1. Cosa bonito goal el puede kita hace mientras ta queda kita de edad?

MIENTRAS ta queda kita de edad, posible ta tiene kita miedo cay gendeh mas kita queda usable con Jehova igual na cosa kita de antes. Maskin pa posible que ya queda mas menos el diaton fuerza contra de antes, puede kita usa con el sabeduria y experiencia que ya tiene kita para ayuda con el maga mas joven que queda usable na organizacion de Jehova y acepta maga nuevo responsibilidad. El un hermano que ya dura ya anciano ya explica, “Cuando ya principia yo sinti con el maga limitacion cay de edad ya yo, ta rindi yo gracias cay tiene maga cualificao joven hermano quien preparao hace con el maga trabajo.”

2. Cosa kita hay discuti na este articulo?

² El ya pasa articulo ya discuti si paquemodo el maga mas joven hay beneficia si hace sila manera para queda mas cerca na maga de edad. Na este articulo, hay mira kita si paquemodo puede ayuda con el maga de edad si humilde sila, modesto, sabe rindi gracias y bondadoso mientras ta trabaja junto na maga mas joven que ta resulta na bendicion para na entero congregacion.

3. Asegun na Filipo 2:3, 4, cosa el humildad y paquemodo este puede ayuda con el un Cristiano?

³ Debe queda humilde el maga de edad si quierre sila ayuda con el maga mas joven. El un humilde persona ta mira con otro que mas bueno que con ele. (Le con el Filipo 2:3, 4.) El maga de edad quien ta dale mira este calidad sabe que puede hace na diferente manera con el un assignment pero todo se harmonia na Biblia y hay tene buen exito. Poreso, gendeh sila ta expecta  con todo que hace el maga cosas na manera que ta hace sila con ese de antes. (Ecl. 7:10) Maskin pa manada sila cosa puede enseña con el maga mas joven, sabe sila que “el condicion de este mundo ta cambia” y posible necesita sila man adjust na nuevo circumstancia.—1 Cor. 7:31, NWT.

4. Paquemodo el maga circuit overseer ta dale mira calidad igual del maga Levita?

⁴ El maga humilde de edad sabe que mientras ta pasa el tiempo, gendeh mas sila puede hace el maga cosas que ta hace sila de antes. Considera con el ejemplo del maga circuit overseer. Si llega sila 70, ta dale kanila nuevo assignment. Posible, dificil se para kanila. Ta aprecia gayot sila con el privilegio que sirvi con el diila maga hermano. Ta ama sila con el diila assignment y bien quierre pa sila que continua hace con ese. Pero, ya realiza sila que mas bueno que el maga mas joven el hace con ese. Poreso, ta dale sila mira igual calidad del maga Levita na Israel de antes, quien na edad de 50 debe descanza na diila servicio na tabernaculo. El alegria de este maga de edad Levita gendeh ta depende na un particular privilegio. Activo sila ya hace con el maga trabajo que ya dale kanila y ya ayuda con el maga mas joven. (Num. 8:25, 26) Maskin pa el maga circuit overseer de antes gendeh mas ta visita na maga congregacion, un bendicion siempre sila na congregacion onde kanila yan assign.

5. Cosa tu ya aprende na ejemplo de Dan y Katie?

⁵ Considera con el ejemplo de Dan, quien ya sirvi como un circuit overseer por 23 año.  Cuando ya llega le 70, yan assign con ele y con el de suyu mujer, si Katie, como maga special pioneer. Paquemodo sila ya puede man adjust na diila nuevo circumstancia? Ya habla si Dan que ya queda le mas ocupao! Ta hace le con el de suyu maga responsibilidad na congregacion, ta ayuda con el maga hermano para cualifica como maga siervo ministerial y tan train con otro si paquemodo predica na ciudad y na preso. Maga de edad, ta sirvi man ustedes full-time o gendeh, manada ustedes cosa puede hace para ayuda con otro. Paquemodo? Man adjust na de ustedes nuevo circumstancia, hace maga nuevo goal y man focus na cosa ustedes puede hace en vez na cosa ustedes gendeh puede hace.

6. Porque bueno queda modesto? Ilustra.

⁶ El un modesto persona sabe que tiene le maga limitacion. (Prov. 11:2) Cay modesto le, gendeh le ta expecta mas na cosa le puede hace. Como resulta, hay esta le alegre y productivo. Puede kita compara con el un modesto persona na un gente quien ta maneja vehiculo pasubida. Ese gente necesita hace abaja con el de suyu cambiada para puede continua corre pa-arriba. Deveras, posible hay menora el de suyu carrera pero hay continua el de suyu corrida. Na igual manera, el un modesto persona sabe si cuando le “hace abaja con el de suyu cambiada” para puede le continua queda activo y productivo na servicio con Jehova.—Fil. 4:5.

7. Paquemodo ya dale mira si Barzilai que modesto le?

⁷ Nota con el ejemplo de Barzilai quien 80 año cuando ya invita con ele si Rey David que sirvi como oficial na palacio. Cay modesto si Barzilai, nuay le acepta con ese. Ciendo sabe le que tiene le limitacion por causa na de suyu edad, ya recomenda si Barzilai con el un mas joven hombre, si Kimham, encambio con ele. (2 Sam. 19:35-37) Igual con Barzilai, alegre el maga de edad hombre que dale oportunidad con el maga mas joven hombre para sirvi.

8. Paquemodo ya dale mira si Rey David que modesto le cuando quierre le construi con el templo?

⁸ Modesto tambien si Rey David. Bien quierre le construi un casa para con Jehova. Pero, cuando ya habla con ele si Jehova que este privilegio hay dale con el mas joven que si Solomon, ya acepta si David con el decision de Jehova y con todo corazon ya suporta con el proyecto. (1 Cron. 17:4; 22:5) Nuay sinti si David que mas puede le hace con el assignment cay si Solomon “joven pa y nuay experiencia.” (1 Cron. 29:1) Sabe si David que hay tene lang buen exito el proyecto de construida por causa na bendicion de Jehova y gendeh na edad o experiencia de aquellos quien ta guia. Igual con David, el maga de edad ahora ta esta activo maskin pa ya cambia diila maga responsibilidad. Y sabe sila que hay bendici si Jehova con el maga mas joven quien ta hace con el trabajo que ta hace sila de antes.

9. Na cosa manera el un miembro de Branch Committee ya dale mira que modesto le?

⁹ Na diaton moderno tiempo, el un hermano que si Shigeo ya dale mira que modesto le. Del 1976 cuando 30 año le, ya iscuji con ele que sirvi como un miembro del Branch Committee. Del 2004, ya queda le coordinator del Branch Committee. Despues del cuanto tiempo, ya realiza le que limitao ya el de suyu fuerza y tarda ya le ta puede hace acaba con el de suyu trabajo. Ya reza le acerca con ese y ya pensa con el maga beneficio si el maga mas joven hermano el hace con ese maga responsibilidad. Maskin pa gendeh mas le el coordinator, ya continua siempre si Shigeo sirvi junto con el otro maga miembro de Branch Committee. Como cosa kita ya puede mira na ejemplo de  Barzilai, Rey David y Shigeo, el un humilde y modesto persona hay man focus gendeh na maga cosas que no sabe pa hace el maga mas joven sino na maga cosas que sabe ya sila hace. Hay mira le kanila gendeh como maga competencia sino como maga hermano quien ta sirvi junto con ele.—Prov. 20:29.

10. Cosa ta sinti el maga de edad acerca con el maga mas joven na congregacion?

¹⁰ El maga de edad ta mira con el maga mas joven como regalo estaba con Jehova y ta rindi gayot sila gracias con ese. Mientras ta menora el diila fuerza, alegre el maga de edad cay el maga joven quien mafuerza preparao hace con el maga trabajo y sirvi na congregacion.

11. Paquemodo el Rut 4:13-16 ta ilustra con el maga bendicion si el maga de edad hay acepta ayuda na maga mas joven kanila?

¹¹ Na Biblia, si Noemi amo un buen ejemplo de un de edad quien alegre acepta ayuda con el un mas joven con ele. Del primero, ya habla si Noemi con Rut, el de suyu yerna que yan viuda, que bira na de suyu familia. Pero, cuando ya insisti si Rut que sigui le con Noemi para na Betlehem, ya acepta le con el ayuda de Rut. (Rut 1:7, 8, 18) Por causa con ese, ya beneficia gayot este dos mujer! (Le con el Rut 4:13-16.) El maga humilde de edad hay sigui con el ejemplo de Noemi.

12. Paquemodo ya dale mira si apostol Pablo que ya rindi le gracias na ayuda que ya ricibi le?

¹² Ta rindi gayot gracias si apostol Pablo na ayuda que ya ricibi le. Por ejemplo, ya rindi le gracias con el maga Cristiano na Filipo para na material cosas que ya imbia sila con ele. (Fil. 4:16) Ya expresa le apresacion na ayuda que ya dale con ele si Timoteo. (Fil. 2:19-22) Y ya rindi gracias si Pablo con Dios por causa con aquellos quien ya anda para anima con ele  cuando ya lleva con ele para na Roma como un preso. (Act. 28:15) Un activo persona si Pablo quien ya viaja miles de kilometro para predica y hace fuerte con el maga congregacion. Pero maskin pa ansina, humilde le y ya acepta ayuda na de suyu maga hermano y hermana.

13. Paquemodo puede dale mira apresacion el maga de edad con el maga mas joven?

¹³ Maga de edad, puede ustedes dale mira con el de ustedes apresacion na maga mas joven na congregacion na manada manera. Si quierre sila ayuda con ustedes na transportacion, na de ustedes cumprada o na otro pa necesidad, acepta con el diila ayuda. Mira con ese como expresion del amor de Jehova. Posible pa gane ustedes queda cerca con uno y otro. Pirmi dale mira interes con el espiritual progreso de aquellos mas joven con ustedes. Y habla kanila si paquemodo ustedes de alegre si ta mira ustedes con el maga mas joven quien ta hace pa mas para sirvi con el congregacion. Mas pa, dale tiempo para habla kanila con el maga cosa ustedes ya experiencia. Si hace se ustedes, ta “dale ustedes gracias” con Jehova para na maga mas joven con quien le ya guia para na congregacion.—Col. 3:15; Juan 6:44; 1 Tes. 5:18.

14. Paquemodo ya dale mira si Rey David con el de suyu pagka-bondadoso?

¹⁴ Tiene pa otro importante calidad el puede kita aprende na ejemplo de Rey David que necesita demonstra el maga de edad—pagka-bondadoso. Ya dale le bien grande donacion estaba na de suyu mismo pondo para suporta con el construida del templo. (1 Cron. 22:11-16; 29:3, 4) Ya hace le con este maskin pa hay guinda con Solomon el atencion del maga gente por causa na este proyecto. Si nuay mas kita el fuerza para participa na maga proyecto de construida del organizacion, puede kita continua suporta con este maga proyecto por medio na diaton maga contribucion, depende na diaton maga circumstancia. Y puede kita ayuda con el maga mas joven si habla kita kanila con el maga experiencia que ya tiene kita por manada año.

15. Cosa maga valoroso regalo el ya dale si apostol Pablo con Timoteo?

¹⁵ Considera con el pagka-bondadoso que ya dale mira si apostol Pablo. Ya invita le con Timoteo que man junto con ele na de suyu trabajo como un misionario y ya enseña si Pablo con este mas joven hombre si paquemodo le ta predica y ta enseña. (Act. 16:1-3) El training que ya dale si Pablo ya puede ayuda con Timoteo para queda efectivo na de suyu predicacion y enseñada del buen noticia. (1 Cor. 4:17) Y ya usa si Timoteo con el cosa con ele ya enseña si Pablo para man train con otro.

16. Porque si Shigeo yan train con otro?

¹⁶ El maga de edad ahora gendeh ta tene miedo que gendeh mas sila queda usable si man train sila con el maga mas joven para hace con el maga trabajo que ta hace sila de antes na congregacion. Por ejemplo, adentro de cuanto año, si Shigeo que ya menciona de enante ya dale training con el maga mas joven miembro del Branch Committee. Ya hace le este para na interes del trabajo del Reino na nacion onde le ta sirvi. Como resulta, cuando ya llega el tiempo que gendeh mas le puede sirvi como un coordinator, el un hermano con quien ya puede man train enbuenamente ya puede releva con ele. Si Shigeo ta continua usa con el cosa le ya aprende adentro de mas de 45 año como un miembro de Branch Committee para ayuda con el maga mas joven hermano. El maga hermano igual con Shigeo un bendicion gayot na maga siervo del Dios!

17. Cosa puede dale el maga de edad con otro? (Lucas 6:38)

 ¹⁷ Ustedes maga de edad hermano y hermana amo un prueba que si el un persona hay sirvi con Jehova con fe y integridad, hay tene le el de con todo alegre vida. Por medio na de ustedes ejemplo, ta dale ustedes mira que hay beneficia kita si aprende kita maga principio na Biblia y aplica con ese na diaton vida. Sabe ustedes si paquemodo ta hace con el maga cosas de antes pero ya realiza tambien ustedes que necesita man adjust na maga nuevo circumstancia. Ustedes maga de edad quien nuevo lang ya bautiza, manada tambien ustedes cosa puede dale. Puede ustedes relata si paquemodo ustedes ya queda bien alegre cay ya conoce ustedes con Jehova na este tiempo na de ustedes vida. El maga mas joven hay aprecia con el de ustedes experiencia y con el maga leccion que ya aprende ustedes. Si hay “dale ustedes” y relata con el de ustedes maga experiencia, hay bendici gayot con ustedes si Jehova.—Le con el Lucas 6:38.

18. Cosa el beneficio si man ayudajan el maga de edad y maga mas joven?

¹⁸ Mientras ustedes maga de edad mas ta queda cerca con el maga mas joven, hay puede ustedes suporta con uno y otro. (Roma 1:12) El cada uno tiene un precioso cosa que nuay el otro. El maga de edad tiene el sabeduria y experiencia que ya tiene sila na maga tiempo que ya pasa. El maga mas joven tiene el fuerza. Si el maga joven y de edad ta man ayudajan como maga man amigo, ta lleva sila alabanza con el diaton amable Tata na cielo y un bendicion con todo na congregacion.