1. Cosa ta sinti si Jehova con el maga humilde? Explica.

SI Jehova ta ama con el maga humilde. El maga deverasan humilde lang el puede tiene cerca relacion con ele. Pero, “lejos le con el orgulloso.” (Sal. 138:6) Todo kita quierre hace alegre con Jehova y queda cerca con ele. Poreso, tiene kita buen razon para aprende queda humilde.

2. Cosa kita discuti na este articulo?

² Na este articulo, hay discuti kita con el contestacion de este tres pregunta: (1) Cosa el humildad? (2) Porque kita debe cultiva con ese calidad? (3) Na cosa maga situacion dificil queda humilde? Como cosa kita puede mira, si queda kita humilde, puede kita hace alegre con el corazon de Jehova y beneficia kita.​—Prov. 27:11; Isa. 48:17.

3. Cosa el humildad?

³ El humilde persona gendeh ta pensa que mas importante le si compara con otro. Gendeh le orgulloso. El Biblia ta indica que el un humilde persona tiene justo mirada na de suyu relacion con Dios Jehova y na otro maga gente. El humilde persona ta conoce que el otro mas bueno que con ele na cuanto cosas.​—Fil. 2:3, 4.

4-5. Porque kita puede habla que el humildad gendeh base na cosa lang ta puede mira el otro?

⁴ Puede mira con el cuanto gente que dol humilde sila. Posible, callao sila y huyain. O baka bueno y respetoso sila  con otro por causa na diila cultura y cay ansina kanila ya hace engranda. Pero el deverasan, posible que bien orgulloso sila. Gendeh tarda, hay sale lang siempre si cosa gayot sila.​—Luc. 6:45.

⁵ Na otro parte, el otro maga gente tiene confianza na diila cuerpo y ta habla si cosa sila ta pensa pero gendeh se quierre decir que orgulloso sila. (Juan 1:46, 47) Pero, aquellos maga gendeh huyain gendeh debe confia con el diila maga abilidad. Huyain man kita o gendeh, debe kita hace esfuerzo para queda humilde.

6. Como cosa ta dale mira na 1 Corinto 15:10, cosa kita puede aprende na ejemplo de apostol Pablo?

⁶ Considera con el ejemplo de apostol Pablo. Ya usa gayot con ele si Jehova para forma maga nuevo congregacion na diferente ciudad. Posible pa gane que mas manada le cosa ya puede hace na ministerio si compara na otro maga apostoles de Jesucristo. Pero, nuay pensa si Pablo que mas importante le que con el de suyu maga hermano. Humilde le ya habla: “Yo amo el menos con todo del maga Apostol y gendeh conviene llama conmigo Apostol, cay yo ya persigui con el Iglesia [“congregacion,” NW] del Dios.” (1 Cor. 15:9) Despues, si Pablo ya habla que tiene le buen relacion con Jehova, gendeh por causa na de suyu maga calidad o trabajo sino por causa na incomparable pagka-bueno del Dios. (Le con el 1 Corinto 15:10.) Buen ejemplo gayot si Pablo de humildad. Cuando ya escribi le carta con el maga Cristiano na Corinto, nuay le man hambug maskin pa el cuanto na congregacion ya hace bajo con ele.​—2 Cor. 10:10.

7. Na cosa manera el un bien conocido hermano ya dale mira que humilde le?

⁷ Tiene grande efecto na maga siervo de  Jehova el istoria de vida de Hermano Karl F. Klein, quien ya sirvi como miembro del Cuerpo Gobernante. Na de suyu istoria de vida, ya admiti si Hermano Klein acerca na de suyu maga problema. Por ejemplo, ya pruba le predica na casa en casa por primer vez del 1922. Bien dificil quel para con ele poreso nuay mas le predica por dos año. Na uliji, cuando ta sirvi le na Bethel, yan sentimiento le con el un hermano quien ya dale con ele consejo. Yan depress tambien le pero ya queda bueno na uliji. Pero ya tiene tambien le maga bonito privilegio. Claro que bien humilde gayot este hermano para admiti con el de suyu maga problema maskin pa bien conocido le. Manada del maga hermano y hermana nuay gayot ulvida con Hermano Klein y con el de suyu honesto y franca istoria de vida. *

8. Paquemodo el 1 Pedro 5:6 ayuda kanaton mira que alegre si Jehova si humilde kita?

⁸ El bien importante razon si porque kita debe queda humilde amo cay quierre kita hace alegre con Jehova. Ya hace se claro si apostol Pedro. (Le con el 1 Pedro 5:6.) El libro “Come Be My Follower” ta discuti acerca na cosa ya habla si Pedro. Este ta habla: “El orgullo igual como veneno. Peligroso el efecto de este. Gendeh usa el Dios con el un orgulloso persona maskin pa manada le abilidad. Pero, puede usa si Jehova con el un persona quien tiene diutay abilidad basta humilde le. . . . [Si Jehova] alegre . . . bendici contigo cay humilde tu.” * Poreso, el de con todo bueno que puede kita hace amo hace alegre con Jehova.​—Prov. 23:15.

9. Porque el otro quierre-quierre man junto kanaton si humilde kita?

⁹ Puera que hace kita alegre con Jehova, puede kita ricibi manada beneficio si humilde kita. Quierre-quierre kanaton man junto el otro si humilde kita. Para entende si porque, pone con el de tuyu mismo cuerpo na situacion del otro. (Mat. 7:12) No quierre kita man junto con aquellos quien pirmi ta forza con el diila gusto y no quierre acepta con el sugestion del otro. Pero, alegre kita man junto con aquellos quien “tene lastima y [ta] ama con uno y otro como hermano y hermana; . . . amable y humilde.” (1 Ped. 3:8) Si quierre-quierre kita man junto con ese maga persona, posible quierre-quierre tambien sila man junto kanaton basta humilde kita.

10. Porque mas facil el diaton vida si humilde kita?

 ¹⁰ Mas facil el diaton vida si humilde kita. Pero el deverasan, ta puede kita mira maga cosas que ta pensa kita que gendeh justo. Si Rey Solomon ya habla: “Ya puede yo mira maga esclavo que ta munta na caballo pero el maga principe ta camina como maga esclavo.” (Ecl. 10:7) Tiene vez, gendeh ta dale honor con el maga gente quien tiene grande abilidad. Y aquellos quien tiene diutay abilidad amo el mas ta ricibi atencion. Maskin pa ansina, si Solomon ya habla que mas bueno si acepta kita con el realidad contra rabia si ta sucede el maga gendeh buen cosas. (Ecl. 6:9) Si humilde kita, mas facil para kanaton acepta el maga cosas na vida que no quierre kita.

11. Cosa debe el diaton reaccion si conseja kanaton?

¹¹ Todo’l dia, puede kita dale mira que humilde kita. Considera con este cuanto situacion. Si ta ricibi consejo. Debe kita acorda que si el un persona ya hace esfuerzo para conseja kanaton, grande el posibilidad que ya puede ya kita hace grande kamali que nuay kita puede nota. Na ese tiempo, baka quierre kita ignora dayun con el consejo. Posible que cuestiona kita con el quien ya dale consejo o si paquemodo se ele ya habla. Pero si humilde kita, pricura kita cambia con el diaton custumbre.

12. Asegun na Proverbio 27:5, 6, porque kita debe rindi gracias con el un persona quien ya dale kanaton consejo? Ilustra.

¹² El un humilde persona ta aprecia con el consejo. Para ilustra: Imagina que talli tu na miting. Despues tu man cuento con el cuanto maga hermano y hermana, el uno kanila ya habla contigo na privado que tiene tu comida na de tuyu diente. Nuay duda, man huya gayot tu. Pero gendeh ba rindi tu gracias cay ya habla le contigo? Gane, baka ya pensa tu que era tiene contigo quien ya habla mas temprano! Na igual manera, debe kita queda humilde y rindi gracias con el un hermano o hermana quien ya dale kanaton consejo. Amigo diaton ese persona y gendeh diaton contrario.​—Le con el Proverbio 27:5, 6; Gal. 4:16.

13. Paquemodo kita dale mira humildad si ta ricibi privilegio el otro?

¹³ Si ta ricibi privilegio el otro. “Si ya puede yo sabe que el otro ya ricibi privilegio, tiene vez ta puede yo pensa si porque nuay conmigo iscuji,” ya admiti el un anciano que si Jason. Ya sinti ya ba tu ansina? Gendeh malo  que pricura kita alcanza maga omento privilegio. (1 Tim. 3:1) Pero, debe kita vicia si cosa kita ta pensa. Si gendeh kita con cuidao, puede kita permiti con el orgullo que crici na diaton corazon. Por ejemplo, puede pensa el un hermano que ele el bien cualificao na un particular privilegio. O el un mujer posible pensa, ‘Mas cualificao el de mio marido si compara con ese hermano!’ Pero si deverasan kita humilde, gendeh kita pensa ansina.

14. Cosa kita puede aprende na reaccion de Moises cuando el otro ya ricibi maga privilegio?

¹⁴ Puede kita aprende na reaccion de Moises cuando el otro ya ricibi maga privilegio. Ya aprecia si Moises con el de suyu assignment que guia con el maga Israelita. Cosa el reaccion de Moises cuando ya permiti si Jehova que sirvi el otro junto con ele? Nuay le man selos. (Num. 11:24-29) Humilde le y ya permiti con otro que ayuda con ele na trabajo que juzga con el maga gente. (Ex. 18:13-24) Como resulta, ya beneficia el maga Israelita ciendo mas manada ya el quien ta sirvi como juez. Este ta dale mira que mas importante para con Moises que ayuda con el maga gente contra na de suyu privilegio. Un buen ejemplo gayot para kanaton! Acorda kita que para queda kita usable con Jehova, mas importante el diaton humildad contra na diaton abilidad. “Maskin alto si Jehova, ta pone le atencion con el humilde.”​—Sal. 138:6.

15. Paquemodo ya cambia el situacion del maga hermano y hermana?

¹⁵ Si cambia el diaton situacion. Del reciente maga año, manada del diaton maga hermano y hermana quien ya sirvi ya con Jehova por largo tiempo ya ricibi otro maga assignment. Por ejemplo, del 2014, el maga district overseer y el diila mujer ya ricibi nuevo assignment. Principia na ese mismo año, gendeh mas continua el maga circuit overseer na diila assignment si llega sila na edad de 70.  Y el maga hermano que tiene edad de 80 pa-arriba gendeh mas puede sirvi como coordinator del grupo del maga anciano. Por cuanto año ya, manada tambien maga Bethelite el yan reassign para sirvi como pioneer. El otro ya descanza na diila assignment por causa na problema na salud, obligacion na familia o otro pa maga razon.

16. Na cosa manera ya dale mira humildad el diaton maga hermano y hermana cuando yan adjust sila na diila nuevo situacion?

¹⁶ Gendeh facil hace ese maga cambio para con el maga hermano y hermana. Asigurao que ya gusta gayot sila con el diila assignment de antes que ya tiene sila por largo tiempo. Cuando na nuevo assignment ya sila, el cuanto bien triste siempre por causa na diila assignment que ya deja sila. Pero despues de cuanto tiempo, ya puede sila man adjust. Porque? El primer razon amo cay ta ama sila con Jehova. Sabe sila que ya dedica sila el diila vida con Jehova y gendeh na diila trabajo, titulo o assignment. (Col. 3:23) Alegre sila continua sirvi con Jehova maskin cosa pa el diila assignment. Ya “deja [sila] todo el [diila] maga lingasa con Ele” cay sabe sila que cuida le kanila.​—1 Ped. 5:6, 7.

17. Porque kita rindi gracias que el Palabra del Dios ta anima kanaton para cultiva humildad?

¹⁷ Gendeh ba kita rindi gracias que el Palabra del Dios ta anima kanaton para cultiva humildad? Si humilde kita, hay beneficia kita y el otro. Mas puede kita aguanta con el maga problema na vida. Y mas pa na todo, queda kita mas cerca con el diaton Tata na cielo. Bien alegre kita sabe que maskin ele “el Uno que Bien Alto,” ta ama le y ta dale valor con el de suyu maga humilde siervo!​—Isa. 57:15.