1-2. Cosa clase de uyuk el ya predicta que sucede na diaton tiempo?

“ADENTRO del cuanto minuto, el maga shop y maga daan building ya principia ya tumba.” “Tan panic ya el todo . . . Manada gente ya habla que ya dura quel por dos minuto. Para conmigo, dol ya tarda gayot quel.” Amo se el cosa ya habla el cuanto quien ya salva na temblor na Nepal del 2015. Si experiencia tu ansina de maka-medio suceso, posible gendeh gayot tu con ese ulvida.

² Pero ahora, ta experiencia kita diferente clase de uyuk que gendeh lang ta sucede na un ciudad o nacion. Sino, envuelto aqui el todo maga nacion y maga decada ya este ta sucede. Ya predicta si profeta Haggeo acerca con este. Ele ya escribi: “Este el cosa ya habla si Jehova de maga soldao, ‘Otravez—por corto tiempo ya lang—hay hace yo uyuk con el cielo, con el tierra, con el mar y con el seco tierra.’”—Hag. 2:6.

3. Paquemodo el uyuk que ya menciona si Haggeo diferente na un literal temblor?

³ El uyuk que ya menciona si Haggeo gendeh igual na un literal temblor que ta lleva lang destrozo. Sino, tiene este maga buen resulta. Si Jehova mismo el ya habla kanaton: “Hay hace yo uyuk con el todo maga nacion, y el maga precioso cosas del todo maga nacion hay entra; y hay llena yo con este casa de gloria.” (Hag. 2:7) Cosa quierre decir de este profecia con aquellos quien ya vivi na tiempo de Haggeo? Y cosa este quierre decir para kanaton ahora? Hay discuti kita con el maga contestacion na ese maga pregunta y hay aprende tambien kita si paquemodo kita participa na trabajo que ta hace uyuk con el nacion ahora.

4. Porque si Jehova ya imbia con profeta Haggeo para na De Suyu maga siervo?

⁴ Si Jehova ya dale con profeta Haggeo un importante trabajo. Considera si cosa ya sucede antes de ese. Del 537 B.C.E., un grupo de maga Judio el ya bira na Jerusalem estaba na Babilonia. Posible, uno si Haggeo kanila. Despues sila llega na Jerusalem, aquellos maga fiel siervo de Jehova ya principia construi con el casa de Jehova o templo. (Esd. 3:8, 10) Pero nuay dura, tiene un maka-triste cosa que ya sucede. Yan luya sila y ya descanza hace con el proyecto por causa na oposicion. (Esd. 4:4; Hag. 1:1, 2) Poreso del 520 B.C.E., ya manda si Jehova con Haggeo que ayuda con el maga Judio para queda activo otravez y motiva kanila que completa con el templo. *—Esd. 6:14, 15.

5. Porque ya puede gayot anima na maga siervo del Dios el mensaje de Haggeo?

⁵ El proposito del mensaje de Haggeo amo para hace fuerte el fe del maga Judio con Jehova. Con coraje ya habla el profeta con este maga palabra na maga Judio quien yan luya: “‘Queda fuerte todo ustedes maga gente del tierra,’ ya declara si Jehova, ‘y trabaja ustedes. Cay junto yo con ustedes,’ ya declara si Jehova de maga soldao.” (Hag. 2:4) El expresion “si Jehova de maga soldao” asigurao ya puede gayot anima kanila. Bien manada si Jehova maga angel que ta sirvi como maga soldao bajo na de suyu autoridad poreso necesita el maga Judio confia con ele para tene sila buen exito.

6. Cosa el resulta del uyuk que ya predicta si Haggeo?

⁶ Ya imbia si Jehova con Haggeo para habla con el maga Judio que hay hace Le uyuk con el todo maga nacion. Este revelacion ya puede anima con el maga Judio quien yan luya y ya descanza construi con el templo. El vision ta dale mira que si Jehova hay hace uyuk con el Persia, el de con todo poderoso nacion na aquel tiempo. Y cosa el resulta de ese? Una, puede hace acaba el maga siervo del Dios con el construida na templo. Como resulta, maskin el maga gendeh Judio hay adora con Jehova junto kanila na ese templo. Asigurao, ya puede gayot anima ese mensaje con el maga siervo del Dios!—Zac. 8:9.

7. Cosa trabajo kita envuelto ahora? Explica.

⁷ Cosa quierre decir del profecia de Haggeo para kanaton ahora? Otravez, ta hace uyuk si Jehova con el todo maga nacion y ahora envuelto ya kita. Considera con este verdad: Del 1914, ya hace si Jehova con Jesucristo el Rey na De Suyu Reino na cielo. (Sal. 2:6) Un mal noticia para na maga lider de este mundo cuando el Reino ya principia rula. Este quierre decir que el “iscujido tiempo del maga nacion”—el tiempo cuando nuay quien ta rula que ta representa con Jehova—ya acaba ya. (Luc. 21:24, NWT) Por causa con ese, especialmente desde 1919, el maga siervo de Jehova ta habla con todo que el Reino del Dios el solamente esperanza del maga gente. Este predicacion del “Buen Noticia acerca del Reino” ta hace uyuk con el entero mundo.—Mat. 24:14.

8. Asegun na Salmo 2:1-3, cosa el reaccion del mayoria del maga nacion na este mensaje?

⁸ Cosa el reaccion del maga gente na este mensaje? El mayoria nuay con ese acepta. (Le con el Salmo 2:1-3.) El maga nacion ya queda bien rabiao. Nuay sila acepta con el iscujido Rey de Jehova. Gendeh sila ta mira con  el mensaje acerca del Reino que ta predica kita como un “Buen Noticia.” Gane, el cuanto maga gobierno ya prohibi con el trabajo predicacion! Maskin pa manada del maga lider de ese maga nacion ta clama que ta sirvi con Dios, no quierre sila deja con el diila mismo autoridad. Igual na cosa ya hace el maga lider na tiempo de Jesus, el maga lider ahora tan contra con el Iscujido Rey de Jehova y ta ataca con el de suyu maga leal siervo.—Act. 4:25-28.

9. Cosa el reaccion de Jehova na cosa ya hace el maga nacion?

⁹ Cosa el reaccion de Jehova na cosa ya hace el maga nacion? El Salmo 2:10-12 ta contesta: “Poreso ahora, ustedes maga rey, dale mira hondo entendimiento; acepta coreccion, ustedes maga juez na tierra. Sirvi con Jehova con miedo, y queda alegre mientras ta tembla. Honra con el anak, para gendeh rabia el Dios y destroza con ustedes, cay el De Suyu rabia enseguidas ta arde. Alegre el todo aquellos quien ta hace refugio con Ele.” Bueno si Jehova y ta dale kanila oportunidad para hace justo decision. Puede siempre sila cambia con el diila mismo pensamiento y acepta con el Reino de Jehova. Pero, corto tiempo ya lang el ya queda. Ta vivi kita na “ultimo maga dia” de este sistema de maga cosas. (2 Tim. 3:1; Isa. 61:2) Necesita ya gayot el maga gente sabe el verdad y hace justo decision.

10. Cosa el positivo reaccion del cuanto na cosa ya habla na Haggeo 2:7-9?

¹⁰ El figurativo uyuk que ya predicta si Haggeo tiene positivo efecto na cuanto maga gente. Ya habla le kanaton que como resulta del uyuk, “el maga precioso cosas [maga gente quien tiene honesto corazon] del todo maga nacion hay entra” para adora con Jehova. * (Le con el Haggeo 2:7-9.) Si Isaias y si Miqueas ya predicta tambien que hay sucede se “na ultimo maga dia.”—Isa. 2:2-4, ftn.; Miq. 4:1, 2, ftn.

11. Cosa el reaccion del un hermano na mensaje acerca del Reino cuando primer vez le ya oi con ese?

 ¹¹ Considera con el efecto del mensaje que ta hace uyuk con el tierra na un hermano que el nombre si Ken, quien ta sirvi na world headquarters. Claro pa le ta puede acorda cuando ya oi le por primer vez con el mensaje acerca del Reino maga 40 año ya el ya pasa. Si Ken ya habla: “Cuando primer vez yo ya sabe el verdad estaba na Palabra del Dios, bien alegre yo aprende que ta vivi ya kita na ultimo maga dia de este sistema de maga cosas. Ya puede yo mira que para puede ganá con el favor del Dios y tene vida hasta para cuando, necesita yo asigura que gendeh yo parte de este mundo y esta pirmi na lao de Jehova. Ya reza yo con Jehova y ya hace dayun con ese. Ya deja yo con el mundo y ya acepta dayun con el proteccion del Reino del Dios que gendeh gayot hay destroza.”

12. Paquemodo el espiritual templo de Jehova ya llena de gloria durante este ultimo maga dia?

¹² Claro gayot que si Jehova ta bendici con el de suyu maga siervo. Durante este ultimo maga dia, mas manada ya maga gente el quien ta sirvi con ele. Del 1914, cuanto mil pa lang kita. Ahora, tiene ya mas de ocho millon quien activo ta adora con Dios y millones el ta atende junto kanaton na Comemoracion. Na este manera, el patio aqui na tierra del espiritual templo de Jehova—el de suyu arreglamiento para na puro adoranza—ya llena de “maga precioso cosas del todo maga nacion.” Ya dale tambien gloria con el nombre de Jehova por medio na maga cambio que ya hace este maga persona cuando ya bisti sila con el nuevo personalidad.—Ef. 4:22-24.

13. Cosa otro maga profecia el ya cumpli por causa na ese maga suceso? (Mira con el letrato na cover.)

¹³ Este maga suceso ta cumpli otro maga profecia, igual na cosa puede incuntra na Isaias capitulo 60. Na versiculo 22 de ese capitulo ya habla: “El poco hay queda un mil y el diutay hay queda un poderoso nacion. Iyo mismo, si Jehova, hay hace lijero con este na de este mismo tiempo.” Por causa cay manada ya gente el ya principia sirvi con Jehova, tiene bonito cosa que ya sucede. Este “maga precioso cosas” tiene diferente abilidad y el deseo para predica con el “Buen  Noticia acerca del Reino.” Como resulta, el maga siervo de Jehova puede usa con ese maga abilidad que ya llama si Isaias “el leche del maga nacion.” (Isa. 60:5, 16) Na ayuda de ese maga precioso hombre y mujer, el trabajo predicacion ya puede ya hace na 240 nacion y ya produci maga literatura na mas de 1,000 lengguaje.

14. Cosa decision el maga gente ta necesita hace ahora?

¹⁴ Na este tiempo del fin, por causa cay ta hace uyuk con el maga nacion, ta causa este con el maga gente para hace un decision. Hay suporta ba sila con el Reino del Dios o pone sila el diila confianza na maga gobierno de este mundo? Un decision este que necesita hace el todo. Maskin pa el maga siervo de Jehova ta obedece con el maga ley del gobierno na lugar donde sila ta queda, ta esta sila neutral si acerca na politica de este mundo. (Roma 13:1-7) Sabe sila que el Reino el solamente deverasan solucion na maga problema del maga gente. Este Reino gendeh parte de este mundo.—Juan 18:36, 37.

15. Cosa grande probanza de lealtad el ya revela na libro de Revelacion?

¹⁵ El libro de Revelacion ta menciona que hay pone na probanza con el lealtad del maga siervo del Dios na ultimo maga dia. Este maga probanza hay continua lleva grande oposicion y persecucion kanaton. El maga gobierno de este mundo hay pidi kanaton el cosa que conviene para con Dios y persigui con aquellos quien gendeh ta suporta kanila. (Rev. 13:12, 15) Hay “puede tamen [sila] hace marca na mano derecha o na frente con todo el maga gente, que importante sila o gendeh, que rico o pobre, que muchacho sila o gente libre.” (Rev. 13:16) Ta marca con el maga esclavo de antes para dale mira si quien el ta dueña kanila. Na igual manera, ta expecta con el todo ahora que tene el simbolico marca na diila mano o frente. El diila maga pensamiento y accion ta dale mira que parte sila y ta suporta con el sistema de politica.

16. Porque bien necesita que hace fuerte el diaton lealtad con Jehova ahora?

¹⁶ Hay acepta ba kita con este simbolico marca y dale el diaton suporta na maga gobierno? Aquellos quien gendeh ta acepta con el marca hay enfrenta maga dificultad y peligro. El libro del Revelacion ta habla: “Noay quien ay puede compra o vende maskin cosa, sino aquellos lang marcao.” (Rev. 13:17) Pero, el maga siervo del Dios sabe si cosa hace el Dios con aquellos quien tiene el marca que ya menciona na Revelacion 14:9, 10. En vez tene con ese marca, dol aquel sila escribi na diila mano, “De Jehova.” (Isa. 44:5) Ahora ya el tiempo para asigura que fuerte el diaton lealtad con Jehova. Si hace kita se, alegre si Jehova habla que de suyu kita!

17. Cosa kita necesita acorda acerca na paciencia de Jehova?

¹⁷ Ta dale gayot si Jehova mira largo paciencia durante este ultimo maga dia. No quierre le que tiene quien hay destroza. (2 Ped. 3:9) Ta dale le oportunidad con todo para arripinti y para hace justo decision. Pero, gendeh hasta para cuando el de suyu paciencia. Aquellos quien gendeh acepta con ese oportunidad hay experiencia igual con el cosa ya sucede con el Faraon na tiempo de Moises. Si Jehova ya habla con el Faraon: “Si ya usa yo de mio poder para castiga contigo y con el de tuyu maga gente por medio de un grabe enfermedad, gendeh mas era tu ta existi na tierra. Pero, ya permiti pa yo contigo que vivi por causa na este razon: para dale  mira contigo el de mio poder y para queda conocido el de mio nombre na entero tierra.” (Ex. 9:15, 16) Llega el tiempo, hay conoce el todo maga nacion que si Jehova el solamente verdadero Dios. (Eze. 38:23) Paquemodo este sucede?

18. (a) Cosa otro clase de uyuk el ya menciona na Haggeo 2:6, 20-22? (b) Porque kita puede habla que el maga palabra de Haggeo hay cumpli na futuro?

¹⁸ Cuanto siglo despues del tiempo de Haggeo, ya escribi si Pablo que el maga palabra que puede incuntra na Haggeo 2:6, 20-22 hay cumpli na futuro. (Le.) Si Pablo ya escribi: “Ele ta dale canaton este Promesa: Una vez pa ay hace yo uyok gendeh lang con el mundo, sino hasta con el cielo. El maga palabra una vez pa quiere decir que el maga cosa-cosa que ta man uyok ay cambia—cay maga cosa-cosa lang esos de este mundo—para ansina el maga cosa-cosa que gendeh ta man uyok ay esta hasta para cuando.” (Heb. 12:26, 27) Gendeh igual na uyuk que ya menciona na Haggeo 2:7, este clase de uyuk hay lleva destrozo hasta para cuando con aquellos quien igual con el Faraon, gendeh ta acepta con el derecho de Jehova para rula.

19. Cosa el gendeh man uyuk y porque kita se sabe?

¹⁹ Cosa el gendeh man uyuk o perde? Ya continua si Pablo: “Kita ya recivi un reino que gendeh ta man uyok. Poreso, esta kita fuerte na gracia que ya recivi kita. Y por medio de ese gracia, adora kita con el Dios na un manera que Ele ta gusta, con respeto y miedo.” (Heb. 12:28) Despues este ultimo uyuk hay completa, el Reino del Dios ya lang el existi. Hay esta este hasta para cuando!—Sal. 110:5, 6; Dan. 2:44.

20. Cosa decision debe hace el maga gente y paquemodo kita puede ayuda kanila?

²⁰ Bien corto ya lang el tiempo! El maga gente debe iscuji: Hay continua ba sila suporta con este mundo que ta resulta na destrozo o iscuji sila sirvi con Jehova y hace maga cambio na vida para hace de suyu voluntad, que ta resulta na vida hasta para cuando? (Heb. 12:25) Por medio na diaton trabajo predicacion, puede kita ayuda con el maga gente hace con ese importante decision. Ojala, puede pa kita ayuda mas manada persona para decidi suporta con el Reino del Dios. Y ojala, acorda kita pirmi con el maga palabra del diaton Señor Jesus: “Este Buen Noticia acerca del Reino ay anuncia na entero mundo, para man testigo con todo el maga nacion. Entonces ay llega ya el fin.”—Mat. 24:14.