1. Cosa cerca ya hace si Jesus?

 TA VIVI kita ahora na tiempo donde bien manada cambio ta sucede. Gendeh tarda, hay juzga si Jesus con el cada uno gente aqui na tierra. Para sabe kita si cuando se sucede, ya dale si Jesus un “señal” con el de suyu maga dicipulo—un señal del de suyu presencia y del fin del sistema de maga cosas. (Mat. 24:3) Puede le con este señal na Mateo capitulo 24 y 25, Marcos capitulo 13 y Lucas capitulo 21.

2. Cosa kita discuti na este articulo y porque este puede ayuda kanaton?

² Ya dale si Jesus maga aviso por medio na tres ilustracion. Este amo el ilustracion acerca na maga carnero y cabrito, maga sabio y gendeh sabio dalaga, y el maga talento. El cada ilustracion puede ayuda kanaton para entende que hay juzga si Jesus con el cada persona base na cosa sila ta hace. Mientras tan repaso con este maga ilustracion, mira kita si cosa el maga leccion y si paquemodo kita puede aplica con ese. El primer ilustracion amo acerca na maga carnero y cabrito.

EL MAGA CARNERO Y EL MAGA CABRITO

3. Cuando juzga si Jesus con el maga gente?

³ Na ilustracion acerca na maga carnero y cabrito, ya habla si Jesus que hay juzga le con el maga gente base na diila reaccion na buen noticia y si ya suporta ba sila con el de suyu maga iscujido hermano o nuay. (Mat. 25:31-46) Hay sucede este durante el grande tribulacion, antes sucede el Armagedon. (Mat. 24:21) Igual si paquemodo ta separta el un pastor  con el maga carnero na maga cabrito, hay separta si Jesus con aquellos quien ta suporta con el de suyu maga iscujido siguidores na maga persona quien gendeh ta hace con ese.

4. Asegun na Isaias 11:3, 4, porque kita puede asigura que recto el juzgamiento de Jesus? (Mira tambien con el letrato.)

⁴ Asegun na profecia na Biblia, recto el juzgamiento de Jesus como el iscujido Juez de Jehova. (Le con el Isaias 11:3, 4.) Hay observa le con el conducta, custumbre y converzada del maga gente—incluido si paquemodo sila ta trata con el de suyu maga iscujido hermano. (Mat. 12:36, 37; 25:40) Sabe si Jesus si quien ta suporta con el de suyu maga iscujido hermano y con el diila trabajo. a El uno na maga de con todo importante manera que puede suporta el un persona con el maga hermano del Cristo amo si ayuda le kanila na predicacion. Hay juzga si Jesus como “bueno” o recto con aquellos quien ta hace con ese y hay tene sila el esperanza de “Vida Eterno” na tierra. (Mat. 25:46; Rev. 7:16, 17) Un bien grande bendicion gayot este para con aquellos quien mentena con el diila integridad! Si esta sila fiel durante el grande tribulacion y despues de ese tiempo, hay esta el diila nombre na “Libro del Vida.”—Rev. 20:15.

5. Cosa el leccion na ilustracion acerca na maga carnero y cabrito, y para con quien este?

⁵ Esta fiel y leal. Aplicable el ilustracion de Jesus acerca na maga carnero y cabrito para con aquellos quien tiene esperanza que vivi hasta para cuando aqui na tierra. Puede sila demonstra el diila fe si suporta sila con el maga hermano del Cristo na trabajo predicacion y si sigui sila con el direccion del diutay grupo de maga iscujido hermano con quien ya iscuji si Jesus. (Mat. 24:45) Pero aplicable tambien este ilustracion con aquellos quien tiene esperanza na cielo. Porque? Cay ta vicia si Jesus con el diila conducta, custumbre y converzada. Debe tambien sila esta fiel. Gane, ya dale pa si Jesus dos ilustracion como aviso con el maga iscujido. Puede tambien kita le con este maga ilustracion na Mateo capitulo 25. Discuti kita ahora con el ilustracion acerca na maga sabio y gendeh sabio dalaga.

EL MAGA SABIO Y GENDEH SABIO DALAGA

6. Paquemodo ya dale mira el cinco dalaga que sabio sila? (Mateo 25:6-10)

⁶ Na ilustracion acerca na maga dalaga, ya menciona si Jesus acerca con el diez virgen dalaga quien ya sale para hace encuentro con el novio. (Mat. 25:1-4) Todo sila quierre que man junto con el novio na de suyu celebracion de casamiento. Ya habla si Jesus que “ajuiciao” o sabio el cinco kanila y “nuay juicio” o gendeh sabio el otro cinco. Preparao y alerto el maga sabio dalaga. Preparao sila espera con el novio maskin bien denoche ya este llega. Poreso, ya lleva sila maga lampara para tiene sila luz. Ya lleva pa gane sila paaman aceite para usa na diila maga lampara en caso atrasa el novio. Claro que preparao gayot sila. (Le con el Mateo 25:6-10, El Nuevo Testamento.) Cuando ya llega el novio, ya sigui con ele el maga sabio dalaga para na celebracion de casamiento. Na igual manera, el maga iscujido Cristiano, quien ya esta preparao cay ya esta sila alerto y fiel hasta na llegada del Cristo, hay puede man junto con el Novio, si Jesus, na de suyu Reino na cielo. b (Rev. 7:1-3) Quetal el cinco gendeh sabio dalaga?

7. Cosa ya sucede con el cinco gendeh sabio dalaga y porque?

 ⁷ Pero, gendeh preparao el cinco gendeh sabio dalaga cuando ya llega el novio. Cerca ya apaga el diila maga lampara y nuay sila lleva paaman aceite. Cuando cerca ya llega el novio, ya anda sila cumpra aceite. Nuay pa sila puede bira cuando ya llega el novio. Pero, el maga dalaga quien “daan ya preparao ya entra na casa junto con el novio para celebra ya el casamiento, y trancao ya el puerta.” (Mat. 25:10, El Nuevo Testamento) Cuando ya bira el maga gendeh sabio dalaga y quierre entra na celebracion, ya habla kanila el novio: “No conoce yo con ustedes.” (Mat. 25:11, 12, El Nuevo Testamento) Gendeh preparao aquellos maga dalaga para espera con el novio. Cosa el leccion para na maga iscujido Cristiano?

8-9. Cosa puede aprende el maga iscujido na ilustracion acerca na maga dalaga? (Mira tambien con el letrato.)

⁸ Esta preparao y alerto. Gendeh quierre decir de Jesus que tiene dos clase de maga iscujido—el un grupo ta esta preparao hasta na fin y el otro grupo gendeh. Sino, ta habla lang le si cosa sucede con el maga iscujido si gendeh sila esta fiel y si gendeh sila preparao aguanta hasta na fin. Cay si sucede se, gendeh sila ricibi con el diila premio. (Juan 14:3, 4) Un importante aviso este! Na cielo man o na tierra el diaton esperanza, todo kita debe sigui con el aviso na ilustracion acerca na maga dalaga. El cada uno kanaton debe esta alerto y queda preparao aguanta hasta na fin.—Mat. 24:13.

⁹ Na ilustracion acerca na maga dalaga, ya hace claro si Jesus que el maga Cristiano necesita esta preparao y alerto. Despues de ese, ya relata le con el ilustracion acerca na maga talento. Ese ilustracion ta enseña con el maga iscujido que queda trabajador.

EL MAGA TALENTO

10. Paquemodo ya dale mira el dos esclavo que fiel sila? (Mateo 25:19-23)

¹⁰ Na ilustracion acerca na maga talento, ya menciona si Jesus acerca na dos esclavo  quien fiel na diila amo y el un esclavo quien gendeh fiel. (Mat. 25:14-18) Fiel el dos esclavo cay ya trabaja sila enbuenamente para omenta el sen del diila amo. Antes de sale el amo, ya dale le kanila un bien grande cantidad de sen que ta llama talento. Trabajador el dos fiel esclavo y ya usa con el sen enbuenamente. Cosa el resulta? Cuando ya bira el amo, ya dobla sila el cantidad de sen que ya dale kanila. Ya comenda kanila el diila amo poreso ya puede sila “entra y participa na alegria del [diila] amo.” (Le con el Mateo 25:19-23.) Pero quetal el ika-tres esclavo? Cosa le ya hace con el sen que ya dale con ele?

11. Cosa ya sucede con el “flojo” esclavo y porque?

¹¹ Ya ricibi un talento el ika-tres esclavo. Ta expecta el de suyu amo que usa le con este enbuenamente. Pero, plojo este esclavo y ya entera con el talento na tierra. Cuando ya bira el amo, un talento siempre el cosa ya debolbe el esclavo. Gendeh tambien bueno el custumbre del esclavo. En vez de pidi despensa cay nuay le puede omenta con el sen, ya habla pa le que “un gente estricto” el de suyu amo. Poreso, nuay con ele premia. Puera con ese, ya saca con ele el talento y ya arria con ele el de suyu amo.—Mat. 25:24, 26-30.

12. Con quien ta representa ahora el dos fiel esclavo?

¹² El dos fiel esclavo ta representa con el maga fiel iscujido Cristiano. El diila Amo, si Jesus, ta invita kanila que “entra y participa na alegria del [diila] amo.” Hay ricibi sila con el diila premio na cielo, el primer resureccion. (Mat. 25:21, 23; Rev. 20:5b) Pero, un aviso para na maga iscujido Cristiano el cosa ya sucede con el plojo esclavo.

13-14. Cosa puede aprende el maga iscujido na ilustracion acerca na maga talento? (Mira tambien con el letrato.)

¹³ Queda trabajador. Igual na ilustracion acerca na maga dalaga, cuando ya relata si Jesus con el ilustracion acerca na maga talento, gendeh le ta habla que hay queda plojo el maga iscujido. Sino, ta habla lang le si cosa sucede kanila si gendeh sila esta activo. “Ay perde ese [diila] llamada y escujida”  y gendeh sila puede entra na Reino na cielo.—2 Ped. 1:10.

¹⁴ El ilustracion de Jesus acerca na maga dalaga y na maga talento ta hace claro con el todo iscujido Cristiano que debe sila esta preparao, alerto y trabajador. Pero tiene pa ba otro aviso ya dale si Jesus para na maga iscujido? Tiene pa! Puede kita le con ese aviso na cosa le ya habla na Mateo 24:40, 41.

QUIEN HAY RICIBI EL DIILA PREMIO NA CIELO?

15-16. Paquemodo el Mateo 24:40, 41 ta hace claro que necesita esta alerto el maga iscujido?

¹⁵ Antes relata si Jesus con el tres ilustracion, ya habla le que juzga le con el maga iscujido base si aprobao ba sila o gendeh. Ya menciona le acerca con el dos hombre quien ta trabaja na simentera y con el dos mujer quien ta trabaja na molino. Na cada situacion, dol igual el cosa sila ta hace pero ya habla si Jesus que “ay saca con el uno y ay deja con el otro.” (Le con el Mateo 24:40, 41.) Despues, ya anima le con el de suyu maga siguidores: “Esta alerto, cay no sabe ustedes si cosa dia ay llega el de ustedes Señor.” (Mat. 24:42) Semejante con ese el cosa ya habla si Jesus despues le relata con el ilustracion acerca na maga dalaga. (Mat. 25:13) Dol conectao el cosa le ya habla na ese dos ocasion. Con el maga verdadero y fiel iscujido Cristiano lang hay saca si Jesus para na Reino na cielo.—Juan 14:3.

¹⁶ Esta alerto. Aquellos quien tiene esperanza na cielo quien gendeh esta alerto na espiritual gendeh queda parte del “maga escujido” quien subi na cielo. (Mat. 24:31) Pero, el todo siervo del Dios, maskin onde pa el diila esperanza, debe oi con el aviso de Jesus que esta alerto y esta fiel.

17. Porque kita gendeh debe man lingasa si cuando iscuji si Jehova por medio na de suyu sagrao espiritu con el cuanto Cristiano?

¹⁷ Bien conoce kita con Jehova poreso ta confia kita con el de suyu maga juzgamiento. Gendeh kita tan lingasa si iscuji si Jehova por medio del de suyu sagrao espiritu con el cuanto Cristiano na diaton tiempo ahora. c Ta acorda kita con el cosa ya habla si Jesus acerca con aquellos quien ya trabaja na ika-11 hora na de suyu ilustracion acerca na uvasan. (Mat. 20:1-16) Igual el sueldo que ya ricibi el maga ya trabaja na uvasan, temprano man sila ya principia o bien tarde ya. Na igual manera, maskin cuando pa ya iscuji con el un Cristiano, hay ricibi le con el de suyu premio na cielo si esta le fiel.

SIGUI CON EL MAGA AVISO

18-19. Cosa maga leccion y aviso kita ya puede discuti?

¹⁸ Cosa kita ya discuti? El ilustracion acerca na maga carnero y cabrito ya hace claro con aquellos quien tiene esperanza aqui na tierra que debe sila esta fiel y leal con Jehova ahora y na grande tribulacion. Na ese tiempo, hay juzga kanila si Jesus y el maga fiel hay ricibi “Vida Eterno.”—Mat. 25:46.

¹⁹ Ya considera tambien kita dos ilustracion que ta dale aviso para na maga iscujido. Na ilustracion de Jesus acerca na maga dalaga, cinco kanila el sabio. Preparao sila y alerto que espera con el novio maskin cosa hora pa este llega. Pero gendeh preparao el maga gendeh sabio dalaga. Poreso, nuay kanila manda entra el novio na celebracion de casamiento. Debe tambien kita queda preparao que espera si cuando destroza si Jesus con el sistema de maga cosas maskin paquemodo  pa se de tarda. Ya puede tambien kita discuti na ilustracion acerca na maga talento que trabajador el dos fiel esclavo. Ya trabaja sila enbuenamente poreso ya ganá sila el favor del diila amo. Pero, ya arria con el plojo esclavo. Cosa kita puede aprende? Debe kita esta ocupao na servicio con Jehova hasta na fin. Ya puede tambien kita considera que debe esta alerto el maga iscujido para puede sila ricibi el diila premio na cielo. Ta espera gayot este maga iscujido con el tiempo cuando hay “man junto” sila con Jesus na cielo. Despues del guerra de Armagedon, queda sila el novia quien hay casa con el Carnero.—2 Tes. 2:1, El Nuevo Testamento; Rev. 19:9.

20. Cosa hace si Jehova para con aquellos quien sigui con el de suyu maga aviso?

²⁰ Maskin pa bien cerca ya juzga si Jesus con el maga gente, gendeh kita debe tene miedo. Si esta kita fiel, el diaton amable Tata na cielo hay dale kanaton “el grande poder” para ‘puede kita con confianza man atubang con el Anak del Gente.’ (2 Cor. 4:7; Luc. 21:36) Na cielo man o na tierra el diaton esperanza, hay queda alegre el diaton Tata si sigui kita con el maga aviso na maga ilustracion de Jesus. Y por causa na incomparable pagka-bueno de Jehova, el diaton maga nombre hay queda “escribido na libro” de vida.—Dan. 12:1; Rev. 3:5.