1. Cosa ta sinti si Jehova si ta mira con el de suyu maga siervo?

 TA PUEDE nota si Jehova con el todo cosas que ta experiencia el de suyu maga siervo. Sabe le si alegre kita y si triste kita. (Sal. 37:18) Si ta mira le que ta dale kita con el diaton de con todo bueno para sirvi con ele maskin pa ta sufri kita na emocion, ta aprecia le con ese! Mas pa, bien quierre le ayuda y dale comforta kanaton.

2. Cosa ta hace si Jehova para na maga dolorido y paquemodo kita beneficia na de suyu cuidada?

² El Salmo 147:3 ta habla que si Jehova ‘ta pone venda con el irida’ del maga dolorido. Este texto ta dale mira si paquemodo si Jehova ta cuida con aquellos quien ta sufri na emocion. Cosa kita debe hace para beneficia na cuidada de Jehova? Considera un ilustracion. El un doctor puede cura con el un irido persona. Pero para queda bueno ese persona, debe le sigui con el instruccion del doctor. Na este articulo, mira kita si cosa comforta ta dale si Jehova para con aquellos quien ta sufri na emocion y considera kita si paquemodo kita aplica con el de suyu amable consejo.

TA ASIGURA KANATON SI JEHOVA QUE PRECIOSO KITA CON ELE

3. Porque el cuanto ta sinti que nuay sila valor?

³ Ta vivi kita ahora na un mundo que manada gente el gendeh ta dale mira amor. Poreso, manada el ta sinti que nuay sila valor. El un hermana que si Helen a ya habla: “Ya engranda yo que nuay sinti amor estaba na de mio familia. Violente el de mio tata y pirmi le ta habla kanamon que nuay kame sirvi.” Posible igual con Helen, ya maltrata contigo, manada beses  contigo ya insulta o ya manda contigo sinti que nuay tu valor. Si ansina, baka man dificil tu creé que tiene contigo deverasan quien ta ama.

4. Asegun na Salmo 34:18, cosa asiguranza ta dale kanaton si Jehova?

⁴ Maskin pa ya maltrata contigo el otro, puede tu asigura que ta ama contigo si Jehova y precioso tu con ele. “Cerca [le] con aquellos dolorido el corazon.” (Le con el Salmo 34:18.) Si ta sinti tu “bien triste,” acorda que ya puede mira si Jehova el maga buen cosas contigo. Y ele mismo el ya hace cerca contigo para con ele. (Juan 6:44) Pirmi le preparao ayuda contigo cay precioso tu con ele.

5. Cosa kita puede aprende na manera si paquemodo si Jesus ya trata con aquellos quien ta sinti que nuay sila valor?

⁵ Puede kita sabe si cosa si Jehova ta sinti si considera kita con el ejemplo de Jesus. Durante na de suyu ministerio aqui na tierra, ya nota si Jesus con aquellos con quien ta hace de menos el otro y ya trata le kanila con compasion. (Mat. 9:9-12) Cuando el un mujer quien tiene un grabe enfermedad ya aguanta con el ropa de Jesus cay quierre le queda bueno, ya dale con ele comforta si Jesus y ya comenda con ele por causa na de suyu fe. (Mar. 5:25-34) Ya puede gayot imita si Jesus con el de suyu Tata. (Juan 14:9) Poreso, puede tu asigura que ta ama contigo si Jehova y ta mira le con el de tuyu maga bonito calidad, incluido el de tuyu fe y de tuyu amor para con ele.

6. Cosa puede hace el un persona si ta sinti le que nuay le valor?

⁶ Cosa tu puede hace si ta sinti tu que nuay tu valor? Le maga versiculo na Biblia que ta asigura contigo que precioso tu con Jehova y medita con ese. b (Sal. 94:19) Si nuay tu  puede alcanza con el un goal o si triste tu cay gendeh tu ta puede hace igual na cosa ta puede hace el otro, no queda bien desmayao na de tuyu mismo cuerpo. Razonable si Jehova y gendeh le ta expecta mas na cosa tu puede hace. (Sal. 103:13, 14) Si ya experiencia tu abuso de antes, no disculpa con el de tuyu mismo cuerpo na cosa ya sucede. Gendeh quel de tuyu culpa. Acorda que responsable con Jehova aquellos quien ya maltrata con otro y gendeh el maga victima. (1 Ped. 3:12) Si Sandra, quien ya experiencia fisical abuso cuando bata le, ya habla: “Pirmi yo ta pidi con Jehova que ayuda conmigo mira con el de mio mismo cuerpo igual si paquemodo le ta mira conmigo.”

7. Paquemodo el diaton maga experiencia del antes puede ayuda kanaton na diaton servicio con Jehova?

⁷ Acorda que puede si Jehova usa contigo para ayuda con otro. Ya dale le contigo el privilegio que trabaja junto con ele na ministerio. (1 Cor. 3:9) El de tuyu maga gendeh buen experiencia del antes posible ya ayuda contigo para tene mas empatia con otro y entende si cosa sila ta sinti. Tiene tu cosa puede hace para ayuda kanila. Si Helen, con quien ya menciona enante, ya puede ricibi ayuda y ahora ta puede tambien le ayuda con otro. Ele ya habla: “Del antes, ta sinti yo nuay valor pero ya ayuda conmigo si Jehova para sinti que ta ama le conmigo y ya usa le conmigo para ayuda con otro.” Alegre si Helen ta sirvi ahora como un regular pioneer.

QUIERRE SI JEHOVA QUE ACEPTA KITA CON EL DE SUYU PERDON

8. Cosa asiguranza ta dale kanaton el Isaias 1:18?

⁸ El cuanto siervo de Jehova tan conciencia siempre na maga culpa que ya hace sila—antes o despues del diila bautismo. Pero debe kita acorda que ya dale si Jehova con el rescate cay ta ama gayot le kanaton. Y bien quierre le que acepta kita con ese regalo. Ta asigura si Jehova que despues kita “arregla . . . el maga cosas entre kanaton,” c completamente le hay perdona kanaton. (Le con el Isaias 1:18.) Bien amable gayot si Jehova cay gendeh mas le ta acorda con el maga culpa que ya hace kita del antes. Pero nunca le ulvida con el maga buen cosas que ya hace kita.—Sal. 103:9, 12; Heb. 6:10.

9. Porque kita pricura man focus na cosa kita ta puede hace ahora y na futuro en vez na cosa ya sucede del antes?

⁹ Si tan conciencia siempre tu na cosa ya sucede del antes, pricura man focus na cosa tu ta puede hace ahora y na futuro. Considera con el ejemplo de apostol Pablo. Triste le cay ya persigui le con el maga Cristiano pero sabe le que ya perdona ya con ele si Jehova. (1 Tim. 1:12-15) Ya continua ba le pensa acerca na de suyu culpa del antes? Asigurao, nuay le con ese hace igual si paquemodo nuay mas le continua pensa con el maga cosas que ya puede le cumpli como un Fariseo. (Fil. 3:4-8, 13-15) Sino, ya hace le con el de suyu de con todo bueno na ministerio y na cosa le puede hace na futuro. Igual con Pablo, gendeh mas tu puede cambia con el cosa ya sucede del antes. Pero, puede tu alaba con Jehova ahora y pensa con el de suyu maga bonito promesa na futuro.

10. Cosa kita puede hace si ya puede kita hace sinti duele con otro del antes?

¹⁰ Posible, destorbao tu na cosa tu ya puede hace del antes que ya hace sinti duele con otro. Cosa puede ayuda contigo? Hace si  cosa tu puede hace para queda enbuenamente el situacion y sincero pidi despensa kanila. (2 Cor. 7:11) Pidi con Jehova que ayuda con aquellos con quien tu ya puede hace sinti duele. Puede le ayuda contigo y kanila para tene paz y continua sirvi con ele.

11. Cosa kita puede aprende na ejemplo de profeta Jonas? (Mira tambien con el letrato .)

¹¹ Aprende na de tuyu kamali y permiti con Jehova que usa contigo. Nota con el ejemplo de profeta Jonas. En vez de anda na Nineve como cosa con ele ya manda el Dios, ya anda le na otro direccion. Ya disciplina con ele si Jehova y ya aprende le na de suyu kamali. (Jon. 1:1-4, 15-17; 2:7-10) Ya continua usa si Jehova con Jonas como un profeta. Ya manda con ele otravez el Dios que anda na Nineve y ahora ya obedece ya si Jonas. Nuay le permiti con el de suyu kamali del antes que sangga con ele para acepta con este assignment que ya dale si Jehova.

TA DALE KANATON COMFORTA SI JEHOVA POR MEDIO DEL SAGRAO ESPIRITU

12. Paquemodo si Jehova ta dale de suyu paz si ta experiencia kita tragedia? (Filipo 4:6, 7)

¹² Por medio del de suyu sagrao espiritu, ta dale kanaton comforta si Jehova si ta experiencia kita tragedia. Considera con el experiencia de Ron y Carol. Maka-triste cay yan suicide el diila anak hombre. Sila ya habla: “Ya experiencia kame maga dificil problema del antes pero este el de con todo grabe. Manada noche, gendeh kame ta puede durmi. Poreso, ya reza kame con Jehova y ya sinti kame el paz que ta menciona na Filipo 4:6, 7.” (Le.) Si ta experiencia tu un grabe problema, puede tu habla con Jehova na rezo si cosa tu ta sinti maskin cuando y maskin paquemodo de largo tu quierre hace con ese. (Sal. 86:3; 88:1) Pidi con el sagrao espiritu de Jehova y puede tu asigura que hay dale le se contigo.—Luc. 11:9-13.

13. Paquemodo el sagrao espiritu puede ayuda kanaton que continua fiel sirvi con Jehova? (Efeso 3:16)

¹³ Ya experiencia ba tu un probanza que ya hace contigo bien maluya? Puede contigo dale fuerza el sagrao espiritu para puede tu continua fiel sirvi con Jehova. (Le con el Efeso 3:16.) Considera con el experiencia del un hermana que si Flora. Ele y el de suyu marido ya sirvi junto como maga misionario pero ya comete adulterio el de suyu marido y yan divurcio sila. Ele ya habla: “Bien triste gayot yo cay ya traiciona le conmigo. Ya reza yo con Jehova que dale conmigo sagrao espiritu para puede yo aguanta. Ya dale conmigo comforta si Jehova y maskin pa dol imposible del primero, ya queda yo fuerte y ya puede yo aguanta por causa na de suyu ayuda.” Ya sinti le que ya ayuda con ele el Dios para tene mas confianza con Ele y que suporta con ele si Jehova na todo de suyu maga dificultad. Si Flora ya habla: “Deverasan gayot para conmigo el Salmo 119:32: ‘Hay sigui gayot yo enbuenamente con el de tuyu maga mandamiento cay ya abri tu con el de mio corazon para con este.’”

14. Cosa kita hace para mas ricibi con el sagrao espiritu del Dios?

¹⁴ Despues tu pidi con Jehova el de suyu sagrao espiritu, cosa tu debe hace? Participa na maga actividad que donde mas ricibi tu con el sagrao espiritu del Dios. Incluido aqui el atendida na maga miting y predicacion. Le con el Palabra de Jehova cada dia. (Fil. 4:8, 9) Mientras ta le tu, nota con el maga caracter na Biblia quien ya experiencia maga probanza y medita si paquemodo si Jehova ya ayuda kanila para aguanta. Si Sandra que ya menciona enante ya experiencia maga  sunod-sunod problema. Ele ya habla: “El istoria de Jose ya anima gayot conmigo. Nuay le permiti con el maga dificultad y injusticia que ya experiencia le que hace luya con el de suyu relacion con Jehova.”—Gen. 39:21-23.

TA DALE KANATON COMFORTA SI JEHOVA POR MEDIO NA MAGA HERMANO Y HERMANA

15. Con quien kita puede ricibi comforta y paquemodo sila puede ayuda kanaton? (Mira tambien con el letrato.)

¹⁵ Si ta sufri kita, “grande el consuelo” que puede dale kanaton el maga hermano y hermana. (Col. 4:11) Puede si Jehova usa kanila para manda sinti que ta ama le kanaton. Puede sila dale comforta kanaton mientras con empatia ta oi kanaton o por medio na diila presencia. Posible anima sila kanaton por medio del un texto na Biblia o reza junto kanaton. d (Roma 15:4) Tiene vez, puede el un hermano o hermana hace acorda kanaton el pensamiento de Jehova y puede se ayuda kanaton que continua aguanta. Puede tambien dale practical ayuda kanaton el maga hermano y hermana, igual como dale comida si ta experiencia kita dificultad.

16. Cosa kita posible necesita hace para ricibi suporta estaba con otro?

¹⁶ Para puede ricibi suporta estaba con otro, posible necesita kita pidi con ese. Ta ama kanaton el maga hermano y hermana  y quierre sila ayuda kanaton. (Prov. 17:17) Pero posible no sabe sila si cosa kita ta sinti o si cosa kita necesita. (Prov. 14:10) Si ta sufri tu na emocion, habla se na maga mature amigo. Manda kanila sabe si cosa puede ayuda contigo. Puede tu habla con ese na uno o dos anciano con quien tu comfortable. El cuanto hermana ya sinti comforta cuando yan cuento sila na un mature hermana.

17. Cosa puede sangga kanaton para gendeh ricibi ayuda estaba con Jehova pero cosa kita debe hace?

¹⁷ Evita que man solo-solo. Si dolorido tu, posible no quierre tu man junto con otro. Tiene vez, el maga hermano y hermana posible gendeh entende contigo o tiene sila cosa habla que puede hace sinti duele contigo. (Sant. 3:2) Pero, no evita con el maga hermano y hermana cay puede usa kanila si Jehova para anima contigo. El un anciano que si Gavin, quien tiene depression, ya habla: “Nuay yo gana man junto na de mio maga amigo.” Pero, ya pricura quita si Gavin con el de suyu negativo sentido y ya beneficia le cuando yan junto le con otro. El un hermana que si Amy ya habla: “Por causa na de mio maga experiencia del antes, dificil para conmigo que confia con el maga gente. Pero, ya aprende yo ama y confia con el maga hermano y hermana igual con Jehova. Sabe yo que ta hace este alegre con Jehova y ta hace tambien este alegre conmigo.”

PUEDE KANATON DALE COMFORTA EL MAGA PROMESA DE JEHOVA

18. Cosa kita puede esperanza na futuro y cosa kita puede hace ahora?

¹⁸ Gendeh dura, hay quita ya si Jehova con el diaton dolor, na fisical man o na emocion. (Rev. 21:3, 4) Na ese tiempo, el dolor que ya experiencia kita hay “perde ya . . . na corazon.” (Isa. 65:17) Como cosa kita ya aprende, ahora pa lang ta cuida ya si Jehova kanaton si ta sufri kita. Acepta con el maga amable provision de Jehova que puede dale contigo comforta y alivio. No gayot man duda que “ta cuida” le contigo.—1 Ped. 5:7.