BIEN importante el musica na cultura del Israel de antes. Manada beses ya menciona el Biblia acerca na maga gente quien ta tuca instrumento y ta canta maga cancion. Gane, grande parte del Biblia amo maga cancion. Incluido alli el maga libro de Salmo, Cancion de Solomon y Lamentacion. Asegun na un libro acerca na tiempo del Biblia, claro puede mira na Biblia que parte el musica na maga actividad del maga Israelita.

Musica na cada dia actividad. Ta canta y ta tuca musica el maga Israelita para dale mira el diila emocion. (Isa. 30:29) Ta tuca tamborin el maga mujer, alegre ta canta y ta baila si tiene nuevo rey, si ya ganá el maga soldao na guerra y si tiene maga fiesta para na adoranza con Dios. (Juez 11:34; 1 Sam. 18:6, 7; 1 Rey 1:39, 40) Ta canta tambien el maga Israelita si tiene quien ya muri. (2 Cron. 35:25) Claro gayot que “quierre-quierre musica el maga Hebreo,” asegun na Cyclopedia de McClintock y Strong.

Musica na palacio. Alegre oi musica el maga rey de Israel. Por ejemplo, ya iscuji si Rey Saul con David que sirvi como un musiquero na de suyu palacio. (1 Sam. 16:18, 23) Despues cuando ya queda rey si David, ya inventa le maga instrumento de musica, ya hace maga cancion y ya organiza con el orchestra para na templo de Jehova. (2 Cron. 7:6; Amos 6:5) Tiene tambien maga hombre y mujer ta canta na palacio de Rey Solomon.—Ecl. 2:8.

Musica para na adoranza. Ta usa musica el maga Israelita para adora con Jehova. Gane, 4,000 musiquero el ta tuca na templo na Jerusalem. (1 Cron. 23:5) Ta tuca sila maga cimbalo, instrumento de cuerdas, arpa y trompeta. (2 Cron. 5:12) Pero, gendeh lang sila el ta adora con Jehova por medio na musica. Ta sale que manada Israelita el ta canta con el Maga Cancion de Subida si ta anda sila na Jerusalem para na maga fiesta que ta hace sila cada año. (Sal. 120-134) Y asegun na maga libro acerca na maga Judio de antes, ta canta el maga Israelita con el Hallel a durante el Pascua.

Importante siempre el musica para na maga siervo del Dios ahora. (Sant. 5:13) Ta canta kita como parte del diaton adoranza. (Ef. 5:19) Ta queda kita unido na diaton maga hermano y hermana por causa con este. (Col. 3:16) Y ta hace este fuerte kanaton si ta experiencia kita maga dificultad. (Act. 16:25) Un bonito manera gayot el musica para dale mira el diaton fe y amor con Jehova.