1-2. (a) Cosa el cuanto duda que posible tene el maga siervo de Jehova? (b) Cosa kita considera na este articulo?

 TAN duda a tiene vez el maga gente maskin cosa pa el diila edad. Por ejemplo, el un joven Testigo tan duda si interesao ba gayot con ele si Jehova. Poreso, tan alang-alang le bautiza. O pensa acerca na un adulto hermano quien ya iscuji hace una con el Reino cuando joven le en vez de queda rico na este mundo. Pero cay ta tormenta el de suyu familia na financial ahora, posible ta pensa le si justo ba el decision que ya hace le de antes. O imagina con el un de edad hermana quien nuay mas tanto fuerza. Posible tan luya le cay gendeh mas le ta puede hace con el cosa le ta hace de antes. Ya puede ya ba tu pregunta con este na de tuyu mismo cuerpo: ‘Ta mira ba gayot conmigo si Jehova? Justo ba el maga sacrificio que ya hace yo de antes para con Jehova? Tiene pa ba yo siempre cosa puede hace para con Jehova?’

² Si nuay kita cosa hace con ese maga duda puede se afecta con el diaton adoranza. Na este articulo, hay considera kita si paquemodo el maga principio na Biblia puede ayuda kanaton  si tan duda kita (1) si interesao ba gayot kanaton si Jehova, (2) si justo ba el maga decision que ya hace kita de antes o (3) si tiene pa ba kita siempre cosa puede hace para con Jehova.

SI PAQUEMODO QUITA CON EL DE TUYU DUDA

3. Cosa el un manera que puede kita quita con el diaton maga duda?

³ El un manera que puede kita quita con el diaton duda amo si busca kita con el maga contestacion na diaton maga pregunta na Palabra del Dios. Si hace kita se, puede se hace fuerte kanaton, progresa kita na espiritual y ‘esta kita bien asigurao na diaton fe.’—1 Cor. 16:13.

4. Paquemodo kita aplica con el 1 Tesalonica 5:21?

⁴ Le con el 1 Tesalonica 5:21. Nota que el Biblia ta anima kanaton que “antes de hacer un cosa, pensa anay.” Cosa se quierre decir? Puede kita asigura que deverasan el cosa kita ta creé si compara kita con ese na cosa ta habla el Biblia. Por ejemplo, considera con aquel joven quien tan duda si interesao ba gayot con ele el Dios. Acepta ya lang ba le dayun que deverasan el cosa le ta pensa? Gendeh. Sino, debe le sabe si cosa si Jehova ta pensa acerca con ese.

5. Paquemodo kita “oi” con el contestacion de Jehova na diaton pregunta?

⁵ Mientras ta le kita con el Palabra del Dios puede kita “oi” con Jehova que tan cuento kanaton. Pero para puede sabe el de suyu contestacion na pregunta que tiene kita, necesita kita hace esfuerzo. Si ta le kita con el Biblia, man focus na maga topico que puede contesta con el diaton pregunta. Man research na diaton maga publicacion. (Prov. 2:3-6) Reza con Jehova que guia y ayuda kanaton para sabe de suyu contestacion na diaton pregunta. Despues, busca maga principio na Biblia y practical informacion que aplicable na diaton situacion. Posible, beneficia tambien kita si considera kita con el maga istoria na Biblia de aquellos quien ya experiencia semejante situacion.

6. Paquemodo puede ayuda el maga miting para quita con el diaton duda?

⁶ Puede tambien kita “oi” con Jehova que tan cuento kanaton por medio na diaton maga miting. Si regular kita ta atende na maga miting, posible puede kita oi na un talk o na un comento del un persona el un cosa que necesita kita para quita con el diaton duda. (Prov. 27:17) Considera kita ahora si paquemodo quita con el cuanto duda.

SI TAN DUDA TU SI INTERESAO BA CONTIGO SI JEHOVA

7. Cosa posible pregunta el cuanto?

⁷ Ya puede ya ba tu pensa, ‘Ta nota ba gayot conmigo si Jehova?’ Si ta sinti tu que gendeh tu importante, baka pensa tu que imposible queda amigo del Creador del universo. Posible, ya sucede tambien se con Rey David. Ya pensa le que dol gendeh maka-creé que si Jehova ta nota con el maga gente poreso ya pregunta le: “O Jehova, cosa lang man el gente para nota tu con ele, el anak del gente para pone tu atencion con ele?” (Sal. 144:3) Onde tu puede incuntra con el contestacion de ese pregunta?

8. Asegun na 1 Samuel 16:6, 7, 10-12, cosa si Jehova ta nota na maga gente?

⁸ Ta enseña el Biblia que ta nota si Jehova con aquellos quien dol gendeh importante para con otro. Por ejemplo, ya imbia si Jehova con Samuel na casa de Jese para iscuji con el uno del de suyu maga anak quien queda rey de Israel na futuro. Na ocho anak de Jese, siete lang kanila el ya manda le conoce con  Samuel. Nuay le inclui con David, el menor. b Pero, con David si Jehova ya iscuji. (Le con el 1 Samuel 16:6, 7, 10-12.) Ya puede mira si Jehova si cosa clase de persona si David—un joven hombre quien ta dale importancia na maga espiritual cosas.

9. Porque tu puede asigura que interesao contigo si Jehova? (Mira tambien con el letrato.)

⁹ Pensa con el maga evidencia que ta nota contigo si Jehova. Ta dale le contigo maga consejo que justo gayot na de tuyu situacion. (Sal. 32:8) Puede ba le se hace si gendeh le bien conoce contigo? (Sal. 139:1) Si aplica tu con el consejo de Jehova y mira si paquemodo este ya ayuda contigo, puede tu queda mas convincido que interesao le contigo. (1 Cron. 28:9; Act. 17:26, 27) Ta mira si Jehova con el de tuyu maga esfuerzo. Sabe le si cosa el de tuyu maga buen calidad y quierre le queda de tuyu Amigo. (Jer. 17:10) Y alegre le si queda tambien tu de suyu amigo.—1 Juan 4:19.

SI TAN DUDA TU SI JUSTO BA EL DECISION QUE YA HACE TU DE ANTES

10. Si pensa kita acerca na maga decision que ya hace kita de antes, cosa kita posible pregunta?

¹⁰ Tiene vez, posible el cuanto ta puede pensa si justo ba el maga decision que ya hace sila de antes. Posible, ya decidi sila sacrificia con el diila trabajo o negocio para puede sirvi mas con Jehova. Ahora, manada año ya el ya pasa. Gane, posible maga decada ya. Baka ta puede sila mira con el diila maga conoce quien yan focus na secular trabajo y dol asenso ya el vida. Poreso, posible sila pensa: ‘Justo ba el maga sacrificio que ya  hace yo para con Jehova? O manada oportunidad el yan sayang por causa con ese?’

11. Cosa negativo sentido tiene el escritor del Salmo 73?

¹¹ Si ya puede tambien tu pregunta igual ansina, considera si cosa ya sinti el escritor del Salmo 73. Ta mira le que el otro tiene buen salud, dol nuay problema y asenso ya el vida. (Sal. 73:3-5, 12) Mientras ta observa le kanila y ta mira que dol tiene sila buen vida, ya sinti le que sayang lang el de suyu esfuerzo para sirvi con Jehova. “Ya sale [le] destorbao entero dia” por causa con ese. (Sal. 73:13, 14) Paquemodo le ya quita con el de suyu negativo sentido?

12. Asegun na Salmo 73:16-18, cosa ya hace el salmista para quita con el de suyu negativo sentido?

¹² Le con el Salmo 73:16-18. Ya anda el salmista na santuario de Jehova. Ya puede le pensa enbuenamente alla. Ya puede le realiza que maskin dol bonito el vida del cuanto, nuay sila esperanza na futuro. Por causa con ese, ya tiene le paz na pensamiento y asigurao le que el servicio con Jehova amo el de con todo buen decision que ya hace le. Como resulta, ya queda le mas determinao que continua sirvi con Jehova.—Sal. 73:23-28.

13. Paquemodo tu tene paz na pensamiento si tan duda tu acerca na maga decision que ya hace tu de antes? (Mira tambien con el letrato.)

¹³ Puede tambien tu tene paz na pensamiento na ayuda del Palabra del Dios. Paquemodo? Medita con el maga buen cosas que tiene tu—incluido el favor de Jehova—y compara con ese na maga cosas que tiene aquellos quien ta depende na cosa lang puede dale el mundo. Baka alegre ya sila na cosa sila ta puede hace ahora cay nuay sila cosa ta esperanza na futuro. Pero, otro tu. Ya promete si  Jehova que hay bendici le contigo mas pa na cosa tu puede imagina. (Sal. 145:16) Considera tambien este: Puede ba gayot kita habla si cosa sucede kanaton si otro el decision que ya hace kita de antes? Este el cosa kita puede asigura: Aquellos quien ta hace maga decision base na diila amor con Dios y amor na diila projimo, pirmi gayot hay tene el maga cosas que deverasan puede hace alegre kanila.

SI TAN DUDA TU SI TIENE BA TU COSA PUEDE HACE PARA CON JEHOVA

14. Porque el cuanto ta sinti que gendeh sila importante y cosa sila posible pregunta?

¹⁴ El cuanto siervo de Jehova gendeh ta puede hace con el cuanto cosas cay de edad ya sila, tiene problema na salud o tiene diferencia na cuerpo. Posible, sinti sila que gendeh sila importante con Jehova. Baka pregunta sila, ‘Tiene ba yo siempre cosa puede hace para con Jehova?’

15. Na cosa convincido el escritor del Salmo 71?

¹⁵ Ya sinti tambien ansina el escritor del Salmo 71. Ya reza le: “No abandona conmigo si nuay mas yo fuerza.” (Sal. 71:9, 18) Maskin pa ansina, convincido el salmista que si continua le fiel sirvi con Dios, hay guia y suporta con ele si Jehova. Ya aprende el salmista que alegre si Jehova con aquellos quien ta dale el diila de con todo bueno para sirvi con Ele maskin pa tiene sila maga limitacion.—Sal. 37:23-25.

16. Cosa puede hace el maga de edad para con Jehova? (Salmo 92:12-15)

¹⁶ Maga de edad, mira con el de ustedes mismo cuerpo igual si paquemodo si Jehova ta mira con ustedes. Puede le ayuda con ustedes para continua fiel sirvi con ele maskin pa na de ustedes limitacion. (Le con el Salmo 92:12-15.) En vez de man focus na maga  cosas que gendeh mas ustedes ta puede hace, pensa con el maga cosas que puede ustedes hace. Por ejemplo, puede ustedes anima con otro por medio na de ustedes buen ejemplo y si dale ustedes mira personal interes kanila. Puede ustedes habla con otro si paquemodo si Jehova ya ayuda con ustedes por manada año y habla kanila si cosa maga promesa na Biblia el bien quierre ustedes mira que cumpli na futuro. Y acorda que el de ustedes maga rezo para con otro tiene gayot grande efecto kanila. (1 Ped. 3:12) Maskin cosa pa el diaton situacion, todo kita tiene cosa puede dale con Jehova y con otro.

17. Porque kita debe evita que compara con el diaton mismo cuerpo con otro?

¹⁷ Si tan luya tu cay limitao el cosa tu ta puede hace para con Jehova, puede tu asigura que ta aprecia le con el maskin cosa que ta hace tu. Posible, ta compara tu con el cosa tu ta hace na cosa ta puede hace el otro. Evita con ese. Porque? Cay gendeh se ta hace si Jehova. (Gal. 6:4) Por ejemplo, caro el aceite que ya dale si Maria como un regalo para con Jesus. (Juan 12:3-5) Pero, bien diutay el valor del dos sencillo que ya dona el pobre viuda na templo. (Luc. 21:1-4) Maskin pa ansina, ya mira si Jesus con el diila maga regalo como expresion del diila fe. El de suyu Tata, si Jehova, ta aprecia gayot con el maskin cosa tu ta hace por causa na de tuyu devocion y amor con Ele maskin paquemodo pa se de diutay para contigo.

18. Cosa puede ayuda kanaton para quita con el diaton duda? (Mira tambien con el cajon “ Puede Ayuda el Palabra de Jehova Para Quita De Tuyu Duda.”)

¹⁸ Todo kita tan duda tiene vez. Pero como cosa kita ya aprende, el Biblia puede ayuda kanaton para quita con ese. Poreso, hace esfuerzo para quita con el de tuyu duda. Si hace tu se, puede este ayuda contigo para gendeh man luya. Conoce gayot contigo si Jehova. Ta aprecia le con el de tuyu maga sacrificio y ya promete le que hay premia le contigo. Puede gayot kita asigura que ta ama y ta cuida si Jehova con el todo leal siervo de suyu.