Considera si cosa el contestacion del Biblia na este maga pregunta.

El Maga Actividad 24:15 ta habla que “hay resucita con el maga recto y con el maga gendeh recto.” (NWT) El maga recto amo aquellos quien ya obedece con Dios antes sila muri poreso escribido el diila maga nombre na libro del vida. (Mal. 3:16) Incluido na maga gendeh recto aquellos quien ya muri que nuay tene el oportunidad para aprende acerca con Jehova poreso nuay el diila nombre na libro del vida.

El Juan 5:28, 29 ta refiri con el igual maga grupo que ya menciona na Maga Actividad 24:15. Ya habla si Jesus que “aquellos quien ya hace maga buen cosas hay tene resureccion de vida y aquellos quien ya hace maga mal cosas hay tene resureccion de juzgamiento.” (NWT) El maga recto ya hace maga buen cosas antes sila muri. Hay tene sila resureccion de vida cay escribido el diila maga nombre na libro del vida. Pero, el maga gendeh recto ya hace maga mal cosas antes sila muri. Poreso, hay tene sila el resureccion de juzgamiento. Nuay pa el diila nombre na libro del vida y hay juzga o examina pa kanila. Na ese tiempo, hay tene sila el oportunidad para aprende acerca con Jehova y para queda incluido el diila nombre na libro del vida.

El Revelacion 20:12, 13 ta explica que el todo con quien hay resucita necesita obedece con el maga “cosa-cosa escribido na . . . maga libro” que ta refiri na maga nuevo ley que hay dale el Dios na nuevo mundo. Si Jehova hay destroza con aquellos quien gendeh obedece.​—Isa. 65:20.

El Daniel 12:2 ya habla que el cuanto maga muerto hay resucita “para na vida eterna y el otro para na verguenza y rabia eterna.” Este ta refiri na cosa hay sucede na uliji con aquellos con quien resucita​—hay obtene sila “vida eterna” o “rabia eterna.” Entonces, na fin del 1,000 año, hay ricibi vida hasta para cuando el cuanto y hay destroza el Dios con el otro.​—Rev. 20:15; 21:3, 4.

Considera un ilustracion. El situacion de este dos grupo puede compara na maga persona quien quierre queda na otro nacion. El maga recto amo igual con aquellos quien tiene work visa o resident visa que puede esta na aquel nacion por largo tiempo, y tiene maga derecho y beneficio alla. Y el maga gendeh recto amo igual con aquellos quien tiene temporary visa o visitor’s visa. Antes kanila permiti que continua esta na nacion, necesita sila dale mira buen conducta. Na igual manera, el maga gendeh recto necesita obedece con el maga ley de Jehova y dale mira que recto sila para puede sila continua esta na Paraiso. Y maskin cosa man el visa del maga persona cuando ya entra sila na nacion, el cuanto posible queda citizen de ese nacion. Y con el otro, posible man deport. Hay man base con el decision na diila conducta na ese nacion. Na igual manera, el ultimo decision para con aquellos quien resucita hay depende na diila pagka-fiel y conducta na nuevo mundo.

Si Jehova gendeh lang basta Dios de compasion sino Dios tambien le de justicia. (Deut. 32:4; Sal. 33:5) Hay dale le mira el de suyu amor cay resucita le con el maga recto y maga gendeh recto. Pero, hay expecta tambien le kanila que sigui na de suyu maga alto principio na moral. Aquellos lang quien ta ama con ele y ta sigui con el de suyu maga principio el puede continua vivi na nuevo mundo.