Este texto ta habla: “Si puede tu mira que ta maltrata con el maga pobre y tiene quien ta viola con el justicia na de ustedes distrito, no tu estraña. Cay ta vicia con ese alto oficial el uno que mas alto que con ele y tiene pa otro quien mas alto que kanila.”​—Ecl. 5:8.

Si na mirada lang del gente, dol ta refiri este con aquellos tiene autoridad na gobierno. Pero si pensa pa kita mas con este, ta revela tambien este un verdad acerca con Jehova que puede dale kanaton comforta y asiguranza.

El Eclesiastes 5:8 ta refiri na un gente quien ta rula que ta maltrata con el maga pobre y gendeh kanila ta dale mira justicia. Ese gente debe acorda que posible ta vicia con ele el un persona que tiene mas alto posicion o mas grande autoridad na gobierno que con ele. Gane, posible tiene pa otro quien tiene mas alto posicion que kanila. Maka-triste que todo el maga gente quien ta rula na gobierno posible gendeh honesto y por causa de ese el maga gente ta sufri.

Maskin pa que dol nuay mas esperanza el diaton situacion, puede kita tiene comforta cay si Jehova ‘ta vicia maskin con el maga alto oficial’ na gobierno del gente. Puede kita pidi ayuda con Dios y habla el diaton maga lingasa con ele. (Sal. 55:22; Fil. 4:6, 7) Sabe kita que “el ojos de Jehova ta mira enbuenamente con el entero tierra para dale mira el de suyu fuerza para con aquellos quien completo el corazon para con ele.”​—2 Cron. 16:9.

Poreso, el Eclesiastes 5:8 ta manda kanaton acorda si cosa el situacion na gobierno del gente​—tiene gayot persona que tiene mas alto posicion. El mas importante, este versiculo ta manda kanaton acorda que si Jehova el tiene el de con todo alto autoridad. Ta rula le ahora por medio del de suyu Anak, si Jesucristo, el Rey del Reino. El Todopoderoso, el quien ta vicia con el todo ta rula con justicia y ansina tambien el de suyu Anak.