El veranda amo el entrada para na Sagrao parte del templo. Asegun na maga edition del New World Translation of the Holy Scriptures que yan publish antes el año 2023, “el veranda adelante tiene largor de 20 codo igual na anchor del casa y 120 el altor de este.” (2 Cron. 3:4) El otro maga translation ya habla tambien que “120 codo” el altor del veranda—quierre decir 53 metro este de alto!

Pero cuando yan publish con el New World Translation del 2023, ya habla este que “20 codo el altor” del veranda del templo de Solomon o maga 9 metro de alto. a Considera con el cuanto razon na este cambio.

Nuay menciona con el altor del veranda na 1 Rey 6:3. Na este texto, ya menciona si Jeremias con el largor y otro pa maga detalle acerca na veranda. Pero, nuay le menciona con el altor de este. Na sunod capitulo, ya discuti le con el otro pa cosas que talla na templo, incluido el grande lugar onde ta hace pondo agua, diez cariton de agua y dos arigui de bronce que puede mira apuera del veranda. (1 Rey 7:15-37) Si mas de 50 metro el altor del veranda y mas alto contra na otro parte del templo, porque nuay menciona con este si Jeremias? Maskin despues del cuanto siglo, ya escribi el maga Judio historian que gendeh mas alto el veranda contra na otro parte del templo de Solomon.

El maga scholar tan duda si puede ba suporta el maga pader del templo con el veranda que 120 codo el altor. El maga bien alto estructura de piedra y ladrillo de antes, igual na maga grande puerta del templo na Egipto, tiene mas ancho fundacion y mas ta queda este diutay pa-arriba. Pero diferente el templo de Solomon. El maga scholar ya habla que el maga pader de este gendeh man lampas na seis codo o 2.7 metro de grueso. Poreso, el un historian que si Theodor Busink ya habla: “Base na gruesor del pader [na entrada del templo], el veranda gendeh puede queda 120 codo [de alto].”

Posible, gendeh justo el copiada del 2 Cronicas 3:4. Maskin pa el cuanto maga manuscrito de antes ya menciona “120” na este texto, el otro maga manuscrito igual na Codex Alexandrinus del ika-cinco siglo y Codex Ambrosianus del ika-seis siglo ya menciona “20 codo.” Cosa posible el razon si porque mali el copiada de este? Na escribida na lengguaje de Hebreo, semejante el maga palabra “ciento” y “codo.” Poreso, posible que el quien ya copia ya puede escribi con el palabra “ciento” en vez na “codo.”

Maskin pa ta pricura kita entende y sabe con este maga detalle na templo de Solomon, mas interesao kita sabe con el cosa que mas importante—el grande espiritual templo. Bien alegre kita que ya invita si Jehova con el todo de suyu maga siervo que adora con ele na este templo!—Heb. 9:11-14; Rev. 3:12; 7:9-17.