1. Porque kita debe somete con Jehova?

DEBE kita somete * con Jehova cay ele el diaton Creador. Poreso, tiene le derecho para habla si cosa debe hace el de suyu maga creacion. (Rev. 4:11) Pero, tiene pa otro razon si porque kita debe obedece con ele. El manera del de suyu rulanza amo el de con todo bueno. Na entero historia del gente, el cuanto maga gente tiene poder y autoridad na otro. Pero si compara kanila, si Jehova el de con todo sabio, amable y lastimoso.​—Ex. 34:6; Rom. 16:27; 1 Juan 4:8.

2. Asegun na Maga Hebreo 12:9-11, porque kita somete con Jehova?

² Quierre si Jehova que obedece kita con ele gendeh lang cay tiene kita miedo con ele. Sino, cay ta ama y ta mira kita con ele como el diaton amable Tata. Na carta de Pablo para na maga Hebreo, ya explica le que debe “somete kita mas embuenamente con el Tata” cay ta enseña le kanaton para na diaton beneficio.​—Le con el Maga Hebreo 12:9-11.

3. (a) Cosa kita hace para dale mira que ta somete kita con Jehova? (b) Cosa maga pregunta kita contesta?

³ Ta somete kita con Jehova si ta hace kita el todo lo que puede para obedece con ele na todo cosas y si ta evita kita con el tendencia que depende na diaton mismo entendimiento. (Prov. 3:5) Mas facil somete con Jehova si mas aprende kita acerca na de suyu maga bonito calidad. Porque? Cay yan base  na este maga calidad el todo cosa le ya hace. (Sal. 145:9) Si mas ta aprende kita acerca con Jehova, mas ama kita con ele. Y si ta ama kita con ele, gendeh kita necesita lista de maga cosas que debe y gendeh debe hace. Ta hace kita esfuerzo para el diaton pensamiento y sentido queda harmonia na cosa quierre si Jehova y evita si cosa el malo. (Sal. 97:10) Pero tiene vez, tan dificil kita obedece con Jehova. Cosa el razon? Y cosa puede aprende el maga anciano, tata y nana na ejemplo de Gobernador Nehemias, Rey David y Maria, el nana de Jesus? Este articulo hay contesta con ese maga pregunta.

4-5. Asegun na Roma 7:21-23, porque tan dificil kita somete con Jehova?

⁴ Un razon si porque tan dificil kita somete con Jehova amo cay ya hereda kita pecado. Ciendo imperfecto kita, tiene kita tendencia man rebelde con Dios. Despues man rebelde si Adan y Eva con Dios y ya come con el fruta que ya prohibi kanila, sila mismo ya decidi si cosa el bueno y malo para kanila. (Gen. 3:22) Ahora, mayoria del maga gente ta ignora tambien con Jehova y sila mismo ta decidi si cosa el justo y malo para kanila.

⁵ Maskin aquellos quien conoce y ta ama con Jehova, posible tan dificil tiene vez somete con ele. Ya puede este experiencia si apostol Pablo. (Le con el Roma 7:21-23.) Igual con Pablo, quierre kita hace si cosa el justo na ojos de Jehova. Pero debe kita pirmi resisti con el tendencia que hace si cosa el malo.

6-7. Cosa el segundo razon si porque dificil somete con Jehova? Dale ejemplo.

⁶ El otro razon si porque dificil somete con Jehova amo cay tiene influencia kanaton el diaton cultura. Manada idea de gente el contra na querrer del Dios y necesita kita hace esfuerzo para gendeh tiene ese clase de pensamiento. Considera kita un ejemplo.

⁷ Comon na otro maga lugar que man pressure con el maga jovenes para busca manada sen. Un hermana, si Mary *, ya experiencia con ese. Antes le aprende acerca con Jehova, ya entra le na uno de maga bien prominente escuela na diila nacion. Ya forza con ele el de suyu familia que busca trabajo que grande el sueldo para respeta con ele el maga gente. Quierre tambien se ele. Pero cuando ya aprende le acerca con Jehova y ya principia ama con ele, ya cambia le de suyu plano. Pero gendeh quel facil para con ele. Ele ya habla: “Tiene vez, ta llega el oportunidad que puede yo incuntra grande sueldo pero tiene negativo efecto na de mio espiritual rutina. Por causa na manera que ya hace conmigo engranda, tan dificil siempre yo resisti con ese. Ya pidi yo con Jehova que ayuda conmigo resisti con el trabajo que puede sangga con el de mio servicio con ele.”​—Mat. 6:24.

8. Cosa kita considera ahora?

⁸ Beneficia kita si somete kita con Jehova. Pero si aquellos tiene autoridad igual con el maga anciano, tata y nana ta somete con Jehova, ta puede sila ayuda con otro. Considera kita cuanto ejemplo na Biblia que ta enseña kanaton si paquemodo usa con el diaton autoridad na manera que ta hace alegre con Jehova.

9. Cosa dificultad ya enfrenta si Nehemias?

⁹ Ya dale si Jehova importante responsibilidad con el maga anciano para cuida con el de suyu maga siervo. (1 Ped. 5:2) Manada cosa  puede aprende el maga anciano si examina sila si paquemodo ya trata si Nehemias con el maga siervo de Jehova. Como gobernador del Juda, tiene grande autoridad si Nehemias. (Neh. 1:11; 2:7, 8; 5:14) Imagina con el maga dificultad que ya enfrenta si Nehemias. Ya puede le sabe que el maga gente ya hace buling con el templo y gendeh ta dale contribucion con el maga Levita como cosa ya manda kanila si Jehova. Nuay sila sigui con el ley acerca na Sabbath y el cuanto maga hombre ya casa maga mujer de otro nacion. Necesita tiene cosa hace si Gobernador Nehemias con ese dificil situacion.​—Neh. 13:4-30.

10. Cosa ya hace si Nehemias?

¹⁰ Nuay usa si Nehemias con el de suyu autoridad para forza con el maga gente que sigui con el de suyu mismo idea. En vez, ya pidi le guia con Jehova por medio na sincero rezo y ya enseña le con el maga gente acerca na Ley de Jehova. (Neh. 1:4-10; 13:1-3) Ya ayuda tambien si Nehemias con el maga gente para planta otravez con el pader de Jerusalem.​—Neh. 4:15.

11. Asegun na 1 Tesalonica 2:7, 8, paquemodo debe trata el maga anciano con el maga hermano y hermana?

¹¹ Posible, el maga anciano gendeh enfrenta problema igual de Nehemias de antes pero puede sila imita con ele na manada manera. Por ejemplo, ta hace sila el todo para ayuda con el diila maga hermano y hermana. Y gendeh sila ta sinti que mas bueno sila con otro por causa na diila autoridad. En vez, enbuenamente sila ta trata con el maga hermano. (Le con el 1 Tesalonica 2:7, 8.) Cay humilde sila y tiene grande amor con otro, ta converza sila kanila na enbuenamente manera. Si Andrew, un experienciao anciano, ya habla: “Ya nota yo que si bueno y friendly el un anciano, bueno el efecto de este na maga hermano y hermana. Y ta manda este move kanila para sigui con el maga anciano.” Si Tony que tarda ya tambien anciano ya habla: “Ta pricura yo aplica con el consejo na Filipo 2:3 y pirmi  ta hace esfuerzo para mira con otro que mas alto que conmigo. Ta ayuda este conmigo para gendeh dicta con otro.”

12. Porque importante que humilde el maga anciano?

¹² El maga anciano debe queda humilde igual con Jehova. Maskin pa si Jehova el Soberano na entero universo, “ta agacha le” para hace levanta con el “humilde estaba na polvos.” (Sal. 18:35; 113:6, 7) Gane, ta odia le con el maga orgulloso y arogante.​—Prov. 16:5.

13. Porque el un anciano necesita “controla el disuyo boca”?

¹³ El un anciano quien ta somete con Jehova necesita “controla el disuyo boca.” Cay si gendeh, baka puede le habla gendeh bueno si gendeh con ele ta respeta el un persona. (Sant. 1:26; Gal. 5:14, 15) Si Andrew, que ya menciona enante, ya habla: “Tiene vez, quierre yo habla gendeh bueno con el un hermano o hermana cay ta sinti yo que nuay le respeto conmigo. Pero, ya medita yo con el maga ejemplo del maga fiel hombre na Biblia y ya puede este ayuda conmigo para mira si porque importante queda humilde y sumiso.” Ta dale mira el maga anciano que ta somete sila con Jehova si ta converza sila na amable y enbuenamente manera con aquellos na congregacion, incluido ya con el otro maga anciano.​—Col. 4:6.

14. Cosa papel ya dale si Jehova con el maga tata y cosa le quierre que hace sila?

¹⁴ Ya iscuji si Jehova con el maga tata como cabeza del familia y quierre el Dios que enseña, guia y disciplina sila con el diila maga anak. (1 Cor. 11:3; Ef. 6:4) Pero limitao el autoridad del maga tata. Ciendo con Jehova estaba el familia, responsable sila con ele si paquemodo sila ta trata con el diila familia. (Ef. 3:14, 15) Ta dale mira el maga tata que ta somete sila con Jehova si ta usa sila con el diila autoridad na manera que ta hace alegre con Dios. Manada sila cosa puede aprende na vida de Rey David.

15. Porque un buen ejemplo si Rey David para na maga tata?

¹⁵ Ya iscuji si Jehova con David para queda cabeza, gendeh lang na de suyu familia, sino pati na entero nacion de Israel. Como un rey, tiene grande autoridad si David. Tiene vez, ya usa le con ese na gendeh justo manera y ya comete serioso kamali. (2 Sam. 11:14, 15) Pero ya dale le mira que ta somete le con Jehova cuando ya acepta le con el disciplina del Dios. Na de suyu rezo, ya habla le con Jehova si cosa gayot le ta sinti. Y ya hace le el todo para obedece con el consejo de Jehova. (Sal. 51: 1-4) Humilde tambien le y ya acepta consejo, gendeh lang del maga hombre sino pati del maga mujer. (1 Sam. 19:11, 12; 25:32, 33) Ya aprende si David na de suyu maga kamali y ya hace centro el de suyu vida na servicio con Jehova.

16. Cosa maga leccion puede aprende el maga tata con David?

¹⁶ Considera cuanto maga leccion que puede aprende el maga tata con Rey David: No usa na gendeh justo manera el autoridad que ya dale contigo si Jehova. Admiti si tiene tu cosa ya hace kamali y acepta consejo del otro que estaba na Biblia. Si hace tu se, hay respeta contigo el de tuyu familia cay humilde tu. Si ta reza tu junto con el de tuyu familia, habla con Jehova si cosa tu deverasan ta sinti y manda kanila oi si paquemodo tu ta depende con ele. Y mas pa, hace centro na de tuyu vida el de tuyu servicio con Jehova. (Deut. 6:6-9) El de tuyu buen ejemplo amo el uno de maga bien bonito regalo que puede tu dale con el de tuyu familia.

17. Cosa responsibilidad ya dale si Jehova con el maga nana?

¹⁷ Ya dale importante responsibilidad si Jehova con el maga nana na familia y ya dale kanila cuanto autoridad na diila maga anak. (Prov. 6:20) Gane, bien grande el influencia del un nana na de suyu maga anak y puede este afecta kanila na diila entero vida. (Prov. 22:6) Nota si cosa puede aprende el maga nana con Maria, el nana de Jesus.

18-19. Cosa puede aprende el maga nana na ejemplo de Maria?

¹⁸ Bien familiar si Maria na Escritura. Tiene le hondo respeto y cerca relacion con Jehova. Conforme le somete na direccion de Jehova maskin pa necesita cambia el de suyu vida.​—Luc. 1:35-38, 46-55.

¹⁹ Maga nana, puede ustedes imita con Maria na manada manera. Paquemodo? Una, mentena con el de tuyu fuerte relacion con Jehova por medio de personal estudiada del Biblia y privado rezo. Ika-dos, conforme hace maga cambio na de tuyu vida para hace alegre con Jehova. Por ejemplo, baka el de tuyu mayores pirmi lang rabiao y ta converza gendeh bueno con el diila maga anak. Poreso, ya pensa tu que normal lang trata na maga anak na ansina manera. Maskin ya aprende ya tu acerca na maga principio de Jehova, baka tan dificil siempre tu esta calmao y paciencioso na de tuyu maga anak, especialmente si cansao tu y gendeh sila ta creé contigo. (Ef. 4:31) Na ese maga tiempo, mas necesita tu reza con Jehova que ayuda contigo. El un nana, si Lydia,  ya habla: “Tiene vez, ta reza yo para gendeh yo rabiao converza con el de mio anak hombre si ta desobedece le conmigo. Gane, ta descanza yo converza y silencio ta reza con Jehova que ayuda conmigo. Ya ayuda conmigo el rezo para esta calmao.​—Sal. 37:5.

20. Cosa dificultad ta enfrenta el cuanto maga nana y paquemodo con ese solva?

²⁰ El otro dificultad que ta enfrenta el cuanto maga nana amo que gendeh facil para kanila que dale mira con el diila maga anak que ta ama sila kanila. (Tito 2:3, 4) El cuanto maga mujer ya engranda na un familia donde el maga mayores gendeh ta dale mira cariño con el diila maga anak. Si ansina tu ya engranda, no repiti el kamali que ya hace el de tuyu mayores. El un nana quien ta somete con Jehova posible necesita aprende si paquemodo dale mira amor con el de suyu maga anak. Posible, dificil para con ele que cambia con el de suyu pensamiento, sentido y accion. Pero, puede con este hace y hay queda le mas alegre y el de suyu familia.

21-22. Asegun na Isaias 65:13, 14, cosa el maga beneficio si somete kita con Jehova?

²¹ Sabe si Rey David que tiene maga beneficio si somete con Jehova. Ele ya escribi: “El maga mandato de Jehova recto, ta hace alegre con el corazon; el mandamiento de Jehova limpio, ta hace brilla con el ojos. Por medio de este, ya dale aviso con el de uste siervo; si sigui con este, tiene grande premio.” (Sal. 19:8, 11) Ahora, puede kita mira que bien diferente aquellos quien ta somete con Jehova y aquellos quien ta ignora con el de suyu consejo. Aquellos quien ta somete con ele “hay grita con alegria por causa na diila buen condicion de corazon.”​—Le con el Isaias 65:13, 14.

²² Si el maga anciano, tata y nana hay somete con Jehova, hay queda mas enbuenamente el diila vida, queda mas alegre el diila familia y hay queda mas unido el entero congregacion. Y mas importante na todo, ta hace sila alegre con el corazon de Jehova. (Prov. 27:11) Tiene pa ba mas grande premio que con ese?