ARTICULO 39
Si el un Persona con Quien Tu Ta Ama Ya Deja con Jehova
“Pirmi gayot sila . . . ya hace con ele sinti duele.”— SAL. 78:40.
CANCION 102 “Assist Those Who Are Weak”
PREVIEW *
1. Cosa posible el efecto con otro si yan disfellow el un persona con quien sila ta ama?
YAN disfellow ba na congregacion el un persona con quien tu ta ama? Asigurao, duele gayot se para contigo! “Cuando ya muri el de mio marido despues de 41 año de casao kame,” ya habla el un hermana que si Hilda, “pensaba yo amo ya quel el de con todo grabe que puede yo experiencia. * Pero, cuando el de mio anak ya deja con el congregacion, con el de suyu mujer y con el de suyu maga anak, mas grabe el dolor que ya sinti yo.”
Ta entende si Jehova si paquemodo tu de triste si el un persona con quien tu ta ama ya descanza sirvi con ele (Mira con el parapo 2-3) *
2-3. Asegun na Salmo 78:40, 41, cosa ta sinti si Jehova si ta deja con ele el de suyu maga siervo?
2 Pensa si paquemodo de dolorido si Jehova cuando el cuanto maga angel quien parte del de suyu familia ya deja con ele. (Jud. 6) Y imagina con el dolor que ya sinti le cuando el maga Israelita con quien le ta ama cuanto beses yan rebelde con ele. (Le con el Salmo 78:40, 41.) Puede tu asigura que el diaton amable Tata na cielo ta sinti tambien duele si el persona con quien tu ta ama ya deja con ele. Ta entende le con el dolor que ta experiencia tu. Hay anima le contigo y dale el suporta que necesita tu.
3 Na este articulo, hay discuti kita si cosa kita puede hace para ricibi con el ayuda de Jehova si el un persona con quien kita ta ama ya deja con ele. Hay examina tambien kita si paquemodo kita puede ayuda con otro na congregacion quien ta enfrenta con ese dificultad. Pero una, considera kita con el un negativo clase de pensamiento que debe kita evita.
NO DISCULPA CON EL DE TUYU MISMO CUERPO
4. Cosa ta sinti el manada mayores si el diila anak ya deja con Jehova?
4 Si el un precioso anak ya deja con Jehova, comon lang para na maga mayores que pensa si cosa pa era sila ya puede hace
para ayuda con el diila anak que esta na verdad. Despues man disfellow el de suyu anak, el un hermano que si Luke ya admiti: “Ya disculpa yo con el de mio mismo cuerpo. Ya tiene pa gane yo mal sueño acerca con ese. Tiene vez, ta llura yo y ta duele el de mio corazon.” Si Elizabeth, un hermana quien ya enfrenta un semejante situacion, ya pensa: “Cosa yo mali ya hace como un nana? Yan sinti yo que gendeh bastante el cosa yo ya hace para enseña el verdad con el de mio anak.”5. Quien el responsable si el un persona ya deja con Jehova?
5 Necesita kita acorda que ya dale si Jehova con el cada uno kanaton el libertad para hace decision. Quierre decir, puede kita decidi si obedece ba kita con ele o gendeh. El cuanto maga jovenes ya engranda que el maga mayores nuay dale mira buen ejemplo pero ya decidi sila que sirvi con Jehova y esta fiel con ele. El otro, ya engranda que el maga mayores ya hace el todo para enseña kanila acerca na maga principio na Biblia pero ya deja con el verdad cuando ya queda sila adulto. Entonces, el cada uno kanaton debe decidi si sirvi ba kita con Jehova. (Jos. 24:15) Poreso maga mayores quien triste cay el de ustedes anak ya deja con Jehova, resisti con el tendencia que pensa que culpa quel de ustedes.
6. Cosa posible el efecto na un joven si el de suyu mayores hay deja con Dios?
6 Tiene vez, el un mayores hay deja con el verdad y maskin con el de suyu familia. (Sal. 27:10) Bien dificil este para na maga anak quien ta mira con el de suyu mayores como un buen ejemplo. Si Esther que el tata yan disfellow ya habla: “Pirmi lang yo ta llura cay ya realiza yo que gendeh lang le basta hinay-hinay ya deja con el verdad. Ya hace gayot le el decision que deja con Jehova. Ta ama yo con el de mio tata poreso cuando yan disfellow le, pirmi yo ta pensa si quetal ya le. Ta tiene pa gane yo panic attack.”
7. Cosa ta sinti si Jehova con el maga jovenes que el mayores yan disfellow?
7 Maga jovenes, si el de ustedes mayores yan disfellow, ta sinti gayot kame triste para con ustedes. Puede ustedes asigura que sabe tambien si Jehova el dolor que ta sinti ustedes. Ta ama le con ustedes y ta aprecia con el de ustedes lealtad y kame tambien—el de ustedes maga hermano y hermana. Acorda tambien que gendeh ustedes responsable na maga decision que ya hace el de ustedes mayores. Como ya menciona enante, si Jehova ya dale el libertad para decidi con el cada uno. Y el cada uno dedicao y bautizao individual debe “carga con el disuyo problema personal” o responsibilidad.—Gal. 6:5.
8. Cosa puede hace el maga miembro del familia mientras ta espera que el un persona hay bira con Jehova? (Mira tambien con el cajon “ Bira con Jehova.”)
8 Si deja con Jehova el un persona con quien tu ta ama, normal lang que esperanza tu que llega el dia hay bira le con Jehova. Cosa tu puede hace mientras tanto? Puede tu hace esfuerzo para mentena con el de tuyu fuerte fe. Si hace tu se, hay puede tu dale mira buen ejemplo con el otro miembro na familia y posible maskin con el quien yan disfellow. Hay tene tambien tu el fuerza que necesita tu para puede aguanta con el de tuyu tristeza. Hay discuti kita cuanto practical cosas que puede tu hace.
SI COSA TU PUEDE HACE PARA ESTA FUERTE NA ESPIRITUAL
9. Cosa tu puede hace para esta fuerte el de tuyu fe? (Mira tambien con el cajon “ Maga Texto que Puede Dale Comforta Contigo.”)
9 Mentena con el un buen espiritual rutina. Bien importante que continua tu hace fuerte con el de tuyu mismo cuerpo y con el otro miembro del familia. Paquemodo tu puede hace con ese? Hay esta fuerte el de tuyu fe si continua tu le con el Palabra del Dios, medita con ese y atende na maga miting na congregacion. Si Joanna que el tata y hermana ya deja con el verdad ya habla: “Ya sinti yo calma si ta le yo acerca na maga caracter na Biblia igual con Abigail, Ester, Job, Jose y Jesus. El diila ejemplo ta anima y ta ayuda conmigo para queda mas positivo y ta alivia con el dolor que ta sinti yo. Ya puede tambien conmigo anima el diaton maga original cancion.”
10. Paquemodo el Salmo 32:6-8 ta ayuda kanaton si ta sinti kita triste?
10 Habla el de tuyu maga lingasa con Jehova. Si ta sinti tu triste, no descanza reza con ele. Pidi con el diaton amable Dios que ayuda contigo mira con el de tuyu situacion igual si paquemodo le ta mira con ese y dale contigo “el hondo entendimiento y enseña contigo el camino que debe tu camina.” (Le con el Salmo 32:6-8.) Siempre, posible bien duele para contigo que habla con Jehova si cosa tu deverasan ta sinti. Pero, ta entende gayot si Jehova si cosa tu ta sinti na de tuyu corazon. Ta ama gayot le contigo y ta anima contigo que habla con ele si cosa gayot tu ta sinti.—Ex. 34:6; Sal. 62:7, 8.
11. Asegun na Maga Hebreo 12:11, porque kita debe confia con el amable disciplina de Jehova? (Mira tambien con el cajon “ Puede Mira el Amor de Jehova si Tan Disfellow con el un Persona.”)
11 Suporta con el decision. Parte del arreglamiento de Jehova que man disfellow con el un persona quien nuay arripinti. El de suyu amable Maga Hebreo 12:11.) El cuanto gente posible habla que gendeh justo el decision que ya hace el maga anciano. Pero, acorda que mas mucho de ese maga gente no quierre lang menciona maga negativo cosas acerca con el quien ya culpa. No sabe kita el todo informacion. Poreso, mas bueno que confia kita con el maga anciano quien ya hace esfuerzo para sigui con el maga principio na Biblia cuando ya hace sila decision y ya juzga “para con Jehova.”—2 Cron. 19:6.
coreccion para na bien del todo, incluido del quien ya culpa. (Le con el12. Cosa el maga beneficio que ya experiencia el cuanto cay ya suporta sila con el arreglamiento de Jehova acerca na disciplina?
12 Si ta suporta tu con el decision del maga anciano que man disfellow con el un miembro del de tuyu familia, posible ta ayuda tu con ele para bira con Jehova. “Bien dificil para kanamon que perde el comunicacion na diamon adulto anak,” ya admiti si Elizabeth que ya menciona enante. “Pero cuando ya bira le con Jehova, ya admiti le que conviene gayot con ele man disfellow. Despues del cuanto tiempo, ya habla le que manada le cosa ya aprende. Ya puede yo realiza que el disciplina de Jehova pirmi justo,” ya habla si Elizabeth. El de suyu marido, si Mark, ya omenta: “Na uliji, ya habla conmigo el diamon anak que el un razon si porque le ya bira amo cay ya hace kame si cosa kame debe hace. Bien alegre yo cay ya ayuda kanamon si Jehova que queda obediente.”
13. Cosa contigo puede ayuda si ta sinti tu triste?
13 Man cuento na maga amigo quien ta entende si cosa tu ta sinti. Man junto na maga mature Cristiano quien puede ayuda contigo para mentena un positivo mirada. (Prov. 12:25; 17:17) Si Joanna que ya menciona enante ya habla: “Ya sinti yo solo. Pero, ya puede gayot ayuda conmigo cuando yan cuento yo na maga amigo y amiga con quien yo ta confia.” Pero, paquemodo si el cuanto na congregacion dol ta puede habla maga cosas que ta hace contigo mas triste?
14. Porque kita necesita “aguanta y perdona con uno y otro”?
14 Queda paciencioso na de tuyu maga hermano y hermana. El deverasan, gendeh kita puede expecta que el todo hay habla maga cosas na justo manera. (Sant. 3:2) Imperfecto kita todo poreso no estraña si el cuanto tan dificil si cosa habla o puede pa gane habla maga cosas que gendeh intencional y hace sinti duele contigo. Acorda con el consejo de apostol Pablo: “Aguanta y perdona con uno y otro si uno tiene reclamo con otro.” (Col. 3:13) El un hermana que el pariente yan disfellow ya habla: “Ya ayuda conmigo si Jehova para perdona con el maga hermano quien ya pricura hace el justo cosas na imperfecto manera.” Cosa puede hace el congregacion para ayuda con el maga miembro del familia quien ya esta fiel?
PUEDE AYUDA EL CONGREGACION
15. Cosa puede ayuda con el otro miembro si uno na diila familia nuevo lang yan disfellow?
15 Trata enbuenamente con el maga miembro del familia quien ya esta fiel. El un hermana
que si Miriam ya admiti que malingasa le anda na maga miting despues man disfellow el de suyu hermano. “Ya tiene yo miedo si cosa habla el maga gente. Pero, tiene maga buen amigo y amiga quien ya sinti tambien triste na cosa ya sucede y nuay sila dale mira que rabiao sila con el de mio hermano. Por causa kanila, nuay yo sinti que iyo lang el dolorido.” El otro hermana ya habla: “Despues man disfellow con el de mio anak, el diamon maga amigo y amiga ya anda para dale comforta kanamon. Ya admiti el cuanto que no sabe sila si cosa habla. Ya llura sila junto conmigo y el otro ya escribi carta. El cosa sila ya hace ya ayuda gayot conmigo!”16. Paquemodo el congregacion puede continua suporta con aquellos tiene pariente yan disfellow?
16 Continua suporta con el maga miembro del familia quien ya esta fiel. Mas necesita sila ahora el de ustedes amor y comforta. (Heb. 10:24, 25) Tiene vez, el maga miembro de familia del yan disfellow ta sinti que pati kanila gendeh tan junto el congregacion. No permiti que sucede se! Debe kita comenda y anima con el maga jovenes que el maga mayores ya deja con el verdad. Si Maria que el marido yan disfellow y ya deja con el familia ya habla: “El cuanto del diamon maga amigo y amiga ya anda na diamon casa, ya cuci comida y ya ayuda conmigo na estudiada na diamon familia. Ya sinti sila el de mio dolor y ya llura junto conmigo. Ya defende sila conmigo cuando yan calayat el maga falso istoria. Ya puede gayot sila anima conmigo!”—Roma 12:13, 15.
El congregacion puede dale amable suporta con el maga miembro del familia quien ya esta fiel (Mira con el parapo 17) *
17. Cosa puede hace el maga anciano para dale comforta con aquellos dolorido?
17 Maga anciano, usa con el maga oportunidad que tiene ustedes para hace fuerte con el maga miembro del familia quien ya esta fiel. Tiene ustedes un especial responsibilidad que dale comforta con aquellos quien el pariente ya deja con Jehova. (1 Tes. 5:14) Man cuento kanila antes y despues del miting para anima kanila. Visita kanila y reza para kanila. Man junto kanila na ministerio o na otro tiempo, invita kanila que man junto con ustedes na de familia adoranza. El maga anciano necesita dale mira compasion, amor y atencion con el maga carnero de Jehova quien ya queda dolorido.—1 Tes. 2:7, 8.
NO PERDE ESPERANZA Y CONTINUA CONFIA CON JEHOVA
18. Asegun na 2 Pedro 3:9, cosa quierre el Dios para con aquellos quien ya descanza sirvi con ele?
18 “Quiere [si Jehova] que noay ni uno quien ay perde, sino todo ay arripinti.” (Le con el 2 Pedro 3:9.) Maskin pa ya comete serioso pecado el un persona, precioso siempre con Dios el de suyu vida. Pensa con el grande pago que ya paga si Jehova—el rescate del de suyu mismo Anak—para na vida del maga pecador. Bien amable si Jehova y ta pricura ayuda con ese maga persona para bira con ele. Ta esperanza le que hace sila se, como cosa kita puede mira na ilustracion de Jesus acerca con el anak quien ya sale. (Luc. 15:11-32) Manada de aquellos quien ya deja con el verdad ya bira na uliji con el diila amable Tata na cielo. Y el congregacion bien alegre que ricibi kanila otravez. Si Elizabeth que ya menciona enante ya queda bien alegre cuando el de suyu anak ya queda otravez un Testigo de Jehova. Ele ya habla, “Ya aprecia gayot yo con aquellos quien ya anima conmigo que no perde esperanza.”
19. Porque puede kita continua confia con Jehova?
19 Pirmi kita puede confia con Jehova. Nunca le kanaton dale direccion que puede causa peligro kanaton. Un Tata le que bondadoso, tiene compasion y tiene hondo amor con todo quien ta ama y ta adora con ele. Puede tu asigura que si Jehova gendeh gayot abandona contigo na tiempo que bien triste tu. (Heb. 13:5, 6) “Nuay gayot kanamon abandona si Jehova,” ya habla si Mark que ya menciona enante. “Gendeh le lejos kanamon cuando ya experiencia kame dificultad.” Si Jehova hay continua dale contigo el “grande poder.” (2 Cor. 4:7) Si, puede tu esta fiel y continua esperanza maskin pa el persona con quien tu ta ama ya deja con Jehova.
CANCION 44 A Prayer of the Lowly One
^ par. 5 Bien maka-triste si el un persona con quien kita ta ama ya deja con Jehova. Este articulo ta considera si cosa ta sinti el diaton Dios si ta sucede se. Ta discuti este maga practical cosas que puede hace el maga fiel miembro del familia para tene comforta y esta fuerte na espiritual. Hay discuti tambien este articulo si paquemodo el todo na congregacion puede dale comforta y suporta con el familia.
^ par. 1 Ya cambia con el cuanto nombre na este articulo.