Gendeh kita debe pensa que ciendo nuay el 70 dicipulo cuando ya hace si Jesus con el Cena del Señor, nuay mas sila el favor de Jesus o ya abandona sila con ele. Quierre lang si Jesus man junto con el de suyu maga apostoles na aquel ocasion.

Dicipulo de Jesus el 12 y el 70. Una le ya iscuji con el 12 hombre con quien le ya llama maga apostoles. (Luc. 6:12-16) Talla le na Galilea cuando “ya llama [le] con el Doce maga Apostol” y “ya imvia Le canila para anuncia el Reino de Dios y para cura.” (Luc. 9:1-6) Despues del cuanto tiempo, cuando na Judea le, “ya escuji [si Jesus] con otro setenta . . . y ya imvia canila dos-dos.” (Luc. 9:51; 10:1) Entonces, tiene si Jesus maga dicipulo na diferente lugar quien ta predica acerca con ele.

El maga Judio quien ya queda maga dicipulo de Jesus ta hace siempre con el Pascua que ta celebra sila cada año, posible junto con el diila maga familia. (Ex. 12:6-11, 17-20) Corto tiempo antes de suyu muerte, ya anda si Jesus y de suyu maga apostoles na Jerusalem. Pero nuay le invita con el todo de suyu maga dicipulo estaba na Judea, Galilea y Perea para celebra con el Pascua junto con ele. Claro que quierre si Jesus que man junto con el de suyu maga apostoles na ese ocasion. Ya habla le kanila: “Con ansias gayot yo come este Pascua junto con ustedes antes de que ay sufri yo.”—Luc. 22:15.

Tiene buen razon si porque se ya hace si Jesus. Cerca ya le muri como “el Cordero del Dios que ta quita el pecado del mundo.” (Juan 1:29) Hay sucede se na Jerusalem donde ya dura ya ta ofrece maga sacrificio con Dios. Por causa na sacrificio de Jesus, puede libra con el todo maga gente na pecado y muerte—mas pa se na cosa ya puede hace el carnero que ya come el maga Israelita na noche cuando ya libra kanila na Egipto. (1 Cor. 5:7, 8) Por causa na muerte de Jesus, el dose apostoles hay queda parte del fundacion del Cristiano congregacion. (Ef. 2:20-22) Maka-interes cay el sagrao ciudad, el Jerusalem, tiene “doce piedra” donde escribido “el maga nombre del maga Doce Apostol del Carnero.” (Rev. 21:10-14) Claro se ta dale mira que el maga fiel apostoles tiene importante parte na cumplimiento del proposito del Dios. Poreso, gendeh maka-estraña si porque quierre si Jesus man junto kanila na ultimo Pascua y na Cena del Señor.

El 70 y otro dicipulo gendeh junto con Jesus na aquel cena. Maskin pa ansina, el todo dicipulo quien esta fiel hay beneficia na Cena del Señor. Todo aquellos quien queda maga iscujido Cristiano hay queda parte del reino que ya menciona si Jesus na de suyu maga apostoles aquel noche.—Luc. 22:29, 30.