1-2. Porque alegre el maga siervo del Dios? (Santiago 1:22-25)

 QUIERRE si Jehova y el de suyu Anak que queda kita alegre. El escritor del Salmo 119:2 ya habla: “Alegre aquellos quien ta sigui con el de tuyu maga palabra, quien ta busca contigo con todo el diila corazon.” Ya habla tambien si Jesus: “Mas alegre pa aquellos quien ta oi y ta obedece con el Palabra de Dios!”—Luc. 11:28.

² Como maga siervo de Jehova, alegre kita. Porque? Manada razon. Uno ya alli amo cay regular kita ta le con el Palabra del Dios y ta pricura aplica con el cosa kita ya aprende.—Le con el Santiago 1:22-25.

3. Cosa el maga beneficio si ta aplica kita con el cosa kita ta le na Palabra del Dios?

³ Manada beneficio si “obedece [kita] el cosa ta habla el Palabra” del Dios. Por ejemplo, sabe kita que un importante manera este para hace alegre con Jehova. Y ta hace tambien este kanaton alegre. (Ecl. 12:13) Si ta aplica kita con el cosa kita ta aprende na Palabra del Dios, puede kita tene alegre familia y tene buen relacion na maga hermano y hermana. Posible, etu mismo ya experiencia con ese. Mas pa, puede kita evita con el maga problema que ta enfrenta aquellos quien gendeh ta sigui na maga principio de Jehova. Poreso, uyun  kita na cosa ya habla si Rey David. Despues le menciona na cancion el maga ley, mandamiento y juzgamiento de Jehova, ele ya habla: “Si sigui con este, tiene grande premio.”—Sal. 19:7-11.

4. Porque dificil le y aplica con el Palabra del Dios?

⁴ Pero deverasan, gendeh pirmi facil para kanaton que le y aplica con el Palabra del Dios cay bien ocupao kita. Maskin pa ansina, debe kita dale tiempo para hace con ese para puede entende si cosa quierre si Jehova que hace kita. Poreso, man repaso kita con el cuanto sugestion que puede ayuda kanaton para puede regular le con el Biblia. Hay considera tambien kita si cosa puede ayuda kanaton para pensa acerca na cosa kita ta le y mira si paquemodo kita puede aplica na diaton vida el cosa kita ta aprende.

DALE TIEMPO PARA LE CON EL PALABRA DEL DIOS

5. Cosa el cuanto responsibilidad que tiene kita?

⁵ Bien busy el mayoria del maga siervo de Jehova. Grande tiempo kita ta usa para cumpli con el diaton maga responsibilidad. Por ejemplo, manada kanaton el ta trabaja para suporta con el diaton mismo cuerpo y con el diaton familia. (1 Tim. 5:8) Manada Cristiano el ta cuida con el diila pariente que enfermo o de edad. Y todo kita necesita cuida con el diaton salud y necesita tiempo para hace con ese. Puera con este maga responsibilidad, tiene tambien kita maga assignment na congregacion. El un importante responsibilidad diaton amo que participa na predicacion. Na todo obligacion que tiene tu, paquemodo tu dale tiempo para puede regular le con el Biblia, medita con el cosa tu ta le y aplica con el cosa este ta habla?

6. Paquemodo tu hace prioridad con el lehida del Biblia? (Mira tambien con el letrato.)

⁶ Como maga Cristiano, el lehida del Biblia amo el uno na “maga cosas que mas importante” poreso debe kita hace prioridad con este. (Fil. 1:10, NWT) Acerca na un alegre persona, el primer salmo ya habla: “El de suyu alegria talli na ley de Jehova y ta le  ele con el De Suyu ley na hinay voz didia y denoche.” (Sal. 1:1, 2) Ta dale este mira que necesita kita dale tiempo para le con el Biblia. Cuando el de con todo buen tiempo para le con el Biblia? Posible, otro-otro el diaton contestacion na ese pregunta. Pero, el importante amo que iscuji kita tiempo donde puede kita regular le con el Biblia. El un hermano que si Victor ya habla: “Quierre yo le con el Biblia cada aga. Gendeh yo anad dispierta temprano pero ta le yo con el Biblia cada aga cay amo se el tiempo que nuay tanto ta destorba conmigo. Mas facil para conmigo que man focus na cosa yo ta le.” Ese ba tambien el de tuyu schedule? Pregunta na de tuyu mismo cuerpo, ‘Cuando el buen tiempo para puede yo le con el Biblia?’

PENSA SI COSA TU TA LE

7-8. Porque posible gendeh kita ta puede beneficia con el cosa kita ta le? Ilustra.

⁷ Posible, manada kita cosa ta le pero gendeh kita ta beneficia con ese. Ya puede ya ba tu experiencia que despues tu le con el un material, nuay tu cosa ya acorda acerca con ese? Posible ya sucede se kanaton todo. Puede tambien este sucede si ta le kita con el Biblia. Baka quierre kita que le cuanto capitulo del Biblia cada dia. Un bonito goal se. Todo kita debe tene maga goal y pricura alcanza con ese. (1 Cor. 9:26) Pero, gendeh bastante que ta puede lang kita le con el Biblia. Mas pa el cosa necesita para puede gayot kita beneficia na diaton lehida del Palabra del Dios.

⁸ Considera con este ilustracion: Importante el ulan para vivi el maga siembra. Pero si man ulan recio na corto tiempo lang, posible gendeh dayun puede man absorb el tierra con el agua. Si ansina, nuay mas ayuda el ulan na maga siembra. Ta necesita tiempo el tierra para puede man absorb con el ulan que necesita para crici el siembra. Na igual manera, debe kita evita paspas le con el Biblia que gendeh mas kita ta puede pensa, acorda y aplica con el cosa kita ta le.—Sant. 1:24.

9. Cosa kita debe hace si yan anad ya kita bien paspas le con el Biblia?

⁹ Bien paspas ba tu ta le con el Biblia? Si ansina,  cosa tu debe hace? No apura na de tuyu lehida. Hace esfuerzo para pensa acerca na cosa tu ta le o nuevo lang ya le. Si dol dificil para contigo que medita, pruba maskin pensa lang con el cosa tu ya le. Para hace se, puede tu dale mas largo tiempo na de tuyu estudiada para puede tu pensa o medita. O puede tu le mas poco versiculo y usa con el otro tiempo para pensa con el cosa tu ya le. “Un capitulo lang yo ta le cada dia,” ya habla si Victor que ya menciona enante. “Cay temprano yo ta le, ta puede yo pensa acerca con ese na entero dia.” Maskin cuanto capitulo pa tu ta le cada dia, importante que no apura para puede tu pensa acerca na cosa tu ta le.—Sal. 119:97; mira con el cajon “ Maga Pregunta que Puede Tu Considera.”

10. Dale ejemplo si paquemodo tu puede aplica con el cosa tu ya aprende. (1 Tesalonica 5:17, 18)

¹⁰ Maskin cosa pa el de tuyu schedule de lehida y si paquemodo pa de tarda tu ta hace con ese, pensa si paquemodo tu puede aplica con el cosa tu ya le. Mientras ta le con el Biblia, pregunta na de tuyu mismo cuerpo, ‘Paquemodo yo puede aplica con ese ahora o na futuro?’ Para ilustra, pone kita que ya le tu con el 1 Tesalonica 5:17, 18. (Le.) Despues tu le con ese dos versiculo, puede tu pensa si paquemodo tu de sincero ta reza y si cuanto beses tu ta hace con ese. Puede tambien tu pensa acerca na maga cosas que ta aprecia tu. Baka ya pensa tu tres cosas que quierre tu rindi gracias con Jehova. Si dale tu maskin cuanto minuto para pensa acerca con ese maga leccion na Biblia, puede se ayuda contigo para entende con el Palabra del Dios y aplica con ese. Pensa si paquemodo tu beneficia si hace tu con este cada dia mientras ta le con el otro maga versiculo na Biblia. Asigurao, hay queda gayot tu mas buen siervo de Jehova. Pero paquemodo si ya puede tu realiza que bien manada cosas el debe tu dale atencion?

QUEDA MODESTO SI TA HACE MAGA CAMBIO

11. Porque posible sinti tu desmayao si ta le con el Biblia? Dale un ejemplo.

¹¹ Si ta le tu con el Biblia y ta busca manera para aplica con ese, baka sinti tu desmayao si bien manada cosas tu necesita aplica. Pensa con este ejemplo: Este dia, ya puede tu le na Biblia que no dale mira favoritismo con otro. (Sant. 2:1-8) Poreso, ya mira tu que necesita tu hace cambio si paquemodo tu ta trata con otro. Bueno se! Despues, pagka-alamañana, ya le tu que importante que queda con cuidao na de tuyu maga palabra. (Sant. 3:1-12) Ya realiza tu que tiene vez gendeh bueno el maga cosa tu ta habla. Poreso, ya decidi tu  que man cuento maga positivo cosas si tan cuento con otro. Na otro dia, ya puede tu le na Biblia el peligro si queda amigo del mundo. (Sant. 4:4-12) Ya puede tu mira que necesita tu iscuji enbuenamente con el de tuyu entretenimiento. Posible na ika-cuatro dia, hay sinti tu que bien dificil hace con ese todo maga cambio.

12. Porque gendeh tu debe man luya si ya realiza tu que necesita tu hace maga cambio? (Mira tambien con el footnote.)

¹² Si ta sinti tu que manada tu cosa necesita cambia, no man luya. Ta dale este mira que humilde tu y tiene tu buen motivo. Si humilde kita, hay le kita con el Biblia y busca manera para hace maga cambio. a Acorda tambien que todo kita ta continua pricura cultiva con el nuevo personalidad. (Col. 3:10; compara na study note “is being made new.”) Cosa puede ayuda contigo para continua aplica con el cosa tu ya le na Palabra del Dios?

13. Cosa el buen manera que puede tu hace para aplica con el cosa tu ya aprende? (Mira tambien con el letrato.)

¹³ En vez de pricura aplica con el todo cosas que ya le tu, pruba aplica uno o dos cosas anay. (Prov. 11:2) Puede tu pruba hace con este: Lista con el maga cosas que necesita tu hace cambio. Despues, iscuji uno o dos de este que quierre tu dale atencion una. Y el los demas, na otro tiempo ya. Cosa tu hace una?

14. Si ta hace maga cambio, na onde tu puede principia?

¹⁴ Puede tu principia na un cosa que facil para contigo que aplica. O puede tu iscuji un cosa que ta sinti tu que necesita gayot hace cambio. Si ya puede ya tu sabe si cosa cambio tu necesita hace, man research na diaton publicacion posible usando el Watch Tower Publications Index o el Research Guide for Jehovah’s  Witnesses. Reza acerca con ese y pidi con Jehova que dale contigo “el voluntad y el fuerza” para hace con ese. (Fil. 2:13) Despues, pricura aplica con el cosa tu ya aprende. Si ya puede tu hace un cambio o cultiva un buen calidad, puede se motiva contigo para hace el otro pa maga cambio. Y posible mas facil ya para contigo que hace se.

APLICA CON EL PALABRA DEL DIOS

15. Porque diferente el maga siervo de Jehova con aquellos quien ta le con el Biblia? (1 Tesalonica 2:13)

¹⁵ El cuanto gente ta clama que manada beses ya sila ya le con el Biblia. Pero ta creé ba gayot sila con el Biblia? Ya pricura ba sila aplica con el cosa este ta enseña o hace maga cambio na diila vida? Maka-triste cay mayoria kanila nuay con ese hace. Pero gendeh ansina el maga siervo de Jehova. Igual na maga Cristiano del primer siglo, ta mira kita con el Biblia “como el cosa que amo gayot: El Palabra del Dios.” Mas pa, ta dale kita mira que ta afecta este con el diaton vida.—Le con el 1 Tesalonica 2:13.

16. Cosa puede ayuda kanaton para aplica con el cosa kita ta le na Biblia?

¹⁶ Gendeh pirmi facil que le y aplica con el Palabra del Dios. Posible, man dificil kita busca tiempo para le. Baka ta le kita bien paspas y gendeh mas ta pensa acerca na cosa kita ta le. O posible tan luya kita cay manada kita cambio que necesita hace. Maskin cosa pa de tuyu dificultad, puede tu con ese enfrenta na ayuda de Jehova. Ojala acepta kita con el de suyu ayuda y gendeh lang basta le con el Biblia sino pricura tambien aplica con ese. Asigurao, si mas ta le kita con el Palabra del Dios y ta aplica con ese na diaton vida, hay queda kita mas alegre.—Sant. 1:25.