre con ele. (1 Juan 5:3) Gendeh gayot kita puede paga con Jehova na maga cosas que ya hace le para kanaton. (Sal. 116:12) Pero, puede kita obedece con ele y con aquellos quien tiene autoridad kanaton. Si ta obedece kita kanila, ta dale kita mira que sabio kita. Y el maga sabio ta hace alegre con el corazon de Jehova.—Prov. 27:11.