1-2. (a) Cosa el situacion na Judea cuando ya escribi si apostol Pablo con el carta para na maga Hebreo? (b) Porque justo gayot na tiempo este carta?

 DESPUES del muerte de Jesus, ya experiencia dificultad el maga Hebreo Cristiano quien ta queda na Jerusalem y na Judea. Na ese tiempo, ya forma con el Cristiano congregacion y ya persigui gayot con el maga Cristiano. (Act. 8:1) Maga 20 año despues, ya enfrenta grabe dificultad el maga siguidores del Cristo—posible por causa na hambre que ya sucede na diila lugar. (Act. 11:27-30) Pero del maga 61 C.E., nuay tanto experiencia persecucion el maga Cristiano. Durante ese tiempo de paz, ya guia si Jehova con apostol Pablo para escribi kanila un carta. Ese carta ya puede gayot prepara kanila na maga cosas que cerca ya sucede.

² Justo gayot na tiempo el carta para na maga Hebreo cay temporario lang el paz que ya experiencia el maga Cristiano. Ya dale consejo si Pablo que puede ayuda con el maga Cristiano para aguanta con el cosa cerca ya sucede. Gendeh tarda, hay destroza con el Jerusalem como cosa ya habla ya daan si Jesus. (Luc. 21:20) Siempre, no sabe si Pablo o el maga Cristiano na Judea si cuando exacto sucede ese destrozo. Maskin pa ansina, puede usa el maga Cristiano con el tiempo que tiene sila para queda preparao. Necesita sila cultiva fe y aprende si paquemodo aguanta.—Heb. 10:25; 12:1, 2.

3. Porque importante para na maga Cristiano ahora el carta para na maga Hebreo?

³ Gendeh tarda, hay experiencia kita un tribulacion que mas grabe pa na cosa ya experiencia el maga Hebreo Cristiano. (Mat. 24:21; Rev. 16:14, 16) Poreso, considera kita cuanto consejo que ya dale kanila si Jehova que puede tambien ayuda kanaton.

 CONTINUA PROGRESA NA ESPIRITUAL

4. Cosa maga dificultad ya enfrenta el maga Judio Cristiano? (Mira tambien con el letrato.)

⁴ Gendeh gayot facil el dificultad que ya experiencia el maga Judio quien ya queda Cristiano. Del antes, ya iscuji si Jehova con el maga Judio como de suyu maga siervo. Por manada año, un bien importante lugar el Jerusalem cay alli ta rula el maga rey quien ta representa con Jehova y el templo de este amo el centro del puro adoranza. El todo fiel Judio ta sigui con el Ley de Moises y con el maga ley que ya enseña kanila el diila maga religioso lider. Ta sigui sila con el maga ley acerca na comida, capada y maskin el diila mirada na maga Gentil. Pero despues del muerte de Jesus, gendeh mas ta acepta si Jehova con el maga sacrificio que ta hace na templo. Yan dificil gayot el maga Judio quien ya queda Cristiano cay yan anad sila sigui con el Ley de Moises. (Heb. 10:1, 4, 10) Gane, maskin el maga mature Cristiano igual con apostol Pedro yan dificil sigui con el cuanto de este maga cambio. (Act. 10:9-14; Gal. 2:11-14) Por causa na nuevo creencia del maga Cristiano, ya persigui kanila el maga Judio religioso lider.

5. Na cosa debe queda con cuidao el maga Cristiano?

⁵ Ya experiencia oposicion el maga Hebreo Cristiano estaba na dos grupo. Ta mira kanila el maga Judio religioso lider como maga apostata. Mas pa, el cuanto na congregacion ta insisti que debe continua sigui el maga siguidores del Cristo con el cuanto aspeto del Ley de Moises—posible, para gendeh kanila persigui. (Gal. 6:12) Cosa puede ayuda con el maga fiel Cristiano para esta na verdad?

6. Cosa ya anima si Pablo que hace el maga hermano y hermana? (Maga Hebreo 5:14–6:1)

⁶ Na de suyu carta para na maga Hebreo, ya anima si Pablo con el maga hermano y hermana que estudia y medita con el Palabra del Dios. (Le con el Maga Hebreo 5:14–6:1.) Ya usa le con el Hebreo Escritura para explica con el de suyu maga hermano si porque mas bueno el manera de adoranza del maga  Cristiano contra na Judaismo. a Sabe si Pablo que si tiene saber el maga Cristiano y ta entende con el Escritura, puede este ayuda kanila para identifica con el maga falso enseñanza y desaleja con ese.

7. Cosa maga dificultad kita ta enfrenta ahora?

⁷ Igual na maga Hebreo Cristiano, ta puede kita le maga informacion o oi maga idea que contra na principio de Jehova. El cuanto ta habla que gendeh justo el diaton creencia acerca na moralidad. Poreso, ta pensa sila que gendeh kita amable y bien istricto. Bien diferente gayot el mirada del maga gente ahora compara na mirada de Jehova acerca si cosa el bueno y malo. (Prov. 17:15) Poreso, bien importante que sabe kita identifica con el maga falso enseñanza y desaleja con ese. Si hace kita se, gendeh kita man luya o disvia na verdad.—Heb. 13:9.

8. Cosa kita hace para continua progresa na espiritual?

⁸ Debe kita sigui con el consejo que ya dale si Pablo con el maga Hebreo Cristiano que continua progresa na espiritual. Quierre decir de este que debe kita estudia enbuenamente con el Palabra del Dios y sigui si paquemodo ta pensa si Jehova. Necesita kita continua hace con ese maskin despues del diaton dedicacion y bautismo. Maskin paquemodo de tarda ya kita na verdad, todo kita debe regular le y estudia con el Palabra del Dios. (Sal. 1:2) Si tiene kita buen rutina de personal estudiada, puede este ayuda kanaton para tene fuerte fe—un calidad que ya menciona si Pablo na de suyu carta para na maga Hebreo.—Heb. 11:1, 6.

TENE FUERTE FE

9. Porque importante para na maga Hebreo Cristiano que tene fuerte fe?

⁹ Necesita fuerte fe el maga Hebreo Cristiano para sobrevivi sila na tribulacion que cerca ya sucede na Judea. (Heb. 10:37-39) Ya dale aviso si Jesus con el de suyu maga siguidores que debe sila escapa para na maga monte si puede sila mira con el maga campo del maga soldao alrededor na Jerusalem. Aplicable el de suyu consejo para na todo maga Cristiano—ta queda man sila na aquel ciudad o na maga barrio na Judea. (Luc. 21:20-24) De antes, si tiene maga soldao quien quierre ataca na un lugar, el maga gente ta anda na maga ciudad que tiene alto pader igual na Jerusalem para queda protegido. Dol gendeh justo que escapa para na maga monte poreso necesita sila grande fe para sigui con el direccion de Jesus.

10. Cosa hace el maga Cristiano si tiene sila fuerte fe? (Maga Hebreo 13:17)

¹⁰ Necesita tambien confia el maga Hebreo Cristiano con aquellos con quien ta usa si Jesus para guia con el congregacion. Posible que dale especifico instruccion aquellos quien ta guia con todo na congregacion para puede sila sigui con el direccion na justo tiempo y na organizao manera. (Le con el Maga Hebreo 13:17, NWT.) El Griego palabra que yan translate “queda obediente” na Maga Hebreo 13:17 ta dale idea que ta obedece el un persona con el quien ta dale direccion gendeh lang cay tiene este autoridad sino cay ta confia le con este. Entonces, necesita aprende confia el maga Hebreo Cristiano con aquellos quien ta guia kanila antes pa llega el destrozo. Si ta obedece ya sila con el instruccion de aquellos quien ta guia mientras enbuenamente pa el situacion, mas facil  ya para kanila que obedece na tiempo de dificultad.

11. Porque importante para na maga Cristiano ahora que tene fuerte fe?

¹¹ Igual na maga Hebreo Cristiano, necesita tambien kita tene fe. Ta vivi kita na tiempo donde mayoria del maga gente gendeh ta creé que hay destroza con este sistema de maga cosas. Ta gangguia pa gane sila kanaton cay ta creé kita con ese. (2 Ped. 3:3, 4) Y maskin pa ya dale manada detalle el Biblia acerca si cosa sucede na grande tribulacion, manada siempre maga cosas el no sabe kita. Poreso, necesita kita tene fuerte fe que hay llega na justo tiempo el fin y que hay cuida kanaton si Jehova.—Hab. 2:3.

12. Cosa puede ayuda kanaton para sobrevivi na grande tribulacion?

¹² Debe tambien kita tene fuerte fe que ta usa si Jehova con “el fiel y sabio esclavo” para guia kanaton. (Mat. 24:45, NWT) Posible que ya ricibi instruccion el maga Hebreo Cristiano cuando yan campo el maga Romano soldao alrededor del Jerusalem. Si principia ya el grande tribulacion, posible ricibi tambien kita maga instruccion que puede salva con el diaton vida. Ahora ya el tiempo para hace mas fuerte con el diaton confianza na direccion que ta ricibi kita con aquellos quien ta guia na organizacion de Jehova. Si gendeh kita ta sigui con el diila direccion ahora, mas dificil ya para kanaton que sigui con el diila direccion na grande tribulacion.

13. Porque importante el consejo na Maga Hebreo 13:5?

¹³ Mientras ta espera sila con el tiempo si cuando sila escapa para na maga monte, necesita tambien mentena simple vida el maga Hebreo Cristiano y no ama con el sen. (Le con el Maga Hebreo 13:5, El Nuevo Testamento.) El cuanto kanila ya experiencia hambre y pobreza. (Heb. 10:32-34) De antes, conforme sila aguanta na maga dificultad para na bien del buen noticia. Pero posible tambien que el cuanto ya principia pricura tene mas manada sen y ya pensa que puede se protege kanila. Pero maskin paquemodo pa de manada el diila sen, gendeh se puede protege kanila na destrozo que hay llega. (Sant. 5:3) Gane, aquellos quien ta ama con el maga material cosas posible mas man dificil sale y deja con el diila maga casa y propiedad.

14. Si tiene kita fuerte fe, paquemodo se puede afecta con el diaton maga decision acerca na maga material cosas?

¹⁴ Gendeh kita cae na trampa de materialismo si tiene kita fuerte fe que cerca ya gayot destroza si Jehova con este sistema de maga cosas. El Biblia ya habla que el maga gente ‘hay buta con el diila plata na camino’ cay puede sila realiza que “gendeh kanila puede salva el diila plata y oro na dia del rabia de Jehova.” (Eze. 7:19) En vez de pricura tene bien manada sen, necesita kita hace maga decision que puede ayuda kanaton para tene simple y balance vida. Evita kita man debe si gendeh necesita o usa manada tiempo para mentena con el maga cosas que tiene kita. Con cuidao tambien kita que gendeh dale sobra importancia con el diaton maga material cosas. (Mat. 6:19, 24) Mientras ta queda mas cerca el fin de este sistema, necesita kita iscuji si confia ba kita con Jehova o na diaton maga material cosas.

CONTINUA AGUANTA

15. Porque necesita continua aguanta el maga Hebreo Cristiano?

¹⁵ Necesita continua aguanta el maga Hebreo Cristiano cay hay queda mas grabe el condicion na Judea. (Heb. 10:36) Maskin pa  ya enfrenta ya grabe persecucion el cuanto kanila, manada kanila el ya queda Cristiano cuando enbuenamente pa el situacion. Poreso, ya hace kanila acorda si Pablo que queda preparao para na mas persecucion y esta fiel hasta na diila muerte igual con Jesus. (Heb. 12:4) Cay mas manada ya el quien ta queda Cristiano, mas ya queda bien rabiao y violente el manada Judio. Gane, cuanto año antes le escribi con el de suyu carta, ya ataca con Pablo el bien manada gente na Jerusalem. Mas de 40 Judio el “ya hace . . . un promesa que gendeh sila ay come o toma ni nada hasta ay puede sila mata con Pablo.” (Act. 22:22; 23:12-14) Maskin pa odia y persigui kanila, necesita siempre man junto-junto el maga Cristiano para na adoranza, predica con el buen noticia y mentena fuerte fe.

16. Paquemodo el carta para na maga Hebreo ya puede ayuda kanila para tene justo mirada na persecucion? (Maga Hebreo 12:7)

¹⁶ Cosa puede ayuda con el maga Hebreo Cristiano para aguanta con el oposicion que hay enfrenta sila? Quierre kanila ayuda si Pablo para tene justo mirada na diila maga probanza. Poreso, ya habla le kanila que posible permiti el Dios que experiencia sila maga probanza para man train kanila. (Le con el Maga Hebreo 12:7.) Ese training puede ayuda kanila para cultiva maga Cristiano calidad. Si pensa el maga Hebreo Cristiano si cosa el resulta del diila maga probanza, mas puede se ayuda kanila para aguanta.—Heb. 12:11.

17. Cosa sabe si Pablo acerca na persecucion?

¹⁷ Ya anima si Pablo con el maga Hebreo Cristiano que queda mas determinao que aguanta na diila maga probanza. Puede gayot le ayuda kanila si paquemodo aguanta na persecucion. Ciendo ta persigui le con el maga Cristiano de antes, sabe le si cosa sila hay enfrenta. Pero sabe tambien le si cosa sila necesita hace para aguanta con ese.  Gane, ele mismo ya experiencia diferente clase de oposicion despues queda un Cristiano. (2 Cor. 11:23-25) Poreso ya hace le acorda con el maga Cristiano que si ta enfrenta sila maga probanza, gendeh sila debe confia na diila mismo cuerpo sino con Jehova. Si Pablo ya habla: “[Si Jehova] amo el quien ta ayuda conmigo. Gendeh yo ay tene miedo.”—Heb. 13:6.

18. Para puede aguanta na persecucion, cosa kita debe sabe acerca na futuro?

¹⁸ El cuanto hermano ta experiencia ahora maga persecucion. Puede kita suporta kanila por medio na diaton rezo y tiene vez, por medio na maga practical manera. (Heb. 10:33) Pero, claro ta habla el Biblia que “todo aquellos quien quiere vivi un vida religioso unido con Cristo Jesus, ay sufri gayot maga persecucion.” (2 Tim. 3:12) Poreso, todo kita necesita queda preparao na cosa hay sucede na futuro. Ojala continua kita confia completamente con Jehova y queda convincido que ayuda le kanaton para aguanta na maskin cosa probanza que hay enfrenta kita. Y puede kita asigura que na justo tiempo, hay salva le con el todo de suyu maga fiel siervo.—2 Tes. 1:7, 8.

19. Cosa kita debe hace para queda preparao na grande tribulacion? (Mira tambien con el letrato.)

¹⁹ Asigurao que ya puede gayot ayuda el carta de Pablo con el maga Hebreo Cristiano para queda preparao na tribulacion que hay enfrenta sila. Ya anima si Pablo con el de suyu maga hermano que estudia enbuenamente con el Escritura y pricura entende con ese. Si hace sila se, puede sila identifica con el maga falso enseñanza y desaleja con ese. Ya anima tambien le kanila que hace fuerte con el diila fe para puede dayun sila sigui con el maga direccion de Jesus y de aquellos quien ta guia con el congregacion. Mas pa, ya ayuda le con el maga Cristiano para continua aguanta y mira con el diila maga probanza como un training estaba na diila amable Tata. Ojala aplica tambien kita con este consejo estaba na Biblia. Como resulta, puede kita esta fiel y continua hasta na fin.—Heb. 3:14.