Asegun na 1 Corinto 15:8, si Pablo ya habla: “Na ultimo gayot, ya aparece tamen Le conmigo, como dol ya nace yo noay na tiempo.” Del antes, ya explica kita que ta refiri aqui si Pablo con el de suyu mismo experiencia cuando ya tiene le un vision acerca con Jesus. Ya entende kita que ya tiene le el privilegio que nace o resucita como un espiritu persona manada siglo antes sucede ese clase de resureccion. Pero despues estudia pa mas acerca con este versiculo, ta sale que necesita hace cambio na diaton entendimiento.

Deverasan que ta refiri si Pablo aqui na cosa ya sucede cuando yan convert le o ya queda un Cristiano. Pero, cosa le quierre decir cuando ya habla le que “ya nace [le] noay na tiempo”? Este el cuanto posibilidad.

Cuando yan convert le, derepente quel y maka-espanta. Mas mucho, maka-espanta gayot si ya nace el un bata nuay na hora. Cuando ya viaja si Saul (quien ya queda conocido na uliji como Pablo) para na Damasco para persigui con el maga Cristiano alla, nuay le expecta que puede le mira un vision acerca con Jesus. Cuando yan convert le, gendeh lang ele el ya espanta sino el maga Cristiano tambien con quien le ta plaña persigui na aquel ciudad. Mas pa, cay espantao gayot le, temporario ya perde el de suyu vista.​—Act. 9:1-9, 17-19.

Yan convert le “noay na tiempo.” Este el cosa ya menciona el Jerusalem Bible: “Dol aquel ya nace yo na tiempo que nuay quien ta expecta.” Cuando yan convert si Pablo, ya bira ya na cielo si Jesus. Gendeh igual con aquellos con quien ya menciona si Pablo na otro maga versiculo, nuay le puede mira con Jesus antes este subi na cielo. (1 Cor. 15:4-8) Pero, ya tiene siempre si Pablo este oportunidad cuando ya aparece con ele si Jesus maskin pa dol ya sucede este “noay na tiempo.”

Ta refiri le con el de suyu mismo cuerpo na humilde manera. Asegun na cuanto maga scholar, el expresion que ya usa si Pablo aqui ta dale impresion que dol ta hace le de menos con el de suyu mismo cuerpo. Si ese el cosa quierre decir de Pablo, ta admiti le que gendeh le conviene queda un apostol. Gane, ya habla pa le: “Yo amo el menos con todo del maga Apostol y gendeh conviene llama conmigo Apostol, cay yo ya persigui con el Iglesia [“congregacion,” NWT] del Dios. Pero, por causa del gracia del Dios, ansina yo.”​—1 Cor. 15:9, 10.

Poreso, ta sale que el cosa quierre decir de Pablo amo que (1) derepente y maka-espanta el manera que ya aparece con ele si Jesus, (2) yan convert le nuay na tiempo o (3) gendeh le conviene ricibi con aquel bonito vision. Maskin cosa man el quierre decir de Pablo, claro que bien precioso con ele aquel experiencia. Ya dale quel con ele asiguranza que ya resucita con Jesus. Poreso, gendeh mas maka-estraña que ta menciona le con ese experiencia si ta predica le con otro acerca na resureccion de Jesus.​—Act. 22:6-11; 26:13-18.