1. Cosa maga suceso el experiencia kita durante el Un Mil Año Rulanza?

 BIEN maka-alegre gayot si principia ya el resureccion aqui na tierra durante el Un Mil Año Rulanza del Cristo! El todo quierre gayot mira otravez con el diila maga familia y amigo quien ya muri. Ese tambien el cosa ta sinti si Jehova. (Job 14:15) Imagina si paquemodo de alegre el todo aqui na tierra si puede ya sila man junto otravez con aquellos con quien hay resucita. Como cosa kita ya aprende del ya pasa articulo, “el maga recto” que el nombre talli na libro del vida hay tene “resureccion de vida.” (Act. 24:15, NWT; Juan 5:29, NWT) Posible que el manada del diaton maga familia y amigo hay resucita corto tiempo despues del Armagedon. * Mas pa, “el maga gendeh recto,” igual con aquellos nuay tene bastante oportunidad para conoce con Jehova o fiel sirvi con ele antes sila muri, hay tene “resureccion de juzgamiento.”

2-3. (a) Como cosa ya indica na Isaias 11:9, 10, cosa el de con todo grande programa de enseñada que hay sucede na tierra? (b) Cosa kita considera na este articulo?

² Necesita enseña con todo quien hay resucita. (Isa. 26:9;  61:11) Poreso, necesita hace con el de con todo grande programa de enseñada aqui na tierra. (Le con el Isaias 11:9, 10.) Porque? El un razon amo cay el maga gendeh recto quien hay resucita necesita aprende acerca con Jesucristo, con el Reino, el rescate y el issue acerca na nombre y soberania de Jehova. Maskin el maga recto necesita siempre aprende si cosa si Jehova ya revela acerca na de suyu proposito para na tierra. El cuanto kanila ya muri antes pa completa el Biblia. Claro gayot que manada pa cosa necesita aprende el maga gendeh recto y el maga recto.

³ Na este articulo, hay considera kita con el siguiente pregunta: Paquemodo hace con este programa de enseñada aqui na tierra? Na cosa manera el reaccion del maga gente na cosa sila ta aprende hay determina si queda ba permanente el diila nombre na libro del vida o gendeh? Importante para kanaton ahora el contestacion na ese maga pregunta. Como cosa kita hay discuti, el cuanto maga bonito profecia na Daniel y Revelacion hay puede ayuda kanaton para mas entende si cosa sucede si hay resucita ya con el maga muerto. Una, considera kita con el maga suceso que ya menciona na profecia na Daniel 12:1, 2.

4-5. Cosa ya revela el Daniel 12:1 acerca na tiempo del fin?

⁴ Le con el Daniel 12:1. El libro de Daniel ya revela si cosa el maga suceso que sucede durante el tiempo del fin. Por ejemplo, el Daniel 12:1 ya menciona que si Miguel, que amo si Jesucristo, “ta actua para na bien” del maga siervo del Dios. Ya principia se cumpli del 1914 cuando si Jesus ya queda el Rey del Reino del Dios na cielo.

⁵ Pero, ya habla tambien si Daniel que si Jesus “hay para” durante el “un tiempo de dificultad que nuay pa gayot sucede desde ya tiene nacion hasta na ese tiempo.” Este “tiempo de dificultad” amo el “grande calamidad” o tribulacion que ya menciona na Mateo 24:21. Si Jesus hay para o hay actua para defende con el maga siervo del Dios na fin de este tiempo de dificultad que amo el Armagedon. El libro de Revelacion ya refiri kanila como el grande grupo “quien ya sale victorioso na grande persecucion” o tribulacion.​—Rev. 7:9, 14.

6. Cosa hay sucede despues sobrevivi el grande grupo na grande tribulacion? Explica. (Mira tambien na este issue con el “Pregunta del Maga Quien Ta Le” acerca na resureccion na tierra.)

⁶ Le con el Daniel 12:2. Cosa hay sucede despues sobrevivi el grande grupo na este tiempo de dificultad? Este profecia gendeh ta refiri na un simbolico o espiritual resureccion del maga siervo del Dios durante el ultimo maga dia, como cosa kita ta creé de antes. * Sino, este maga palabra ta refiri con el resureccion del maga muerto que hay sucede na nuevo mundo. Porque se kita puede habla? El palabra “polvos” ya usa tambien na Job 17:16 y ta refiri este na “Sepultura.” Entonces, el Daniel 12:2 ta refiri na un literal resureccion que hay sucede despues del ultimo maga dia y del guerra de Armagedon.

7. (a) Cosa quierre decir que el cuanto hay resucita para na “vida eterna”? (b) Na cosa manera “mas buen resureccion” este?

⁷ Pero, cosa quierre decir del Daniel 12:2  cuando ya habla este que el cuanto hay resucita para na “vida eterna”? Quierre decir de este que aquellos quien hay resucita y hay conoce, o continua conoce, y obedece con Jehova y con Jesus durante el 1,000 año hay ricibi vida eterna na uliji. (Juan 17:3) “Mas buen resureccion” este contra na resureccion que ya experiencia el cuanto maga gente de antes. (Heb. 11:35, NWT) Porque? Cay aquellos maga imperfecto gente ya muri lang otravez.

8. Cosa quierre decir que el otro hay resucita “para na verguenza y rabia eterna”?

⁸ Pero, gendeh todo aquellos quien hay resucita hay acepta con el cosa hay enseña kanila. El profecia de Daniel ya habla que el cuanto hay resucita “para na verguenza y rabia eterna.” Cay queda sila rebelloso, gendeh queda incluido el diila nombre na libro del vida y gendeh sila ricibi vida eterna. Sino, hay ricibi sila “rabia eterna” o destrozo. Entonces, el Daniel 12:2 ta discuti acerca na cosa sucede na uliji con el maga quien hay resucita base na cosa sila hace despues del diila resureccion. * (Rev. 20:12) El cuanto hay obtene vida eterna; el otro gendeh.

9-10. Cosa pa hay sucede despues del grande tribulacion y quien “hay brilla igual como el cielo”?

⁹ Le con el Daniel 12:3. Cosa pa hay sucede despues del “tiempo de dificultad”? Puera na Daniel 12:2, el versiculo 3 ya menciona tambien un cosa que hay sucede despues del grande tribulacion.

¹⁰ Quien “hay brilla igual como el cielo”? Puede kita saca idea na cosa ya habla si Jesus na Mateo 13:43: “El maga gente bueno [o recto] ay brilla igual como el sol na Reino del diila Tata.” Na contexto de este, tan cuento si Jesus acerca con “el maga anak del Reino”​—el de suyu maga iscujido hermano quien hay sirvi junto con ele na Reino na cielo. (Mat. 13:38) Entonces, el Daniel 12:3 ta refiri con el maga iscujido y con el trabajo que hay hace sila durante el Un Mil Año Rulanza.

11-12. Cosa trabajo hay hace el 144,000 durante el 1,000 año?

¹¹ Paquemodo el maga iscujido hay “guia con el manada para na pagka-recto”? El maga iscujido hay trabaja junto con Jesucristo para guia con el programa de enseñada que hay hace aqui na tierra durante el 1,000 año. El 144,000 gendeh lang rula como maga rey sino hay sirvi tambien como maga sacerdote. (Rev. 1:6; 5:10; 20:6) Poreso, hay ayuda sila para “cura” con el maga gente​—ayuda kanila para hinay-hinay queda perfecto otravez. (Rev. 22:1, 2; Eze. 47:12) Asigurao que hay queda gayot alegre el maga iscujido na ese trabajo!

¹² Quien el incluido na “manada” con quien hay guia para na pagka-recto? El todo quien hay resucita, aquellos quien hay sobrevivi na Armagedon y el diila maga anak quien posible nace na nuevo mundo. Na fin del 1,000 año, hay queda ya perfecto el todo maga gente aqui na tierra. Entonces, cuando hay queda permanente escribido el diila maga nombre na libro del vida?

13-14. Cosa necesita hace el todo maga perfecto gente na tierra para obtene sila vida eterna?

¹³ Debe kita acorda que si perfecto el un gente gendeh se quierre decir que tene ya le dayun vida hasta para cuando. Considera con Adan y Eva. Perfecto sila pero necesita sila demonstra con el diila obediencia con Dios Jehova para obtene sila vida eterna. Pero maka-triste cay nuay sila obedece con ele.​—Roma 5:12.

¹⁴ Cosa ya el situacion aqui na tierra na fin del 1,000 año? Perfecto ya el todo. El todo maga perfecto gente ba hay suporta con el rulanza de Jehova hasta para cuando? O el cuanto kanila hay queda igual con Adan y Eva quien nuay esta fiel maskin pa perfecto sila? Necesita contesta con este maga pregunta.

15-16. (a) Cuando hay tene oportunidad el todo maga gente para dale mira el diila lealtad con Jehova? (b) Cosa el resulta del ultimo probanza?

¹⁵ Hay hace preso con Satanas por 1,000 año. Durante ese tiempo, gendeh le puede engaña maskin con quien. Pero, hay larga con ele na fin del 1,000 año. Na ese tiempo, hay pricura le engaña con el maga perfecto gente. Durante ese probanza, el todo maga perfecto gente na tierra hay tene el oportunidad que dale mira si ta respeta ba  sila con el nombre del Dios y ta suporta con el de suyu soberania. (Rev. 20:7-10) El cosa sila hace na ese tiempo hay determina si hay queda ba permanente escribido el diila nombre na libro del vida o gendeh.

¹⁶ El cuanto gendeh esta fiel igual con Adan y Eva, y gendeh suporta con el rulanza de Jehova. Cosa hay sucede kanila? El Revelacion 20:15 ta habla kanaton: “Adentro na tanque de fuego ya buta tamen con todo aquellos quien noay el nombre escribido na Libro del Vida.” Hay destroza gayot completamente con este maga rebelloso gente. Pero, el mayoria del maga perfecto gente hay esta fiel. Poreso, hay queda permanente escribido el diila nombre na libro del vida.

17. Cosa ya habla con Daniel que hay sucede na diaton tiempo? (Daniel 12:4, 8-10)

¹⁷ Maka-alegre gayot pensa acerca con este maga suceso na futuro! Pero, ya ricibi tambien si Daniel cuanto importante informacion estaba na un angel acerca na diaton tiempo​—el “tiempo del fin.” (Le con el Daniel 12:4, 8-10; 2 Tim. 3:1-5) El angel ya habla con Daniel: “El verdadero sabeduria hay queda abundancia.” Hay mas entende  gayot el maga siervo del Dios con el maga profecia na este libro. Ya habla tambien el angel que durante este tiempo “el maga malo hay hace malo, y nuay ni uno kanila el quien entende.”

18. Cosa el cerca ya sucede con el maga malo?

¹⁸ Ahora, ta puede lang hace el maga malo con el maskin cosa y dol nuay este mal consequencia kanila. (Mal. 3:14, 15) Pero, cerca ya si Jesus juzga con el maga cabrito y hace separta kanila na maga carnero. (Mat. 25:31-33) Este maga malo gendeh hay sobrevivi na grande tribulacion y gendeh tambien kanila resucita para vivi na nuevo mundo. Gendeh queda incluido el diila maga nombre na “libro de recuerdo” que ya menciona na Malaquias 3:16.

19. Cosa kita debe hace ahora y porque? (Malaquias 3:16-18)

¹⁹ Ahora ya el tiempo para dale mira que gendeh kita incluido na maga malo. (Le con el Malaquias 3:16-18.) Ta ajunta si Jehova con aquellos quien precioso con ele que ta considera le como “un especial propiedad.” Asigurao, quierre kita que queda uno kanila.

20. Cosa el ultimo promesa de Jehova con Daniel y porque tu ta espera que cumpli ese promesa?

²⁰ Bien maka-interes gayot el tiempo que ta vivi kita ahora. Pero, tiene pa maga mas maka-interes cosas que hay sucede. Gendeh mas dura, hay mira kita que hay destroza con el todo maga malo. Despues, hay puede kita mira cumpli este promesa de Jehova con Daniel: “Na fin del maga dia, hay para tu para acepta con el de tuyu parte.” (Dan. 12:13) Ta espera ba tu con el tiempo cuando hay “para” otravez si Daniel y el de tuyu maga familia y amigo? Si ansina, hace el todo para esta fiel y puede tu asigura que hay esta escribido el de tuyu nombre na libro del vida.