1. Cosa el situacion de apostol Juan na fin del primer siglo C.E.?

NA FIN del primer siglo C.E., na bien dificil situacion si apostol Juan. De edad ya le, preso na isla de Patmos y posible, ele ya lang el vivo na maga apostoles. (Rev. 1:9) Sabe le que el maga tan contra kanila ta enseña falso cosas y ta causa division con el congregacion. El verdadero Cristianidad dol igual ya na un diutay fuego que cerca ya apaga.​—Jud. 4; Rev. 2:15, 20; 3:1, 17.

2. Asegun na Revelacion 7:9-14, cosa maka-alegre vision el ya ricibi si Juan? (Mira con el letrato na cover.)

² Mientras na dificil situacion si Juan, el Dios ya dale con ele un maka-alegre vision acerca na futuro. Na este vision, ya habla con el maga angel que sangga con el viento de destrozo del grande tribulacion hasta hay acaba ajunta con el grupo de maga esclavo. (Rev. 7:1-3) Este grupo amo el 144,000 quien hay rula junto con Jesus na cielo. (Luc. 12:32; Rev. 7:4) Despues, ya menciona si Juan acerca na otro grupo que bien grande y ya habla: “Ya puede yo mira bien mucho maga gente que no puede conta, de todo maga nacion, raza, tribo y lenguage. Parao sila adelante del trono y del Carnero.” (Le con el Revelacion 7:9-14.) Imagina si paquemodo de alegre si Juan cuando ya puede le sabe que na futuro, manada gente hay adora con Dios na justo manera!

3. (a) Porque el vision de Juan puede hace fuerte con el diaton fe? (b) Cosa kita aprende na este articulo?

³ Asigurao, aquel vision ya hace gayot fuerte con el fe de Juan. Debe tambien se mas hace fuerte con el diaton fe cay ta cumpli ya ese vision na diaton tiempo ahora. Millones del maga gente el ya principia adora con Jehova y ta esperanza  sobrevivi na grande tribulacion y vivi hasta para cuando na tierra. Na este articulo, puede kita aprende si paquemodo si Jehova ya revela na de suyu maga siervo mas de 80 año ya el ya pasa si con quien ta refiri este grande grupo. Despues, considera kita con el dos cosas acerca con ese grupo: (1) este bien grande y (2) el maga miembro de este estaba na todo nacion. Este maga punto puede hace fuerte con el fe de aquellos quien ta esperanza que queda parte de ese grupo.

4. Cosa verdad na Biblia el nuay entende aquellos quien ta clama maga Cristiano y paquemodo el maga Estudiante del Biblia diferente kanila?

⁴ Aquellos quien ta clama Cristiano gendeh ta enseña con el verdad que el maga obediente gente hay vivi hasta para cuando aqui na tierra. (2 Cor. 4:3, 4) Ahora, mayoria del maga religion que ta clama Cristiano ta enseña que el todo maga bueno hay subi na cielo si muri sila. Pero, otro el cosa ta enseña el diutay grupo de maga Estudiante del Biblia quien yan publish con el Watch Tower desde el año 1879. Ya puede sila entende que el Dios hay hace Paraiso otravez con el tierra y millones del maga obediente gente hay vivi aqui na tierra y gendeh na cielo. Pero, ya pasa pa el cuanto tiempo antes sila ya puede entende si quien este maga obediente gente.​—Mat. 6:10.

5. Cosa ta creé el maga Estudiante del Biblia acerca na 144,000?

⁵ Siempre, ya puede tambien sabe el maga Estudiante del Biblia na Escritura que tiene un grupo “con quien ya rescata na mundo” para man junto con Jesus rula na cielo. (Rev. 14:3) Este grupo de 144,000 amo el maga activo y dedicao Cristiano quien ya sirvi fiel con Dios cuando na tierra pa sila. Pero cosa ta creé el maga Estudiante del Biblia acerca na grande grupo?

6. Cosa ta creé el maga Estudiante del Biblia acerca na grande grupo?

⁶ Na vision de Juan, ya puede le mira con ese grupo ‘parao adelante del trono y del Carnero.’ (Rev. 7:9) Base con ese palabra, ya puede pensa el maga Estudiante del Biblia que el grande grupo hay esta tambien na cielo igual con el 144,000. Si el 144,000 y el grande grupo hay esta na cielo, cosa el diferencia de este dos grupo? Pensaba el maga Estudiante del Biblia que este grande grupo amo aquellos maga Cristiano quien gendeh gayot bien obediente con Dios cuando na tierra pa sila. Maskin pa ta sigui sila con el principio de moral na Biblia, posible el cuanto diila miembro pa na maga religion que ta clama Cristiano. Ya pensa el maga Estudiante del Biblia que tiene sila amor con Dios pero gendeh bastante para rula junto con Jesus. Cay gendeh bien fuerte el diila amor con Dios, el grande grupo cualificao subi na cielo adelante del trono pero gendeh sila sinta na maga trono.

7. Asegun con el maga Estudiante del Biblia, quien hay vivi na tierra y cosa sila ta pensa acerca con el maga fiel hombre quien ya muri antes del Cristo?

⁷ Quien man hay esta na tierra? El maga Estudiante del Biblia ta creé que despues ajunta con el 144,000 y con el grande grupo para na cielo, millones el quien vivi na tierra para beneficia na maga bendicion del Un Mil Año Rulanza del Cristo. Nuay pensa el maga Estudiante del Biblia que ese maga gente puede sirvi con Jehova antes principia rula el Cristo. Sino, ta pensa sila que este grupo hay aprende acerca con Jehova durante del Un Mil Año Rulanza. Despues, aquellos quien ya obedece con el mandamiento de Jehova hay  obtene el vida hasta para cuando pero hay destroza con aquellos quien yan rebelde con ele. Ya pensa tambien el maga Estudiante del Biblia que posible cuanto de aquellos quien queda “maga principe” durante ese tiempo hay subi na cielo na fin del Un Mil Año Rulanza. Incluido aqui el maga fiel hombre quien ya muri antes del Cristo con quien hace resucita durante el Un Mil Año Rulanza.​—Sal. 45:16.

8. Asegun con el maga Estudiante del Biblia, cosa tres grupo el tiene parte na proposito del Dios?

⁸ El maga Estudiante del Biblia ta creé que tiene tres grupo: (1) el 144,000 quien hay rula junto con Jesus na cielo; (2) el grande grupo de maga Cristiano que gendeh bien activo quien hay para adelante na trono de Jesus na cielo y (3) el millones de maga gente quien hay aprende acerca con Jehova durante del Un Mil Año Rulanza del Cristo. * Pero nuay dura, si Jehova ya ayuda kanila para mas claro sila entende con ese topico.​—Prov. 4:18.

9. (a) Na cosa manera el grande grupo aqui na tierra puede para “adelante del trono y del Carnero”? (b) Porque razonable este nuevo entendimiento acerca na Revelacion 7:9?

⁹ Del 1935, mas ya entende el maga Testigo de Jehova si quien el incluido na grande grupo. El maga Testigo de Jehova ya puede realiza que el grande grupo gendeh literal hay para “adelante del trono y del Carnero.” Sino, ta hace sila este na simbolico manera. Maskin pa esta sila na tierra, el grande grupo puede para “adelante del trono” si conoce sila el autoridad de Jehova y somete na de suyu soberania. (Isa. 66:1) Puede sila para “adelante . . . del Carnero” si demonstra sila fe na rescate de Jesus. Na Mateo 25:31, 32 ta habla tambien que “todo el maga nacion”​—incluido el maga malo—​“ay ajunta adelante” na trono de Jesus. Claro que este todo nacion taqui na tierra, gendeh na cielo. Razonable este nuevo entendimiento cay ta hace este claro si porque el Biblia nuay menciona acerca con el grande grupo que subi na cielo. Na un grupo lang ya promete vida hasta para cuando na cielo​—el 144,000 quien “goberna con el mundo” junto con Jesus.​—Rev. 5:10.

10. Porque necesita aprende el grande grupo acerca con Jehova antes principia el Un Mil Año Rulanza?

¹⁰ Desde el año 1935, el maga Testigo de Jehova ya puede entende que el grande grupo na vision de Juan amo el un grupo del maga fiel Cristiano quien tiene el esperanza vivi na tierra hasta para cuando. Para puede salva na grande tribulacion, el grande grupo necesita aprende acerca con Jehova antes principia el Un Mil Año Rulanza del Cristo. Necesita sila demonstra fuerte fe para puede “escapa [con] todo ese maga cosas que ay vene” antes principia el Un Mil Año Rulanza.​—Luc. 21:34-36, El Nuevo Testamento.

11. Porque ya puede pensa el maga Estudiante del Biblia que tiene cuanto del maga gente hay subi na cielo despues del Un Mil Año Rulanza del Cristo?

¹¹ Quetal el diila entendimiento acerca con el maga fiel de antes con quien hay resucita para na cielo despues del Un Mil Año Rulanza del Cristo? Ese posibilidad puede le na issue de The Watch Tower, del Febrero 15, 1913. Posible tiene quien ya pensa, ‘Porque el maga fiel de antes hay resucita lang na tierra, pero el maga Cristiano quien gendeh bien activo hay premia vida na cielo?’ Ya puede se sila pensa por causa na dos mali razon: (1) el  grande grupo hay subi na cielo y (2) el grande grupo amo el maga gendeh bien activo Cristiano.

12-13. Cosa sabe el maga iscujido y el grande grupo acerca na diila premio?

¹² Como cosa kita ya puede aprende, desde 1935, claro ya puede entende el maga Testigo de Jehova que el grande grupo na vision de Juan amo aquellos quien hay sobrevivi na Armagedon. Sila hay “sale victorioso na grande persecucion” aqui na tierra y “grita sila duro: ‘El Salvacion ta sale con el diaton Dios, quien sintao na trono, y con el Carnero.’” (Rev. 7:10, 14) Mas pa, el Escritura ta enseña que aquellos resucita na cielo hay ricibi “un cosa mas bueno pa” compara con el esperanza que tiene aquellos maga fiel de antes. (Heb. 11:40) Poreso, el diaton maga hermano con gana ya principia invita con el maga gente para sirvi con Jehova que tiene esperanza vivi na tierra hasta para cuando.

¹³ Bien alegre el grande grupo na diila esperanza. Ya puede sila entende que si Jehova el quien iscuji si na cielo ba o na tierra sirvi el de suyu fiel siervo. El maga iscujido y el grande grupo sabe que el diila premio ya queda lang posible por causa na rescate de Jesucristo que resulta del incomparable pagka-bueno de Jehova.​—Rom. 3:24.

14. Despues del año 1935, porque manada el ya estraña si paquemodo cumpli el profecia acerca con el grande grupo?

¹⁴ Despues mas queda claro el entendimiento del maga Testigo de Jehova del año 1935, manada siempre el ya estraña si paquemodo queda manada aquellos quien tiene esperanza vivi na tierra. Por ejemplo, 12 año pa lang si Ronald Parkin cuando ya queda claro si con quien ta refiri el grande grupo. “Aquel tiempo,” ya acorda le, “maga 56,000 publisher lang el tiene na entero mundo y el manada, posible el mayoria kanila, amo maga iscujido Cristiano. Poreso, dol gendeh gayot grande ese grupo.”

15. Paquemodo ta continua omenta el grande grupo?

¹⁵ Del siguiente maga decada, manada misionario el ya imbia na manada nacion y el numero del maga Testigo de Jehova mas ya omenta. Despues del 1968, ya principia hace un programa de estudiada na Biblia usando el libro The Truth That Leads to Eternal Life. Por causa na simple explanacion de este acerca na verdad na Biblia, mas manada sumiso persona el ya queda interesao. Adentro lang del cuatro año, mas de media millon nuevo dicipulo el ya bautiza. Mientras ta principia perde el influencia del Iglesia Catolico  na Latin America y na otro pa maga nacion y nuay mas ya prohibi con el diaton trabajo na Eastern Europe y na cuanto lugar na Africa, millones el ya bautiza. (Isa. 60:22) Na mas reciente año, el organizacion de Jehova ya produci otro pa maga efectivo tool que ta usa para ayuda con el maga gente aprende si cosa ta enseña el Biblia. Claro que ta ajunta ya con el grande grupo que mas de ocho millon ya ahora.

16. Onde estaba el grande grupo?

¹⁶ Cuando ya escribi si Juan con el vision, ele ya habla que el grande grupo hay sale estaba na “todo maga nacion, raza, tribo y lenguage.” Si profeta Zacarias ya predicta tambien igual con ese. Ya escribi le: “Na ese tiempo, diez hombre que estaba na otro-otro maga lengguaje del maga nacion el agarra con el ropa del un Judio y hay habla: ‘Quierre kame sigui con ustedes, cay ya puede kame oi que el Dios junto con ustedes.’”​—Zac. 8:23.

17. Cosa kita ta hace para ayuda con el maga gente estaba na todo nacion y lengguaje?

¹⁷ Ya realiza el maga Testigo de Jehova que para puede ajunta con el maga gente de todo lengguaje, debe predica con el buen noticia na manada lengguaje. Mas de 130 año ya  kita tan translate maga publicacion que ta usa na Bible study pero ahora, mas manada kita cosa ta puede man translate na mas de 900 lengguaje. Claro que si Jehova ta hace un milagro na diaton tiempo ahora. Ta ajunta le con el grande grupo estaba na todo nacion. Por causa na abundancia de espiritual comida na manada lengguaje, este grupo unido ta adora con Jehova maskin pa estaba sila na otro-otro nacion. Y conocido tambien con el maga siervo de Jehova por causa na diila activo predicacion y diila amor con uno’y otro. Ta puede gayot este anima kanaton!​—Mat. 24:14; Juan 13:35.

18. (a) Asegun na Isaias 46:10, 11, porque gendeh maka-estraña que ya puede cumpli si Jehova con el profecia acerca con el grande grupo? (b) Porque aquellos tiene esperanza vivi na tierra gendeh ta pensa que alcanse sila?

¹⁸ Bien alegre gayot kita cay ta cumpli ya ahora el profecia acerca con el grande grupo! Gendeh maka-estraña que ya puede cumpli si Jehova con ese profecia. (Le con el Isaias 46:10, 11.) Ta rindi gayot gracias el grande grupo con el esperanza que ya dale si Jehova kanila. Gendeh sila ta pensa que alcanse sila cay nuay kanila iscuji el espiritu del Dios para sirvi junto con Jesus na cielo. Puede kita le na Escritura el cuanto maga fiel hombre y mujer quien ya guia el sagrao espiritu pero gendeh parte del 144,000. Uno alli amo si Juan Bautista. (Mat. 11:11) El otro ejemplo amo si David. (Act. 2:34) Hay resucita kanila y con otro na paraiso tierra. Este sila todo​—junto con el grande grupo—​hay tiene el privilegio para demonstra diila lealtad con Jehova y na de suyu soberania.

19. Si ya entende kita con el vision de Juan acerca na grande grupo, cosa kita hace?

¹⁹ Este el primer vez que el Dios ya ajunta con el millones de maga gente estaba na todo nacion para adora con ele. Na cielo man el diaton esperanza o na tierra, necesita kita ayuda con el mas manada gente para queda parte del grande grupo de “otro maga carnero.” (Juan 10:16) Gendeh mas dura, por medio del grande tribulacion, hay destroza si Jehova con el maga gobierno y maga religion que ta causa grabe sufrimiento na maga gente. El todo miembro del grande grupo tiene grande privilegio que sirvi con Jehova na tierra hasta para cuando!​—Rev. 7:14.