1. Cosa dificil situacion ya enfrenta kanda Jehoas, Ozias y Josias?

 IMAGINA que queda tu un rey del maga siervo del Dios pero un bata lang tu o teenager! Paquemodo tu usa con el de tuyu poder y autoridad? El Biblia ta menciona acerca na cuanto jovenes quien ya queda maga rey de Juda. Por ejemplo, 7 año lang si Jehoas, 16 año si Ozias y 8 año si Josias. Posible, bien dificil gayot quel para kanila. Pero maskin pa na diila situacion, ya ayuda kanila si Jehova y el otro para hace manada buen cosas.

2. Porque bueno que estudia kita acerca na maga ejemplo de Jehoas, Ozias y Josias?

² Gendeh kita maga rey o reina pero puede kita aprende maga importante leccion con este tres caracter na Biblia. Ya hace sila maga buen decision pero ya hace tambien sila maga gendeh justo decision. Na diila ejemplo, mira si porque necesita kita iscuji maga buen amigo, esta humilde y continua busca con Jehova.

3. Paquemodo ya puede ayuda si Jehoiada con Rey Jehoas que hace maga buen decision?

³ Imita con el maga buen decision de Jehoas. Cuando joven si Jehoas, ya muri el de suyu tata poreso el alto sacerdote que si Jehoiada el quien ya hace engranda con ele y ya enseña con ele acerca con Jehova. Ya hace le un buen decision cay ya oi le con el consejo que ta dale con ele este sacerdote. Por causa na ejemplo de Jehoiada, ya decidi si Jehoas que sirvi con Jehova y ya ayuda tambien le con otro que hace se. Gane, ya asigura le que hay puede compone con el templo de Jehova.—2 Cron. 24:1, 2, 4, 13, 14.

4. Paquemodo kita ta beneficia si ta aprecia kita con el maga mandamiento de Jehova? (Proverbio 2:1, 10-12)

⁴ Si ya enseña contigo que ama con Jehova y vivi asegun na de suyu maga principio, ya ricibi tu un valuable regalo. (Le con el Proverbio  2:1, b 10-12. c) Puede man train el maga mayores con el diila maga anak na manada manera. Considera si paquemodo ya ayuda el tata del un hermana que si Katya para puede le hace maga buen decision. Si ta hace hatud con ele el de suyu tata na escuela, ta discuti sila junto con el texto del dia. Ele ya habla: “Ya puede quel ayuda conmigo para hace el cosa justo si enfrenta yo maga problema durante el dia.” Pero, paquemodo si ta sinti tu que el direccion del de tuyu mayores que base na Biblia dol ta quita con el de tuyu libertad? Cosa puede ayuda contigo para obedece kanila? El un hermana que si Anastasia ta acorda que el de suyu maga mayores ya dale tiempo para explica si porque sila ya dale maga ley. Ele ya habla, “Ya ayuda quel conmigo para mira con el maga limitacion como amable proteccion y gendeh lang basta maga restriccion.”

5. Paquemodo el de tuyu maga accion puede afecta con el de tuyu mayores y con Jehova? (Proverbio 22:6; 23:15, 24, 25)

⁵ Si sigui tu con el maga consejo del Biblia, puede tu hace alegre con el de tuyu maga mayores. Y el mas importante, puede tu hace alegre con Dios y tene buen amistad con ele. (Le con el Proverbio 22:6 d; 23:15, e 24, 25. f) Maga buen razon este para imita con el ejemplo de Jehoas cuando joven le!

6. De quien consejo el ya principia oi si Jehoas y cosa el resulta? (2 Cronicas 24:17, 18)

⁶ Aprende na maga mal decision de Jehoas. Despues muri si Jehoiada, ya iscuji si Jehoas maga mal amigo. (Le con el 2 Cronicas 24:17, 18. g) Ya decidi le oi con el maga principe de Juda quien gendeh ta ama con Jehova. Posible man uyun tu que debe era si Jehoas desaleja kanila cay ta hace sila maga mal cosas. (Prov. 1:10) Pero, nuay le se hace sino ya oi le con el diila mal consejo. Gane, cuando ya pricura corecta con ele el de suyu primo que si Zacarias, ya manda le mata con este. (2 Cron. 24:20, 21; Mat. 23:35) Bien malo gayot el cosa le ya hace! Enbuenamente el vida de Jehoas del primero pero maka-triste cay na uliji ya queda le apostata y criminal. Despues del cuanto tiempo, el de suyu mismo maga gente el ya mata con ele.  (2 Cron. 24:22-25) Bien diferente era el de suyu vida si ya continua lang le oi con Jehova y con aquellos quien ta ama con Ele! Cosa leccion tu ya aprende na aquel ejemplo?

7. Con quien tu debe iscuji man amigo? (Mira tambien con el letrato.)

⁷ El un leccion que puede kita aprende na mal decision de Jehoas amo que necesita kita iscuji maga amigo quien tiene buen influencia kanaton—maga amigo quien ta ama y ta hace alegre con Jehova. Puede kita man amigo maskin con aquellos gendeh igual na diaton edad. Acorda que mas joven si Jehoas contra con el de suyu amigo que si Jehoiada. Si ta iscuji maga amigo, pregunta na de tuyu mismo cuerpo: ‘Ta ayuda ba sila conmigo para hace fuerte con el de mio fe con Jehova? Ta anima ba sila conmigo que vivi asegun na maga principio del Dios? Tan cuento ba sila acerca con Jehova y acerca na verdad? Ta dale ba sila mira respeto na maga principio del Dios? Ta habla lang ba sila el cosa yo quierre oi o tiene sila animo para corecta conmigo si tan kamali yo?’ (Prov. 27:5, 6, 17) El deverasan, si el de tuyu maga amigo gendeh ta ama con Jehova, gendeh tu necesita kanila. Pero si el de tuyu maga amigo ta ama con Jehova, esta cerca kanila—puede sila ayuda contigo!—Prov. 13:20.

8. Si ta usa kita social media, cosa kita debe considera?

⁸ Unrato lang puede comunica con el diaton familia y maga amigo usando el social media. Pero, manada maga gente ta usa con este para man bilib kanila el otro y tan post sila maga letrato y video del maga cosa sila ya puede cumpra o hace. Si ta usa tu social media, pregunta na de tuyu mismo cuerpo: ‘El de mio motivo ba amo para man bilib el otro conmigo? Ta hace ba yo este para man share un buen cosa con otro o cay quierre yo que alaba sila conmigo? Ta permiti ba yo que el maga opinion del otro influencia con el de mio pensamiento, converzada y accion na negativo manera?’ Si Hermano Nathan Knorr, quien ya sirvi como un miembro del Cuerpo Gobernante, ya dale este consejo: “No pricura ganá el favor del maga gente cay na uliji, nuay con ustedes quien gusta. Sino, pricura ganá el favor de Jehova y hay gusta con ustedes todo aquellos quien ta ama con Jehova.”

9. Cosa ya puede hace si Ozias por causa na ayuda de Jehova? (2 Cronicas 26:1-5)

⁹ Imita con el maga buen decision de Ozias. Cuando joven, humilde si Rey Ozias. Ya aprende le “que tene miedo con el verdadero Dios.” Ya vivi le por 68 año y na mayoria del de suyu vida, ya bendici con ele si Jehova. (Le con el 2 Cronicas 26:1-5. h) Ya ganá si Ozias contra na manada enemigo del diila nacion y ya hace fuerte con el maga defensa del Jerusalem. (2 Cron. 26:6-15) Asigurao bien alegre si Ozias na todo cosa le ya puede hace na ayuda del Dios.—Ecl. 3:12, 13.

10. Cosa ya sucede con Ozias?

¹⁰ Aprende na maga mal decision de Ozias. Anad dale si Rey Ozias maga instruccion para sigui el otro. Ya pensa ba le que puede ya le hace el maskin cosa le quierre? Bueno, un dia ya decidi entra si Ozias na templo de Jehova y ya pricura quema incenso na altar—un cosa que gendeh ta permiti con el maga rey que hace. (2 Cron. 26:16-18) Ya pricura corecta con ele el alto sacerdote que si Azarias pero si Ozias ya queda bien rabiao. Maka-triste, nuay esta fiel si Ozias y ya queda le leproso cay ya castiga con ele si Jehova. (2 Cron. 26:19-21) Bien diferente era el de suyu vida si ya esta lang le humilde!

11. Cosa puede ayuda kanaton para esta humilde? (Mira tambien con el letrato.)

¹¹ Cuando ya tiene grande autoridad si Ozias, ya ulvida le que con Jehova estaba el todo maga buen cosas que ya hace le. Cosa el leccion para kanaton?  Debe kita acorda que el diaton maga bendicion y privilegio estaba con Jehova. En vez de man hambug na cosa kita ya puede hace, debe kita dale el alabanza con Jehova. i (1 Cor. 4:7) Debe kita queda humilde y acepta que maga imperfecto kita y necesita disciplina. El un hermano que maga 60 el edad ya escribi: “Ya aprende yo que gendeh yo debe man luya si ya nota el otro con el de mio maga kamali. Si ta ricibi yo disciplina por causa na maga kamali que ta puede yo hace tiene vez, ta pricura yo hace maga cambio y continua siempre sirvi con Jehova.” Si ta obedece kita con Jehova y ta esta humilde, hay queda gayot kita deverasan alegre.—Prov. 22:4.

12. Cuando joven le, paquemodo si Josias ya busca con Jehova? (2 Cronicas 34:1-3)

¹² Imita con el maga buen decision de Josias. Teenager si Josias cuando ya principia le busca con Jehova. Quierre le aprende acerca con Jehova y hace el De Suyu voluntad. Pero, gendeh facil el vida de este joven rey. Necesita le coraje para quita con el falso adoranza y hace bira otravez con el puro adoranza. Y amo gayot se el cosa le ya hace! Nuay pa 20 año si Josias, ya principia ya le quita con el falso adoranza na nacion.—Le con el 2 Cronicas 34:1-3. j

13. Paquemodo el de tuyu dedicacion con Jehova hay afecta con el de tuyu vida?

¹³ Maskin pa bien joven tu, puede tu decidi que imita con Josias por medio que busca con Jehova y aprecia con el De Suyu maga calidad. Si hace tu se, puede este manda move contigo que dedica de tuyu vida con ele. Paquemodo se puede afecta con el de tuyu vida? Si Luke, quien ya bautiza cuando 14 año le, ya habla, “Principia este dia, hace yo pirmi una con Jehova na de mio vida y pricura hace alegre con ele.” (Mar. 12:30) Un bendicion gayot si hace tambien tu igual ansina!

14. Dale maga ejemplo si paquemodo el cuanto maga jovenes ta imita con Rey Josias.

¹⁴ Cosa maga dificultad tu posible enfrenta  como un joven siervo de Jehova? Si Johan, quien ya bautiza na edad de 12, ya habla que yan pressure con ele el de suyu maga classmate que man vape. Para puede resisti con aquel pressure, ya acorda si Johan si cosa el mal efecto de este na de suyu salud y na de suyu relacion con Jehova. Si Rachel, quien ya bautiza na edad de 14, ya relata si cosa ya puede ayuda con ele para enfrenta con el maga dificultad na escuela. Ele ya habla: “Ta pricura yo mira maga cosas que ta manda conmigo acorda acerca na Biblia y con Jehova. Por ejemplo, el un topico acerca na history posible manda acorda conmigo un istoria o un profecia na Biblia. O tiene vez si tan cuento yo con otro na escuela, ta pensa yo un texto que puede yo man share kanila.” Posible, diferente el de tuyu maga dificultad na cosa ya experiencia si Rey Josias pero puede tu queda sabio y leal igual con ele. Si sabe ya tu enfrenta con el de tuyu maga dificultad mientras joven pa, puede se prepara contigo para enfrenta con el maga problema na futuro.

15. Cosa ya ayuda con Josias para fiel sirvi con Jehova? (2 Cronicas 34:14, 18-21)

¹⁵ Cuando 26 año le, ya principia manda compone si Rey Josias con el templo. Durante na este tiempo, ya puede incuntra con “el libro del Ley de Jehova que ya dale por medio con Moises.” Cuando ya puede oi el rey con el cosa escribido aqui, ya actua dayun le para hace con el cosa este ta habla. (Le con el 2 Cronicas 34:14, k 18-21. l) Quierre ba tu regular le con el Biblia? Si ta pricura ya tu hace con ese, tan enjoy ba tu? Ta nota ba tu con el maga texto que puede ayuda contigo? Si Luke que ya menciona enante ta escribi na de suyu journal con el maga bonito punto que ya puede le incuntra. Si hace tu ansina, puede se ayuda contigo acorda con  el maga texto o con el maga leccion que ya puede tu aprende. Si mas ta ama tu con el Biblia, hay queda tu mas determinao que sirvi con Jehova. Y igual con Rey Josias, hay manda este move contigo para actua.

16. Porque ya hace un serioso kamali si Josias y cosa el leccion para kanaton?

¹⁶ Aprende na mal decision de Josias. Cuando maga 39 año si Josias, ya puede le hace un kamali que ya causa el de suyu muerte. Ya confia le con el de suyu mismo cuerpo en vez de pidi el guia de Jehova. (2 Cron. 35:20-25) Cosa el leccion para kanaton? Maskin cosa man el diaton edad o si paquemodo de tarda ya kita ta estudia con el Biblia, debe kita continua busca con Jehova. Quierre decir de este que necesita kita regular pidi el de suyu guia por medio na rezo, estudia con el de suyu Palabra y beneficia na consejo del maga mature Cristiano. Si hace kita se, puede kita evita hace maga grande kamali y queda kita mas alegre.—Sant. 1:25.

17. Cosa maga importante leccion kita ya puede aprende con el tres rey de Juda?

¹⁷ El maga jovenes tiene manada maga bonito oportunidad. El istoria de Jehoas, Ozias y Josias ta dale mira que el maga jovenes puede hace maga justo decision y hace alegre con Jehova. Deverasan, este maga jovenes ya hace maga kamali que ya resulta na maga mal cosas. Pero, si imita tu con el maga buen cosas sila ya hace y evita con el maga kamali que ya hace sila, puede tu tene alegre vida.

18. Cosa maga ejemplo na Biblia el ta dale mira que puede tu tene alegre vida? (Mira tambien con el letrato.)

¹⁸ El Biblia ta contene maga istoria del otro maga jovenes quien ya queda cerca con Jehova, ya ganá el de suyu favor y ya tiene alegre vida. Uno si David kanila. Cuando joven le, ya iscuji le adora con Dios y na uliji ya queda le un leal rey. Deverasan, ya hace le maga kamali pero ya mira el Dios con David como un fiel siervo siempre. (1 Rey 3:6; 9:4, 5; 14:8) Si estudia tu acerca con David, el de suyu ejemplo puede anima contigo para sirvi fiel con Jehova. O baka quierre tu aprende pa mas acerca con Marcos o con Timoteo. Ya principia sila sirvi con Jehova cuando bien joven pa sila y ya continua sila fiel sirvi con ele. Y por causa con ese, ya tiene sila alegre vida.

19. Cosa clase de vida el puede tu tene?

¹⁹ El maga cosas que ta hace tu ahora na de tuyu vida puede afecta si cosa sucede contigo na futuro. Si confia tu con Jehova y gendeh na de tuyu mismo entendimiento, hay ayuda le contigo para hace maga justo decision. (Prov. 20:24) Puede tu tene un bonito y alegre vida. Acorda que ta aprecia si Jehova con el cosa tu ta hace para con ele. El servicio na diaton Tata que si Jehova amo el de con todo buen manera que puede tu usa con el de tuyu vida!