1-2. (a) Asegun na Proverbio 16:31, cosa debe el diaton mirada na maga de edad hermano y hermana? (b) Cosa maga pregunta kita hay contesta na este articulo?

TIENE un parque na United States donde puede tu incuntra maga diamante na tierra. Pero, nuay pa forma con este maga diamante igual como cosa puede mira na maga alajas. Como resulta, manada de aquellos quien ta mira con el maga diamante posible gendeh ta realiza que precioso este y pasa lang con ese.

² Na cuanto maga manera, el diaton maga fiel de edad igual con ese maga diamante. Maga precioso tesoro sila. El Palabra del Dios ya compara con el diila blanco pelo na un corona. (Le con el Proverbio 16:31; 20:29) Pero, facil lang gendeh nota con este maga tesoro. Si el maga mas joven hay realiza que precioso el maga de edad, puede sila tene con el un cosa que mas valuable na maga literal riqueza. Na este articulo, hay contesta kita tres pregunta: Porque ta mira si Jehova con el maga de edad como maga tesoro? Cosa papel ya dale si Jehova kanila na de suyu organizacion? Cosa kita puede hace para mas beneficia na diila ejemplo?

3. Uyun na Salmo 92:12-15, porque precioso con Jehova el maga fiel de edad?

³ Precioso para con Dios Jehova el maga fiel de edad. Sabe le si cosa clase sila de persona y ta aprecia con el diila maga bonito calidad. Ta aprecia le si el maga de edad ta hace pasa con el maga mas joven el sabeduria que ya puede sila tiene durante el manada año del diila fiel servicio. (Job 12:12; Prov. 1: 1-4) Ta aprecia tambien si Jehova cay ta continua sila aguanta. (Mal. 3:16) Ya enfrenta sila manada problema na diila vida pero maskin pa ansina, nuay man luya el diila fe con Jehova. Mas fuerte el diila esperanza na futuro compara cuando primer vez sila ya aprende con el verdad. Y ta ama kanila si Jehova cay ta continua sila declara con el de suyu nombre “maskin de edad ya.”—Le con el Salmo 92:12-15.

4. Cosa puede anima con el diaton maga de edad hermano y hermana?

⁴ Si ta queda ya tu de edad, puede tu asigura que si Jehova ta acorda con el trabajo que ya hace tu de antes. (Heb. 6:10) Activo tu ya suporta con el trabajo predicacion y ta hace se alegre con el diaton Tata na cielo. Ya puede tu aguanta maga probanza incluido aquel maga ya hace contigo bien triste. Ya sigui tu con el maga justo principio na Biblia, ya cumpli maga importante trabajo na organizacion de Jehova y yan train con otro. Ya hace tu el todo para sigui con el maga cambio na organizacion. Ya suporta tu y ya anima con otro quien ta sirvi full-time na ministerio. Ta ama gayot contigo si Dios Jehova cay ya esta tu leal. Ya promete le que “gendeh le abandona con el maga leal con ele”! (Sal. 37:28) Ya dale le contigo este asiguranza: “Hasta queda blanco el [de tuyu] pelo, hay continua yo carga [contigo].” (Isa. 46:4) Poreso no pensa cay de edad ya tu, nuay mas ya tu importante papel na organizacion de Jehova. Bien valuable tu!

5. Cosa debe acorda el maga de edad?

⁵ Manada cosa puede dale el maga de edad hermano y hermana. Maskin pa posible nuay ya sila el fuerza que tiene sila de antes, manada sila experiencia que ya tiene adentro na manada año. Si Jehova puede kanila continua usa na diferente manera, como cosa ta dale mira el siguiente ejemplo de antes y na presente tiempo.

6-7. Dale maga ejemplo estaba na Biblia del maga de edad quien ya ricibi maga bendicion por causa na diila leal servicio.

⁶ Puede kita incuntra maga buen ejemplo na Biblia del maga fiel siervo quien activo ya sirvi con Jehova maskin de edad ya sila. Por ejemplo, maga 80 año ya si Moises cuando ya  principia le sirvi como un profeta y representante de Jehova para na nacion de Israel. Ya usa siempre si Jehova con Daniel como De Suyu mensajero maskin pa posible mas de 90 año ya le. Y posible talli tambien na maga 90 el edad de apostol Juan cuando ya guia con ele para escribi con el libro de Revelacion.

⁷ Manada otro fiel de edad el gendeh prominente o conocido y posible gendeh ta nota kanila el maga gente. Maskin pa ansina, ya nota kanila si Jehova y ya bendici con el diila lealtad. Por ejemplo, el un “buen gente y devoto” hombre que el nombre Simeon unrato lang ya menciona na Biblia. Pero, conoce si Jehova si quien le y ya dale con ele el privilegio para mira con Jesus cuando baby este y para dale profecia acerca con ese bata y con el de suyu nana. (Luc. 2:22, 25-35) Pensa tambien con el viuda profeta que si Ana. El de suyu edad 84 año ya pero pirmi le ta anda na templo. Ya bendici gayot con el de suyu regular atendida cay na un ocasion, ya puede tambien le mira con Jesus cuando baby este. Si Simeon y Ana precioso para con Jehova.—Luc. 2:36-38.

8-9. Cosa ta continua hace el maga viuda na organizacion ahora?

⁸ Na moderno tiempo, manada maga fiel de edad el quien ta sirvi como maga buen ejemplo para con el maga mas joven. Considera con el experiencia de Hermana Lois Didur. Ya principia le sirvi como un special pioneer na Canada cuando 21 año pa lang le. Despues de ese, ele y el de suyu marido, si John, ya sirvi por cuanto año na traveling work. Nuay dura, ya sirvi sila na Canada Bethel por mas de 20 año. Cuando 58 ya si Lois, ya invita kanila de John para sirvi na Ukraine. Cosa sila hay hace? Hay pensa ba sila que gendeh mas sila puede sirvi na otro nacion cay de edad ya sila? Ya acepta sila con el assignment y ya iscuji con John para sirvi como miembro del Branch Committee alla. Despues del siete año, ya muri si John pero ya decidi si Lois que esta le na de suyu assignment. Ahora, 81 año ya si Lois. Ta continua le siempre sirvi fiel con Jehova junto con el familia Bethel na Ukraine y ta ama gayot sila con ele.

⁹ Posible gendeh mas tanto ta nota con el maga viuda igual con Lois, gendeh igual cuando vivo pa el diila marido. Maskin pa ansina, gendeh se quierre decir que ya menggua diila valor. Ta aprecia gayot si Jehova con el maga hermana quien ya suporta con el diila marido por manada año y hasta ahora ta continua sirvi con ele con lealtad. (1 Tim. 5:3) Omento pa, ta anima sila con el maga mas joven kanila.

10. Cosa buen ejemplo el ya dale mira si Tony?

¹⁰ El manada del maga de edad quien ta queda na maga nursing home amo maga espiritual tesoro tambien. Uno ya alli amo el un hermano que el nombre Tony. Ya bautiza le na Pennsylvania, U.S.A., del Agosto 1942 na  edad de 20. Nuay dura despues del de suyu bautismo, ya forza con ele para queda soldao. Pero cay nuay le conforma, ya pone con ele na preso por dos año y media. Ele y el de suyu mujer, si Hilda, ya hace engranda con el diila dos anak na verdad. Adentro na manada año, ya sirvi si Tony na tres congregacion como presiding overseer (ahora conocido como el coordinator del grupo de maga anciano) y como un circuit assembly overseer. Ya conduci le maga miting y Bible study na preso. Na edad de 98 año, no quierre siempre descanza si Tony. Ta continua le siempre dale el de suyu de con todo bueno para sirvi con Jehova junto con el maga hermano y hermana na diila congregacion.

11. Paquemodo kita dale mira que ta aprecia kita con aquellos quien ta queda na maga nursing home?

¹¹ Paquemodo kita puede dale mira honor con el maga de edad quien ta queda na maga nursing home? El maga anciano puede inclui kanila na maga actividad del congregacion si puede na diila circumstancia. Puede kita dale mira personal interes si visita kita kanila o convida kanila man video call. Y quierre kita dale mira especial atencion na maga de edad quien ta queda na ese maga facilidad que lejos na diila congregacion. Si gendeh kita pone atencion, posible kita ulvida con este maga de edad. El cuanto kanila posible man dificil o sinti gendeh comfortable que man cuento acerca na diila mismo cuerpo. Pero, mas beneficia kita si dale kita tiempo para pregunta kanila y oi mientras ta cunta sila con el alegria que ya experiencia sila na organizacion de Jehova.

12. Cosa kita puede incuntra na diaton mismo congregacion?

¹² Posible, gendeh kita ta expecta que incuntra maga bonito ejemplo del maga fiel de edad na diaton mismo congregacion. El un hermana que si Harriette ya sirvi fiel con Jehova por cuanto decada na diila congregacion na New Jersey, U.S.A. Despues, ya cambia le lugar onde ta queda el de suyu anak mujer. El maga hermano y hermana na de suyu nuevo congregacion ya dale tiempo para conoce con ele y ya puede sila incuntra tesoro. Ya anima le kanila por medio na de suyu experiencia na predicacion cuando ya puede le aprende el verdad del maga 1925. Na aquel tiempo, pirmi le ta lleva cepillo si ta anda predica—en caso arresta con ele. Gane del 1933, dos beses le ya esta na preso por un semana. Durante na ese tiempo, el de suyu marido que gendeh Testigo ya cuida con el diila tres anak. Asigurao, debe lang aprecia con el maga fiel de edad igual con Harriette!

13. Cosa kita ya aprende acerca na papel del maga de edad na organizacion de Jehova?

¹³ El diaton maga de edad hermano y hermana tiene un importante papel na organizacion de Jehova. Ya puede sila mira si paquemodo si Jehova ya bendici na diferente manera con el de suyu organizacion y maskin con el diila vida. Ya aprende sila maga importante leccion na maga kamali que ya hace sila. Mira kanila como un “tuburan de sabeduria” y aprende na diila maga experiencia. (Prov. 18:4) Si dale tu tiempo para conoce kanila, hay queda fuerte el de tuyu fe y manada tu cosa puede aprende.

14. Cosa ta anima el Deuteronomio 32:7 con el maga mas joven para hace?

¹⁴ Hace iniciativo para man cuento con el maga de edad. (Le con el Deuteronomio 32:7.) Deverasan, posible malubug ya diila vista, mahina ya sila ta camina y hinay ya el diila voz. Pero, quierre siempre sila queda  activo y tiene sila “un buen nombre” adelante con Jehova. (Ecl. 7:1) Acorda si porque ta aprecia si Jehova kanila. Continua dale mira honor kanila. Queda igual con Eliseo. Ya insisti le que esta cerca con Elias na ultimo dia que puede sila man junto. Si Eliseo tres beses ya habla: “Gendeh yo deja contigo.”—2 Rey 2:2, 4, 6.

15. Cosa kita puede pregunta na maga de edad?

¹⁵ Puede kita dale mira deverasan personal interes na maga de edad si pregunta kita kanila. (Prov. 1:5; 20:5; 1 Tim. 5:1, 2) Puede tu pregunta igual con este: “Cuando joven tu, cosa ya convinci contigo que ya puede tu incuntra el verdad?” “Paquemodo el de tuyu maga experiencia ya hace contigo mas cerca con Jehova?” “Cosa ya puede ayuda contigo para esta alegre na servicio con Jehova?” (1 Tim. 6:6-8) Despues, oi mientras ta cunta sila diila istoria.

16. Paquemodo puede beneficia el de edad y el mas joven si man cuento sila na uno y otro?

¹⁶ Si tan cuento el un de edad y el un mas joven, sila dos hay beneficia. (Roma 1:12) Mas queda hondo el de tuyu apresacion na manera si paquemodo si Jehova ta cuida con el de suyu maga fiel siervo y hay sinti el de edad que ta ama con ele. Alegre le hay cunta contigo si paquemodo le ya ricibi el maga bendicion de Jehova.

17. Porque kita puede habla que el maga fiel de edad mas ta queda precioso mientras ta pasa el año?

¹⁷ El ichura del un persona mas ta menora mientras ta subi el edad. Pero, aquellos quien leal con Jehova mas ta queda precioso con ele mientras ta pasa el año. (1 Tes. 1:2, 3) Porque se deverasan? Cay adentro na manada año, ya permiti sila con el espiritu del Dios para man train kanila y ayuda kanila cultiva maga bonito calidad. Si mas conoce kita con el diaton maga precioso de edad hermano y hermana, honra y aprende kanila, mas puede kita mira kanila como maga valoroso tesoro.

18. Cosa kita hay discuti na siguiente articulo?

¹⁸ Mas ta queda fuerte el congregacion gendeh lang si ta aprecia el maga mas joven con el maga de edad sino si ta aprecia tambien el maga de edad con el maga mas joven kanila. Na siguiente articulo, hay discuti kita si paquemodo el maga de edad puede dale mira que ta aprecia sila con el maga mas joven na congregacion.