Pregunta del Maga Quien Ta Le

Claro el cosa ta habla na Biblia acerca na propio usada del sangre. Cosa el mirada del maga Testigo de Jehova acerca na curada medical que envuelto el usada del sangre del mismo persona?

El un Cristiano debe hace el de suyu decision acerca con este, gendeh lang base na cosa le quierre o na cosa ta habla el doctor sino na cosa ta habla el Biblia. Un cosa este que entre con ele y con Jehova.

Ya crea kanaton si Jehova y claro le ya manda que gendeh kita debe come sangre. (Genesis 9:3, 4) Ya explica le na Ley que ya dale le para na maga Israelita si cosa debe hace con el sangre cay ta representa este con el vida. Ele ya habla: “El vida del un creatura talli na sangre y iyo mismo ya dale con este na altar para hace ustedes el tapada del de ustedes culpa.” Paquemodo si el un persona ya mata un animal para queda de suyu comida? El Dios ya habla: “Debe le hace derrama el sangre y tapa con este de tierra.” * (Levitico 17:11, 13) Manada beses ya repiti si Jehova con este mandamiento. (Deuteronomio 12:16, 24; 15:23) El Judio Soncino Chumash ya habla: “El sangre gendeh debe recuji sino debe con este hace derrama na tierra para nuay quien puede come con este.” Nuay Israelita el quien debe saca, recuji o usa con el sangre del otro creatura cay el dueño del vida amo el Dios.

Cuando ya muri el Mesias, gendeh mas obligao el maga gente que sigui con el Ley de Moises. Pero, nuay cambia el mirada del Dios na pagka-sagrao del sangre. Por medio na guia del sagrao espiritu del Dios, el maga apostoles ya dale direccion con el maga Cristiano que ‘evita con el sangre.’ Bien serioso cosa este. Este mandamiento igual de importante na mandamiento que evita con el sexual imoralidad o idolatria. (Maga Actividad 15:28, 29, NWT; 21:25) Cuando ya queda comon que dona y abona sangre despues del Guerra Mundial II, sabe el maga Testigo de Jehova que ese practica gendeh uyun na Palabra del Dios. *

Tiene vez, el doctor hay anima con el paciente para hace pondo con el de suyu sangre cuanto semana antes el un operacion (preoperative autologous blood donation o PAD) para puede usa el doctor con este na operacion si necesita. Pero contra ese na cosa ta habla na Levitico y Deuteronomio. Gendeh debe hace pondo con el sangre. Debe con este hace derrama que quierre decir hace con este bira con Dios. Deverasan, gendeh mas kita ahora obligao obedece con el Ley de Moises. Maskin pa ansina, el maga Testigo de Jehova ta respeta con el mirada del Dios na sangre y determinao que ‘evita con el sangre.’ Poreso, gendeh kame ta dona sangre o maskin hace con este pondo para na abonada de sangre que debe era hace derrama. Ese practica contra na ley del Dios.

Tiene cuanto cosas que ta hace el maga doctor na diaton sangre que nuay menciona na Palabra del Dios. Por ejemplo, manada maga Cristiano ta permiti que usa con el diila sangre para man test. Despues usa con ese, ta buta con el sangre. Pero tiene pa otro maga curada que puede kita decidi si acepta ba kita o gendeh.

Por ejemplo, tiene un proceso que ta llama hemodilution. Durante el operacion, el cuanto sangre del paciente ta hace pasa directa na un machine. Despues, ta omenta liquido con el sangre del paciente. Acabar, el sangre que ya hace pasa directa na machine hay bira otravez na paciente. Tiene tambien otro proceso que ta llama cell salvage. Ta saca con el sangre que ya sale durante el operacion, ta limpia o ta hace sala con este y despues, ta pone otravez na paciente. Na diferente proceso, el sangre del paciente ta pone na un machine que tan function dol igual diaton corazon, pulmon o riñon. Despues, el sangre que estaba na machine hay bira otravez na paciente. Na otro proceso, el sangre ta hace pasa na otro machine que ta llama centrifuge, donde ta separta con el sangre na manada parte para quita con el maga parte del sangre que yan damage. O ta separta con este para el cuanto parte del sangre puede pone na otro parte del cuerpo. Posible na cuanto caso, el doctor hay saca un sample del sangre, pone un substance o mezcla medicina con este y debolbe otravez na paciente.

Tiene manada diferente maga curada y el maga doctor pirmi ta hace maga nuevo manera. Gendeh responsibilidad diaton para habla con otro si cosa sila debe hace na cada situacion. Si el un Cristiano necesita curada medical, debe le decidi si cosa clase de curada le hay acepta. Antes el operacion, debe le pregunta con el doctor si cosa hay sucede con el de suyu sangre durante el operacion. Despues, necesita le decidi asegun na cosa ta permiti el de suyu conciencia. (Mira con el cajon.)

El maga Cristiano debe acorda que ya promete sila con Dios que sirvi con ele y ‘ama con ele con todo corazon, con todo alma, con todo fuerza y con todo pensamiento.’ (Lucas 10:27, El Nuevo Testamento na Chavacano) Bien importante para na maga Testigo de Jehova que queda sila obediente con Dios y mentena con el diila amistad con ele. El diaton Creador ta anima kanaton que tene fe na sangre de Jesus. Puede kita le: “Unido con Cristo y por medio del disuyo sangre, kita ya gana el libertad, que amo el perdon del diaton maga pecado.”—Efeso 1:7.

[Maga footnote]

[Cajon/​Maga letrato]

MAGA PREGUNTA QUE PUEDE TU CONSIDERA

Si tiene sangre que hay hace sale na de mio cuerpo y posible descanza unrato el corrida de este, hay permiti ba el de mio conciencia que mira con este como parte siempre del de mio cuerpo que gendeh necesita hace derrama “na tierra”?

Hay man conciencia ba yo si saca conmigo sangre durante el un medical curada, mezcla con este medicina y despues, hace bira na de mio cuerpo?