1-2. Cosa ya sucede mientras ta camina el dos dicipulo de Jesus para na Emaus?

 NISAN 16 quel, del 33 C.E. Bien triste y ta tiene miedo el maga dicipulo de Jesus. Dos kanila el ta camina estaba na Jerusalem para na Emaus, un barrio que maga 11 kilometro estaba na Jerusalem. Bien triste este maga hombre cay nuevo lang ya muri si Jesus. Ya esperanza sila que hace maga buen cosas el Mesias pero ahora, muerto ya le. Nuay expecta este maga hombre si cosa sunod sucede.

² Ya atraca kanila el un estranjero y ya camina junto kanila. Despues, ya relata el maga dicipulo si cosa ya sucede con Jesus. Acabar, ya principia man cuento el estranjero acerca na maga cosas que gendeh gayot sila ulvida. Ya explica le “principiando con Moises y hasta con todo el maga profeta” si porque necesita sufri y muri el Mesias. Cuando ya llega sila na Emaus, ya puede realiza el dos dicipulo que aquel estranjero amo si Jesus con quien ya resucita el Dios. Bien alegre sila cay vivo el Mesias!—Luc. 24:13-35.

3-4. Cosa ya sucede na maga dicipulo de Jesus y cosa kita aprende na este articulo? (Maga Actividad 1:3)

³ Manada beses ya aparece si Jesus na de suyu maga dicipulo durante el de suyu ultimo 40 dia aqui na tierra. (Le con el Maga Actividad 1:3.) Ya anima le con el de suyu maga dicipulo quien triste y ta tiene miedo. Como resulta, ya queda sila  alegre y ya tiene coraje para predica y enseña con el buen noticia. a

⁴ Puede kita beneficia si estudia kita si cosa ya hace si Jesus durante ese tiempo. Na este articulo, considera kita si paquemodo ya usa si Jesus con este tiempo (1) para anima con el de suyu maga dicipulo, (2) para ayuda kanila mas entende con el Escritura y (3) para man train kanila na mas responsibilidad. Na cada uno de este, mira kita si paquemodo kita puede imita con el ejemplo de Jesus.

ANIMA CON OTRO

5. Porque yan luya el maga dicipulo de Jesus?

⁵ Porque yan luya el maga dicipulo de Jesus? El cuanto kanila ya deja con el diila casa, familia y negocio para sigui con Jesus. (Mat. 19:27) Ya maltrata tambien con otro cay ya queda sila de suyu maga dicipulo. (Juan 9:22) Ya hace sila con este maga sacrificio cay ta creé sila que si Jesus el Mesias. (Mat. 16:16) Poreso cuando ya muri si Jesus, ya queda sila bien triste y yan luya cay no sabe sila si cosa sucede.

6. Cosa ya hace si Jesus despues con ele resucita?

⁶ Cuando ya mira si Jesus que bien dolorido el de suyu maga dicipulo, nuay le pensa que falta sila fe. Sino, sabe le que normal reaccion lang se si tiene quien ta muri. Poreso na mismo dia que ya resucita con ele, ya principia le anima con el de suyu maga amigo y amiga. Por ejemplo, ya aparece le con Maria Magdalena cuando ta llura este na sepultura. (Juan 20:11, 16) Ya aparece tambien le con el dos dicipulo que ya menciona na introduccion de este articulo. Y ya aparece le con apostol Pedro. (Luc. 24:34) Cosa kita puede aprende na ejemplo de Jesus? Considera si cosa ya sucede cuando ya aparece le con Maria Magdalena.

7. Asegun na Juan 20:11-16, cosa ya mira si Jesus que ta hace si Maria y cosa le ya hace para con este? (Mira tambien con el letrato.)

⁷ Le con el Juan 20:11-16. Temprano aga del Nisan 16, tiene cuanto mujer quien ya anda na lugar donde ya entera con Jesus. (Luc. 24:1, 10) Considera kita ahora con  el experiencia del uno de ese maga mujer, si Maria Magdalena. Cuando ya llega le na sepultura, ya mira le que nuay este laman. Ya anda le habla con Pedro y Juan acerca con este y ya sigui sila con ele para na sepultura. Cuando ya mira sila que nuay alla el cuerpo de Jesus, ya bolbe el dos hombre. Pero si Maria ya esta alla y ya llura. No sabe le que ta mira gale con ele si Jesus. Ya mira si Jesus que ta llura este fiel mujer y quierre le dale comforta con este. Poreso, ya aparece le con Maria y ya hace un cosa que ya puede gayot anima con este. Yan cuento le y ya dale un importante assignment con Maria—habla con el de suyu maga hermano que ya resucita ya le.—Juan 20:17, 18.

8. Paquemodo kita puede imita con Jesus?

⁸ Paquemodo kita puede imita con Jesus? Tiene kita cosa puede hace para anima con el diaton maga hermano y hermana para continua sirvi con Jehova. Igual con Jesus, necesita kita sabe si cosa el diila maga dificultad y man cuento kanila con empatia. Considera con el experiencia del un hermana que si Jocelyn que el hermana ya muri na un grabe accidente. “Por manada meses, bien dolorido gayot yo,” ya habla le. Pero, el un hermano y el de suyu mujer ya invita con ele na diila casa, ya oi con ele con empatia y ya asigura con ele que precioso le con Dios. Si Jocelyn ya habla: “Ya sinti yo que dol aquel tan lumus yo na mar durante el bien fuerte tifun. Pero, ya usa kanila si Jehova para ayuda conmigo. El cosa sila ya hace ya motiva conmigo para continua sirvi con Jehova.” Puede tambien kita anima con otro si oi kita kanila enbuenamente mientras ta habla sila si cosa sila ta sinti y si man cuento kita kanila con empatia. Na ese manera, puede kita dale comforta kanila y ayuda kanila para continua sirvi con Dios.—Roma 12:15.

AYUDA CON OTRO QUE ENTENDE CON EL ESCRITURA

9. Cosa dificultad ya enfrenta el maga dicipulo de Jesus y paquemodo le ya ayuda kanila?

⁹ El maga dicipulo de Jesus ta creé con el Palabra del Dios y ta pricura aplica con ese na diila vida. (Juan 17:6) Pero, gendeh sila ta entende si porque ya muri si Jesus como un criminal. Ya puede mira si Jesus que tan duda sila, gendeh cay tiene sila mal motivo, sino cay falta lang sila entendimiento. (Luc. 9:44, 45; Juan 20:9) Poreso, ya ayuda le kanila para entende si cosa quierre decir del cosa sila ya le na Escritura. Considera kita si paquemodo se le ya hace cuando ya aparece le con el dos dicipulo na camino para na Emaus.

10. Paquemodo ya convinci si Jesus con el de suyu maga dicipulo que ele gayot el Mesias? (Lucas 24:18-27)

¹⁰ Le con el Lucas 24:18-27. Nota que nuay dayun habla si Jesus con el dos hombre si quien le. Sino, ya pregunta le kanila. Porque? Posible, quierre le que habla sila si cosa el na diila pensamiento y corazon. Y ese el cosa sila ya hace. Ya habla sila con ele que pensaba sila hay libra si Jesus con el Israel na mano del maga Romano quien ta maltrata kanila. Despues sila habla con el cosa sila ta sinti, ya usa si Jesus con el Escritura para ayuda con este maga hombre entende que manada profecia el ya cumpli na cosa ya sucede. b Pagka-denoche, yan junto si Jesus con el de suyu otro maga dicipulo para ayuda tambien kanila entende con este maga verdad. (Luc. 24:33-48) Cosa kita puede aprende con este?

11-12. (a) Cosa leccion kita puede aprende na manera si paquemodo ya enseña si Jesus maga verdad na Escritura? (Mira tambien con el maga letrato.) (b) Paquemodo ya ayuda con Nortey el quien yan Bible study con ele?

¹¹ Paquemodo kita puede imita con Jesus?  Una, si ta enseña tu con el de tuyu maga Bible study, usa maga pregunta que puede ayuda contigo sabe si cosa el na diila pensamiento y corazon. (Prov. 20:5) Si sabe ya tu si cosa sila deverasan ta sinti, dale kanila mira si paquemodo busca maga especifico texto que aplicable na diila situacion. Pero no habla kanila si cosa sila necesita hace. Sino, ayuda kanila entende si cosa quierre decir del maga texto na Biblia y pensa si paquemodo sila puede aplica con el maga principio na diila vida. Considera con el experiencia del un hermano na Ghana que si Nortey.

¹² Cuando 16 año si Nortey, ya principia le estudia con el Biblia. Pero nuay tarda, yan contra con ele el de suyu familia. Cosa ya puede ayuda con ele para continua? El quien tan Bible study con ele ya usa con el Mateo capitulo 10 para explica que hay persigui con el todo verdadero Cristiano. “Poreso cuando ya principia persigui conmigo,” ya habla si Nortey, “convincido yo que ya incuntra yo con el verdad.” Ya usa tambien el quien tan Bible study con ele el Mateo 10:16 para ayuda con ele realiza que necesita le queda con cuidao y respetoso si ta explica con el de suyu creencia na de suyu familia. Despues del bautismo de Nortey, quierre le man pioneer pero el de suyu tata quierre que entra le na un universidad. Nuay habla con Nortey el quien tan Bible study con ele si cosa le necesita hace. Sino, ya usa este maga pregunta y ya ayuda con ele pensa maga principio na Biblia. Cosa el resulta? Ya principia man pioneer si Nortey pero ya arria con ele el de suyu tata. Cosa ta sinti si Nortey na todo cosa ya sucede? Ele ya habla: “Convincido yo que justo el de mio decision.” Si ayuda tambien kita con otro para entende con el Escritura, puede kita ayuda kanila para tene fuerte fe y continua sirvi con Jehova.—Ef. 3:16-19.

MAN TRAIN MAGA HERMANO

13. Cosa ya hace si Jesus para asigura que hay continua el trabajo predicacion? (Efeso 4:8)

¹³ Cuando taqui si Jesus na tierra, ya puede le hace con el trabajo que ya manda con ele el de suyu Tata. (Juan 17:4) Pero nuay pensa si Jesus, ‘Si quierre yo queda enbuenamente el trabajo, iyo lang debe el quien hace con ese.’ Durante el de suyu tres y media año ministerio, yan train le con otro si paquemodo predica. Antes le bira na cielo, ya dale le con el de suyu maga dicipulo el responsibilidad que cuida con el maga precioso carnero de  Jehova y guia con el trabajo predicacion y enseñada. Y posible que el cuanto del de suyu maga dicipulo mas de 20 año pa lang el edad. (Le con el Efeso 4:8, NWT.) Dedicao, leal y trabajador este maga dicipulo. Paquemodo kanila yan train si Jesus?—Mira con el study note na Efeso 4:8.

14. Cosa ya enseña si Jesus na de suyu maga dicipulo durante el de suyu ultimo 40 dia aqui na tierra? (Mira tambien con el letrato.)

¹⁴ Ya dale si Jesus con el de suyu maga dicipulo maga franca pero amable consejo. Por ejemplo, ya nota le que el cuanto kanila tan duda poreso ya conseja le kanila. (Luc. 24:25-27; Juan 20:27) Ya hace tambien le claro que mas importante que cuida sila con el maga carnero de Jehova contra na diila maga secular trabajo. (Juan 21:15) Ya hace le acorda kanila que no man lingasa acerca na maga privilegio que hay ricibi el otro na servicio con Jehova. (Juan 21:20-22) Y ya corecta le con el cuanto del diila maga gendeh justo idea acerca na Reino y ya ayuda kanila que mas man focus na predicacion del buen noticia. (Act. 1:6-8) Cosa puede aprende el maga anciano con Jesus?

15-16. (a) Paquemodo puede imita el maga anciano con Jesus? Explica. (b) Paquemodo ya puede beneficia si Patrick na consejo del un anciano?

¹⁵ Paquemodo puede imita el maga anciano con Jesus? Debe sila man train y ayuda con el maga hermano para queda cualificao na mas responsibilidad, incluido aquellos quien joven pa. c Sabe el maga anciano que manada cosa debe aprende aquellos con quien sila tan train. Necesita sila dale amable consejo con el maga joven hermano para hay aprende sila queda humilde, fiel y preparao sirvi con otro.—1 Tim. 3:1; 2 Tim. 2:2; 1 Ped. 5:5.

¹⁶ Considera si paquemodo ya beneficia el un hermano que si Patrick na consejo del un anciano. Ciendo joven pa le, ta puede le man cuento na gendeh buen manera y gendeh enbuenamente el de suyu tratamiento con otro, maskin con el maga hermana. Ya puede se nota el un mature anciano poreso ya dale le amable pero franca consejo con Patrick. “Ta rindi gayot yo gracias cay ya hace le quel,” ya habla si Patrick. “Del antes, tan luya yo si ta puede yo  mira que el otro maga hermano ta ricibi el maga privilegio que quierre yo. Pero, aquel consejo ya puede ayuda conmigo para realiza que mas importante que queda humilde y sirvi con el de mio maga hermano y hermana contra tene maga privilegio na congregacion.” Como resulta, ya queda un anciano si Patrick cuando 23 año pa lang le.—Prov. 27:9.

17. Paquemodo ya dale mira si Jesus que ta confia le con el de suyu maga dicipulo?

¹⁷ Ya dale si Jesus con el de suyu maga dicipulo el responsibilidad, gendeh lang para predica, sino para enseña tambien. (Mira con el “teaching them” study note na Mateo 28:20.) Posible, ya sinti el maga dicipulo que gendeh sila cualificao para na ese assignment. Pero, asigurao si Jesus que puede sila hace con ese. Gane, ya habla le kanila: “Igual como ya imvia conmigo el Tata, ansina tamen yo ta imvia con ustedes.”—Juan 20:21.

18. Paquemodo puede imita el maga anciano con Jesus?

¹⁸ Paquemodo puede imita el maga anciano con Jesus? El maga experienciao anciano ta dale maga responsibilidad con otro. (Fil. 2:19-22) Por ejemplo, puede pidi el maga anciano con el maga jovenes que ayuda limpia y mentena con el Kingdom Hall. El maga anciano puede dale maga assignment con el maga hermano, man train kanila si paquemodo hace con ese y despues confia que puede sila hace con ese enbuenamente. El un nuevo anciano que si Matthew ya habla que ta rindi gayot le gracias con el maga experienciao anciano quien yan train con ele na un assignment y despues ya confia que puede le quel hace enbuenamente. Ele ya habla, “Cuando ya puede yo hace maga kamali, ya ayuda sila conmigo para mira si paquemodo yo puede aprende con ese y despues ya ayuda sila conmigo si paquemodo puede hace mas enbuenamente con ese.” d

19. Cosa kita debe determinao hace?

¹⁹ Ya usa si Jesus con el de suyu ultimo 40 dia na tierra para anima, enseña y man train con otro. Ojala queda kita determinao que imita con el de suyu ejemplo. (1 Ped. 2:21) Ayuda le kanaton para hace con ese. Gane, ya promete le: “Ay esta yo junto con ustedes todo el dia hasta na fin del mundo.”—Mat. 28:20.