1. Paquemodo kita puede sabe que puede confia con el un persona?

 EL UN persona con quien puede confia ta pricura cumpli con el de suyu maga promesa y ta habla el verdad. (Sal. 15:4) Sabe el maga gente que puede sila depende con ele. Quierre kita que ansina sinti el diaton maga hermano y hermana kanaton. Cosa kita puede hace para confia sila kanaton?

2. Cosa kita hace para confia kanaton el otro?

² Gendeh kita puede forza con otro que confia kanaton. Debe kita hace esfuerzo para ganá con el diila confianza. Asegun con otro, el confianza igual na sen. Dificil con este obtene pero facil este perde. Asigurao que ya dale gayot mira si Jehova que puede kita con ele confia. Nunca le kanaton dale razon para gendeh confia con ele cay “puede confia con el todo cosa le ta hace.” (Sal. 33:4) Y ta expecta le que imita kita con ele. (Ef. 5:1) Considera kita con el cuanto ejemplo del maga siervo de Jehova quien ya imita con el diila Tata na cielo y ya dale mira que puede kanila confia. Hay discuti tambien kita cinco calidad que puede ayuda para confia kanaton el otro.

3-4. Paquemodo ya dale mira si profeta Daniel que puede con ele confia y cosa ese debe motiva kanaton para considera?

³ Si profeta Daniel amo un buen ejemplo del un persona con quien puede confia. Cuando yan destierro le na Babilonia, ya conoce con ele como un persona con quien puede confia. Mas ya confia pa con ele el maga gente cuando, na ayuda de Jehova, ya habla le si cosa quierre decir del maga sueño del rey de Babilonia que si Nabucodonosor. Necesita habla si Daniel con el rey que gendeh alegre si Jehova con este​—un clase de mensaje  que asigurao no quierre este oi. Necesita coraje si Daniel cay grabe si ta rabia si Nabucodonosor! (Dan. 2:12; 4:20-22, 25) Cuanto año despues, ya dale tambien mira si Daniel que puede con ele confia cuando ya habla le si cosa quierre decir del mensaje que ya abuya na pader del palacio na Babilonia. (Dan. 5:5, 25-29) Na uliji, ya puede tambien nota si Rey Dario y el de suyu maga oficial que tiene “extraordinario saber” si Daniel. Ya admiti sila que “puede con ele confia, con cuidao le na de suyu trabajo y gendeh le ta hace cosas malo.” (Dan. 6:3, 4) Claro que maskin el maga pagano rey ya puede gayot mira que puede confia con este siervo de Jehova!

⁴ Mientras ta pensa con el ejemplo de Daniel, puede kita pregunta na diaton mismo cuerpo: ‘Cosa el de mio reputacion apuera del congregacion? Conocido ba conmigo como un persona quien ta cumpli con el de suyu maga responsibilidad y con quien puede confia?’ Porque importante que considera con este maga pregunta? Cay ta lleva kita alabanza con Jehova si ta puede kanaton confia.

5. Porque conocido con Hananias como un persona con quien puede confia?

⁵ Del 455 B.C.E., despues construi otravez con el maga pader del Jerusalem, si Gobernador Nehemias ya busca maga hombre con quien puede confia quien hay mira con el ciudad. Uno na maga ya iscuji si Nehemias amo si Hananias, el jefe de Fortaleza. Acerca con Hananias, el Biblia ya habla que “puede gayot con ele confia y si compara con otro, mas  grande el de suyu miedo con Dios.” (Neh. 7:2) Cay ta ama le con Jehova y ta tiene le miedo hace maskin cosa que no quierre el Dios, ya hace gayot enbuenamente si Hananias con el maskin cosa assignment que ya dale con ele. Este maga calidad puede tambien ayuda para puede kanaton depende el otro na servicio con Dios.

6. Paquemodo ya dale mira si Tiquico con apostol Pablo que un amigo le con quien puede confia?

⁶ Nota con el ejemplo de Tiquico, el uban de apostol Pablo. Cuando preso si Pablo na casa, ya depende le con Tiquico y ya considera con ele como un “fiel ayudante” del Señor. (Ef. 6:21, 22) Nuay lang con ele confia si Pablo para lleva maga carta na maga hermano na Efeso y Colosa. Sino, ya confia tambien con ele para anima y dale comforta kanila. El ejemplo de Tiquico ta hace acorda kanaton con el maga fiel hombre con quien kita puede confia quien ta dale el diaton maga espiritual necesidad ahora.​—Col. 4:7-9.

7. Cosa tu puede aprende na ejemplo del maga anciano y siervo ministerial na de ustedes congregacion?

⁷ Ahora, ta aprecia gayot kita con el maga anciano y siervo ministerial cay puede kanila confia. Igual con Daniel, Hananias y Tiquico, ta cumpli sila enbuenamente con el diila maga responsibilidad. Por ejemplo, si ta atende kita na midweek miting, asigurao kita que tiene quien dale con el todo parte del programa. Y ta aprecia gayot el maga anciano si aquellos quien tiene parte hay prepara y dale con ese! Mas pa, gendeh tambien kita tan alang-alang invita con el diaton maga Bible study que atende na weekend miting cay asigurao kita que tiene quien dale con el discurso. Y ta confia kita que pirmi kita tiene maga literatura para usa na ministerio. Este maga fiel hermano ta cuida gayot kanaton y ta rindi kita gracias con Jehova por causa kanila! Pero, cosa kita hace para dale mira que puede kanaton confia?

8. Paquemodo kita queda balance si ta dale mira personal interes con otro? (Proverbio 11:13)

⁸ Ta ama kita con el diaton maga hermano y hermana, y interesao kita na diila bien. Pero, debe kita queda balance y respeta con el diila privacia. El cuanto na congregacion del primer siglo amo maga “chismosa y metedora y ta conversa sila del cosa no conviene sila habla.” (1 Tim. 5:13) Asigurao, no quierre kita queda igual kanila. Pero, pone kita que tiene kanaton quien ya habla maga personal informacion. Por ejemplo, el un hermana ya habla kanaton acerca na de suyu enfermedad o otro probanza que ta enfrenta le y ya pidi que no se habla con otro. Debe kita hace el cosa le ya pidi kanaton. * (Le con el Proverbio 11:13.) Ahora, considera kita cuanto situacion donde importante que gendeh kita revela personal informacion.

9. Paquemodo dale mira el maga miembro del familia que puede kanila confia?

⁹ Na familia. El cada miembro del familia tiene responsibilidad que gendeh revela con el cuanto informacion acerca na diila familia. Pone kita que el un mujer tiene cosa ta hace que para con el de suyu marido dol maka-risas. Man cuento ba el marido con otro acerca con ese y causa para man huya el de suyu mujer? Siempre gendeh! Ta ama le con el de suyu mujer y no quierre le hace maskin cosa para sinti este duele. (Ef. 5:33) Quierre el maga teenager que dale kanila mira respeto. Importante que  acorda se el maga mayores. Gendeh sila debe revela con otro el maga kamali del diila maga anak y hace huya kanila. (Col. 3:21) El maga anak necesita queda con cuidao para gendeh habla con otro maga informacion que puede hace huya con el otro miembro del diila familia. (Deut. 5:16) Si el cada miembro del familia gendeh ta habla con otro acerca na cuanto informacion del diila familia, hay queda sila mas cerca con uno y otro.

10. Paquemodo kita queda un verdadero amigo? (Proverbio 17:17)

¹⁰ Na diaton maga amigo y amiga. Tiene maga tiempo que necesita kita habla con el un cerca amigo acerca na cosa kita ta sinti. Tiene vez, posible dificil con ese hace. Baka gendeh kita anad que habla con otro acerca na cosa kita ta pensa y hay queda gayot kita triste si ya sabe kita na uliji que el diaton amigo ya habla con otro el cosa kita ya habla. Pero, hay aprecia gayot kita con el un amigo quien gendeh ta revela con otro maga personal informacion! Un “verdadero amigo” gayot le.​—Le con el Proverbio 17:17.

11. (a) Paquemodo dale mira el maga anciano y el diila maga mujer que puede kanila depende? (b) Cosa kita puede aprende con el un anciano quien ya sabe confidencial informacion pero nuay se habla na de suyu familia? (Mira con el letrato.)

¹¹ Na congregacion. Ya compara con el maga anciano quien gendeh ta revela maga confidencial informacion na “un lugar que donde puede esconde desde na viento, un lugar que donde puede man hulao.” (Isa. 32:2) Sabe kita que puede kita man cuento acerca na maskin cosa con el maga anciano y asigurao kita que gendeh se sila habla con otro. Gendeh kita ta forza kanila que habla kanaton el maga cosas que gendeh kita debe sabe. Mas pa, ta aprecia kita con el maga mujer del maga anciano cay gendeh sila ta pregunta con el diila maga marido acerca na maga confidencial informacion. El deverasan, un bendicion gayot si el mujer del anciano no sabe acerca el personal informacion del maga hermano  y hermana. El mujer del un anciano ya habla: “Ta rindi gayot yo gracias cay el de mio marido gendeh ta habla conmigo maga informacion acerca de aquellos con quien le yan shepherding o aquellos quien necesita espiritual ayuda, maskin el diila nombre. Alegre yo cay por causa con ese, gendeh yo necesita man lingasa acerca con el maga cosas que nuay yo cosa puede hace. Comfortable yo si tan cuento con todo na congregacion. Y sabe yo que si habla yo con el de mio marido acerca na cosa yo ta sinti o de mio maga problema, gendeh tambien le se habla con otro.” Siempre, quierre kita todo que puede kanaton confia el otro. Cosa maga calidad kita necesita cultiva? Considera kita con el cinco de ese.

12. Explica si porque bien importante el amor para confia kanaton el otro.

¹² Bien importante el amor para confia kanaton el otro. Ya habla si Jesus que el dos de con todo importante mandamiento amo que ama con Jehova y ama con el diaton projimo. (Mat. 22:37-39) Ta ama kita con Jehova poreso quierre kita que igual con ele, puede tambien kanaton confia el otro. Cay ta ama kita con el diaton maga hermano y hermana, no quierre kita habla con otro acerca con el diila maga privado informacion. No quierre gayot kita revela maskin cosa que puede causa kanila peligro, huya o dolor.​—Juan 15:12.

13. Na cosa manera puede kanaton confia el otro si humilde kita?

¹³ Hay ayuda tambien kanaton el humildad para puede kanaton confia el otro. El un Cristiano que humilde no quierre que ele el primer persona quien revela acerca na un cosa para alaba con ele el otro. (Fil. 2:3) No quierre le manda pensa con otro que tiene le cosa sabe importante informacion que gendeh le puede habla con otro. Si humilde kita, gendeh tambien kita hace calayat maga especulacion acerca na maga cosas que nuay discuti na Biblia o na diaton maga publicacion.

14. Na cosa manera confia kanaton el otro si tiene kita entendimiento?

¹⁴ El entendimiento puede ayuda con el un Cristiano para determina si cuando el “tiempo para man silencio y tiempo para converza.” (Ecl. 3:7) Na cuanto maga cultura, comon el expresion, “Si plata el converzada, oro el pagka-silencio.” Quierre decir, tiene maga tiempo que mas bueno que esta silencio contra man cuento. Poreso, el Proverbio 11:12 ta habla: “El gente quien tiene deverasan entendimiento ta esta silencio.” Considera un ejemplo. Pirmi ta pidi con el un experienciao anciano que ayuda solva con el problema del otro maga congregacion. Acerca con este, el de suyu uban anciano ya habla, “Pirmi le con cuidao que gendeh habla kanamon maga confidencial informacion acerca na otro maga congregacion.” Por causa na ese calidad del anciano, ta respeta con ele el otro maga anciano na diila congregacion. Asigurao sila que gendeh le revela maga confidencial cosas con otro.

15. Dale un ejemplo que ta dale mira que confia contigo el otro si honesto tu.

¹⁵ Necesita tambien kita cultiva con el pagka-honesto si quierre kita que confia kanaton el otro. Ta confia kita con el un honesto persona cay sabe kita que pirmi le habla si cosa el deverasan. (Ef. 4:25; Heb. 13:18) Por ejemplo, pone kita que quierre tu mejora el de tuyu abilidad de enseñada. Poreso, ya pidi tu con el un persona que oi con el de tuyu parte para na miting y dale contigo sugestion si paquemodo tu puede mejora con ese. Con quien tu puede confia que ayuda contigo? Aquel ba  persona quien ta habla contigo el cosa tu quierre oi o el persona quien ta habla el deverasan? Claro si con quien tu iscuji. El Biblia ta habla: “Mas bueno pa el directa coreccion contra na amor que escondido. El maga irida que ya causa el un amigo amo un señal de lealtad.” (Prov. 27:5, 6) Maskin pa na primero dol dificil acepta con el cosa ya habla el un amigo, hay beneficia kita con ese na uliji.

16. Paquemodo el Proverbio 10:19 ta dale mira que necesita kita tene control na cuerpo?

¹⁶ Bien importante tambien el control na cuerpo. Este calidad ayuda kanaton para esta silencio si dol quierre kita revela un confidencial informacion. (Le con el Proverbio 10:19.) Posible, dificil tene control na cuerpo si ta usa kita social media. Si gendeh kita con cuidao, puede kita revela maga confidencial informacion na manada gente. Y si ya puede ya se man calayat, gendeh mas kita puede controla si paquemodo con ese usa el otro o si paquemodo de manada problema ese causa. Si tiene kita control na cuerpo, puede tambien este ayuda para esta kita silencio si tiene quien pricura engaña kanaton para habla maga cosas que puede pone na peligro con el diaton maga hermano y hermana. Posible este sucede si cuestiona kanaton el maga polis na lugar donde ta prohibi o tiene restriccion el diaton trabajo. Na este maga situacion y na otro pa, puede kita aplica con el principio que “pone . . . buzal con el [diaton] boca.” (Sal. 39:1) Importante que puede kanaton confia el todo maga gente​—diaton familia man, maga amigo y amiga, maga hermano y hermana, o el otro. Y para confia kanaton, debe kita tene control na cuerpo.

17. Cosa kita puede hace para tene confianza adentro del congregacion?

¹⁷ Ta rindi gayot kita gracias cay por medio con Jehova, ya puede kita conoce con el maga hermano y hermana quien maga amable y con quien puede confia! Todo kita tiene el responsibilidad que hace esfuerzo para dale mira que conviene kanaton confia el diaton maga hermano y hermana. Si el cada uno ta dale mira amor, humildad, entendimiento, pagka-honesto y control na cuerpo, ta ayuda kita para tene confianza adentro na congregacion. Necesita se kita continua hace. Ojala hay imita kita con el diaton Dios, si Jehova, y dale mira que puede kanaton confia.