1-2. Cosa el coneccion del Eclesiastes 11:6 na trabajo predicacion?

NA CUANTO maga nacion, manada gente el quierre sabe pa mas acerca na buen noticia. Ya dura ya se sila ta espera! Mientras na otro maga lugar, mayoria del maga gente gendeh tanto interesao na Dios o na Biblia. Cosa el reaccion del maga gente na de ustedes lugar? Maskin cosa man el diila reaccion, ta expecta si Jehova que continua kita predica hasta habla le que descanza ya hace con ese trabajo.

² Na tiempo que ya iscuji si Jehova, hay termina ya con el trabajo predicacion y “ay llega ya el fin.” (Mat. 24:14, 36) Mientras tanto, paquemodo kita obedece con el mandato que “no deja descanza el de tuyu mano”? *​—Le con el Eclesiastes 11:6.

3. Cosa kita considera na este articulo?

³ Del ya pasa articulo, ya considera kita cuatro cosas que necesita kita hace para queda maga efectivo “pescador de gente.” (Mat. 4:19) Ahora, discuti kita tres manera si paquemodo kita hace fuerte el diaton determinacion que continua predica maskin cosa el diaton circumstancia. Hay aprende kita si porque importante que (1) esta kita focus, (2) queda paciencioso y (3) mentena fuerte fe.

4. Porque kita necesita esta focus na trabajo que ya dale kanaton si Jehova?

⁴ Ya predicta si Jesus si cosa el sucede na ultimo maga dia, sabe le que ese maga cosas posible hace perde con el focus del de suyu maga siguidores na trabajo predicacion. Y ya habla le con el de suyu maga dicipulo que “esta alerto.” (Mat. 24:42) Na tiempo de Noe, tiene maga cosas que ya causa con el maga gente para gendeh pone atencion na aviso que ya dale le. Ansina tambien el cosa kita ta enfrenta ahora. (Mat. 24:37-39; 2 Ped. 2:5) Por causa con ese, quierre kita esta focus na trabajo que ya dale kanaton si Jehova.

5. Na cosa manera el Maga Actividad 1:6-8 ta dale mira si paquemodo de grande el trabajo predicacion?

⁵ Ahora, necesita gayot kita dale atencion na predicacion del buen noticia del Reino. Ya predicta si Jesus que este trabajo hay queda grande y continua despues del de suyu muerte. (Juan 14:12) Despues del muerte de Jesus, el cuanto del de suyu maga dicipulo ya bira otravez na pescada. Cuando ya resucita con ele, ya ayuda si Jesus con el de suyu maga dicipulo cuji bien manada pescao por medio na un milagro. Despues de aquel, ya hace le claro que el diila assignment que queda maga pescador de gente amo el mas importante compara na otro trabajo. (Juan 21:15-17) Antes subi na cielo si Jesus, ya habla le con el de suyu maga dicipulo que gendeh lang na Israel hace con el trabajo predicacion. (Le con el Maga Actividad 1:6-8.) Manada año despues, na un vision, ya dale mira si Jesus con apostol Juan si cosa hay sucede na “dia del Señor.” * Ya puede mira si Juan con este vision: Tiene un angel ta “anuncia un buen noticia . . . con todo nacion, raza, lenguaje y pais.” (Rev. 1:10, NWT; 14:6) Claro que quierre si Jehova que continua kita participa na este trabajo hasta acaba este.

6. Paquemodo kita esta focus na trabajo predicacion?

 ⁶ Puede kita esta focus na trabajo predicacion si pensa kita el todo que ta hace si Jehova para ayuda kanaton. Por ejemplo, ta dale le kanaton abundancia de espiritual comida​—maga printed y electronic publicacion, audio y video recording y maga broadcast na Internet. Pensa este: Na diaton website, puede mira con el maga informacion na mas de 1,000 lengguaje! (Mat. 24:45-47) Na este mundo que nuay unidad por causa na politica, religion y economia, tiene mas de ocho millon siervo del Dios que unido como maga hermano y hermana na entero mundo. Por ejemplo, del Viernes, Abril 19, 2019, el maga Witness na entero mundo unido ya discuti con el texto del dia. Na ese noche, 20,919,041 el junto ya atende con el Comemoracion del muerte de Jesus. Mas ta queda kita determinao esta focus na trabajo predicacion si pensa kita acerca el diaton privilegio que puede mira y queda parte de ese maga ocasion.

7. Paquemodo el ejemplo de Jesus puede ayuda kanaton esta focus?

⁷ Puede tambien kita esta focus na predicacion si sigui kita con el ejemplo de Jesus. Nuay le deja con el maskin cosa que hace perde con el de suyu focus. (Juan 18:37) Nuay puede engaña con ele si Satanas cuando ya ofrece este con ele “todo el maga reino na mundo y el diila gloria.” Nuay tambien le conforma cuando quierre con ele hace rey el otro. (Mat. 4:8, 9; Juan 6:15) Nuay le tiene el deseo queda rico ni descanza por causa na grabe oposicion. (Luc. 9:58; Juan 8:59) Si na probanza el diaton fe, puede kita esta focus si acorda kita con el consejo de apostol Pablo. Ya anima le con el maga Cristiano que sigui con el ejemplo de Jesus para ‘gendeh perde el diila animo ni queda sila nuay gana’.​—Heb. 12:3.

8. Cosa ta hace el gente que tiene paciencia y porque se mas necesita ahora?

⁸ El paciencioso persona ta puede esta calma mientras ta espera que cambia con el un situacion. Ta espera man kita con el fin del un mal situacion o con el cumplimiento del un cosa que ya dura ya kita ta espera, necesita kita paciencia. Si profeta Habacuc bien quierre mira que termina ya con el maga mal situacion na Juda. (Hab. 1:2) El maga dicipulo de Jesus ya esperanza que el Reino hay “aparece dayun” y salva kanila desde na maga maltratamiento del maga Romano. (Luc. 19:11) Ta esperanza tambien kita con el dia cuando el Reino del Dios hay quita con maldad y lleva kanaton na nuevo mundo. (2 Ped. 3:13) Pero, necesita kita queda paciencioso y espera con el justo tiempo de Jehova. Considera si paquemodo si Jehova kanaton ta enseña para queda paciencioso.

9. Na cosa maga manera si Jehova ya dale mira que paciencioso le?

⁹ Si Jehova el perfecto ejemplo que ta dale mira paciencia. Ya dale le con Noe bastante tiempo para construi con el arca y para predica o “conversa por causa del justicia.” (2 Ped. 2:5; 1 Ped. 3:20) Ya oi si Jehova mientras bira-bira si Abraham ya pregunta acerca con el de suyu decision que destroza con el ciudad de Sodoma y Gomorra. (Gen. 18:20-33) Por cuanto siglo, ya dale mira si Jehova grande paciencia con el nacion de Israel. (Neh. 9:30, 31) Ta dale tambien mira si Jehova con el de suyu paciencia ahora cay ta dale le bastante tiempo con el todo con quien le quierre queda de suyu amigo para “arripinti.” (2 Ped. 3:9; Juan 6:44; 1 Tim. 2:3, 4) El ejemplo de Jehova amo un razon  si porque necesita tambien kita dale mira paciencia mientras ta continua predica y enseña. Ta enseña tambien kanaton si Jehova queda paciencioso por medio na un ilustracion que puede incuntra na de suyu Palabra.

10. Na Santiago 5:7, 8, cosa kita puede aprende na ejemplo del siembrador?

¹⁰ Le con el Santiago 5:7, 8. El ejemplo del un siembrador ta enseña kanaton si paquemodo queda paciencioso. El cuanto siembra pronto ta crici. Pero, mas mucho especialmente aquel ta fruta, mas tarda antes puede cosecha. Na Israel, necesita espera maga seis mes para puede cosecha con el maga siembra. El siembrador ta siembra con el maga similla na amediao de Abril y ta cosecha na amediao de Octubre. (Mar. 4:28) Sabio kita si imita kita con el paciencia del siembrador. Pero, posible gendeh se facil hace.

11. Paquemodo el paciencia puede kanaton ayuda na ministerio?

¹¹ Como maga imperfecto gente, quierre dayun kita mira con el maga resulta del diaton esfuerzo. Pero, si quierre kita tiene buen cosecha el diaton jardin, debe kita dale con ese atencion​—siembra, arranca con el maga sahbut y rega con ese. Si quierre kita hace maga dicipulo, necesita tambien kita continua hace esfuerzo. Necesita tiempo para puede kita ayuda con el diaton maga Bible study para queda imparcial y amable. Si tiene kita paciencia, puede kita evita man luya si ta enfrenta maga dificultad. Y maskin ta progresa sila, necesita siempre kita queda paciencioso. Gendeh kita puede forza kanila que tiene dayun fe. Maskin el maga dicipulo de Jesus, tiene vez nuay dayun entende na cosa le ya enseña. (Juan 14:9) Debe kita acorda que posible kita el ya siembra y ya rega, pero el Dios el ta hace crici con ese.​—1 Cor. 3:6.

12. Paquemodo kita dale mira paciencia si ta predica na maga pariente que gendeh Witness?

¹² Posible, dificil para kanaton queda paciencioso si ta predica na maga pariente  quien gendeh Witness. El principio na Eclesiastes 3:1, 7 puede ayuda kanaton. Este ta habla: “Tiene . . . tiempo para man silencio y tiempo para converza.” Puede kita predica por medio del diaton conducta pero debe preparao tambien kita que converza acerca el verdad. (1 Ped. 3:1, 2) Debe con paciencia kita predica y enseña con el todo gente incluido el diaton maga pariente.

13-14. Cosa el cuanto ejemplo que puede kita imita?

¹³ Puede kita aprende na ejemplo de aquellos maga fiel siervo na Biblia y na diaton tiempo ahora. Bien quierre si Habacuc mira con el fin del maldad pero ya dale le mira que tiene le paciencia cuando ele ya habla: “Na de mio puesto, hay continua yo para.” (Hab. 2:1) Si apostol Pablo ya habla que bien quierre le hace “acaba” con el de suyu ministerio. Pero con paciencia le ya continua “man testigo por causa del Buen Noticia.”​—Act. 20:24.

¹⁴ Considera con el ejemplo del un man maridable quien ya gradua na Gilead y ya sirvi na un nacion donde poco lang el Witness. Mayoria na maga gente alla gendeh Cristiano. Y poco lang el quierre estudia con el Biblia. Pero el diila maga classmate quien ta sirvi na otro maga nacion ta habla kanila que manada sila maga progresivo Bible study. Maskin pa nuay tanto progreso na diila teritorio, con paciencia el man maridable ya continua el diila ministerio. Despues de ocho año na ese teritorio, ya queda sila bien alegre cuando tiene uno na diila maga Bible study el ya bautiza. Cosa este maga ejemplo ta enseña kanaton ahora? Este maga fiel siervo ya continua queda activo y nuay sila deja con el diila mano que descanza. Como resulta, ya bendici kanila si Jehova por causa na diila paciencia. Ojala imita kita con aquellos quien “por medio diila fe y paciencia, ta hereda el Promesa.”​—Heb. 6:10-12.

15. Cosa el un manera si paquemodo el fe ta puede hace fuerte con el diaton determinacion para predica?

¹⁵ Tiene kita fe na mensaje que ta lleva kita, poreso bien quierre kita se manda sabe na manada gente. Tiene kita grande confianza na maga promesa na Palabra del Dios. (Sal. 119:42; Isa. 40:8) Ya puede kita mira con el cumplimiento del maga profecia na Biblia. Ya puede tambien kita mira que ya queda mas enbuenamente el vida del maga gente cuando ya principia sila aplica con el maga consejo na Biblia. Por causa con ese, mas convincido kita que todo gente el debe sabe acerca na buen noticia del Reino.

16. Asegun na Salmo 46:1-3, paquemodo el diaton fe con Jehova y Jesus puede hace mas fuerte con el diaton determinacion que predica?

¹⁶ Tiene tambien kita fe con Jehova, con quien estaba el diaton mensaje, y con Jesus, con quien le ya hace Rey del Reino. (Juan 14:1) Maskin cosa pa el sucede kanaton, si Jehova el diaton refugio y fuerza. (Le con el Salmo 46:1-3.) Mas pa, tiene kita confianza que ta guia si Jesus con el trabajo predicacion por medio na poder y autoridad que ya dale con ele si Jehova.​—Mat. 28:18-20.

17. Dale un ejemplo si porque debe kita continua predica.

¹⁷ Por causa na fe, tiene kita grande confianza que hay bendici si Jehova con el diaton maga esfuerzo, tiene vez na manera que gendeh kita ta expecta. (Ecl. 11:6) Por ejemplo, cada dia miles el ta puede mira con el diaton maga literature display y cart. Efectivo ba este manera de predicacion? Si! El Noviembre 2014 issue del Our Kingdom Ministry ya menciona acerca na un mujer estudiante de universidad quien quierre escribi acerca na maga Testigo de Jehova. Nuay le puede incuntra un Kingdom Hall pero ya puede le mira con el diaton literature display na de suyu  escuela y ya puede le incuntra alla informacion que puede le usa. Na uliji, ya queda le un bautizao Witness y ahora ta sirvi le como un regular pioneer. Ese maga experiencia ta hace kanaton mas determinao que continua predica cay ta dale se mira que tiene siempre maga gente quien necesita sabe acerca na mensaje del Reino.

18. Porque kita puede asigura que hay acaba el trabajo predicacion na tiempo que ya decidi si Jehova?

¹⁸ Puede kita asigura que el trabajo predicacion hay acaba na justo tiempo. Considera si cosa ya sucede na tiempo de Noe. Ya dale mira si Jehova que pirmi le ta hace con el maga cosas na justo tiempo. Maga 120 año antes el Grande Avenida, ya decidi ya si Jehova si cuando se sucede. Cuanto decada despues, ya manda si Jehova con Noe que construi con el arca. Adentro del maga 40 o 50 año antes principia el Avenida, ya continua si Noe trabaja. Maskin gendeh ta oi con ele el maga gente, ya continua le dale el aviso hasta ya habla si Jehova que tiempo ya para lleva con el maga animal na arca. Despues, na justo tiempo “ya cerra si Jehova con el puerta.”​—Gen. 6:3; 7:1, 2, 16.

19. Cosa kita puede esperanza si gendeh kita deja con el diaton mano que descanza?

¹⁹ Gendeh dura, hay manda ya si Jehova descanza con el trabajo predicacion. Hay “cerra le con el puerta” del sistema de Satanas y lleva kanaton na nuevo mundo. Mientras tanto, puede kita imita con Noe, Habacuc y otro quien nuay deja descanza el diila mano. Ojala esta kita focus, queda paciencioso y mentena diaton fuerte fe con Jehova y na de suyu maga promesa.