1. Cuanto tiempo antes muri si apostol Pedro, paquemodo si Jehova ya usa con ele?

 FIEL ya sirvi si apostol Pedro con Jehova por manada año. Ya sigui le con Jesus na predicacion, ya principia le el trabajo predicacion na maga gendeh Judio y na uliji, ya queda le miembro del cuerpo gobernante. Durante el cuanto tiempo antes le muri, ya dale pa con ele mas manada trabajo si Jehova. Del maga 62-64 C.E., ya usa con ele si Jehova para escribi dos carta—el 1 y 2 Pedro. Ta esperanza le que este maga carta puede ayuda con el maga Cristiano despues del de suyu muerte.—2 Ped. 1:12-15.

2. Porque tupao gayot na tiempo el maga carta que ya escribi si Pedro?

² Ya escribi si Pedro con el de suyu maga carta cuando el de suyu maga hermano y hermana ta enfrenta “todo clase de sufrimiento.” (1 Ped. 1:6) El cuanto ta pricura introduci maga falso enseñanza y maga mabuling conducta na congregacion. (2 Ped. 2:1, 2, 14) Gendeh dura, el maga Cristiano quien ta queda na Jerusalem hay enfrenta con “el fin de todo el maga cosa-cosa”—el destrozo de aquel ciudad y del templo de este na mano del maga Romano soldao. (1 Ped. 4:7) Asigurao que el maga carta de Pedro ya puede ayuda con el maga Cristiano para mira si paquemodo sila enfrenta con el maga presente probanza y prepara para na maga dificultad que hay enfrenta sila. b

3. Porque kita debe examina con el maga carta que ya escribi si Pedro?

 ³ Maskin pa el maga carta que ya escribi si Pedro amo para na maga Cristiano del primer siglo, ya hace si Jehova con ese parte del De Suyu Palabra. Por causa con ese, puede kita beneficia con ese maga carta ahora. (Roma 15:4) Ciendo ta vivi kita na un mundo que donde manada el ta practica maga mabuling conducta, ta enfrenta kita maga probanza que ta hace dificil kanaton para sirvi con Jehova. Puera con ese, hay enfrenta kita tribulacion que mas pa na cosa ya experiencia el maga Cristiano de antes. Puede kita aprende maga importante leccion na dos carta de Pedro. Puede se kanaton ayuda para continua espera con el dia de Jehova, ganá con el miedo na gente y tene hondo amor para na uno y otro. Puede tambien se ayuda con el maga anciano para mira si paquemodo sila puede cuida con el maga hermano y hermana na congregacion.

4. Como cosa ta indica na 2 Pedro 3:3, 4, cosa puede hace luya con el diaton fe?

⁴ Ta vivi kita entre na maga gente quien gendeh ta creé na maga profecia na Biblia. Posible que hay gangguia kanaton el otro cay ya dura ya kita ta espera con el fin. El cuanto ta clama que nunca se hay llega. (Le con el 2 Pedro 3:3, 4.) Si puede kita oi ansina na ministerio, na diaton uban na trabajo o na diaton familia, posible man luya el diaton fe. Ya explica si Pedro si cosa puede ayuda kanaton.

5. Cosa puede ayuda kanaton para continua tene el justo mirada acerca na fin de este sistema? (2 Pedro 3:8, 9)

⁵ Para con el cuanto, ta pensa sila que dol ta dura si Jehova termina con el presente mal sistema de maga cosas. El maga palabra de Pedro puede ayuda kanaton para tene justo mirada acerca con ese. Ya hace le acorda kanaton que el mirada de Jehova acerca na tiempo bien diferente na mirada del maga gente. (Le con el 2 Pedro 3:8, 9.) Para con Jehova, el un mil año amo un dia lang. Paciencioso le y no quierre le que tiene quien hay sale destrozao. Pero si llega ya el de suyu dia, hay termina le con el sistema de este mundo. Tiene kita un grande privilegio que usa con el tiempo que ya queda para predica con todo el maga gente.

6. Paquemodo kita continua “espera . . . con ansias” con el dia de Jehova? (2 Pedro 3:11, 12)

⁶ Ya anima kanaton si Pedro que “espera . . . con ansias” con el dia de Jehova. (Le con el 2 Pedro 3:11, 12.) Paquemodo? Puede kita medita—cada dia, si posible—con el maga bendicion que puede kita obtene na nuevo mundo. Imagina que ta resulla tu limpio aire, ta come sustancioso comida, ta hace encuentro con el de tuyu maga familia con quien ya resucita y ta enseña con el maga gente acerca na cumplimiento del maga profecia na Biblia. Si hace tu se, puede se ayuda contigo para continua espera con el dia de Jehova y queda convincido que cerca ya el fin. Ciendo ‘sabe ya kita’ acerca el diaton futuro, ‘gendeh kita hay queda engañao’ na enseñanza del maga falso maestro.—2 Ped. 3:17.

7. Paquemodo el miedo na gente puede afecta kanaton?

⁷ Mientras ta espera kita con el dia de Jehova, ta motiva se kanaton que predica con el buen noticia con otro. Pero na cuanto maga circumstancia, posible man alang-alang kita converza acerca con ese. Porque? Cay baka hay ganá kanaton el miedo na gente. Ya sucede se con Pedro. Na noche cuando na corte si Jesus del maga Judio, ya tiene miedo si Pedro manda conoce con el de suyu mismo  cuerpo como uno del maga dicipulo de Jesus y cuanto beses ya habla que no conoce le con este. (Mat. 26:69-75) Pero, ya puede ganá si Pedro con el de suyu miedo y na uliji, ya puede le habla: “No tene miedo canila y no man lingasa.” (1 Ped. 3:14) El maga palabra de Pedro ta dale kanaton asiguranza que puede kita ganá con el miedo na gente.

8. Cosa puede ayuda kanaton para ganá con el miedo na gente? (1 Pedro 3:15)

⁸ Cosa puede ayuda kanaton para ganá con el miedo na gente? Si Pedro ya habla kanaton: “Dale honor con Jesucristo . . . na di ustedes maga corazon.” (Le con el 1 Pedro 3:15, El Nuevo Testamento.) Puede kita se hace si medita kita con el posicion y poder del diaton Señor y Rey, si Jesucristo. Si tiene tu oportunidad para predica el buen noticia pero ta nervia tu o ta tiene miedo, acorda con el diaton Rey. Imagina con ele que ta rula na cielo y junto con ele el miles de maga angel. Acorda que tiene le el “todo autoridad na cielo y na mundo” y ‘hay esta le junto kanaton todo el dia hasta na fin.’ (Mat. 28:18-20) Ya anima kanaton si Pedro que “esta firmi preparao” para defende con el diaton fe. Quierre ba tu predica na trabajo, na escuela o na otro situacion? Pensa adelantao si cuando tu se puede hace y prepara si cosa tu hay habla. Reza para tene tu coraje y confia que ayuda contigo si Jehova para ganá con el miedo na gente.—Act. 4:29.

9. Na un ocasion, paquemodo si Pedro nuay puede dale mira amor? (Mira tambien con el letrato.)

⁹ Ya aprende si Pedro si paquemodo dale mira amor. Talla le aquel tiempo cuando ya habla si Jesus: “Ta dale yo con ustedes un mandamiento nuevo: Ama ustedes con uno y otro. Igual como ta ama yo con ustedes, ansina tamen ustedes ama con uno y otro.” (Juan 13:34) Maskin pa ansina, na un ocasion, nuay junto come si Pedro con el de suyu maga Gentil hermano y hermana cay ya tiene le miedo que baka cosa con ele habla el maga Judio Cristiano. Ya habla si apostol Pablo que ta “pretende” lang si Pedro. (Gal. 2:11-14) Ya acepta si Pedro con ese consejo y ya aprende na de suyu kamali. Na de suyu dos carta, ya hace le claro que gendeh lang kita debe sinti amor para con el diaton maga hermano y hermana sino dale tambien kita mira con ese.

10. Paquemodo kita tene “un amor sincero”? Explica. (1 Pedro 1:22)

¹⁰ Ya habla si Pedro que debe kita “ama con un amor sincero” con el diaton maga hermano y hermana. (Le con el 1 Pedro 1:22.) El un persona puede tene ansina sentido si ele ta “obedece con el verdad.” Incluido na este verdad el enseñanza que “el Dios noay favorito” o imparcial. (Act. 10:34, 35) Gendeh kita puede obedece con el cosa ya manda si Jesus si ta iscuji lang kita con quien kita ta dale mira amor na congregacion. Deverasan, igual con Jesus, posible sinti kita que mas cerca kita con el cuanto que con otro. (Juan 13:23; 20:2) Pero, ya hace acorda kanaton si Pedro que debe kita pricura ama con todo maga hermano como parte del diaton familia.—1 Ped. 2:17.

11. Cosa quierre decir que ama con otro “con todo el corazon”?

¹¹ Ya anima kanaton si Pedro que “ama deverasan con uno y otro y con todo el corazon.” Na este texto, el expresion ama “con todo el corazon” quierre decir que ama kita con el un persona maskin pa dificil para dale mira amor con ele. Por ejemplo, paquemodo si ya puede kanaton hace sinti duele el un hermano? Baka pensa kita que man balus en vez de dale mira amor con ele. Pero, ya aprende si Pedro con Jesus que gendeh alegre el Dios si tan balus el un persona. (Juan 18:10, 11) Si Pedro ya escribi: “No ustedes devolve malo con quien ta hace malo con ustedes, ni devolve insulto con quien ta insulta con ustedes. Emvez, devolve ustedes bendicion.” (1 Ped. 3:9) Si ta ama tu con otro con todo corazon, hay trata tu kanila bueno maskin con aquellos quien ya hace sinti duele contigo.

12. (a) Si el un persona ta ama gayot con otro, cosa pa le puede hace? (b) Cosa tu quierre pricura hace, como cosa puede mira na video Preserve the Precious Gift of Unity?

¹² Na de suyu primer carta, ya usa si Pedro con el expresion “ama gayot con uno y otro.” Ese clase de amor ta tapa gendeh lang con el cuanto maga pecado sino con “mucho maga pecado.” (1 Ped. 4:8) Posible que ya acorda si Pedro con el cosa ya enseña si Jesus acerca na perdon cuanto año ya el ya pasa. Na aquel tiempo, ya pensa si Pedro que bien bueno ya gayot ele cuando ya habla le que hay perdona le con el de suyu hermano “hasta siete veces.” Pero, ya enseña si Jesus con ele—y kanaton—que debe kita perdona hasta “setenta y siete veces,” quierre decir nuay limitacion. (Mat. 18:21, 22) Si tan dificil tu aplica con este consejo, no man luya! El todo maga imperfecto siervo de Jehova tiene vez tan dificil perdona. El cosa importante ahora amo que hace tu el maga cosas que necesita para perdona con el de tuyu hermano y para tene paz entre con ele. c

13. Porque posible gendeh facil para na maga anciano que cuida con el maga hermano y hermana?

¹³ Asigurao que nuay ulvida si Pedro con el cosa ya habla si Jesus con ele despues del de suyu resureccion: “Cuida con el dimio maga carnero.” (Juan 21:16) Si un anciano tu, sabe tu que aplicable tambien quel instruccion para contigo. Pero, posible que tan dificil el un anciano busca tiempo para cumpli con este importante trabajo. Necesita sila dale una el fisical, emocional y espiritual necesidad del diila familia. Ta guia tambien sila con otro na trabajo predicacion y ta prepara y ta dale maga parte na maga miting y na maga asemblea. El cuanto ta sirvi tambien como miembro del Hospital Liaison Committee o ta ricibi maga assignment na Local Design/Construction Department. Deverasan, bien ocupao gayot el maga anciano!

14. Cosa puede motiva con el maga anciano para cuida con el maga hermano y hermana? (1 Pedro 5:1-4)

¹⁴ Ya anima si Pedro con el de suyu maga uban anciano: “Cuida ustedes con el maga hermano y hermana.” (Le con el 1 Pedro 5:1-4.) Si un anciano tu, asigurao que ta ama tu con el de tuyu maga hermano y hermana, y quierre cuida kanila. Pero posible tiene tiempo, ta sinti tu que bien busy tu o bien cansao y gendeh mas tu puede cumpli con ese trabajo. Cosa tu puede hace? Habla con Jehova el de tuyu maga lingasa. Si Pedro ya escribi: ‘Si quien ta sirvi, sirvi con fuerza que el Dios ya dale con ele.’ (1 Ped. 4:11) Posible que el de tuyu maga hermano y hermana ta enfrenta maga problema que gendeh puede solva na este sistema de maga cosas. Pero acorda que “el jefe del maga pastor,” si Jesucristo, puede ayuda kanila mas pa na cosa tu puede hace. Puede le se hace ahora y na nuevo mundo. El cosa lang el Dios ta pidi na maga anciano amo que ama y cuida con el diila maga hermano y queda “un ejemplo para canila.”

15. Paquemodo el un anciano ta cuida con el de suyu maga hermano y hermana? (Mira tambien con el letrato.)

¹⁵ Si William, quien ya dura ya ta sirvi como un anciano, sabe si paquemodo de importante el shepherding. Cuando ya principia el COVID-19 pandemic, ele y el de suyu maga uban anciano ya hace prioridad que man contact con el cada individual na diila grupo  cada semana. Ya explica le si porque: “Manada del maga hermano solo-solo lang na casa y facil lang sila puede pensa negativo.” Si tiene problema el un hermano o hermana, ta oi enbuenamente si William para puede le sabe si cosa el diila necesidad y maga lingasa. Despues, ta busca le maga especifico material, mas mucho maga video estaba na diaton website, para puede ayuda kanila. Ele ya habla: “Bien necesita ahora el shepherding. Ta hace kita grande esfuerzo para ayuda con el maga gente aprende acerca con Jehova. Poreso, necesita tambien kita hace igual esfuerzo para cuida y ayuda con el maga carnero de Jehova que esta na verdad.”

16. Na cosa maga manera puede kita aplica con el maga leccion na dos carta de Pedro?

¹⁶ Ya discuti kita cuanto maga leccion lang estaba na dos carta de Pedro. Posible ya puede tu nota cuanto cosas que necesita pa tu mejora. Por ejemplo, quierre ba tu medita pa mas acerca na maga bendicion que puede tu obtene na nuevo mundo? Tiene ya ba tu goal que predica na trabajo, escuela o na otro pa maga situacion? Tiene ya ba tu maga manera ta pensa para mas puede dale mira amor con el de tuyu maga hermano y hermana? Maga anciano, determinao ba ustedes cuida con el maga carnero de Jehova? Si sincero kita examina con el diaton mismo cuerpo, posible puede kita mira maga cosas que necesita pa kita mejora. Si ansina, no man luya. “Bueno el Señor” y ayuda le contigo para hace se. (1 Ped. 2:3) Si Pedro ta asigura kanaton: “El Dios . . . ay dale con ustedes valor y fuerza y ay suporta con ustedes.”—1 Ped. 5:10.

17. Cosa el resulta si continua kita hace esfuerzo y permiti con Jehova que man train kanaton?

¹⁷ Del una, ya sinti si Pedro que gendeh le conviene para man junto con Jesus. (Luc. 5:8) Pero na amable ayuda de Jehova y Jesus, ya puede hace esfuerzo si Pedro para queda un siguidores del Cristo. Como resulta, ya permiti si Jehova con Pedro para “entra na reino eterno del diaton Señor y Salvador si Jesucristo.” (2 Ped. 1:11) Un grande bendicion gayot quel! Si continua tu hace esfuerzo igual con Pedro y permiti que continua contigo man train si Jehova, puede tu ricibi el premio de vida hasta para cuando. Puede tu ricibi ‘el resulta del de tuyu fe que amo el salvacion.’—1 Ped. 1:9.