1-2. Cosa el beneficio cay ya crea kanaton que ta queda mas alegre si ta dale?

 MAS alegre kita si ta dale kita con otro contra si kita el ta ricibi. Ansina kanaton ya crea si Jehova. (Act. 20:35) Pero quierre decir ba de ese que gendeh kita queda alegre si kita el ta ricibi? Gendeh. Siempre alegre kita si ta ricibi kita regalo. Pero, mas alegre kita si kita el ta dale. Y el deverasan, ta beneficia kita cay ya crea kanaton si Jehova na ansina manera. Paquemodo?

² Cay ya crea kanaton si Jehova na ansina manera, tiene kita cosa puede hace para queda alegre. Puede kita queda mas alegre si busca kita oportunidad para dale con otro. Gendeh ba bien bonito cay ansina kanaton ya crea si Jehova?—Sal. 139:14.

3. Porque ya llama con Jehova el “alegre Dios”?

³ Ta habla el Biblia que alegre aquellos quien ta dale. Poreso gendeh maka-estraña si porque ya llama con Jehova el “alegre Dios.” (1 Tim. 1:11, NWT) Ele el primer Persona quien ya dale con otro y nuay quien puede dale mas pa na cosa le ya dale. Por causa con ele, “ta move y ta vivi” kita. (Act. 17:28) Claro gayot que “todo el regalo bueno y perfecto” estaba con Jehova. —Sant. 1:17.

4. Cosa kita hace para queda mas alegre?

⁴ Posible, todo kita quierre queda mas alegre si ta dale con otro. Puede kita se experiencia si imita kita con el pagka-bondadoso de Jehova. (Ef. 5:1) Mientras ta considera con el de suyu ejemplo, nota si cosa kita puede hace si dol nuay aprecia  el otro con el cosa kita ya dale. Hay motiva este kanaton que continua dale con otro y queda kita mas alegre.

QUEDA BONDADOSO IGUAL CON JEHOVA

5. Cosa material cosas ta dale kanaton si Jehova?

⁵ Cosa el cuanto manera que ta dale mira si Jehova que bondadoso le? Considera con el cuanto ejemplo. Ta dale kanaton si Jehova maga material cosas. Posible gendeh kita rico pero por causa con Jehova, mayoria kanaton tiene el cosa kita necesita. Por ejemplo, ta dale le kanaton comida, ropa y lugar onde esta. (Sal. 4:8; Mat. 6:31-33; 1 Tim. 6:6-8) Ta dale ba se si Jehova cay obligao lang le hace con ese? Gendeh! Entonces, porque man le se ta hace?

6. Cosa kita puede aprende na Mateo 6:25, 26?

⁶ Ta dale si Jehova con el diaton material necesidad cay ta ama le kanaton. Considera con el cosa ya habla si Jesus na Mateo 6:25, 26. (Le.) Ya usa si Jesus maga ejemplo na creacion. Acerca na maga pajaro, si Jesus ya habla: “Gendeh sila ta siembra ni ta cosecha, ni ta pone maga grano na tambobo.” Pero nota con el cosa le ya habla sunod: “El de ustedes Tata na cielo ta cuida canila.” Despues, ya pregunta si Jesus: “Gendeh ba ustedes mas importante pa que con el maga pajaro?” Cosa el punto? Mas valoroso con Jehova el de suyu maga siervo contra na maga animal. Si ta dale si Jehova el necesidad del maga animal, puede kita asigura que hay dale tambien le el diaton necesidad. Igual na un amable tata, ta cuida si Jehova con el de suyu familia cay ta ama le kanila.—Sal. 145:16; Mat. 6:32.

7. Cosa el un manera que puede kita imita con el pagka-bondadoso de Jehova? (Mira tambien con el letrato.)

⁷ Igual con Jehova, puede tambien kita dale material cosas con otro cay ta ama kita kanila. Por ejemplo, tiene ba tu conoce un hermano o hermana quien ta necesita comida o ropa? Puede usa contigo si Jehova para ayuda con ele. Preparao tambien ayuda con otro el maga siervo de Jehova si tiene calamidad. Por ejemplo, durante el COVID-19 pandemic, ya dale el diaton maga hermano y hermana comida, ropa y otro pa cosas con aquellos quien ta necesita con ese. Manada tambien el ya dona na worldwide work. Por causa con ese, ya puede ayuda con el maga siervo del Dios quien ya queda victima na entero mundo. Ya aplica gayot el maga hermano y hermana con el cosa ta habla na Maga  Hebreo 13:16: “No ustedes olvida hace el bueno y man ayudahan con uno y otro, cay ese clase de sacrificio amo el ta hace alegre con Dios.”

8. Na cosa manera ta beneficia kita na fuerza de Jehova? (Filipo 2:13)

⁸ Ta dale kanaton fuerza si Jehova. Alegre si Jehova dale fuerza con el de suyu maga fiel siervo. (Le con el Filipo 2:13.) Ya reza ya ba tu con Jehova que dale contigo fuerza para resisti tentacion o para aguanta na un dificil probanza? Posible ya reza tambien tu para tene bastante fuerza para lang puede continua na de tuyu vida cada dia. Si ya contesta con el de tuyu rezo, asigurao man uyun tu na cosa ya habla si Pablo quien ya escribi: “Tiene yo fuerza para enfrenta todo cosas por causa con ele quien ta dale conmigo poder.”—Fil. 4:13, NWT.

9. Paquemodo kita puede imita si paquemodo si Jehova ta usa con el de suyu fuerza? (Mira tambien con el letrato.)

⁹ Maskin pa maga imperfecto kita, puede kita imita si paquemodo si Jehova ta usa con el de suyu fuerza. Deverasan, gendeh kita puede dale literal fuerza con otro. Pero puede kita usa con el diaton fuerza para ayuda kanila. Por ejemplo, puede kita ayuda con el maga hermano o hermana quien de edad o enfermo para anda man compra o hace maga trabajo na diila casa. Si ta permiti el diaton circumstancia, puede kita ayuda na limpieza y mentenada na diaton Kingdom Hall. Si ta usa kita con el diaton fuerza na ansina manera, ta puede kita ayuda con aquellos quien ta sirvi con Jehova.

10. Paquemodo kita puede hace fuerte con otro por medio na diaton maga palabra?

¹⁰ Acorda tambien que tiene grande efecto con otro el diaton maga palabra. Tiene ba tu con quien ta pensa que hay beneficia na de tuyu comendacion? Tiene ba tu conoce quien ta necesita comforta? Si ansina, puede ba tu hace iniciativo para anima con ese persona? Puede tu con ele visita, llama o gaha imbia card, email o text. No man lingasa si cosa tu habla. El de tuyu simple y sincero palabra posible amo gayot el cosa necesita el de tuyu hermano o hermana para esta fiel o para queda mas positivo.—Prov. 12:25; Ef. 4:29.

11. Si ta dale si Jehova sabeduria, paquemodo le ta hace con ese?

¹¹ Ta dale kanaton sabeduria si Jehova. Si Santiago ya escribi: “Si tiene di ustedes quien ta falta el sabiduria . . . , pidi con Dios y Dios ay dale. Dios hende ta regaña si ta pidi ustedes, cay ta dale le con abierto mano con todo el gente si cosa sila ta pidi con ele.” (Sant. 1: 5, El Nuevo Testamento) Ta dale mira este texto que gendeh canalla si Jehova. Bondadoso si Jehova y ta dale sabeduria con otro. Ya habla tambien este texto que si ta dale si Jehova sabeduria, gendeh le kanaton “ta regaña” o ta busca kamali. No quierre le que tiene kita huya pidi con el de suyu guia. Gane, ta anima le kanaton que pidi se con ele.—Prov. 2:1-6.

12. Na cosa manera kita puede man share con el diaton sabeduria con otro?

¹² Puede ba kita imita con Jehova y dale tambien sabeduria con otro? (Sal. 32:8) Tiene manada oportunidad el maga siervo de Jehova para man share el cosa sila ya aprende. Por ejemplo, tan train kita con el maga nuevo na ministerio. Con paciencia ta ayuda el maga anciano con el maga siervo ministerial y maga bautizao hermano si paquemodo hace con el diila assignment na congregacion. Y aquellos experienciao na construida y mentenada ta ayuda man train con otro para puede sila hace con el maga trabajo na maga teocratico facilidad.

13. Si tan train con otro, paquemodo kita puede imita con Jehova?

¹³ Aquellos quien tan train con otro debe pricura imita con Jehova. Bondadoso si Jehova ta dale sabeduria con otro. Na igual manera, quierre kita enseña con el cosa kita sabe con aquellos con quien kita tan train. Gendeh kita ta esconde con el cuanto cosas que sabe kita cay ta tiene kita miedo que baka saca sila con el diaton trabajo. Gendeh tambien kita ta pensa: ‘Ciendo nuay conmigo quien yan train, bahala le solo-solo aprende.’ Nuay ansina custumbre el maga siervo de Jehova sino alegre kita enseña el cosa kita sabe. Gane, conforme kita ‘dale el diaton vida’ para con aquellos con quien kita tan train. (1 Tes. 2:8) Por medio con ese, ta esperanza tambien kita que “ay puede tamen sila insiña con otros.” (2 Tim. 2:1, 2) Si todo kita gendeh man alang-alang enseña con el cosa kita sabe, hay queda kita mas sabio y alegre y aquellos tambien con quien kita tan train.

SI DOL NUAY APRECIA EL COSA KITA YA HACE

14. Cosa el reaccion del mayoria si bondadoso kita?

¹⁴ Si bondadoso kita especialmente na diaton maga hermano y hermana, mas mucho kanila ta rindi gracias kanaton. Posible dale sila card o rindi gracias kanaton na otro manera. (Col. 3:15) Si ta aprecia sila con el cosa kita ya hace, ta queda kita mas alegre.

15. Cosa kita debe acorda si nuay rindi gracias kanaton el cuanto?

¹⁵ Pero el deverasan, posible el cuanto gendeh rindi gracias kanaton. Posible ya dale kita diaton tiempo, fuerza o material cosas para ayuda kanila pero dol nuay lang se kanila. Si sucede se, cosa kita puede hace para gendeh perde el diaton alegria o queda desmayao? Acorda con el texto onde yan base el diaton articulo, Maga Actividad 20:35. Si ta dale kita con otro, gendeh ta depende el diaton alegria na diila reaccion. Puede kita queda alegre maskin pa que dol nuay aprecia con el cosa kita ya hace. Cosa puede ayuda kanaton?

16. Cosa puede ayuda kanaton para continua dale con alegria?

¹⁶ Acorda que con Jehova tu ta imita. Ta dale le maga buen cosas na maga gente, ta aprecia man se sila o gendeh. (Mat. 5:43-48) Ya promete si Jehova que si ta dale kita y ‘gendeh ta espera ricibi nada’ hay “recivi [kita] grande premio.” (Luc. 6:35) Poreso, no queda desmayao si nuay kanaton rindi gracias el otro. Acorda que premia kanaton si Jehova cay ta ayuda kita con otro y cay “ta dale [kita] con alegria.”—Prov. 19:17; 2 Cor. 9:7.

17. Cosa pa kita puede hace para puede mentena con el diaton alegria si ta dale? (Lucas 14:12-14)

 ¹⁷ El otro manera para imita con Jehova amo si sigui kita con el principio na Lucas 14:12-14. (Le.) Gendeh malo si queda kita hospitable o bondadoso con aquellos quien puede tambien se hace kanaton. Pero paquemodo si ya realiza kita que tiene vez ta dale kita cay tiene kita cosa ta expecta kanila? Si ansina, pruba hace con el cosa ya habla si Jesus. Queda hospitable con aquellos quien gendeh se puede hace kanaton. Como resulta, hay queda kita alegre cay ta imita kita con Jehova. Puede tambien se ayuda kanaton que mentena con el diaton alegria si nuay rindi gracias kanaton el otro.

18. Cosa puede ayuda kanaton para gendeh pensa negativo con otro?

¹⁸ Evita juzga. (1 Cor. 13:7) Si nuay kanaton rindi gracias, puede kita pregunta na diaton mismo cuerpo: ‘Nuay ba gayot sila aprecia con el cosa yo ya hace o ya ulvida lang sila habla con ese?’ Posible, tiene pa otro razon si porque nuay sila rindi gracias kanaton. El cuanto posible ta aprecia gayot con el cosa kita ya hace pero tan dificil lang sila habla con ese. Baka tan huya sila ricibi ayuda especialmente si sila el quien ta ayuda del antes. Pero si deverasan kita ta ama con el diaton hermano y hermana, gendeh kita pensa negativo kanila y hay continua kita dale con alegria.—Ef. 4:2.

19-20. Porque importante que queda kita paciencioso si ta hace buen cosas con otro? (Mira tambien con el letrato.)

¹⁹ Queda paciencioso. Acerca na pagka-bondadoso si Rey Solomon ya escribi: “Buta con el de tuyu pan na agua cay despues del manada dia hay incuntra tu con ese otravez.” (Ecl. 11:1) Como cosa ta dale mira este texto, el cuanto posible rindi gracias kanaton ‘despues pa del manada dia.’ Considera con el un experiencia.

²⁰ Manada año ya el ya pasa, ya escribi un carta el mujer del circuit overseer con el nuevo bautizao hermana para anima con ele que  esta fiel con Jehova. Despues del maga ocho año, ya escribi carta el hermana con el mujer del circuit overseer que ta habla: “Quierre yo manda sabe contigo que ya puede gayot tu ayuda conmigo del ya pasa maga año maskin pa no sabe tu este.” Mas pa, ya habla le: “Bonito gayot el cosa tu ya habla y nunca yo ulvida con el texto que ya menciona tu.” a Despues menciona con el cuanto dificultad que ya enfrenta le, ya habla el hermana: “Tiene vez quierre ya lang yo descanza sirvi con Jehova. Pero ya anima conmigo el texto que ya dale tu . . . poreso ya continua yo.” Y ya habla pa le: “Durante na aquel ocho año, ese gayot el cosa ya puede ayuda conmigo.” Asigurao, bien alegre el mujer del circuit overseer cuando ya ricibi le con este carta “despues del manada dia.” Posible, pasa pa tambien manada año antes kita ricibi apresacion na buen cosas que ya hace kita con otro.

21. Porque tu determinao imita con el pagka-bondadoso de Jehova?

²¹ Como cosa ya menciona, ya crea kanaton si Jehova que ta queda mas alegre si ta dale contra ta ricibi. Alegre kita si ta puede kita ayuda con el diaton maga hermano y hermana y si ta rindi sila gracias kanaton. Pero aprecia man sila o gendeh con el cosa kita ya hace, alegre kita cay ya hace kita si cosa el justo. Acorda que maskin cosa man tu dale con otro, “si Jehova tiene abilidad para dale contigo mas pa con ese.” (2 Cron. 25:9) Gendeh kita puede dale mas pa na cosa puede dale si Jehova! Y hay queda kita bien alegre si mismo si Jehova el quien premia kanaton. Poreso, queda determinao que continua imita con el diaton bondadoso Tata na cielo.