Corto tiempo despues del año 1940, el de mio mayores ya estudia con el Biblia junto na maga Testigo de Jehova. Ya descanza el diila Bible study pero el de mio nana ya continua ricibi maga copia del maga magasin El Torre de Guardia y Awake! Del 1950, tiene ya hace un internacional convencion na New York City y ya atende el diamon familia.

Nuay dura despues de ese, ya principia visita kanamon si Hermano Lawrence Jeffries. Ya pricura le ayuda conmigo para aprende el verdad. Del primero, nuay yo man uyun acerca na decision del maga Testigo de Jehova que gendeh participa na politica y gendeh man soldao. Ya habla yo con ele que si el todo gente na America gendeh participa na guerra, el maga enemigo facil lang ataca con el entero nacion. Si Hermano Jeffries con paciencia ya contesta: “Ta mira tu, cosa gaha hace si Dios Jehova si el todo maga gente na America ta sirvi con ele y despues, ya ataca kanila el maga enemigo?” El cosa le ya habla acerca con ese y na otro pa maga cosas ya puede ayuda conmigo para mira que mali el cosa yo ta pensa. Por causa con ese, ya queda yo mas interesao na Biblia.

Manada hora yo ta le con el maga mas daan issue del El Torre de Guardia y Awake! que ya recuji el de mio nana. Ya llega el tiempo, ya realiza yo que el cosa yo ta aprende amo el verdad poreso ya conforma yo man Bible study junto con Hermano Jeffries. Ya principia tambien yo regular atende na maga miting. Ya gusta gayot yo con el cosa yo ta aprende y ya principia yo predica con el buen noticia. Ya cambia el de mio maga goal cuando ya queda yo convincido que “cerca ya el grande dia de Jehova.” (Sof. 1:14) No quierre ya yo entra escuela na universidad sino quierre yo ayuda con otro para aprende el verdad na Biblia.

 Ya gradua yo na high school del Junio 13, 1956. Tres dia despues, ya bautiza conmigo na un asemblea de circuito. Nuay gayot yo expecta que hay ricibi yo bien manada bendicion cay ya iscuji yo que usa con el de mio vida para aprende y enseña con otro acerca con Jehova.

Seis meses despues del de mio bautismo, ya queda yo un regular pioneer. El Kingdom Ministry del Deciembre 1956 tiene el articulo “Can You Serve Where the Need Is Great?” Ya pensa yo que puede yo quel hace. Quierre yo sirvi onde poco lang el ta predica con el buen noticia.​—Mat. 24:14.

Ya cambia yo na Edgefield, South Carolina. Tiene lang cuatro publisher na congregacion alla. Cay ya cambia yo alla, cinco ya kame. Tan miting kame na un cuarto na casa del hermano. Cada mes, ta usa yo 100 hora na ministerio. Ocupao tambien yo dale maga parte na miting y guia con el maga hermano na predicacion. Y ya realiza yo que si mas ocupao yo na congregacion, mas manada yo cosa ta puede aprende acerca con Jehova.

El un mujer con quien yo tan Bible study amo dueño del un funeraria na Johnston​—un barrio que cuanto kilometro de lejos kanamon. Ya dale le conmigo part-time trabajo alla y ya permiti kanamon que usa con el un diutay building para queda Kingdom Hall.

Si Hermano Jolly Jeffries, el anak del hermano quien yan Bible study conmigo, ya cambia estaba na Brooklyn, New York y ya queda de mio partner na ministerio. Ta queda kame na un diutay trailer que ya dale kanamon presta el un hermano.

Diutay el sueldo na diamon lugar. Para na entero dia trabajo, ta paga lang kanamon dos o tres dollar. Na un ocasion, ya acaba ya yo gasta con el de mio sen para cumpra comida. Cuando ya sale yo na grocery store, ya atraca conmigo el un hombre y ya pregunta: “Quierre tu trabaja? Paga yo contigo un dollar cada hora.” Ya trabaja yo con ele por tres dia para limpia con el un lugar onde tiene construction. Bien claro que ta ayuda conmigo si Jehova para esta na Edgefield. Pero, ya puede yo atende na un internacional convencion na New York City del 1958.

Na ika-dos dia del convencion, tiene cosa especial que ya sucede. Ya conoce yo con Ruby Wadlington, quien ta sirvi como un regular pioneer na Gallatin, Tennessee. Cay quierre kame dos queda misionario, ya atende kame con el miting de Gilead na ese convencion. Acabar, ya principia kame escribi carta con uno y otro. Despues de cuanto tiempo, ya invita tambien conmigo que dale public talk na Gallatin. Durante ese tiempo, ya habla yo con Ruby que quierre yo casa con ele. Ya cambia yo na diila congregacion y ya casa kame del 1959.

Cuando 23 año yo, ya queda yo el congregation servant (que ta llama ahora como el coordinator del grupo del maga anciano) na Gallatin. Diamon congregacion el primero ya visita si Hermano Charles Thompson cuando ya queda le circuit  overseer. Maskin pa experienciao ya le, ya pregunta le siempre conmigo acerca si cosa necesita el maga hermano y si paquemodo el otro maga circuit overseer ya puede ayuda kanila. Ya puede yo aprende con ele que bueno si ta pregunta y sabe anay el todo detalle antes de hace decision.

Del Mayo 1964, ya invita conmigo que atende na Kingdom Ministry School na South Lansing, New York por un mes. El maga hermano quien ya conduci con este clase ya puede ayuda conmigo para cultiva el deseo que aprende pa mas acerca con Jehova y progresa na espiritual.

Del Enero 1965, ya ricibi kame de Ruby un invitacion que sirvi na circuit work. Grande el teritorio del diamon primer circuito​—principia na Knoxville, Tennessee hasta cerca na Richmond, Virginia. Incluido tambien aqui el maga congregacion na North Carolina, Kentucky y West Virginia. Ta visita lang kame na maga congregacion del maga negro hermano cay na aquel tiempo, tiene maga ley na sur parte del United States que gendeh puede man junto el maga negro na maga blanco. Gendeh rico el maga hermano alla y ya aprende kame man share con el cosa kame tiene. El un hermano que tarda ya ta sirvi como un circuit overseer ya enseña conmigo un importante leccion: “Queda como un hermano kanila. No anda na congregacion y actua como un boss. Puede lang tu ayuda kanila si ta mira sila contigo como diila hermano.”

Mientras ta visita kame con el un diutay congregacion, ya puede principia man Bible study si Ruby con el un joven mujer quien tiene anak mujer que un año el edad. Cay nuay na congregacion quien puede continua con el estudiada, ya hace se si Ruby por medio na carta. Na diamon sunod visitada, ya atende el mujer na todo miting. Cuando ya cambia alla el dos special pioneer hermana, ya continua sila con el estudiada y nuay tarda, ya bautiza el mujer. Maga 30 año despues, del 1995, tiene un joven hermana quien ya atraca y yan cuento con Ruby na Patterson Bethel. Anak quel del mujer con quien yan Bible study si Ruby. Ele y el de suyu marido maga estudiante del ika-100 clase de Gilead.

El diamon segundo circuito amo na central Florida. Aquel tiempo, necesita kame coche y ya puede kame cumpra que gendeh caro. Pero na primer semana pa lang, tiene cosa ya queda malo na maquina. Nuay mas kame sen para manda compone con este. Ya llama yo con el un hermano quien ta pensa yo que puede ayuda kanamon. Ya pidi le con el uno del de suyu maga trabajante que compone con el coche y nuay mas le manda paga kanamon. Ya habla lang le, “OK ya quel.” Ya dale pa gane le sen kanamon como regalo! Un bonito ejemplo quel si paquemodo si Jehova ta cuida con el de suyu maga siervo. Ya hace este acorda kanamon que queda bondadoso con otro.

Si ta visita kame na maga congregacion, ta esta kame na casa del maga hermano. Por causa con ese, ya tiene kame manada buen amigo y amiga. Un dia, ya principia yo man type con el de mio report acerca na congregacion y ya deja con ese na typewriter. Cuando ya bira yo pagka-denoche, ya sabe yo que el tres año anak hombre del familia onde kame ta esta ya “ayuda” hace acaba con el de mio report. Ya tenta yo con ele acerca con aquel por manada año.

Del 1971, ya ricibi yo un carta que tan assign conmigo que sirvi como un district overseer na New York City. Espantao gayot kame! Cuando ya cambia kame alla, 34 año lang yo. Iyo el primer negro district overseer alla y yan welcome gayot kanamon el maga hermano.

Como district overseer, ya gusta gayot yo con el de mio assignment que enseña acerca con Jehova cada weekend na maga asemblea de circuito. Manada maga circuit overseer el mas experienciao contra conmigo. El uno kanila amo el quien ya dale talk durante el de mio bautismo. El otro hermano amo si Theodore Jaracz, quien ya queda un miembro del Cuerpo Gobernante na uliji. Manada tambien maga experienciao hermano quien ta sirvi na Brooklyn Bethel. Ta rindi gayot yo gracias cay el maga circuit overseer y maga Bethelite ya manda conmigo sinti comfortable. Ya puede yo mismo mira que este maga amable hermano ta confia gayot na Palabra del Dios y leal ta suporta con el organizacion. Mas facil yo ya puede hace con el de mio assignment como un district overseer cay humilde sila.

Del 1974, el Cuerpo Gobernante yan assign otro grupo de maga circuit overseer para na district work. Poreso, ya sirvi yo otravez como un circuit overseer pero ahora na South Carolina ya. Aquel tiempo, puede ya man junto el maga blanco y maga negro na un congregacion poreso alegre gayot el maga hermano.

Na fin del 1976, yan assign conmigo na circuito de Georgia que na entre medio del Atlanta y Columbus. Ta acorda pa gayot yo que ya dale yo discurso de intierro para con el cinco negro bata quien ya muri cuando tiene quien ya quema con el diila casa. Yan hospital el diila nana por causa na de suyu maga irida. Pirmi ta visita na hospital el maga negro y blanco hermano y hermana para dale comforta con el mayores. Ya puede yo mira que grande gayot el amor del maga hermano. Si el maga siervo del Dios ta dale mira este clase de compasion con uno y otro, puede sila aguanta na maskin cosa dificil circumstancia.

Del 1977, ya pidi kanamon que anda na Brooklyn Bethel para ayuda na un proyecto por cuanto meses. Cuando cerca ya quel acaba, el dos miembro del Cuerpo Gobernante ya pregunta conmigo si conforme ba kame de Ruby que permanente sirvi na Bethel. Ya acepta kame con el invitacion.

Por 24 año, ya sirvi yo na Service Department donde el maga hermano ta ayuda para contesta con el maga sensitivo y dificil pregunta. El Cuerpo Gobernante ta dale direccion que harmonia na maga principio na Biblia. Ta usa con este como basejan para contesta con el maga pregunta y ta usa tambien con ese para man train con el maga circuit overseer, anciano y pioneer. Este training ya puede ayuda con el manada para progresa na espiritual. Como resulta, ya hace este fuerte con el organizacion de Jehova.

Desde 1995 hasta 2018, ya puede yo visita manada branch office como un headquarters representative que de antes ta llama como zone overseer. Tan cuento yo con el maga Branch Committee, Bethelite y misionario para anima y ayuda kanila na diila maga dificultad. Y el maga hermano y hermana quien ya relata el diila maga experiencia kanamon de Ruby ya puede gayot anima kanamon. Por ejemplo, ya puede kame visita na Rwanda del 2000. Ya puede gayot afecta kanamon cuando ya oi kame si paquemodo el maga hermano y el familia Bethel ya puede aguanta durante el matanza alla del 1994. Ya muri el manada del diila maga familia y amigo. Pero maskin cosa pa sila ya experiencia, aquel maga hermano ya demonstra fe y alegria, y nuay perde el diila esperanza.

Mas de 80 año ya kame ahora. Del ya pasa 20 año, ta sirvi yo como un miembro del United States Branch Committee. Nuay yo entra escuela na universidad pero ya ricibi yo el de con todo alto educacion estaba con Jehova y na de suyu organizacion. Por causa con este, ya puede yo enseña con otro el maga verdad na Biblia que puede ayuda kanila hasta para cuando. (2 Cor. 3:5; 2 Tim. 2:2) Ya puede yo mira si paquemodo el mensaje del Biblia ya puede ayuda para queda mas enbuenamente el vida del maga gente y ayuda kanila para tene buen relacion na diila Creador. (Sant. 4:8) Kame de Ruby ta pricura anima con otro que aprecia con el privilegio que aprende acerca con Jehova y enseña con otro el maga verdad na Biblia​—el de con todo grande privilegio que tiene el un siervo de Jehova!