Ya nace yo del 1934. Estaba na Switzerland el de mio mayores quien ya anda na Timmins, un ciudad na Ontario, Canada. Del maga 1939, ya principia le el de mio nana con el magasin El Torre de Guardia y ya atende na maga miting del maga Testigo de Jehova. Ta lleva tambien le kanamon siete man hermano y hermana. Nuay dura, ya queda le uno del maga Testigo de Jehova.

Gendeh alegre el de mio tata na decision de Mamang pero ta ama si Mamang con el verdad y ya esta le leal con Jehova. Ya esta le na verdad maskin pa ya prohibi con el trabajo del maga Testigo de Jehova na Canada del maga 1940. Pirmi bueno y respetoso si Mamang con Papang maskin pa ta habla malo si Papang con ele. El de suyu buen ejemplo ya ayuda conmigo y con el de mio maga hermano y hermana para acepta tambien con el verdad. Na uliji, alegre gayot kame cay ya cambia el custumbre de Papang y enbuenamente ya le ta trata kanamon.

Del Agosto 1950, ya atende yo na Theocracy’s Increase Assembly na New York City. Despues conoce con el maga hermano y hermana estaba na entero mundo y oi con el maga bonito interview de aquellos quien ya gradua na Gilead, ya motiva se conmigo para hace pa mas na servicio con Jehova. Mas ya queda yo determinao que sirvi con Jehova full-time. Cuando ya bolbe yo, yan apply dayun yo como un regular pioneer. Pero, ya habla conmigo el branch na Canada que bautiza anay yo y ya hace yo se del Octubre 1, 1950. Despues del un mes, ya queda yo un regular pioneer y yan assign conmigo na Kapuskasing. Bien lejos ese barrio na lugar onde yo ta queda.

Del 1951, ya invita el branch office con el maga Testigo de Jehova quien sabe converza  French que transfiri na provincia de Quebec que French el lengguaje. Grande el necesidad na ese lugar. Ciendo ya engranda yo que sabe converza French y English, ya acepta yo con el invitacion y yan assign conmigo na Rouyn. Nuay yo con quien conoce alla. Address lang yo tiene, como ya relata yo enante. Pero ya bendici conmigo si Jehova. Ya queda kame man amigo de Marcel y alegre yo ya sirvi na Quebec por cuatro año y na uliji, como un special pioneer.

Mientras talla yo na Quebec, alegre gayot yo cuando ya invita conmigo na ika-26 clase de Gilead na South Lansing, New York. Ya gradua yo del Febrero 12, 1956, y yan assign conmigo na un lugar que ta llama ahora Ghana, b na West Africa. Pero antes yo anda alla, necesita yo bira na Canada para prepara con el de mio maga documento. Pensaba yo cuanto semana lang yo necesita espera.

Ya espera yo siete meses na Toronto para na ese maga documento. Na aquel tiempo, ya queda yo na casa del familia Cripps y alla ya conoce yo con el diila anak, si Sheila. Ya queda le de mio novia. Cuando ta plaña yo para casa con ele, ya llega el de mio visa. Ya reza kame de Sheila acerca con este y ya decidi que debe yo anda na de mio assignment. Pero ya escribi siempre kame carta con uno y otro para mira si puede ba kame casa na futuro. Gendeh quel facil decision pero ya realiza kame na uliji que justo el cosa kame ya hace.

Despues viaja por un mes por medio na train, barco y eroplano, ya llega yo na Accra, Ghana. Yan assign conmigo alla como un district overseer poreso necesita yo viaja na entero Ghana, Ivory Coast (Côte d’Ivoire ahora) y na Togoland (Togo ahora). Mas mucho, solo-solo lang yo ta viaja usando el coche que ya dale el branch. Yan enjoy gayot yo ese maga tiempo!

Basta Sabado y Domingo, tiene yo assignment na maga asemblea de circuito. Nuay kame Assembly Hall poreso para gendeh quema na sol el maga ta atende, ta hace techo el maga hermano usando el caña y palma. Cay nuay kame ref na  cafeteria, ta prepara kame maga vivo animal y ta mata con ese para dale come con el maga ta atende.

Tiene kame maga maka-risas experiencia na ese maga asemblea. Un tiempo cuando ta dale talk el un misionario que si Herb Jennings, c tiene vaca ya escapa na cafeteria. Ya anda este entre medio del stage y del maga gente. Ya descanza man cuento si Hermano Herb y dol bien espantao el animal. Pero ya puede con este cuji el cuatro hermano y ya lleva con este na cafeteria, y alegre gayot el maga hermano y hermana mientras ta mira kanila.

Si nuay asemblea, ta anda yo na maga cerca barrio y ta dale mira con el salida The New World Society in Action. Ta usa yo un projector para dale mira el salida na un blanco tela que amarrao na dos poste o dos pono. Ya gusta gayot se el maga gente! Manada kanila el primer vez ya mira salida. Suena gayot sila ta tuca mano cuando ya mira sila que ta bautiza con el maga gente. Por causa na ese salida, ya puede sila mira que unido el maga Testigo de Jehova na entero mundo.

Despues del maga dos año na Africa, excited gayot yo atende na international convention na New York City del 1958. Alegre gayot yo que mira otravez con Sheila, quien estaba na Quebec, onde le ta sirvi como un special pioneer. Ta continua kame escribi carta con uno y otro pero ahora cay yan mirajan kame otravez, ya pregunta yo si quierre le casa conmigo. Ya conforma le. Ya escribi yo carta con Hermano Knorr d y ya pregunta con ele si puede ba atende na Gilead si Sheila y despues, man junto conmigo na Africa. Ya conforma si Hermano Knorr. Despues del cuanto tiempo, ya llega si Sheila na Ghana y ya casa kame na Accra, del Octubre 3, 1959. Ya puede kame sinti que ya bendici gayot kanamon si Jehova cay ya hace kame una con ele na diamon vida.

Del 1961, yan assign kanamon na Cameroon. Ya pidi conmigo que ayuda establicia un nuevo branch office alla poreso bien busy gayot yo. Como un nuevo branch servant, manada gayot yo cosa para aprende. Despues, del 1965, ya  sabe kame que priñada si Sheila. Dificil para pensa que queda ya kame mayores. Pero cuando ta prepara ya era kame para na este nuevo responsibilidad y ta plaña bira na Canada, tiene tragedia ya sucede.

Ya malpari si Sheila. Ya habla kanamon el doctor que hombre el bata. Mas de 50 año ya el ya pasa pero gendeh siempre kame quel ta ulvida. Maskin pa bien triste kame na cosa ya sucede, ya decidi kame que esta na diamon assignment na Cameroon.

Manada beses ta persigui con el maga hermano y hermana na Cameroon por causa na diila neutralidad. Mas grabe el situacion alla si tiempo de eleccion del presidente. Despues, del Mayo 13, 1970, ya prohibi ya gayot con el trabajo del maga Testigo de Jehova na ese nacion. Cinco meses pa lang kame na diamon nuevo facilidad pero ya saca con ese el gobierno. El todo maga misionario—incluido kame dos de Sheila—forzao ya sale na ese nacion adentro lang del un semana. Dificil gayot que deja con el maga hermano y hermana con quien kame ta ama y malingasa kame si cosa kanila sucede alla.

Ya esta kame na branch office na France por seis meses. Alla, ya pricura yo hace el todo para puede suporta con el diaton maga hermano y hermana na Cameroon. Pagka-Deciembre na ese mismo año, yan assign kanamon na Nigeria branch que amo ya ahora el ta mira con el trabajo na Cameroon. Alegre kanamon yan welcome el maga hermano y hermana na Nigeria y ya sirvi kame alla por manada año.

Del 1973, necesita kame hace un bien dificil decision. Por cuanto tiempo ya, tiene grabe enfermedad si Sheila. Cuando na New York kame para atende na un convencion, ya llura le y ya habla conmigo: “Gendeh mas yo este puede aguanta! Pirmi ya lang yo cansao y enfermo.” Ya sirvi le junto conmigo na West Africa por mas de 14 año. Proud gayot yo na de suyu servicio con Jehova pero necesita kame hace maga cambio. Despues discuti acerca na diamon situacion y reza acerca con este, ya decidi kame que debe kame bira na Canada donde mas puede cura con ele. Este el de con todo dificil decision que ya hace kame cay necesita kame sale na diamon assignment como maga misionario y descanza sirvi full-time.

Cuando ya llega kame na Canada, ya puede yo trabaja na de mio amigo quien tiene negocio que ta vende maga auto na norte parte del Toronto. Yan renta kame apartment, ya cumpra maga segundo mano gamit na casa y ya puede kame continua na diamon vida que nuay debe. Ya hace kame simple el diamon vida cay quierre kame sirvi full-time otravez. Y nuay kame expecta que ya puede dayun kame alcanza con ese goal.

Ya principia yo man volunteer cada Sabado na construida del un nuevo Assembly Hall na Norval, Ontario. Despues del cuanto tiempo, yan assign conmigo para sirvi como Assembly Hall overseer. Ciendo mas enbuenamente ya el salud del Sheila, ya sinti kame que puede le cumpli con este nuevo assignment. Poreso, ya transfiri kame na  apartment na Assembly Hall del Junio 1974. Alegre gayot kame que puede sirvi otravez full-time!

Ya continua queda mas enbuenamente el salud de Sheila. Despues del dos año, ya acepta kame un assignment na circuit work na Manitoba, un provincia na Canada que bien frio. Bien amable gayot el maga hermano y hermana alla. Ya puede kame aprende que gendeh importante si onde kame ta sirvi. El importante amo que continua sirvi con Jehova.

Despues sirvi na circuit work por cuanto año, ya invita kanamon que sirvi na Canada Bethel del 1978. Nuay dura despues se, ya aprende yo un duele pero importante leccion. Yan assign conmigo que dale uno y media hora talk na French na un special meeting na Montreal. Maka-triste, nuay gana oi el maga ta atende con el de mio talk poreso ya conseja conmigo el un hermano de Service Department acerca con ese. Nuay yo pensa que gendeh yo bueno dale talk poreso nuay yo acepta con el de suyu consejo. Nuay kame man tupajan y ya rabia yo cay dol sobra le de istricto y nuay le comenda conmigo. Nuay yo acepta con el consejo por causa na manera si paquemodo con ese ya dale y por causa na de mio negativo mirada con el persona quien ya dale con ese.

Despues del cuanto dia, yan cuento conmigo el un miembro del Branch Committee acerca con aquel. Ya admiti yo que gendeh bueno el de mio reaccion na consejo que ya dale conmigo y ya pidi yo despensa. Despues quel, yan cuento yo con el hermano quien ya conseja conmigo y ya perdona le conmigo. Ya aprende yo na aquel experiencia que bien importante queda humilde y nunca yo se ulvida. (Prov. 16:18) Manada beses yo ya reza con Jehova acerca con este y determinao yo que acepta maskin cosa consejo que hay dale conmigo.

Mas de 40 año ya yo ta sirvi na Canada Bethel y desde 1985, ya tiene yo el privilegio que sirvi como miembro del Branch Committee. Del Febrero 2021, ya despidi el de mio mujer, si Sheila. Puera que triste yo cay nuay mas ya le, tiene tambien yo maga problema na salud. Pero cay ocupao yo y alegre na servicio con Jehova, ‘gendeh yo tanto ta puede nota con el pasada del maga dia.’ (Ecl. 5:20) Maskin pa ya enfrenta yo maga dificultad na de mio vida, mas manada siempre el maga cosas que ta hace conmigo alegre. Alegre gayot yo cay ya hace yo una con Jehova na de mio vida y ta sirvi full-time por 70 año. Ojala hay continua tambien hace una con Jehova el maga joven hermano y hermana cay convincido yo que hay tene tambien sila alegre vida. Hay queda lang se posible si sirvi kita con Jehova.