1. Cuando posible mas dificil sirvi con Jehova?

PARA contigo, cuando el mas dificil sirvi con Jehova​—si manada tu problema o si nuay tu tanto problema? Si ta enfrenta kita maga dificultad, facil lang para kanaton confia con Jehova. Pero quetal si nuay tanto problema el diaton vida? Posible gaha que ulvida kita sirvi con Dios? Si Jehova ya habla con el maga Israelita que posible este sucede.​—Deut. 6:10-12.

2. Cosa ejemplo ya dale mira si Rey Asa?

² Si Rey Asa amo un bien sabio persona cay ya confia le con Jehova. Ya sirvi le con Jehova gendeh lang durante el maga dificil situacion, sino maskin na tiempo que tiene paz. Desde na principio, “completo el devocion de Asa para con Jehova.” (1 Rey 15:14, ftn.) El un manera que ya dale mira si Asa con el de suyu devocion amo cuando ya quita le con el falso adoranza na Juda. Ya habla el Biblia que “ya quita le con el maga altar del maga estraño y con el maga alto lugar, ya machaca con el maga sagrao arigui y ya destroza con el maga sagrao poste.” (2 Cron. 14:3, 5) Ya quita pa gane le con el de suyu aguela si Maaca na de este prominente posicion na reino. Porque? Cay ya anima este con el maga gente para adora na maga dios-dios.​—1 Rey 15:11-13.

3. Cosa kita considera na este articulo?

³ Nuay lang basta quita si Asa con el falso adoranza. Ya ayuda tambien le con el maga gente de Juda para adora otravez con Jehova. Ya dale si Jehova con Asa y con el maga Israelita  un tiempo de paz. * Adentro na diez año rulanza de Asa, “tiene paz na lugar.” (2 Cron. 14:1, 4, 6) Na este articulo, hay discuti kita si paquemodo si Asa ya usa con ese tiempo de paz. Despues, hay considera tambien kita con el ejemplo del maga Cristiano del primer siglo. Na uliji, hay contesta kita con este pregunta: Si ta queda tu na lugar donde tiene libertad para sirvi con Jehova, paquemodo tu usa enbuenamente con ese tiempo de paz?

4. Asegun na 2 Cronicas 14:2, 6, 7, paquemodo si Asa ya usa con el tiempo de paz?

⁴ Le con el 2 Cronicas 14:2, 6, 7. Si Asa ya habla con el maga gente que si Jehova el quien ‘ya dale kanila descanzo na todo diila maga contrario alrededor.’ Nuay pensa si Asa que tiempo este para man relax. Sino, ya principia le planta maga ciudad, pader, torre y grande puerta. Ya habla le con el maga gente de Juda: “Diaton pa el tierra.” Cosa le quierre decir? Ta habla le con el maga gente que nuay maga contrario na tierra el quien hace descanza kanila na maskin cosa sila hace y na diila construida. Ya anima le con el maga gente que usa enbuenamente con ese tiempo de paz.

5. Porque si Asa ya hace fuerte con el de suyu fuerza militar?

⁵ Ya usa tambien si Asa con el tiempo de paz para hace fuerte con el de suyu fuerza militar. (2 Cron. 14:8) Quierre decir ba de este que gendeh le ta confia con Jehova? Gendeh. Sino, sabe si Asa que obligacion de suyu como rey que prepara con el maga gente para na maga problema que posible sila enfrenta na futuro. Sabe si Asa que el tiempo de paz na Juda posible gendeh permanente y deverasan gayot se.

6. Paquemodo el maga Cristiano del primer siglo ya usa con el tiempo de paz?

⁶ Maskin ya persigui con el maga Cristiano del primer siglo, tiene tambien sila maga tiempo de paz. Paquemodo el maga dicipulo ya usa con ese tiempo? Aquellos maga fiel hombre y mujer nuay descanza predica con el buen noticia. El Maga Actividad ya habla que ya ‘vivi sila con miedo del Señor.’ Ya continua sila predica con el buen noticia y como resulta, ‘ya crisi sila’ o ya continua queda manada. Claro que ya bendici si Jehova con el diila predicacion durante aquel maga tiempo de paz.​—Act. 9:26-31.

7-8. Cosa ya hace si Pablo y el otro cuando tiene sila el oportunidad? Explica.

⁷ El maga dicipulo del primer siglo, ya usa con el todo oportunidad para predica con el buen noticia. Por ejemplo, cuando ya realiza si Pablo que puede le predica na manada del maga gente na Efeso, ya esta le na ese ciudad y ya predica le alla.​—1 Cor. 16:8, 9.

⁸ Si apostol Pablo y el otro maga Cristiano ya puede tambien predica na manada del maga gente del 49 C.E, cuando ya puede ya hace decision acerca con el issue de capada. (Act. 15:23-29) Cuando el decision ya puede ya hace pasa na maga congregacion, el maga dicipulo ya hace grande esfuerzo para “anuncia con el Palabra del Señor.” (Act. 15:30-35) Cosa el resulta? El Biblia ta habla que el maga congregacion ‘ya queda mas fuerte y el diila maga miembro ta omenta cada dia.’​—Act. 16:4, 5.

9. Cosa el situacion na manada maga nacion ahora y cosa kita puede pregunta na diaton mismo cuerpo?

⁹ Na manada maga nacion ahora, tiene libertad el diaton predicacion. Ansina ba tambien el situacion na de ustedes nacion? Si ansina, pregunta con el de tuyu mismo cuerpo, ‘Paquemodo yo ta usa con este libertad?’ Durante na este ultimo maga dia, el organizacion de Jehova ta hace con el de con todo grande trabajo de predicacion y enseñada. (Mar. 13:10) Manada cosa puede hace el maga siervo de Jehova na este trabajo.

10. Cosa ta anima kanaton hace el 2 Timoteo 4:2?

¹⁰ Paquemodo tu usa enbuenamente con el de tuyu tiempo de paz? (Le con el 2 Timoteo 4:2.) Pruba examina con el de tuyu circumstancia y mira si puede ba etu o el un miembro na de tuyu familia dale mas tiempo na predicacion o posible sirvi como pioneer. Gendeh este el tiempo para pricura queda rico y obtene maga material cosas​—maga cosas que gendeh kita puede lleva para travesa na grande tribulacion.​—Prov. 11:4; Mat. 6:31-33; 1 Juan 2:15-17.

11. Cosa ya hace el cuanto para puede predica na mas manada gente?

¹¹ Manada maga publisher el ya aprende nuevo lengguaje para puede sila este usa na predicacion y enseñada. El organizacion del Dios ya dale manada publicacion para ayuda kanaton predica na mas manada lengguaje. Por ejemplo del 2010, el diaton maga literatura puede obtene na maga 500 lengguaje. Ahora, puede ya con este obtene na mas de 1,000 lengguaje!

12. Cosa el efecto si oi el maga gente con el mensaje na diila mismo lengguaje? Dale un ejemplo.

¹² Cosa el resulta si el maga gente puede oi con el verdad estaba na Palabra del Dios na diila mismo lengguaje? Considera con el experiencia del un hermana quien ya beneficia na asemblea de region na Memphis, Tennessee, U.S.A. Ya hace con el convencion na lengguaje Kinyarwanda, un lengguaje que ta usa na Rwanda, Congo (Kinshasa) y Uganda. Despues  del convencion, el un hermana quien ta converza Kinyarwanda ya habla: “Este el primer vez que ya puede gayot yo entende con el convencion desde ya cambia yo na United States maga 17 año y el ya pasa.” Claro que ya penetra gayot na corazon del hermana el mensaje del programa cuando ya oi le este na de suyu mismo lengguaje. Si ta permiti el de tuyu circumstancia, puede ba tu aprende otro lengguaje para ayuda con el cuanto na de ustedes teritorio? Posible gaha mas queda interesao el maga gente na de ustedes teritorio cay mas quierre sila usa con el diila mismo lengguaje? Asigurao que hay bendici gayot con el de tuyu esfuerzo.

13. Paquemodo el diaton maga hermano na Russia ya usa con el tiempo de paz?

¹³ Gendeh todo del diaton maga hermano el tiene libertad para predica. Tiene vez, por causa na restriccion del gobierno, limitao lang gayot el cosa kita ta puede hace na ministerio. Considera, por ejemplo, con el diaton maga hermano na Russia. Despues del cuanto decada de persecucion, del Marzo 1991, el gobierno ya dale kanila libertad na diila adoranza. Na ese maga tiempo, tiene maga 16,000 Witness na Russia. Despues del 20 año, tiene ya mas de 160,000 publisher. Claro que el diaton maga hermano y hermana ya usa enbuenamente con ese oportunidad para predica. Pero, ese tiempo de paz nuay tarda. Maskin pa ya cambia el diila circumstancia, activo siempre sila na diila adoranza para con Jehova. Ta continua sila hace el todo para continua sirvi con ele.

14-15. Paquemodo si Jehova ya usa con el de suyu poder para ayuda con Asa?

¹⁴ Na tiempo de Asa, el tiempo de paz ya termina. Tiene mas de un millon soldao el ya sale estaba na Etiopia. El diila comandante, si  Zera, confianza que puede sila hace perde con el Juda. Pero si Rey Asa ya confia, gendeh na de suyu maga soldao, sino con el suyu Dios, si Jehova. Si Asa ya reza: “Ayuda kanamon, O Jehova diamon Dios, cay ta confia kame contigo, y na de tuyu nombre kame hay man contra con este grande grupo.”​—2 Cron. 14:11.

¹⁵ Maskin cerca man doble el numero del maga soldao de Etiopia que con el diila maga soldao, sabe si Asa que si Jehova mas poderoso y puede le ayuda con el De Suyu maga siervo. Y amo gayot se el cosa ya hace si Jehova; el maga soldao de Etiopia ya perde na guerra.​—2 Cron. 14:8-13.

16. Porque kita sabe que temporario lang el tiempo de paz?

¹⁶ Maskin pa no sabe kita con el todo detalle del cosa pasa na futuro, pero sabe kita que temporario lang el tiempo de paz que tiene el maga siervo de Jehova. Gane, si Jesus ya habla que na ultimo maga dia, “todo el maga gente ay odia” con el de suyu maga dicipulo. (Mat. 24:9) Ya habla tambien si apostol Pablo que “todo aquellos quien quiere vivi un vida religioso unido con Cristo Jesus, ay sufri gayot maga persecucion.” (2 Tim. 3:12) “Bien rabiao” si Satanas y ta hace kita loco con el diaton mismo cuerpo si pensa kita que posible kita puede evita con el de suyu rabia.​—Rev. 12:12.

17. Na cosa manera posible pone na probanza con el diaton fe?

¹⁷ Gendeh mas dura, todo kita experiencia probanza na diaton integridad. El mundo hay experiencia “un grande calamidad [“grande tribulacion,” NWT] como noay pa tene desde el principio del mundo hasta ahora.” (Mat. 24:21) Durante na ese tiempo, posible el diaton familia hay man contra kanaton y posible tambien prohibi con el diaton trabajo. (Mat. 10:35, 36) Hay confia ba kita con Jehova, igual con Asa, que hay ayuda le y protege kanaton?

18. Asegun na Maga Hebreo 10:38, 39, cosa puede ayuda kanaton para queda preparao si termina ya el tiempo de paz?

¹⁸ Si Jehova ta ayuda kanaton hace fuerte con el diaton fe para queda kita preparao na cosa sucede na futuro. Ta guia le con el “fiel y sabio esclavo” para dale kanaton  “comida na justo tiempo” que ta ayuda kanaton hace fuerte diaton espiritualidad. (Mat. 24:45, NWT) Pero, el cada uno kanaton debe hace esfuerzo para tiene fuerte fe con Jehova.​—Le con el Maga Hebreo 10:38, 39.

19-20. Uyun na 1 Cronicas 28:9, cosa kita debe pregunta na diaton mismo cuerpo y porque?

¹⁹ Igual con Rey Asa, necesita kita “busca con Jehova.” (2 Cron. 14:4; 15:1, 2) Puede kita busca con Jehova si conoce kita con ele y bautiza. Ta hace kita el todo para hace fuerte con el diaton amor para con Jehova. Poreso, puede kita pregunta con el diaton mismo cuerpo: ‘Regular ba yo ta atende na maga miting?’ Na maga miting, ta puede kita saca el fuerza para continua sirvi con Jehova y ta puede tambien anima kanaton el diaton maga hermano y hermana. (Mat. 11:28) Puede tambien kita pregunta con el diaton mismo cuerpo, ‘Regular ba yo ta estudia con el Biblia?’ Si ta queda tu junto na de tuyu familia, ta dale ba tu tiempo cada semana para na de ustedes de familia adoranza? Y si solo lang tu, ta dale ba tu tiempo para hace hondo personal estudiada de Biblia? Ta hace ba tambien tu el todo para participa na trabajo predicacion y hacida de dicipulo?

²⁰ Porque kita debe pregunta ese maga pregunta? El Biblia ta habla kanaton que si Jehova ta examina si cosa el na diaton pensamiento y corazon, poreso debe tambien kita hace ansina. (Le con el 1 Cronicas 28:9.) Si ta mira kita que necesita kita hace maga cambio na diaton maga goal, custumbre o pensamiento, debe kita pidi el ayuda de Jehova para hace con ese maga cambio. Este ya el tiempo para prepara con el diaton mismo cuerpo para enfrenta con el maga probanza na futuro. Ojala, usa kita enbuenamente con el tiempo de paz!