Report del maga Predicador del Reino

Ya Incuntra Le el Proposito del Vida

YA HABLA si Jesus que conoce le con el de suyu maga carnero. (Juan 10:14) Si el un persona tiene buen corazon y ta ama con el paz y pagka-recto, ese persona hay queda cerca con el maga siguidores de Jesus. Ese individual hay sabe el proposito del vida, igual con el un mujer de Belgium. Este el de suyu istoria:

“Cuando yan tuktuk na diamon casa el maga Testigo de Jehova, bien depress gayot yo y ya pensa que termina ya lang con el de mio vida. Ya gusta yo con el cosa ya habla el maga Testigo acerca na solucion del maga problema na este mundo pero nuay yo gusta el idea que envuelto el Dios aqui. Ya descanza yo anda na iglesia maga ocho año ya el ya pasa cay nuay yo gusta con el hipocresia que ya mira yo alla. Pero na maga Testigo de Jehova, ya sabe yo el verdad y ya realiza que dificil el vida si nuay el Dios.

“Maka-triste, despues del cuanto visitada, nuay mas kame man mirajan pati el maga Testigo de Jehova. Ya sinti yo miserable. Ta puma yo dos caja de cigarillo na un dia y gane ya principia yo man droga. Cay quierre yo comunica con el de mio lolo que ya muri ya, ya queda yo envuelto na espiritismo. Un noche, bien tiene gayot yo miedo cuando solo-solo yo cay ya ataca conmigo el maga demonio! Ya experiencia yo se por cuanto meses. Cada denoche, ta tiene yo miedo si ta pensa pa lang yo que solo yo.

“Un dia cuando ta camina yo, ya pasa yo na un camino que nuay pa gayot yo pasa y ya mira yo un grande building que ta construi. Ya espanta yo cay manada gayot gente alla. Mientras ta queda yo cerca, ya mira yo que maga Testigo de Jehova sila quien ta construi un Kingdom Hall. Ya acorda yo con el maga Testigo quien ya visita na de mio casa y ya pensa si paquemodo de bonito el entero mundo si igual kanila el todo maga gente.

“Quierre gayot yo que visita conmigo otravez el maga Testigo poreso yan cuento yo con el cuanto quien ta trabaja alla. Ya reza yo con Dios y diez dia despues, el hombre quien una ya predica conmigo ya anda na de mio casa. Ya habla le que continua kame man Bible study y ya conforma yo. Despues, ya invita le conmigo dayun que atende na maga miting na Kingdom Hall. Ya acepta yo con ese invitacion. Por primer vez, ya puede yo mira maga gente quien ta ama con uno y otro y alegre. Y ese el ya dura ya yo ta busca!

“Principia na aquel tiempo, ya atende yo con el todo maga miting. Despues del maga tres semana, ya descanza yo puma. Ya buta yo con el de mio maga libro de astrologia y maga placa de musica de maga demonio, y ya sinti yo que hinay-hinay conmigo ta deja el maga demonio. Ya hace yo cambio na de mio vida asegun na maga principio de Jehova na Biblia y despues del tres meses, ya principia yo predica con el buen noticia. Despues del seis meses, ya bautiza yo. Dos dia despues del de mio bautismo, ya principia yo man auxiliary pioneer.

“Ta rindi yo gracias con Jehova na todo buen cosas que ya hace le para conmigo. Ahora, tiene ya proposito el de mio vida. Deverasan gayot que el nombre de Jehova amo un fuerte torre donde ya puede yo incuntra seguridad y proteccion. (Proverbio 18:10) Ya sinti yo igual na salmista quien ya escribi con el Salmo 84:10: ‘El un dia alli na de tuyu patio mas bueno pa na un mil dia na maskin onde lugar! Iscuji yo para na entrada del casa del de mio Dios contra queda na tolda del maga malo.’”

Este sumiso mujer ya tene proposito el vida. Ansina tambien el maskin quien ta busca con Jehova quien tiene buen corazon.