1. Asegun na Mateo 11:28-30, cosa promesa ya hace si Jesus?

SI Jesus ya hace un bonito promesa para na maga gente quien ta oi con ele. “Anda ustedes todo conmigo,” ya habla le, “cay ay dale yo con ustedes el alivio.” (Le con el Mateo 11:28-30.) Deverasan gayot este promesa. Por ejemplo, pensa si cosa le ya hace con el un mujer quien ta sufri na un grabe enfermedad.

2. Cosa ya hace si Jesus con el enfermo mujer?

² Necesita gayot ayuda el mujer. Ya anda le na manada doctor cay quierre le queda bueno. Por 12 año ya le ta sufri pero nuay quien ya puede cura con ele. Asegun na Ley de Moises, mabuling le. (Lev. 15:25) Despues, ya sabe le que ta puede cura si Jesus con aquellos quien ta sufri poreso ya busca le con ele. Cuando ya incuntra le con Jesus, ya agarra le con el sit-sit del de suyu camisa y ya queda le dayun bueno! Pero nuay lang cura si Jesus con el mujer sino ya manda con ele sinti que ta ama y ta respeta con ele. Por ejemplo, cuando yan cuento le con el mujer, ya llama le con ele “mi anak.” Asigurao ya sinti gayot alivio el mujer!​—Luc. 8:43-48.

3. Cosa maga pregunta kita hay contesta?

³ Nota que el mujer ya anda con Jesus. Ya hace le esfuerzo para anda con ele. Deverasan tambien se na diaton tiempo ahora. Debe kita hace esfuerzo para “anda” con Jesus. Ahora, gendeh ta cura si Jesus con aquellos maga enfermo que ta “anda” con ele. Pero, ta invita le siempre: “Anda ustedes todo  conmigo . . . cay ay dale yo con ustedes el alivio.” Na este articulo, hay contesta kita con el cinco pregunta: Cosa kita necesita hace para “anda” con Jesus? Cosa quierre decir de Jesus cuando ya habla le: “Carga el dimio ayugo”? Cosa kita puede aprende con Jesus? Porque ta dale alivio el trabajo que ya dale le kanaton? Y na cosa manera kita puede continua sinti alivio bajo na ayugo de Jesus?

4-5. Cosa el cuanto manera que puede kita “anda” con Jesus?

⁴ El un manera para “anda” con Jesus amo que hace el todo lo que puede para aprende acerca na cosa le ya habla y ya hace. (Luc. 1:1-4) Nuay quien puede hace con este para kanaton. Responsibilidad diaton que estudia si cosa ta habla el Biblia acerca con Jesus. Ta “anda” tambien kita con Jesus si decidi kita bautiza y queda dicipulo del Cristo.

⁵ El otro manera para “anda” con Jesus amo si ta atraca kita na maga anciano si ta necesita kita ayuda. Ta usa si Jesus con este “maga regalo con el maga gente” para cuida con el de suyu maga carnero. (Ef. 4:7, 8, 11; Juan 21:16; 1 Ped. 5:1-3) Necesita kita hace esfuerzo para pidi ayuda kanila. Gendeh kita expecta que puede le el maga anciano con el diaton pensamiento y sabe si cosa kita necesita. Considera si cosa ya habla el un hermano que si Julian: “Necesita yo deja con el de mio assignment na Bethel por causa na de mio salud y uno del de mio maga amigo ya habla que pidi yo que man shepherding conmigo. Del primero, nuay yo pensa que necesita yo se. Pero na uliji, ya pidi yo ayuda y aquel shepherding ya queda uno del maga de con todo buen regalo que ya ricibi yo.” El maga leal anciano, igual con aquel dos quien ya visita con Julian, puede kanaton ayuda para sabe con el “pensamiento de Cristo.” Este quierre decir que puede sila ayuda kanaton entende y imita con el pensamiento y custumbre de Jesus. (1 Cor. 2:16; 1 Ped. 2:21) Amo este el uno del maga de con todo buen regalo que puede sila dale kanaton.

6. Cosa quierre decir cuando ya habla si Jesus: “Carga el dimio ayugo”?

⁶ Cuando ya habla si Jesus: “Carga el dimio ayugo,” posible quierre decir este “Acepta de mio autoridad.” O posible quierre decir quel “Carga kita con el ayugo y junto kita trabaja para con Jehova.” Este dos expresion quierre decir que necesita kita trabaja.

7. Asegun na Mateo 28:18-20, cosa trabajo ya dale kanaton y na cosa kita puede asigura?

⁷ Ya acepta kita con el invitacion de Jesus cuando ya dedica kita diaton vida con Jehova y ya bautiza. Para na todo se invitacion​—acepta gayot si Jesus con todo quien quierre sirvi con Dios. (Juan 6:37, 38) Todo del maga siguidores del Cristo ya dale privilegio que hace el trabajo que ya manda si Jehova con Jesus. Puede kita asigura que pirmi kanaton junto si Jesus para ayuda hace ese trabajo.​—Le con el Mateo 28:18-20.

8-9. Porque el maga humilde persona quierre queda cerca con Jesus y cosa kita pregunta na diaton mismo cuerpo?

⁸ El maga humilde persona quierre queda cerca con Jesus. (Mat. 19:13, 14; Luc. 7:37, 38) Porque? Considera con el diferencia entre con Jesus y na maga Fariseo. Arogante y gendeh amable aquellos maga religioso lider. (Mat. 12:9-14) Si Jesus amable y humilde. El maga Fariseo tan hambug con el diila posicion na sociedad. Si Jesus ya habla que gendeh bueno man hambug y ya enseña le  con el de suyu maga dicipulo que queda humilde y sirvi con otro. (Mat. 23:2, 6-11) El maga Fariseo ta usa con el diila poder para hace miedo con otro. (Juan 9:13, 22) Ya dale alivio si Jesus con otro por medio na de suyu amable accion y palabra.

⁹ Ya aprende ya ba tu este leccion con Jesus? Pregunta na de tuyu mismo cuerpo: ‘Ta mira ba el otro que humilde yo y gendeh pronto rabia? Preparao ba yo hace bajo trabajo para sirvi con otro? Bueno ba yo con otro?’

12-14. Porque ta dale alivio el trabajo que ya dale si Jesus kanaton?

¹² Porque kita sinti alivio si hace kita el trabajo que ya dale kanaton si Jesus? Considera kita con el cuanto razon.

¹³ Tiene kita maga de con todo buen overseer. Maskin pa si Jehova el Bien Alto Dios, ta aprecia le kanaton y gendeh le un mal amo. Ta aprecia le con el trabajo que ta hace kita. (Heb. 6:10) Y ta dale le fuerza kanaton para puede kita hace el diaton trabajo. (2 Cor. 4:7; Gal. 6:5) Si Jesus, el diaton Rey, ya dale kanaton buen ejemplo si paquemodo trata con otro. (Juan 13:15) Y el maga anciano quien ta cuida kanaton ta pricura imita con Jesus, “el grande pastor.” (Heb. 13:20; 1 Ped. 5:2) Sila tiene coraje, ta anima y ta pricura trata kanaton enbuenamente mientras ta guia y ta protege kanaton.

¹⁴ Tiene kita el de con todo buen amigo. Nuay otro gente el tiene maga amable amigo y bonito trabajo que igual na cosa kita tiene. Pensa este: Tiene kita el privilegio que trabaja junto con el maga gente quien tiene bien alto principio na moral pero gendeh ta pensa que mas bueno sila con otro. Manada sila abilidad pero gendeh sila tan hambug y ta considera sila que mas alto kanila el otro. Ta mira sila kanaton como maga amigo y gendeh lang como maga uban na trabajo. Y bien grande el diila amor cay preparao sila muri para kanaton!

15. Cosa kita debe sinti acerca na diaton trabajo?

¹⁵ Tiene kita el de con todo buen trabajo. Ta enseña kita con el maga gente el verdad acerca con Jehova y gendeh kita ta esconde con el imbusterias del Diablo. (Juan 8:44) Tan imbusterias si Satanas con el maga gente que ta causa kanila para perde esperanza. Por ejemplo, quierre le que pensa kita que gendeh perdona si Jehova con el diaton maga culpa y nuay kanaton quien ta ama. Maka-luya gayot se imbusterias! Si “anda” kita con el Cristo, hay perdona con el diaton maga pecado. Y el verdad amo que si Jehova ta ama gayot  kanaton todo. (Rom. 8:32, 38, 39) Ta dale gayot kanaton alegria si ta ayuda kita con el maga gente aprende confia con Jehova y si ta mira kita el progreso na diila vida!

16. Na cosa manera diferente el trabajo que ya manda kanaton si Jesus na otro trabajo que ta hace kita?

¹⁶ El trabajo que ya manda kanaton si Jesus diferente na otro trabajo que ta hace kita. Por ejemplo, despues del diila secular trabajo, manada el ta sinti cansao y gendeh alegre. Pero kita, despues usa con el diaton tiempo na servicio con Jehova y con el Cristo, bien alegre kita. Posible, cansao kita despues trabaja entero dia y necesita kita forza con el diaton cuerpo para atende miting ese noche. Pero si bolbe kita na casa despues del miting, ta sinti kita alivio y tiene fuerza otravez. Ansina tambien kita ta sinti si ta hace kita esfuerzo predica y man personal study. Mas manada bendicion kita ta ricibi contra na esfuerzo que ta hace kita.

17. Cosa kita debe realiza y na cosa kita debe con cuidao?

¹⁷ Debe kita realiza que limitao lang el diaton fuerza. Poreso, debe con cuidao kita na usada de ese. Por ejemplo, posible kita hace usik con el diaton fuerza para busca material cosas. Nota si cosa ya habla si Jesus con el rico joven hombre quien ya pregunta con ele: “Cosa yo necesita hace para hereda el vida eterno?” El joven hombre ta obedece ya con el Ley. Posible, buen gente le cay el Evangelio de Marcos ya habla que si Jesus “ya mira con ele con amor.” Ya invita si Jesus con ese gente. “Anda, y vende todo el que tiene tu,” ya habla si Jesus, “despues, vene y sigui Conmigo.” Quierre le sigui con Jesus pero no quierre le deja con el de suyu riqueza cay “bien rico gayot ele.” (Mar. 10:17-22) Como resulta, nuay le acepta con el invitacion de Jesus y ya continua le queda esclavo na “sen.” (Mat. 6:24) Etu, cosa tu iscuji?

18. Cosa kita debe hace y porque?

¹⁸ Bueno si regular kita ta examina con el diaton maga prioridad. Porque? Para puede kita asigura que ta usa kita diaton fuerza na justo manera. Considera el cosa ya habla el un jovencito, si Mark: “Por cuanto año, pensaba yo ta vivi ya yo simple. Pioneer yo pero pirmi yo ta pensa acerca na sen y si paquemodo yo vivi mas comfortable. Ya pensa yo si porque dificil el de mio vida. Despues pa yo ya realiza que ta hace yo una con el de mio mismo cuerpo y sobra ya lang del de mio tiempo y fuerza el ta dale yo con Jehova.” Ya hace cambio si Mark na de suyu pensamiento y manera de vida para puede hace mas na servicio con Jehova. “Tiene vez tan lingasa yo acerca na sen,” ya habla si Mark, “pero na ayuda de Jehova y de Jesus, ya puede yo man focus sirvi con Jehova.”

19. Porque importante tiene justo mirada?

¹⁹ Puede kita continua sinti alivio bajo na ayugo de Jesus si hace kita tres cosas. Una, mentena justo mirada na maga cosas. Ta hace kita el trabajo de Jehova poreso debe se hace na manera que quierre si Jehova. Kita el maga trabajador y si Jehova el Amo. (Luc. 17:10) Si pricura kita hace con el de suyu trabajo asegun na cosa kita quierre, ta hace lang kita dificil diaton vida. Gane, maskin el un mafuerza toro hay iri y cansa si pirmi le quierre anda na de suyu direccion y man contra con el ayugo que controlao de suyu amo. Pero si sigui kita con el guia de Jehova, puede kita hace el maga cosas que ta pensa kita gendeh kita puede hace y puede kita enfrenta con el maga dificultad. Acorda que nuay quien puede  sangga con ele para cumpli con el de suyu voluntad!​—Rom. 8:31; 1 Juan 4:4.

20. Cosa debe el diaton motivo si carga kita con el ayugo de Jesus?

²⁰ Ika-dos, trabaja con justo motivo. El diaton goal amo que dale alabanza con el diaton amable Tata, si Jehova. El maga gente del primer siglo quien maga hambriento o diila cuerpo lang ta pensa ya queda gendeh mas alegre na uliji y ya deja sila con el ayugo de Jesus. (Juan 6:25-27, 51, 60, 66; Fil. 3:18, 19) Pero aquellos quien ta ama con Dios y con el diila vecinos, alegre carga con el ayugo na entero vida diila y tiene sila esperanza sirvi junto con el Cristo na cielo. Igual kanila, puede kita esta alegre si carga kita con el ayugo de Jesus con justo motivo.

21. Asegun na Mateo 6:31-33, cosa kita puede expecta que hace si Jehova?

²¹ Ika-tres, expecta que si Jehova hay ayuda contigo. Ya iscuji kita el vida que necesita man sacrificio y trabaja enbuenamente. Ya dale aviso si Jesus que hay persigui kanaton. Pero, puede kita expecta que hay dale kanaton fuerza si Jehova para puede aguanta maskin cosa dificultad. Si continua kita aguanta, mas queda kita fuerte. (Sant. 1:2-4) Puede tambien kita expecta que hay dale si Jehova el diaton necesidad, hay cuida kanaton si Jesus y hay anima kanaton el diaton maga hermano y hermana. (Le con el Mateo 6:31-33; Juan 10:14; 1 Tes. 5:11) Completo ya el cosa kita necesita para aguanta maskin cosa dificultad!

22. Na cosa kita alegre?

²² Ya sinti dayun alivio el mujer con quien ya cura si Jesus. Pero puede lang le ricibi el alivio hasta para cuando si ya esta le leal dicipulo del Cristo. Cosa gaha le ya hace? Pensa con el premio que hay ricibi le si ya queda le dicipulo de Jesus​—sirvi le junto con Jesus na cielo! El maskin cosa sacrificio que ya hace le para sigui con el Cristo bien diutay lang si compara con ese bendicion. Maskin cosa man el diaton esperanza​—vivi hasta para cuando na cielo o na tierra—​alegre gayot kita cay ya acepta kita con el invitacion de Jesus: “Anda ustedes todo conmigo”!