Por mas de un año ya ta prepara el maga hermano na Bethel para planta con el estacion de radio que ta llama WBBR na Staten Island, New York City. Despues curta con el maga pono, ya construi sila un grande casa onde esta el maga ta trabaja y otro pa building para na maga equipment. Despues de ese, ya principia man assemble el maga hermano con el maga equipment que necesita para puede man broadcast. Pero ya enfrenta sila cuanto problema.

Yan dificil el maga hermano que man install con el antenna para na estacion. Necesita hace cabit con el antenna que tiene largor de 91 metro na dos poste que 61 metro el altor del cada uno. Del primero, nuay sila puede hace con ese. Na uliji, na ayuda de Jehova, ya puede se hace el maga hermano. Si Calvin Prosser, quien ya trabaja na ese proyecto ya habla, “Si ya puede dayun quel kame hace del primero, baka yan hambug kame.” Ya dale el maga hermano el alabanza con Jehova. Pero, nuay pa acaba el diila problema.

Na ese año, nuevo pa lang ta principia el maga programa na radio y gendeh pronto obtene el maga gamit que necesita. Poreso, ya usa el maga hermano con el un transmitter que usao ya. En vez cumpra un nuevo microfono, ya usa sila con el microfono que estaba na un ordinario telefono. Un noche del Febrero, ya pruba usa el maga hermano con el equipment que ya hace sila. Necesita sila un programa para man broadcast na radio poreso ya canta el maga hermano maga Kingdom song. El uno de ese maga hermano que si Ernest Lowe ya relata con el maka-risas suceso na ese noche. Ya habla le que mientras ta canta sila,  ya llama kanila si Judge Rutherford, b quien ta oi kanila na radio na Brooklyn, maga 25 kilometro de lejos kanila.

“Puede ya se,” yan broma si Hermano Rutherford. “Dol aquel ustedes maga gato ta canta!” Ya tiene huya el maga hermano y ya apaga dayun con el transmitter. Pero por causa con ese, asigurao sila que preparao ya sila para na primer broadcast.

Del Febrero 24, 1924, durante el primer broadcast, ya habla si Hermano Rutherford que hay usa con el estacion de radio “para na bien del Reino del Mesias.” Ya habla le que ya hace con el estacion “para ayuda con el maga gente maskin cosa pa el diila creencia o religion que entende con el Biblia y con el tiempo onde kita ta vivi.”

Bonito gayot el resulta del primer broadcast. Poreso, ya usa con este estacion de radio por 33 año para man broadcast maga programa del maga siervo de Jehova.

Del Julio 1924, ya atende el maga Estudiante del Biblia na convencion na Columbus, Ohio. Estaba na diferente nacion el maga ya atende y ya puede sila oi con el maga talk na lengguaje Arabic, English, French, German, Greek, Hungarian, Italian, Lithuanian, Polish, Russian, Ukrainian y maga lengguaje de Scandinavia. Puede oi na radio con el cuanto parte del programa. Ya pidi el maga hermano con el Ohio State Journal que escribi maga articulo na diario acerca na programa del convencion cada dia.

Del Jueves, Julio 24, mas de 5,000 hermano y hermana el ya participa na predicacion. Ya puede sila distribui cerca 30,000 libro y ya puede principia miles de Bible study. El The Watch Tower ya llama con este dia “el de con todo alegre parte na programa del convencion.”

Del Viernes, Julio 25, durante na uno del maga talk de Hermano Rutherford, con animo le ya le con el un documento que ta condena con el maga clero. Na aquel documento, ya habla le que el maga lider de politica, religion y negocio “ta sangga con el maga gente para sabe si cosa usa el Dios para bendici con el maga gente.” Ya habla tambien le que “ta suporta este maga gente con el League of Nations y ta clama que ‘este el  rulanza del Dios aqui na tierra.’” Necesita animo el maga Estudiante del Biblia para predica con este mensaje na maga gente.

Na uliji, el The Watch Tower ya habla que este convencion que ya hace na Columbus ya hace fuerte con el fe del maga hermano y hermana. Ya dale se kanila el coraje para predica maskin pa na cosa oposicion sila enfrenta. Si Leo Claus, quien ya atende na convencion, ya habla: “Despues del asemblea, excited gayot kame para predica con este mensaje na diamon teritorio.”

Del Octubre, ya principia distribui el maga Estudiante del Biblia con el millones de copia del tract Ecclesiastics Indicted, el printed version del cosa ya presenta si Hermano Rutherford. Na un diutay barrio na Cleveland, Oklahoma, ya acaba distribui si Frank Johnson con ese tract na de suyu teritorio. Pero, necesita le espera por 20 minuto antes con ele anda incuntra el otro maga publisher. Gendeh le puede espera apuera cay ta busca con ele el maga gente na ese barrio quien rabiao con ele por causa na cosa le ta predica. Poreso, ya decidi si Hermano Johnson que esconde na un iglesia. Cay nuay gente alla, ya deja le maga copia del Ecclesiastics Indicted na maga bangco y na Biblia del pastor. Pronto-pronto le ya hace con ese. Cay tiene pa le tiempo, ya anda pa le na otro dos iglesia y amo tambien se el cosa le ya hace.

Ya bira dayun si Hermano Frank na lugar onde con ele anda incuntra el otro maga hermano. Ya esconde le na un gasoline station, mientras ta vicia con el maga gente quien ta busca con ele. Nuay sila puede mira con ele cuando ya pasa el diila vehiculo. Cuando nuay mas ya el maga gente, ya llega ya el maga hermano y hermana quien ya predica tambien cerca alla y ya saca con Hermano Frank y despues ya sale sila alla.

“Cuando pa-salida ya kame na aquel barrio,” ya habla el un hermano, “ya pasa kame na aquel tres iglesia. Tiene mas de 50 gente el ta para enfrente del cada iglesia. El cuanto gente ta le con el tract y el otro ta agarra con este para dale mira con el diila pastor. Cerca ya gayot kanamon alcanza! Pero, ta rindi kame gracias con Jehova cay ya protege le kanamon y ya ayuda le kanamon escapa con este maga enemigo del Reino.”

Na otro maga nacion, con coraje tambien ya predica el maga Estudiante del Biblia. Na norte parte del France, ya predica si Józef Krett con el maga trabajador de mina quien estaba na Poland. Hay dale le un talk que tiene tema “The Resurrection of the Dead Soon.” Cuando ya distribui el maga hermano y hermana con el invitacion na maga gente na aquel barrio, ya habla el un padre con el de suyu maga miembro que no atende. Pero diferente el cosa ya sucede. Mas de 5,000 el ya atende para oi con el talk, incluido aquel padre! Ya invita si Hermano Krett con el padre que defende con el creencia de este pero nuay este conforma. Despues del talk, ya dale si Hermano Krett con el maga gente el todo literatura que tiene le cay quierre pa sila aprende mas acerca con el Biblia.—Amos 8:11.

Na Africa, ya predica si Claude Brown el buen noticia na Gold Coast que ta llama ahora Ghana. Por causa na de suyu maga talk y maga literatura que ya distribui le, pronto yan calayat el verdad na aquel nacion. Si John Blankson, quien ta estudia para queda un pharmacist, ya atende na uno del maga talk de Hermano Brown. Ya realiza le dayun que ya incuntra ya le el verdad. “Alegre gayot yo na cosa yo ya sabe,” ya habla si John,  “y ta habla yo acerca con ese na maga gente na escuela.”

Un dia, ya anda si John na un iglesia para pregunta con el padre acerca na Trinidad cay ya sabe le que gendeh base na Biblia ese enseñanza. Ya hace apas con ele el padre y ya grita: “Gendeh bo un Cristiano; de Demonio bo. Sale bo qui!”

Cuando ya llega le na casa, ya escribi carta si John con el padre y ya pidi con ele que defende con el Trinidad na publico. Poreso, ya manda anda el padre con John na oficina del maestro de John. Despues, ya pregunta el maestro con John si deverasan ba que ya escribi le carta con el padre.

“Si, Sir,” ya contesta si John.

Ya manda el maestro con John que escribi carta con el padre para pidi perdon. Poreso, ya escribi si John:

“Sir, ya manda conmigo el de mio maestro que escribi carta para pidi perdon contigo. Pero, hace lang yo se si admiti tu que ta enseña tu falso doctrina.”

Espantao el maestro y ya pregunta, “Blankson, ese el cosa tu quierre escribi?”

“Si, Sir. Amo se el cosa yo quierre escribi.”

“Hay quita contigo na escuela. Porque man tu ta habla ansina contra con el padre del religion que ta suporta el gobierno?”

“Pero, Sir, . . . gendeh ba si ta enseña tu kanamon y si tiene kame cosa nuay entende, ta pregunta kame contigo?”

“Si.”

“Ansina el cosa ya sucede Sir. Ese gente ta enseña kanamon acerca na Biblia y tiene yo cosa ya pregunta con ele. Si nuay le puede contesta con el de mio pregunta, debe ba yo escribi carta para pidi despensa con ele?”

Nuay quita na escuela con Blankson y nuay le porsigui escribi carta con el padre.

Acerca na maga trabajo que ya hace sila na aquel año, el The Watch Tower ya habla: “Uyun gayot kita na cosa ya habla si David: ‘Hay dale tu conmigo el fuerza para man guerra.’ (Salmo 18:39) Ya puede gayot kanaton anima este año cay ya puede kita mira el ayuda del Señor . . . El de suyu maga siervo . . . alegre gayot ya participa na predicacion.”

Na ultimo parte del 1924, ya plaña el maga hermano hace otro estacion de radio que ta usa para na ministerio. Ya hace sila con ese cerca na Chicago. Ya llama con este nuevo estacion WORD que quierre decir palabra. Usando el un mas mafuerza transmitter, ya puede sila hace pasa con el palabra o mensaje del Reino na mas manada gente y na mas ancho lugar—gane hasta na norte parte na Canada.

Na año 1925 ya ayuda si Jehova con el maga Estudiante del Biblia para entende con el nuevo entendimiento del Revelacion capitulo 12. Yan tisut el cuanto por causa con ese. Pero, manada el alegre ya acepta con este nuevo entendimiento del maga suceso que ya sucede na cielo y si paquemodo este ta afecta con el maga siervo del Dios na tierra.