1. Cosa el invitacion de Jesus con el cuatro pescador y cosa sila ya hace?

TA TRABAJA como maga pescador kanda dicipulo Pedro, Andres, Santiago y Juan. Imagina si paquemodo sila de espantao cuando ya oi sila con el invitacion de Jesus: “Sigui ustedes conmigo y ay hace yo con ustedes maga pescador de gente.” * Cosa sila ya hace? El Biblia ta habla: “Y insiguidas ya deja sila el diila maga rede [o net] y ya sigui con Ele.” (Mat. 4:18-22) Ese decision ya cambia gayot con el diila vida. En vez de cuji maga literal pescao, hay queda sila “pescador de maga gente.” (Luc. 5:10) Ahora, ta invita tambien si Jesus con aquellos quien ta aprecia con el verdad. (Mat. 28:19, 20) Ya acepta ya ba tu con el invitacion de Jesus que queda pescador de maga gente?

2. Porque kita debe pensa enbuenamente con el decision que queda pescador de maga gente y cosa ayuda kanaton para hace con ese decision?

² Posible, ta progresa ya tu na de tuyu estudiada del Biblia y ta pensa si decidi ya tu queda publisher del buen noticia. No man luya si tan alang-alang tu acepta con el invitacion de Jesus. Ta dale lang se mira que sabe tu si paquemodo de importante ese decision. Deveras, el Biblia ya habla que si Pedro y de suyu maga uban “insiguidas” ya deja con el diila maga net de pescada. Pero nuay lang sila basta-basta hace decision. Conoce ya sila con Jesus y ya acepta con ele como el Mesias mas de seis meses ya el ya pasa. (Juan 1:35-42) Posible, manada ya tambien tu cosa ya aprende acerca con Jehova y con Jesus y quierre tu continua progresa na espiritual. Pero, gendeh tu  debe hace con ese decision que gendeh ta pensa enbuenamente. Cosa ya ayuda con Pedro, Andres y con otro para hace con ese decision?

3. Cosa maga calidad el puede hace fuerte con el de tuyu deseo para acepta con el invitacion de Jesus?

³ El maga primer dicipulo de Jesus bien quierre y sabe hace con el diila trabajo, tiene animo y tiene disciplina na cuerpo. Asigurao que ya puede ayuda kanila ese maga calidad para queda efectivo pescador de maga gente. Este articulo hay discuti si paquemodo tu puede tiene ese maga calidad para queda tu un efectivo dicipulo del Cristo.

4. Porque quierre queda pescador si Pedro?

⁴ Ta pesca si Pedro para suporta con el de suyu familia. Pero, gendeh lang quel basta trabajo para con ele. Bien quierre-quierre le pesca. (Juan 21:3, 9-15) Ya principia tambien le ama con el de suyu trabajo como pescador de maga gente. Y na ayuda de Jehova, ya queda bien efectivo si Pedro na ese trabajo.​—Act. 2:14, 41.

5. Base na Lucas 5:8-11, porque ya tiene miedo si Pedro y cosa puede ayuda kanaton para quita con ese sentido?

⁵ Ta predica kita cay ta ama kita con Jehova. Amo se el primer razon si porque kita ta hace con este trabajo. El diaton amor para con Jehova puede ayuda kanaton predica maskin pa ta sinti kita que gendeh kita cualificao. Cuando ya invita si Jesus con Pedro que queda pescador de maga gente, si Jesus ya habla con ele: “No tu tene miedo!” (Le con el Lucas 5:8-11.) Gendeh ta tiene miedo si Pedro si cosa posible sucede con ele si queda le dicipulo. Sino, yan lingasa le cuando ya  puede le mira con el bien manada pescao que ya puede sila cuji por causa con Jesus y ya sinti si Pedro que gendeh le cualificao que trabaja junto con Jesus. Posible, tan lingasa tambien tu si ta pensa tu si cosa necesita hace para queda dicipulo del Cristo. Si ansina, hace fuerte con el de tuyu amor para con Jehova, con Jesus y con el de tuyu projimo. Y como resulta, manda este move contigo para acepta con el invitacion de Jesus que queda pescador de maga gente.​—Mat. 22:37, 39; Juan 14:15.

6. Cosa pa el otro razon si porque kita quierre predica?

⁶ Considera con el otro razon si porque kita quierre predica. Quierre kita sigui con el mandato de Jesus: “Anda . . . y hace maga dicipulo.” (Mat. 28:19, 20) Ta predica tambien kita con el maga gente cay “cansao sila y desanimao” y bien necesita aprende con el verdad acerca na Reino. (Mat. 9:36) Quierre si Jehova que el todo clase de maga gente hay tiene justo saber de verdad y salva.​—1 Tim. 2:4.

7. Paquemodo el Roma 10:13-15 ta dale mira que importante el trabajo predicacion?

⁷ Si pensa kita si cosa el efecto del diaton predicacion na maga gente, manda tambien este move kanaton para predica. Gendeh igual na maga literal pescador que ta vende o ta come con el maga pescao que ta cuji sila, ta “cuji” kita con el maga gente para salva con el diila vida.​—Le con el Roma 10:13-15; 1 Tim. 4:16.

8-9. Cosa debe sabe el un pescador y porque?

⁸ El un Israelita pescador na tiempo de Jesus necesita sabe si cosa clase de pescao le posible cuji. (Lev. 11:9-12) Necesita tambien le sabe si onde le puede incuntra con el maga pescao. Mas mucho, el maga pescao ta esta na un lugar donde ta gusta sila con el agua y donde tiene manada comida. Importante ba si que hora pesca el pescador? El un misionario que ta queda na Pacific island ya aprende que tiene especifico tiempo que bueno pesca. Ya invita con ele el un Witness que anda pesca. El misionario ya habla, “Man mirajan kita mañana alas nueve del aga.” El hermano ya contesta, “Gendeh. Anda kita si cuando el buen tiempo para pesca y gendeh si cuando el buen tiempo para kanaton.”

⁹ Na igual manera, el maga pescador de gente del primer siglo ya anda na maga lugar si onde el maga gente y na tiempo que talla sila. Por ejemplo, el maga siguidores de Jesus ya predica na maga templo, na sinagoga, na casa en casa y na tianggue. (Act. 5:42; 17:17; 18:4) Necesita tambien kita sabe si onde el maga gente y si que hora kita puede predica kanila. Necesita kita queda preparao cambia con el diaton schedule para puede kita predica na lugar y hora que puede kita man cuento na manada gente.​—1 Cor. 9:19-23.

10. Cosa el maga tool que ya dale el organizacion de Jehova para kanaton?

¹⁰ El un pescador necesita tiene el justo gamit y debe le sabe si paquemodo usa con ese. Necesita tambien kita tiene maga justo tool para na diaton trabajo y necesita kita sabe si paquemodo usa con ese. Ya dale si Jesus maga claro instruccion con el de suyu maga dicipulo si paquemodo predica. Ya habla le kanila si cosa carga, onde predica y si cosa habla. (Mat. 10:5-7; Luc. 10:1-11) Ahora, el organizacion de Jehova ta dale kanaton el Teaching Toolbox que ta contene maga tool que grande gayot ayuda kanaton. * Y ya enseña kanaton si paquemodo usa con ese maga tool. Como resulta, puede kita tiene el confianza  y abilidad para queda efectivo na ese trabajo.​—2 Tim. 2:15.

11. Porque el maga pescador de gente debe tiene coraje?

¹¹ El maga literal pescador necesita tiene coraje. Tiene vez, no sabe sila cosa posible sucede na mar. Mas mucho, denoche sila ta pesca y posible queda lang dayun malo el tiempo. El maga pescador de gente necesita tambien coraje. Si principia kita predica y manda conoce con el diaton mismo cuerpo como un Testigo de Jehova, posible kanaton man contra el diaton familia, gangguia el diaton maga uban y gendeh oi el maga gente con el diaton mensaje. Pero, gendeh mas kita espanta con ese. Ya habla ya daan si Jesus que hay predica el de suyu maga siguidores con el maga gente quien man contra kanila.​—Mat. 10:16.

12. Harmonia na Josue 1:7-9, cosa puede ayuda kanaton para tiene coraje?

¹² Cosa tu hace para tiene coraje? Una, debe tu queda convincido que ta continua guia si Jesus con el predicacion estaba na cielo. (Juan 16:33; Rev. 14:14-16) Ika-dos, hace fuerte con el de tuyu fe con Jehova que hay cuida le contigo. (Mat. 6:32-34) Si mas ta queda fuerte el de tuyu fe, mas ta queda tambien fuerte el de tuyu coraje. Si Pedro y el de suyu maga uban ya dale mira fuerte fe cuando ya deja sila con el diila negocio de pescada para sigui con Jesus. Na igual manera, ya dale tu mira fuerte fe cuando ya habla tu con el de  tuyu maga uban y familia que ya principia ya tu estudia con el Biblia junto na maga Testigo de Jehova y ya atende na diila maga miting! Asigurao que ya hace tu maga cambio na de tuyu conducta y manera de vida para sigui con el justo principio de Jehova. Ya puede tu se hace cay tiene tu fe y coraje. Mientras ta continua tu hace grande con el de tuyu coraje, puede tu asigura que “si Jehova, el de tuyu Dios, junto contigo maskin onde tu anda.”​—Le con el Josue 1:7-9.

13. Na cosa manera el meditacion y rezo puede ayuda contigo para tiene coraje?

¹³ Cosa pa tu hace para tiene coraje? Reza que dale contigo coraje y animo. (Act. 4:29, 31) Si Jehova hay contesta gayot con el de tuyu maga rezo y gendeh gayot deja contigo. Talli le pirmi para ayuda contigo. Puede tambien tu medita si paquemodo si Jehova ya salva con otro del antes. Mas pa, pensa si paquemodo le ya ayuda contigo para enfrenta maga dificultad y ya dale contigo el fuerza para hace maga cambio na de tuyu vida. Asigurao que el Dios quien ya guia con el maga Israelita para na Colorao Mar puede ayuda contigo queda dicipulo del Cristo. (Ex. 14:13) Queda convincido igual con el salmista quien ya habla: “Junto conmigo si Jehova; gendeh yo tiene miedo. Cosa conmigo puede hace el gente?”​—Sal. 118:6.

14. Cosa tu ya puede aprende na experiencia de kanda Masae y Tomoyo?

¹⁴ El otro manera para puede kita tiene coraje amo si aprende kita si paquemodo ya ayuda si Jehova con el maga huyain para tiene animo. Considera con el experiencia del un hermana que si Masae. Huyain le y ya sinti que gendeh gayot le puede man cuento na publico acerca na cosa le ta creé. Ya sinti le que bien dificil man cuento na maga estranjero cay igual este na un bien alto pader que gendeh gayot ele puede subi. Poreso, ya hace le grande esfuerzo para hace hondo con el de suyu amor para con Dios y para con el de suyu maga vecinos. Ya pensa le que bien corto ya lang el diaton tiempo y ya reza que ayuda con ele tiene mas deseo para predica. Ya perde el de suyu miedo y ya puede pa gane le sirvi como un regular pioneer. Puede tambien ayuda si Jehova con el maga nuevo publisher para “tiene coraje.” Nota con el experiencia del un hermana que si Tomoyo. Cuando ya principia le predica na casa en casa, el primer householder ya grita con ele: “No quierre yo man cuento na maga Testigo de Jehova!” y ya hace bagsak con el fuerta. Con animo ya habla si Tomoyo con el de suyu partner: “Ya oi tu quel? Nuay pa yo cosa ya habla pero sabe ya le daan que un Testigo de Jehova yo. Alegre gayot yo!” Un regular pioneer ya ahora si Tomoyo.

15. Cosa el disciplina na cuerpo y porque ese importante para na maga Cristiano?

¹⁵ Tiene disciplina na cuerpo el maga pescador poreso manada sila cosa ta puede cuji. El disciplina na cuerpo ta refiri na “abilidad del un persona hace con el maga cosas que debe le hace.” El maga literal pescador debe hace esfuerzo para dispierta temprano, esta hasta acaba el diila trabajo y continua maskin pa malo el tiempo. Necesita tambien kita disciplina na diaton cuerpo para puede kita aguanta na diaton trabajo y hace acaba con ese.​—Mat. 10:22.

16. Cosa kita hace para tiene disciplina na cuerpo?

¹⁶ Nuay kita nace que tiene ya daan disciplina na cuerpo. Mas mucho, mas quierre kita hace con el maga cosas que facil para kanaton. Poreso, necesita kita aprende que controla con el diaton cuerpo. Necesita kita  ayuda para hace anad con el diaton mismo cuerpo que hace el maga cosas que posible dificil hace. Ta dale si Jehova con ese ayuda por medio na de suyu sagrao espiritu.​—Gal. 5:22, 23.

17. Como cosa puede le na 1 Corinto 9:25-27, cosa ya habla si apostol Pablo que necesita le hace para tiene disciplina na cuerpo?

¹⁷ Tiene disciplina na cuerpo si apostol Pablo. Pero ya admiti le que necesita le “castiga” con el de suyu mismo cuerpo para hace si cosa el justo. (Le con el 1 Corinto 9:25-27.) Ya anima le con otro que tiene tambien disciplina na cuerpo y hace “embuenamente y con orden” con el todo cosas. (1 Cor. 14:40) Debe kita tiene disciplina na cuerpo para puede mentena con el diaton buen espiritual rutina que ta inclui el participacion na trabajo predicacion y enseñada.​—Act. 2:46.

18. Cosa kita hace para tiene buen exito el diaton ministerio na ojos de Jehova?

¹⁸ Puede habla que el un pescador tiene buen exito na pescada si manada le pescao ya cuji. Pero otro el trabajo predicacion. Gendeh kita puede habla que tiene kita buen resulta o nuay, base lang si paquemodo de manada kita ya puede ayuda guinda na verdad. (Luc. 8:11-15) Si ta continua kita predica con el buen noticia y ta enseña con otro, na ojos de Jehova tiene kita buen exito. Porque? Cay obediente kita con ele y con el de suyu Anak.​—Mar. 13:10; Act. 5:28, 29.

19-20. Cosa omento razon kita tiene para predica ahora?

¹⁹ Na cuanto maga nacion, ta permiti lang pesca na cuanto maga mes. Na ese maga lugar, el maga pescador ta pensa que si cerca ya acaba el tiempo de pescada, mas necesita ya sila pesca. Como maga pescador de gente, tiene kita omento razon para predica ahora: Cerca ya gayot el fin de este sistema! Bien diutay ya lang el tiempo para participa na este trabajo que ta salva con el vida del maga gente. No man dulug o espera que queda enbuenamente el de tuyu situacion antes participa na este bien importante trabajo.​—Ecl. 11:4.

²⁰ Ahora ya el tiempo para hace fuerte con el de tuyu deseo que predica, omenta el de tuyu saber na Biblia, tiene coraje y tiene disciplina na cuerpo. Trabaja junto con el mas de ocho millon pescador de maga gente y hay experiencia tu el deverasan alegria que ta sale con Jehova. (Neh. 8:10) Queda determinao que hace el todo lo que puede para participa na este trabajo hasta acaba este. El siguiente articulo hay discuti con el tres manera que puede kita hace fuerte con el diaton determinacion que continua na trabajo predicacion como maga pescador de gente.