1. Asegun na Malaquias 3:16, cosa libro el ta escribi si Jehova y cosa este ta contene?

 POR miles de año ya, si Jehova ta escribi un especial libro. Este libro ta contene un lista de maga nombre y el primero alli amo el nombre del primer fiel testigo, si Abel. * (Luc. 11:50, 51) Desde aquel, ta omenta pa si Jehova maga nombre na aquel libro y ahora millones ya el maga nombre alli. Na Biblia, ta llama con ese libro como “un libro de recuerdo” y “Libro del Vida.” Na este articulo, hay refiri kita con este como el “Libro del Vida.”​—Le con el Malaquias 3:16; Rev. 3:5; 17:8.

2. De quien nombre el escribido na libro del vida y cosa kita debe hace para inclui con el diaton nombre na ese libro?

² Escribido na este especial libro el nombre del todo aquellos quien ta adora con Jehova con hondo respeto y ta ama con el de suyu nombre. Tiene sila el oportunidad para vivi hasta para cuando. Ahora puede escribi con el diaton nombre na ese libro si tiene kita cerca personal relacion con Jehova base na rescate del de suyu Anak, si Jesucristo. (Juan 3:16, 36) Todo kita quierre que incluido el diaton nombre na ese libro​—na cielo man el diaton esperanza o na tierra.

3-4. (a) Asigurao ba que hay vivi kita hasta para cuando si escribido ahora el diaton nombre na libro del vida? Explica. (b) Cosa hay discuti na este articulo y na sunod?

³ Quierre decir ba de este que todo quien talli na ese libro asigurao hay tene vida hasta para cuando? Puede kita mira  el contestacion de ese na maga palabra de Jehova con Moises que escribido na Exodo 32:33. Si Jehova ya habla: “El maskin quien ya culpa contra conmigo hay borra yo na de mio libro.” Entonces, posible borra con el maga nombre que talli ya na ese libro. Quierre decir, dol de lapiz si Jehova ya escribi con el maga nombre. (Rev. 3:5) Debe kita asigura que el diaton nombre hay esta na ese libro hasta queda este permanente escribido alli.

⁴ Posible, tiene kita cuanto pregunta acerca con ese. Por ejemplo, cosa ta habla el Biblia acerca con aquellos de quien nombre escribido alli na libro de vida y aquellos nuay alli? Cuando hay ricibi vida eterna aquellos quien talli na ese libro? Quetal aquellos quien ya muri pero nuay tene el oportunidad para conoce con Jehova? Posible ba que escribi con el diila maga nombre na ese libro? Hay contesta con este maga pregunta na este articulo y na sunod.

DE QUIEN NOMBRE EL INCLUIDO NA LIBRO?

5-6. (a) Asegun na Filipo 4:3, de quien nombre el incluido na libro del vida? (b) Cuando hay queda permanente escribido el diila nombre na ese libro?

⁵ De quien nombre el talli na ese figurativo libro? Para contesta con ese pregunta, hay considera kita cinco grupo de maga gente. El cuanto talli na libro del vida y el otro nuay.

⁶ El primer grupo amo aquellos con quien ya iscuji para rula junto con Jesus na cielo. Escribido ba ahora el diila nombre na libro del vida? Si. Asegun na cosa ya habla si apostol Pablo con aquellos quien “ya trabaja junto” con ele na Filipo, escribido na libro del vida el nombre del maga iscujido con quien ya invita para rula junto  con Jesus. (Le con el Filipo 4:3.) Pero para esta el diila nombre na ese libro, debe sila esta fiel. Despues del diila ultimo sellada, antes man sila muri o antes principia el grande tribulacion, el diila maga nombre hay queda permanente escribido na ese libro.​—Rev. 7:3.

7. Base na Revelacion 7:16, 17, cuando permanente hay queda escribido na libro del vida el nombre de aquellos parte del grande grupo de otro maga carnero?

⁷ El segundo grupo amo el grande grupo de otro maga carnero. Escribido ba ahora el diila nombre na libro del vida? Si. Escribido ba siempre el diila nombre na ese libro despues sila sobrevivi na Armagedon? Si. (Rev. 7:14) Si Jesus ya habla que sila hay ricibi “Vida Eterno.” (Mat. 25:46) Pero, aquellos quien hay sobrevivi na Armagedon gendeh dayun ricibi vida eterna. Dol de lapiz siempre el diila nombre na ese libro. Durante el Un Mil Año Rulanza, si Jesus “ay guia canila para na maga tuburan de agua vivo.” El nombre de aquellos quien hay obedece con el guia del Cristo y esta fiel con Jehova hay queda permanente escribido na libro del vida.​—Le con el Revelacion 7:16, 17.

8. De quien nombre el gendeh incluido na libro del vida y cosa hay sucede kanila?

⁸ El ika-tres grupo amo el maga cabrito con quien hay destroza na Armagedon. Nuay el diila maga nombre na libro del vida. Si Jesus ya habla que sila “ay guinda na castigo eterno.” (Mat. 25:46) Bajo na guia del Dios, si Pablo ya habla, “el diila castigo amo el condenacion hasta para cuando.” (2 Tes. 1:9; 2 Ped. 2:9) Ansina tambien el sucede con aquellos quien intencional ta culpa contra na sagrao espiritu. Hay destroza tambien kanila y gendeh sila tene vida eterna. Claro que gendeh kanila resucita. (Mat. 12:32; Mar. 3:28, 29; Heb. 6:4-6) Ahora, hay considera kita con el dos grupo quien hay resucita na tierra.

AQUELLOS QUIEN HAY RESUCITA

9. Asegun na Maga Actividad 24:15, quien el dos grupo que hay resucita na tierra y cosa el diferencia na este dos grupo?

⁹ El Biblia ta habla que tiene dos grupo de maga gente quien hay resucita quien puede tene vida hasta para cuando na tierra​—“el maga recto” y “el maga gendeh recto.” (Le con el Maga Actividad 24:15, NWT.) “El maga recto” amo aquellos quien fiel ya sirvi con Jehova cuando vivo sila. Y “el maga gendeh recto” amo aquellos quien nuay puede sirvi con Jehova. Gane, mayoria kanila gendeh gayot bueno el conducta. Ciendo hay resucita con este dos grupo, puede ba kita habla que talli el diila maga nombre na libro del vida? Para contesta con ese, considera kita con el cada grupo.

10. Porque hay resucita con “el maga recto” y cosa privilegio hay tene el cuanto kanila? (Mira tambien na este issue con el “Pregunta del Maga Quien Ta Le” acerca na resureccion na tierra.)

¹⁰ “El maga recto” amo el ika-cuatro grupo. Antes sila muri, escribido ya el diila maga nombre na libro del vida. Ya quita ba con el diila maga nombre na ese libro cuando ya muri sila? Nuay cay “vivo” siempre sila na memoria de Jehova. “Gendeh Le un Dios del maga muerto, sino del maga vivo, cay para con Ele todo el maga gente vivo.” (Luc. 20:38) Este quierre decir que si resucita ya con el maga recto na tierra, escribido siempre el diila maga nombre na libro del vida pero gendeh pa se permanente. (Luc. 14:14) El cuanto kanila hay tene el privilegio que sirvi como “maga principe na entero tierra.”​—Sal. 45:16.

11. Cosa necesita aprende “el maga gendeh recto” para queda incluido el diila maga nombre na libro del vida?

 ¹¹ Y el ultimo, considera kita con el ika-cinco grupo, “el maga gendeh recto.” Ciendo posible que no sabe sila el maga ley de Jehova, gendeh recto el diila conducta antes sila muri. Poreso, nuay el diila nombre na libro del vida. Pero cay resucita kanila, ta dale kanila el Dios un oportunidad para queda incluido el diila maga nombre na ese libro. Na ese tiempo, hay necesita gayot sila ayuda. De antes, el cuanto kanila ta hace maga bien mal cosas. Poreso, necesita kanila enseña si paquemodo vivi asegun na maga principio de Jehova. Para hace con ese, el Reino del Dios hay conduci con el de con todo grande programa de enseñada na tierra.

12. (a) Quien hay enseña con el maga gendeh recto? (b) Cosa hay sucede con aquellos quien no quierre aplica con el cosa sila ta aprende?

¹² Quien hay enseña con el maga gendeh recto? El grande grupo y el maga recto con quien hay resucita. Para queda incluido na libro del vida el nombre de aquellos gendeh recto, necesita sila tene personal relacion con Jehova y dedica diila vida con ele. Hay mira enbuenamente si Jesucristo y el maga iscujido si cosa el reaccion del maga gendeh recto na cosa sila ta aprende. (Rev. 20:4) Gendeh gayot permiti que esta na tierra con aquellos quien gendeh ta obedece, maskin pa posible 100 año ya sila. (Isa. 65:20) Si Jehova y Jesus ta puede le corazon y gendeh gayot sila hay permiti con maskin quien que causa destrozo na nuevo mundo.​—Isa. 11:9; 60:18; 65:25; Juan 2:25.

RESURECCION PARA NA VIDA Y PARA NA JUZGAMIENTO

13-14. (a) De antes, cosa el diaton entendimiento na maga palabra de Jesus na Juan 5:29? (b) Cosa kita debe nota na aquel maga palabra?

¹³ Tiene tambien cosa ya habla si Jesus acerca con aquellos quien hay resucita aqui na tierra. Ya habla le: “Hay llega el tiempo  cuando el todo aquellos na sepultura hay oi con el de suyu voz y hay sale. Aquellos quien ya hace maga buen cosas hay tene resureccion de vida y aquellos quien ya hace maga mal cosas hay tene resureccion de juzgamiento.” (Juan 5:28, 29, NWT) Cosa quierre decir de este?

¹⁴ De antes, ta creé kita que el maga palabra de Jesus ta refiri con el maga cosas que hay hace aquellos quien resucita despues del diila resureccion; quierre decir, el cuanto hay vivi y hace maga buen cosas mientras el otro hay vivi y hace mal cosas. Pero, nota que nuay habla si Jesus que aquellos quien hay sale na diila maga sepultura hay hace maga buen cosas o hay hace maga mal cosas. Sino, ya habla le que el cuanto “ya hace maga buen cosas” y el otro “ya hace maga mal cosas.” Este ta dale mira que ya hace sila con ese maga cosas antes el diila muerte. Razonable conclusion se cay gendeh mas permiti maskin con quien que hace mal cosas na nuevo mundo. Entonces, cosa debe el diaton entendimiento acerca na “resureccion de vida” y “resureccion de juzgamiento”?

15. Quien hay tene “resureccion de vida” y porque?

¹⁵ El maga recto, quien ya hace buen cosas antes sila muri, hay tene “resureccion de vida” cay escribido ya el diila maga nombre na libro del vida. Este quierre decir que el resureccion de “aquellos quien ya hace maga buen cosas” que ya menciona na Juan 5:29 amo tambien el resureccion de “maga recto” que ya menciona na Maga Actividad 24:15. Este explanacion amo uyun na cosa ya menciona na Roma 6:7 donde ta habla: “Si el gente muerto ya, libre ya le del pecado.” Ya cancela ya con el maga culpa del maga recto persona cuando ya muri sila. Mas pa, ta acorda si Jehova con el diila pagka-fiel. (Heb. 6:10) Maskin pa ansina, este maga recto con quien ya resucita necesita siempre esta fiel para esta el diila maga nombre na libro del vida.

16. Na cosa ta refiri el “resureccion de juzgamiento”?

¹⁶ Quetal aquellos quien ya hace maga mal cosas antes sila muri? Maskin pa ya cancela ya con el diila maga culpa cuando ya muri sila, nuay pa sila demonstra pagka-fiel con Jehova. Nuay el diila maga nombre na libro del vida. Entonces, el resureccion de “aquellos ya hace maga mal cosas” amo tambien el resureccion del “maga gendeh recto” que ya menciona na Maga Actividad 24:15. Sila hay tene el “resureccion de juzgamiento.” * Este quierre decir que hay examina con el maga gendeh recto. (Luc. 22:30) Despues del cuanto tiempo, hay sabe si Jesus si conviene ba pone con el diila maga nombre na libro del vida. Hay escribi lang con el maga nombre de este maga gendeh recto si deja sila con el diila manera de vida de antes y dedica el diila vida con Jehova.

17-18. Cosa necesita hace el todo quien resucita na tierra y na cosa ta refiri el “maga trabajo” que ya menciona na Revelacion 20:12, 13?

¹⁷ Maga recto man sila o gendeh recto de antes, aquellos quien hay resucita necesita obedece con el maga ley na nuevo maga rollo o libro que hay abri durante el 1,000 año. Si apostol Juan ya explica si cosa le ya mira na vision: “Ya puede yo mira con el maga  muerto, el maga rico y el maga pobre, parao adelante del trono. . . . Tiene cuanto maga libro ya abri y, despues, ya abri pa otro libro que amo el Libro del Vida, y ya juzga con el maga muerto asegun con el cosa-cosa escribido na ese maga libro: cada y cual asegun con el disuyo maga trabajo.”​—Rev. 20:12, 13.

¹⁸ Base na cosa “maga trabajo” hay juzga con aquellos quien hay resucita? Base ba na cosa sila ya hace antes sila ya muri? Gendeh! Acorda que ya cancela ya con el diila maga culpa cuando ya muri sila. Entonces, el “maga trabajo” gendeh ta refiri con el maga cosas que ya hace sila de antes. Sino, ta refiri este na cosa sila hay hace na cosa sila hay aprende na nuevo mundo. Maskin el maga fiel hombre que si Noe, Samuel, David y Daniel necesita aprende acerca con Jesucristo y demonstra fe na de suyu sacrificio. Cosa pa gaha el maga gendeh recto!

19. Cosa hay sucede con aquellos quien gendeh obediente na nuevo mundo?

¹⁹ Cosa hay sucede con aquellos quien gendeh obediente na nuevo mundo? El Revelacion 20:15 ta habla: “Adentro na tanque de fuego ya buta tamen con todo aquellos quien noay el nombre escribido na Libro del Vida.” Este quierre decir que completamente hay destroza kanila. Entonces, bien importante que asigura kita que escribido el diaton nombre na libro del vida y esta ese alli!

20. Cosa trabajo kita hay hace durante el Un Mil Año Rulanza? (Mira con el letrato na cover.)

²⁰ Asigurao que maka-alegre gayot el Un Mil Año Rulanza! Hay sucede el de con todo grande programa de enseñada na entero tierra. Pero, amo tambien se el tiempo que hay examina con el conducta del maga recto y gendeh recto. (Isa. 26:9; Act. 17:31) Paquemodo hay hace con el enseñada? El sunod articulo hay ayuda kanaton para entende y aprecia con este bien bonito provision.