1. Cosa el cuanto regalo que ya dale kanaton si Jesus?

 NUAY gente el igual de bondadoso con Jesus. Cuando taqui le na tierra, ya usa le con el de suyu poder para ayuda con otro. (Luc. 9:12-17) Ya dale le kanaton el de con todo bonito regalo cuando ya dale le el de suyu vida para kanaton. (Juan 15:13) Desde cuando ya resucita con ele, ya continua queda bondadoso si Jesus. Como cosa le ya promete, ya pidi le con Jehova que dale kanaton sagrao espiritu para enseña y dale comforta kanaton. (Juan 14:16, 17; 16:13) Y por medio na maga miting na congregacion, ta continua kanaton man train si Jesus para puede kita hace maga dicipulo na entero mundo.—Mat. 28:18-20.

2. Quien el incluido na “maga regalo” que ya refiri na Efeso 4:7, 8?

² Considera con el otro pa regalo que ya dale kanaton si Jesus. Ya escribi si apostol Pablo que despues subi si Jesus na cielo, “ya dale le maga hombre como maga regalo.” (Le con el Efeso 4:7, 8, NWT.) Ya explica si Pablo que ya dale si Jesus con este maga regalo para ayuda con el congregacion na diferente manera. (Ef. 1:22, 23; 4:11-13) Ahora, incluido na este “maga regalo” el maga siervo ministerial, maga anciano na congregacion y maga circuit overseer. a Siempre, imperfecto este maga hombre poreso tan kamali sila. (Sant. 3:2) Pero ta usa kanila si Señor Jesus para ayuda kanaton y maga regalo sila para kanaton.

3. Ilustra si paquemodo kita todo puede suporta con el trabajo del maga hombre que ya dale kanaton si Jesus.

³ Ya iscuji si Jesus con este maga hombre para hace fuerte  con el congregacion. (Ef. 4:12) Pero, todo kita puede ayuda kanila para cumpli con este importante responsibilidad. Para ilustra: El cuanto kanaton actual ta ayuda construi Kingdom Hall pero el otro ta suporta con el maga quien ta trabaja. Ta dale sila comida, transportacion y otro pa ayuda. Na igual manera, puede kita suporta con el maga trabajo del maga siervo ministerial, anciano y circuit overseer por medio na cosa kita ta habla y ta hace. Considera kita ahora si paquemodo sila ta ayuda kanaton y si paquemodo kita puede dale mira apresacion kanila y con Jesus, quien ya dale este “maga regalo.”

TA AYUDA EL MAGA SIERVO MINISTERIAL NA CONGREGACION

4. Cosa el cuanto trabajo que ta hace el maga siervo ministerial del primer siglo?

⁴ Del primer siglo, ya iscuji con el cuanto hermano para sirvi como maga siervo ministerial. (1 Tim. 3:8) Ta sale que kanila ta refiri si Pablo cuando ya escribi le acerca con aquellos quien “ta puede ayuda con otros.” (1 Cor. 12:28, El Nuevo Testamento) Poreso, posible que ta hace maga importante trabajo el maga siervo ministerial para puede man focus el maga anciano na enseñada y man shepherding na maga hermano. Por ejemplo, posible que ta hace sila maga copia del Escritura o ta cumpra sila maga material que necesita para na copiada de ese.

5. Cosa el cuanto trabajo que ta hace el maga siervo ministerial ahora?

⁵ Considera con el cuanto trabajo que ta hace el maga siervo ministerial na de ustedes congregacion. (1 Ped. 4:10) Posible, yan assign kanila que mira con el pondo o teritorio del congregacion, man order literatura, man operate con el audio y video equipment, sirvi como maga attendant o para ayuda mentena con el Kingdom Hall. Importante este todo maga trabajo para queda organizao el congregacion y el trabajo predicacion. (1 Cor. 14:40) Puera con ese, tan assign con el cuanto siervo ministerial para dale maga parte na Vida y Ministerio Miting y para dale maga public talk. Posible tambien man assign con el un siervo ministerial para asisti con el un group overseer. Tiene vez, ta sigui el maga cualificao siervo ministerial si tan shepherding el maga anciano.

6. Cosa el cuanto razon si porque kita ta aprecia con el diaton maga siervo ministerial?

⁶ Na cosa manera ta beneficia el congregacion na cosa ta hace el maga siervo ministerial? “Por causa na ayuda del diamon maga siervo ministerial, tan enjoy gayot yo na maga miting,” ya habla si Beberly, b un hermana na Bolivia. “Por causa kanila, ta puede yo canta, dale comento, oi maga talk y aprende na maga video y letrato. Ta ayuda sila para queda safe el maga ta atende y para beneficia aquellos conectao na videoconference. Despues del miting, ta ayuda sila limpia, ta mira con el pondo del congregacion y ta asigura que tiene kame el literatura que necesita kame. Ta aprecia gayot yo con el diila ayuda!” Si Leslie, quien ta queda na Colombia y un anciano el marido, ya habla: “Necesita el de mio marido con el ayuda del maga siervo ministerial para hace con el cuanto assignment. Si nuay sila, mas queda ocupao el de mio marido poreso alegre yo cay preparao sila ayuda.” Asigurao, ansina tambien el cosa tu ta sinti.—1 Tim. 3:13.

7. Paquemodo kita dale mira apresacion na maga siervo ministerial? (Mira tambien con el letrato.)

⁷ Posible, ta sinti kita apresacion para na maga siervo ministerial. Pero, el Biblia ta anima kanaton: “Dale gracias.” (Col. 3:15, El  Nuevo Testamento) Si Krzysztof, un anciano na Finland, ta dale mira el de suyu apresacion na ansina manera, “Ta hace yo card o ta imbia text que tiene texto y especifico yo ta menciona si paquemodo conmigo ya anima el un siervo ministerial o si porque yo ta aprecia con el cosa le ta hace.” Si Pascal y Jael, quien ta queda na New Caledonia, especifico ta reza para na maga siervo ministerial. Si Pascal ya habla, “De este nuevo lang, pirmi kame ta inclui na rezo con este maga hermano. Ta rindi kame gracias con Jehova por causa kanila y ta pidi con ele que guia y ayuda kanila.” Ta oi gayot si Jehova con ese maga rezo y como resulta, ta beneficia el congregacion.—2 Cor. 1:11.

TA TRABAJA ENBUENAMENTE EL MAGA ANCIANO NA CONGREGACION

8. Porque ya puede habla si Pablo que ta trabaja enbuenamente el maga anciano del primer siglo? (1 Tesalonica 5:12, 13)

⁸ El maga anciano del primer siglo ta trabaja gayot enbuenamente para na congregacion. (Le con el 1 Tesalonica 5:12, 13; 1 Tim. 5:17) Ta guia sila—ta conduci maga miting y ta hace maga decision. Ta dale tambien sila especifico pero amable consejo na maga hermano y hermana para protege con el congregacion. (1 Tes. 2:11, 12; 2 Tim. 4:2) Puera con ese, ta trabaja tambien sila para puede mantene con el diila familia y para mentena fuerte espiritualidad.—1 Tim. 3:2, 4; Tito 1:6-9.

9. Cosa el cuanto responsibilidad del maga anciano ahora?

⁹ Ocupao el maga anciano ahora. Maga predicador sila. (2 Tim. 4:5) Activo sila ta participa na ministerio, ta organiza con el trabajo predicacion na teritorio del congregacion y tan train kanaton para predica y enseña na efectivo manera. Ta sirvi tambien sila como maga lastimoso y imparcial juez. Si ya comete un serioso culpa el un Cristiano, ta ayuda el maga anciano con ele para hace bira el de suyu buen relacion con Jehova. Y ta hace sila esfuerzo para mentena limpio con el congregacion. (1 Cor. 5:12, 13; Gal. 6:1) Mas pa na todo, pastor el maga anciano. (1 Ped. 5:1-3) Ta dale sila maga talk que base na Biblia, ta pricura conoce con el todo na congregacion y tan shepherding con el maga hermano y hermana. Ta ayuda tambien el cuanto anciano na construida y mentenada del Kingdom Hall, ta organiza maga asemblea, ta sirvi na maga Hospital Liaison Committee y Patient Visitation Group, puera pa na otro maga assignment. Claro, ta trabaja gayot enbuenamente el maga anciano para kanaton!

10. Porque kita ta aprecia con el diaton maga anciano?

¹⁰ Ya predicta si Jehova que hay cuida kanaton el maga pastor y “gendeh mas [kita] tene miedo ni asusta.” (Jer. 23:4) Ese mismo el cosa ya sinti si Johanna, un hermana na Finland, cuando ya tiene grabe enfermedad el de suyu nana. Ele ya habla: “Maskin pa tan dificil yo habla con otro el cosa yo ta sinti, con paciencia conmigo ya oi el un anciano con quien gendeh gayot yo bien conoce. Ya reza le junto conmigo y ya asigura que ta ama conmigo si Jehova. Gendeh yo ta acorda si cosa le exacto ya habla pero ya acorda yo que na aquel tiempo, ya perde el de mio lingasa. Sabe yo que ya imbia con ele si Jehova para ayuda conmigo na tiempo que bien necesita yo con ese.” Paquemodo el maga anciano na de ustedes congregacion ya ayuda contigo?

11. Paquemodo kita puede dale mira apresacion na maga anciano? (Mira tambien con el letrato.)

¹¹ Quierre si Jehova que dale kita mira sincero apresacion na maga anciano “por causa del diila trabajo.” (1 Tes. 5:12, 13) Si Henrietta, quien ta queda tambien na Finland, ya habla: “Preparao ayuda el maga anciano pero gendeh se quierre decir que tiene sila mas manada  tiempo y fuerza o que nuay sila problema na vida. Tiene vez, ta habla lang yo kanila: ‘Sabe tu, un buen anciano gayot tu. Era sabe tu se.’” El un hermana na Türkiye c que si Sera ya habla: “Necesita tambien el maga anciano que tiene quien anima kanila para puede sila continua. Poreso, puede kita dale kanila card, invita kanila come o man junto kanila na ministerio.” Tiene ba un anciano con quien tu ta aprecia? Busca manera para dale mira el de tuyu apresacion na esfuerzo que ta hace le.—1 Cor. 16:18.

TA HACE FUERTE CON EL CONGREGACION EL MAGA CIRCUIT OVERSEER

12. Con quien pa ya usa si Jesus para hace fuerte con el maga congregacion del primer siglo? (1 Tesalonica 2:7, 8)

¹² Ya dale si Jesucristo “maga regalo” na congregacion quien ta sirvi na otro manera. Bajo na de suyu guia, el maga anciano na Jerusalem ya imbia con kanda Pablo, Bernabe y con otro para sirvi como maga traveling overseer. (Act. 11:22) Porque? Para hace fuerte con el maga congregacion. (Act. 15:40, 41) Ya hace manada sacrificio este maga hombre. Tiene vez, ta pone pa gane sila na peligro el diila vida para enseña y anima con otro.—Le con el 1 Tesalonica 2:7, 8.

13. Cosa el cuanto responsibilidad del maga circuit overseer?

¹³ Pirmi ta viaja el maga circuit overseer. El cuanto ta viaja largo distancia para anda na maga congregacion. Cada semana, el un circuit overseer ta dale cuanto talk, ta anda man shepherding, ta conduci miting del maga pioneer y del maga anciano, y ta conduci miting para na ministerio. Ta prepara le maga talk y ta organiza con el maga asemblea. Ta enseña le na maga escuela del maga pioneer y ta  organiza un especial miting para na maga pioneer na circuito. Tiene pa le otro assignment que ta dale con ele el branch office y tiene vez, necesita le dayun hace con ese.

14. Cosa el cuanto razon si porque kita ta aprecia con el diaton maga circuit overseer?

¹⁴ Paquemodo ta beneficia el maga congregacion na trabajo del maga circuit overseer? Acerca na maga traveling overseer, el un hermano na Türkiye ya habla: “El cada uno del diila visitada ta motiva gayot conmigo para dale mas tiempo para ayuda con el maga hermano y hermana. Manada yo circuit overseer ya conoce pero nuay ni uno kanila el ya manda sinti conmigo que bien ocupao sila o gendeh yo puede atraca kanila.” Si Johanna que ya menciona enante ya puede man partner con el un circuit overseer na ministerio pero nuay sila con quien ya puede predica. “Maskin pa ansina,” ya habla le, “gendeh gayot yo ulvida con aquel dia. Nuevo lang ya sale el de mio dos hermana na diamon lugar y tan miss gayot yo kanila. Ya anima conmigo el circuit overseer y ya hace le acorda que maskin pa lejos conmigo el de mio familia ahora, na nuevo mundo hay tene yo manada oportunidad para man junto kanila.” Asigurao, manada kanaton el tiene bonito experiencia junto con el diaton maga circuit overseer.—Act. 20:37–21:1.

15. (a) Asegun na 3 San Juan 5-8, paquemodo kita dale mira apresacion na maga circuit overseer? (Mira tambien con el letrato.) (b) Porque kita debe dale mira apresacion na maga mujer del maga hermano quien ta sirvi na congregacion y paquemodo se kita hace? (Mira con el cajon “ Acorda con el Diila Mujer.”)

¹⁵ Ya anima si apostol Juan con Gayo que queda hospitable na maga hermano quien ta visita na diila congregacion y “ayuda canila . . . na un manera que ay hace alegre con el Dios.” (Le con el 3 San Juan 5-8.) El un manera que puede se kita hace amo si invita kita  con el circuit overseer para come junto kanaton. Puera con ese, puede tambien kita suporta con el maga arreglamiento que ya hace para na predicacion durante el de suyu visitada. Si Leslie que ya menciona enante ta dale mira el de suyu apresacion na otro maga manera. “Ta reza yo que dale si Jehova el cosa sila necesita,” ya habla le. “Ta escribi tambien kame carta del de mio marido y ta habla kanila que ya puede gayot ayuda kanamon el diila visitada.” Acorda, gente lang tambien el maga circuit overseer. Tiene vez, ta enferma sila, tan lingasa y tan luya tambien. Posible, el de tuyu maga buen palabra o simple regalo amo el contestacion na rezo del de ustedes circuit overseer!—Prov. 12:25.

NECESITA KITA MAGA HERMANO QUIEN PUEDE SIRVI NA CONGREGACION

16. Harmonia na Proverbio 3:27, cosa puede pregunta el maga hermano na diila mismo cuerpo?

¹⁶ Na entero mundo, necesita kita mas manada hermano quien puede sirvi na congregacion. Si un bautizao hermano tu, puede ba tu ayuda na este manera? (Le con el Proverbio 3:27.) Ta hace ba tu esfuerzo para queda cualificao que sirvi como siervo ministerial? Ta pricura ba tu alcanza el cualificacion para sirvi como un anciano? d Puede ba tu hace cambio na de tuyu circumstancia para puede man apply na School for Kingdom Evangelizers? Ese escuela hay man train contigo para puede contigo mas usa na organizacion. Si ta sinti tu que gendeh tu cualificao, reza con Jehova. Pidi con ele que dale contigo sagrao espiritu para puede tu hace con el maskin cosa assignment que hay dale contigo.—Luc. 11:13; Act. 20:28.

17. Cosa ta revela acerca con el diaton Rey, si Jesucristo, el “maga regalo” que ya dale le kanaton?

¹⁷ El maga hermano que ya dale si Jesus como “maga regalo” amo un prueba que ta guia le kanaton na este ultimo maga dia. (Mat. 28:20) Gendeh ba alegre gayot kita cay el diaton amable y bondadoso Rey sabe si cosa kita necesita y ya dale kanaton maga cualificao hermano para ayuda kanaton? Poreso, busca maga oportunidad para dale mira el de tuyu apresacion con este maga hermano. Y no ulvida rindi gracias con Jehova cay con ele estaba “todo el regalo bueno y perfecto.”—Sant. 1:17.