1-2. Porque bueno para kanaton que estudia con el istoria de Samson?

 COSA tu ta puede pensa si ta oi tu con el nombre Samson? Siguro ta puede tu pensa con el un persona que bien mafuerza. Justo se. Pero, ya puede hace gendeh justo decision si Samson que ya causa con ele grabe sufrimiento. Maskin pa ansina, yan focus si Jehova na todo cosa ya hace si Samson para fiel sirvi con Ele y ya inclui Le con ese na Biblia para puede kita beneficia.

² Ya usa si Jehova con Samson para ayuda con el De Suyu maga siervo—el maga Israelita. Cuanto siglo despues muri si Samson, ya guia si Jehova con apostol Pablo para inclui el nombre de Samson na lista del maga hombre quien tiene fuerte fe. (Heb. 11:32-34) Puede kanaton anima el ejemplo de Samson. Ya confia le con Jehova maskin durante na maga bien dificil situacion. Na este articulo, hay discuti kita si cosa kita puede aprende con Samson y si paquemodo el de suyu ejemplo puede anima kanaton.

3. Cosa assignment ya ricibi si Samson?

³ Cuando ya nace si Samson, el maga Filisteo el ta rula na entero nacion de Israel y ta maltrata con el maga Israelita. (Juez 13:1) Como resulta, grabe ya sufri el maga Israelita. Ya iscuji si Jehova con Samson para “salva . . . con el Israel na mano del maga Filisteo.” (Juez 13:5) Un dificil assignment gayot este! Poreso para puede cumpli con ese, necesita confia si Samson con Jehova.

4. Paquemodo si Jehova ya ayuda con Samson para salva le na mano del maga Filisteo? (Juez 15:14-16)

⁴ Considera un ejemplo si paquemodo si Samson ya confia con Jehova y ya depende na suporta que ya dale el Dios. Na un ocasion, el un grupo de maga Filisteo ya anda para cuji con Samson  na Lehi, posible un lugar na Juda. Ya tiene miedo el maga gente de Juda poreso ya decidi sila que entrega con Samson na mano del maga enemigo. Mismo el maga uban Israelita de Samson el ya amarra con ele usando el dos amarro y ya lleva con ele na maga Filisteo. (Juez 15:9-13) Pero, “ya hace con ele fuerte el espiritu de Jehova” y ya desata el maga amarro. Despues, “ya mira le con el bukuk de sahgang del hombre asno que nuevo lang ya muri,” ya pipina le con este y ya usa con ese para mata con el 1,000 Filisteo hombre!—Le con el Juez 15:14-16. b

5. Paquemodo ya dale mira si Samson que ta confia le con Jehova?

⁵ Porque si Samson ya usa con el bukuk del asno? Gendeh este un armas que comon ta usa el maga gente! Asigurao, sabe si Samson que hay ganá le por causa na ayuda de Jehova y gendeh por causa na armas que ya usa le. Claro que ya usa le si cosa le tiene aquel tiempo para cumpli con el voluntad de Jehova. Cay ya confia le con Jehova, ya ganá gayot si Samson.

6. Cosa el un leccion que puede kita aprende con Samson?

⁶ Hay ayuda tambien kanaton si Jehova para cumpli con el diaton maga assignment, maskin pa dol imposible con ese hace. Puede se hace el Dios na manera que posible man bilib gayot kita. Puede tu asigura que si Jehova, quien ya hace fuerte con Samson, hay ayuda contigo para hace el De Suyu voluntad basta confia tu na De Suyu ayuda.—Prov. 16:3.

7. Cosa ejemplo ta dale mira que importante que pidi el direccion de Jehova?

⁷ Manada maga hermano y hermana quien ya ayuda construi con el diaton maga lugar de adoranza ya dale mira que ta confia sila con Jehova. De antes, el maga hermano el ta diseña y ta construi con el mayoria del maga nuevo Kingdom Hall y otro pa maga facilidad. Pero  despues del cuanto tiempo, necesita hace cambio el organizacion por causa cay mas manada gente ya el ta bautiza. El maga hermano ya pidi el direccion de Jehova y ya pruba otro maga manera, igual como cumpra maga facilidad y man renovate con ese. “Del primero, gendeh facil para con el cuanto que hace con este nuevo manera,” ya habla si Robert, quien ya participa na manada proyecto de construida na entero mundo. Ele ya continua: “Bien diferente ese na cosa kame ya hace de antes. Pero, el maga hermano preparao sigui con este maga cambio y ya puede kame mira que ta bendici si Jehova con este maga nuevo manera.” Un ejemplo lang este si paquemodo si Jehova ta guia con el de suyu maga siervo para cumpli con el de suyu voluntad. Todo kita debe pirmi pregunta con el diaton mismo cuerpo, ‘Ta busca ba yo con el direccion de Jehova y conforme hace maga cambio para puede sirvi con ele?’

8. Na un ocasion cuando bien con sequia si Samson, cosa le ya hace?

⁸ Posible, ya puede tu le acerca na otro maga situacion cuando si Samson ya puede hace maga maka-bilib cosas. Maskin pa solo-solo, ya puede le mata un leon y na uliji ya mata 30 Filisteo na ciudad de Askelon. (Juez 14:5, 6, 19) Sabe si Samson que gendeh le puede hace con ese maga cosas si nuay el ayuda de Jehova. Claro se puede mira na un ocasion cuando ya queda le bien con sequia despues mata con el 1,000 Filisteo. Cosa le ya hace? En vez de depende na de suyu mismo cuerpo y busca agua para toma, ya pidi le el ayuda de Jehova.—Juez 15:18.

9. Cosa ya hace si Jehova cuando ya reza con ele si Samson? (Juez 15:19)

⁹ Ya contesta si Jehova con el rezo de Samson y ya dale con ele agua por medio na un milagro. Cuando ya toma con ese si Samson, “ya bira el de suyu fuerza y gendeh mas le maluya.” (Le con el Juez 15:19. c) Ta sale que este nuevo tuburan de agua ta existi siempre na tiempo cuando ya iscuji con profeta Samuel para escribi con el libro de Juez. El maga Israelita quien ya mira con ese agua posible ya acorda que si confia sila con Jehova, hay ayuda le con el de suyu maga fiel siervo na tiempo que necesita sila.

10. Cosa kita debe hace para ricibi el ayuda de Jehova? (Mira tambien con el letrato.)

¹⁰ Necesita tambien kita pidi el ayuda de Jehova maskin pa cosa talento o abilidad kita tiene o maskin cosa pa que ya puede kita cumpli na diaton servicio con ele. Debe kita queda modesto y acepta que puede lang kita hace el maga cosas que ya pidi kanaton si Jehova si confia kita con ele. Igual si paquemodo ya bira el fuerza de Samson cuando ya toma le con el agua que ya dale si Jehova, hay queda tambien kita fuerte na espiritual si usa kita con el todo provision que ya dale kanaton si Jehova.—Mat. 11:28.

11. Cosa kita hace para puede beneficia na ayuda de Jehova? Ilustra.

¹¹ Considera con el ejemplo de Aleksey, un hermano na Russia quien ta experiencia grabe persecucion. Cosa ya puede ayuda con ele para esta fuerte maskin pa bien dificil el de suyu situacion? Ele y el de suyu mujer tiene un buen espiritual rutina. Ele ya habla: “Ta pricura yo queda regular na de mio espiritual rutina de personal estudiada y lehida del Biblia cada dia. Cada aga, kame del de mio mujer ta discuti junto con el texto del dia y ta reza con Jehova.” Cosa este ta enseña kanaton? En vez de depende na diaton mismo cuerpo, debe kita confia con Jehova. Paquemodo? Si continua kita hace fuerte con el diaton fe por medio del  regular personal estudiada del Biblia y otro pa maga teocratico actividad. Si hace kita se, hay ayuda kanaton si Jehova para puede kita continua sirvi con ele. Ya hace le fuerte con Samson y puede kita asigura que hace tambien le fuerte kanaton.

12. Cosa gendeh justo decision el ya hace si Samson y porque diferente este na cosa le ya experiencia de antes?

¹² Igual kanaton, imperfecto tambien si Samson poreso tiene maga tiempo que ya puede le hace maga gendeh justo decision. Por ejemplo, ya puede le hace un decision que ya tiene maga grabe consequencia. Cuando ta sirvi ya si Samson como un juez por cuanto tiempo, “ya ama le con el un mujer que si Delaila quien ta queda na Valle de Sorek.” (Juez 16:4) Pero antes pa con ese, para casa ya era si Samson con el un Filisteo mujer y “manera este de Jehova cay ta busca Le un oportunidad contra na maga Filisteo.” Despues del cuanto tiempo, ya esta si Samson na casa del un mala mujer na Gaza, un ciudad del maga Filisteo. Durante este ocasion, ya ayuda el Dios con Samson para quita con el maga grande puerta del ciudad. Como resulta, ya queda mahina el defensa de ese ciudad. (Juez 14:1-4; 16:1-3) Pero, otro el situacion de Delaila cay posible un Israelita le. Poreso, el relacion de Samson con ele gendeh un oportunidad para ganá le contra na maga Filisteo.

13. Cosa ya hace si Delaila con Samson?

¹³ Ya acepta si Delaila un grande cantidad de sen estaba na maga Filisteo para traiciona con Samson. Bien grande ba gayot el confianza y amor de Samson para con Delaila poreso nuay le puede mira si cosa el plano de este? Maskin cosa pa man el razon, manada beses yan pressure si Delaila con Samson que habla con ele si porque este bien mafuerza y na uliji,  ya habla con ele si Samson si porque. Maka-triste cay por causa na kamali de Samson, ya perde el de suyu fuerza y temporario ya perde con ele el favor de Jehova.—Juez 16:16-20.

14. Cosa ya sucede con Samson cay ya confia le con Delaila?

¹⁴ Cay ya confia si Samson con Delaila en vez con Jehova, ya experiencia le grabe consequencia. Ya cuji el maga Filisteo con Samson y ya hace con ele bulak. Del primero, ya quita le con el maga puerta del Gaza pero ahora, ya queda le preso na ese ciudad. Mas pa, ya hace tambien con ele un esclavo na molino. Despues, ya lleva el maga Filisteo con Samson na diila celebracion. Ya ofrece sila un grande sacrificio na diila falso dios que si Dagon cay ta creé sila que ya ayuda kanila si Dagon para cuji con Samson. Ya saca sila con Samson na preso y ya lleva con ele na diila celebracion para “tiene quien entretene” kanila.—Juez 16:21-25.

15. Paquemodo ya dale mira si Samson que ya confia le otravez con Jehova? (Juez 16:28-30) (Mira con el letrato na cover.)

¹⁵ Ya puede hace un serioso kamali si Samson pero nuay le descanza sirvi con Jehova. Ya busca le un oportunidad para cumpli con el cosa con ele ya manda si Jehova contra na maga Filisteo. (Le con el Juez 16:28-30. d) Ya reza si Samson con Jehova: “Permiti conmigo que puede yo vengga con el maga Filisteo.” El verdadero Dios ya contesta con el rezo de Samson y ya hace otravez bira el de suyu extraordinario fuerza. Como resulta, mas manada ya puede mata si Samson maga Filisteo na este ocasion contra de antes.

16. Cosa kita puede aprende na kamali de Samson?

¹⁶ Maskin pa ya experiencia si Samson con el maga grabe consequencia del de suyu kamali, nuay le descanza hace el voluntad de Jehova. Maskin pa ya puede kita hace un kamali y ya corecta kanaton o ya perde el diaton privilegio, gendeh kita debe descanza sirvi con Jehova. Acorda que preparao le perdona kanaton. (Sal. 103:8-10) Maskin pa na diaton maga kamali, puede siempre kanaton usa si Jehova igual na cosa ya sucede con Samson.

17-18. Paquemodo ya puede anima contigo el ejemplo de Michael? (Mira tambien con el letrato.)

 ¹⁷ Considera con el ejemplo del un joven hermano que si Michael. Ocupao le na maga teocratico actividad, ta sirvi como un siervo ministerial y un regular pioneer. Pero, maka-triste cay ya puede le hace un kamali. Como resulta, ya perde el de suyu maga privilegio na congregacion. Ele ya habla: “Bien ocupao yo na de mio servicio con Jehova pero bigla lang, ya sinti yo que dol nuay mas yo cosa puede hace para sirvi con ele. Sabe yo que nuay abandona conmigo si Jehova pero ya pensa yo si bira pa ba el de mio relacion con ele o hay tene pa ba yo maga assignment na congregacion igual de antes.”

¹⁸ Pero si Michael nuay descanza sirvi con Jehova. Ele ya omenta: “Ya hace yo grande esfuerzo para compone el de mio relacion con Jehova. Regular yo ya reza con ele, ya estudia y ya medita.” Despues del cuanto tiempo, ya bira el maga privilegio de Michael na congregacion. Ta sirvi ya le ahora como un anciano y un regular pioneer. Ele ya habla: “Por causa na suporta y ayuda que ya ricibi yo, especialmente estaba na maga anciano, ya puede yo realiza que ta ama siempre conmigo si Jehova. Puede yo otravez sirvi con ele na congregacion que tiene limpio conciencia. Este experiencia ya enseña conmigo que hay perdona si Jehova con aquellos quien deverasan ta arripinti.” Puede kita asigura que si Jehova hay usa y bendici tambien kanaton maskin pa ya puede kita hace maga kamali, basta hace kita el todo para corecta con ese y continua confia con ele.—Sal. 86:5; Prov. 28:13.

19. Paquemodo el ejemplo de Samson ya puede hace fuerte contigo?

¹⁹ Na este articulo, ya puede kita man repaso con el cuanto maga suceso na vida de Samson. Gendeh le perfecto; pero ya continua le sirvi con Jehova, maskin pa despues le man kamali por causa con Delaila. Y ya usa con ele otravez si Jehova. Ya considera siempre con ele si Jehova como un hombre quien tiene grande fe y ya inclui con ele na lista del maga fiel persona na Maga Hebreo capitulo 11. Ta puede gayot anima kanaton cay ta sirvi kita con el diaton amable Tata na cielo quien bien quierre hace fuerte kanaton especialmente si maluya kita! Poreso igual con Samson, ojala pidi kita con Jehova: “Pabor, acorda conmigo. . . . Pabor hace fuerte conmigo.”—Juez 16:28.